Ungancedisa Njani Nxa Kube Lomonakalo?

Lezinsuku sesihlala sisizwa ngomonakalo wemvelo endaweni ezitshiyeneyo. Nxa kungaba lomonakalo umsebenzi wokuncedisa abantu abehlelwe ngumonakalo kumele uhlelwe kuhle njalo uqondiswe ngendlela ezakwenza uphumelele. Yikho iQula Elikhokhelayo lihlele ukuthi kube loHlangothi Oluncedisa Abehlelwe Ngumonakalo egatsheni ngalinye.

Nxa kungaba lomonakalo abazalwane abakuhlangothi lolu bahle bathintane labadala abasendaweni elomonakalo ukuze bakwazi ukuthi abamemezeli bangancediswa njani. Nxa umonakalo umkhulu kakhulu njalo ungaphezu kwamandla abamemezeli bakuleyondawo iwofisi yegatsha izakhetha abazalwane abafaneleyo ukuthi bakhokhele emsebenzini wokuncedisa abamemezeli. Abazalwane laba bangathenga izinto ezifunakalayo loba bacele amavolontiya angancedisa kumbe bacele abantu banikele ngezinto ezithile.

Ukwenza izinto ngendlela le kuyanceda kakhulu. Kunceda ukuthi into eyodwa ingacini isenziwa ngabantu abanengi futhi kunceda ukuthi abantu bakwazi okumele bakwenze lokuthi izimali lezinto okunikelwe ngazo kusetshenziswe kuhle. Ngakho kungcono ukulandela inhlelo zenhlanganiso kulokuthi omunye lomunye azenzele okwakhe.

Abazalwane abakhethwe ligatsha bangakhangela ukuthi kufuneka imali enganani lokuthi kufunakala abantu abangaki ukuthi bancedise. Okunye abangakwenza yikukhuluma leziphathamandla zakuleyondawo ezingabancedisa ukuthi bawenze masinyane umsebenzi wabo. Yikho abamemezeli akumelanga baziqoqele izimali kumbe bathumele izinto zokuyancedisa lapho okuyabe kulomonakalo khona njalo akumelanga baye endaweni leyo ngaphandle nxa beceliwe ukuthi benze njalo.

Lanxa kunjalo, siyabathanda abafowethu yikho sifisa ukuncedisa nxa kungaba lomonakalo. (Heb 13:16) Singakwenza njani lokhu? Okuqakatheke kakhulu esingakwenza yikuthandazela labo abehlelwe ngumonakalo kanye lalabo ababancedisayo. Singanikela lasemsebenzini womhlaba wonke. Amagatsha yiwo angabona ukuthi izimali lezo zingasetshenziswa ngaphi elandela okutshiwo liQula Elikhokhelayo. Kanti njalo nxa sifisa ukuncedisa lapho okube lomonakalo khona singagcwalisa ifomu okuthiwa yi-Local Design/Construction Volunteer Application (i-DC-50).

BUKELANI IVIDIYO ETHI IZIKHUKHULA EBRAZIL, BESELIPHENDULA UMBUZO OLANDELAYO:

Kuyini okuthandileyo ngendlela oFakazi bakaJehova abancedisa ngayo sekube lezikhukhula eBrazil ngo-2020?