Sebenzisa Ikhasi Lokuqala Le-JW.ORG Enkonzweni Yakho

Ikhasi lokuqala lewebhusayithi yethu lilezihloko lamavidiyo enzelwe ukukhanga abantu bonke nje abafuna ukufunda iBhayibhili. (Imis 13:48) Liba lezinto eziyabe zisezindabeni loba ezisematheni kumbe ezicatshangwa ngabantu.

Ikhasi lokuqala le-jw.org ungalisebenzisa njani enkonzweni yakho?

• Hlala ukhangela ukuthi kulani kuwebhusayithi. Nanzelela izinto eziyabe zisanda kufakwa ubusucabanga ngokuthi ungazisebenzisa njani ukuze uncede umuntu ofisa ukufunda iBhayibhili. Ukuhlala usazi izinto eziyabe ziphume kuwebhusayithi kuzakunceda ukuthi uthole indlela ezitshiyeneyo zokutshumayela.

• Qalisa ingxoxo usebenzisa izihloko lamavidiyo okusekhasini lokuqala lewebhusayithi. Izinto lezi ziyasinceda sikwazi lokho okungabe kucatshangwa ngabantu esibatshumayezayo ensimini yethu.

• Tshengisa abantu ikhasi lokuqala lewebhusayithi. Tshengisa umuntu izihloko ezitshiyeneyo, umtshengise lokuthi angayisebenzisa njani iwebhusayithi yethu.

• Thumeza i-link. Lanxa abanye abantu bengabe bengafuni ukukhuluma lathi, bangakuthanda ukungena kuwebhusayithi yethu. Ungathikazi ukuthumela abantu abalesifiso sokufunda okunengi i-link yekhasi lokuqala kumbe isihloko loba ividiyo okuyabe kulapho.