Ukulingisela Izibonelo Ezinhle Kwangenza Ngabusiswa Kakhulu

Ngazalelwa eQuebec City, idolobho elisesabelweni seQuebec eCanada. Endaweni le kukhulunywa kakhulu isiFrench. Abazali bami uLouis loZélia babelomusa futhi bengithanda. Ubaba wayethule njalo ethanda ukubala. Mina ngangithanda ukubhala futhi ngifisa ukuba yintathelizindaba.

Ngathi sengileminyaka engaba ngu-12, savakatshelwa nguRodolphe Soucy owayesebenza lobaba. Wabuya lomngane wakhe futhi bobabili babengoFakazi bakaJehova. Ngangingakwazi okunengi ngaboFakazi njalo ngingelandaba kangako lalokho abakukholwayo. Kodwa ngamangaliswa yikuthi babelomusa futhi bephendula imibuzo yethu ngendlela ezwisisekayo besebenzisa iBhayibhili. Abazali bami labo bamangala, yikho sonke savuma ukufunda iBhayibhili.

Ngalesosikhathi ngangifunda esikolo samaRoma. Ngezinye izikhathi ngangixoxela abanye ekilasini lokho engangikufunda eBhayibhilini. Kodwa ababalisi ababengabaphristi bezwa ngezingxoxo lezo. Kulokuthi basebenzise iBhayibhili ukuze baveze ukuthi lokho engangikutsho kungamanga, omunye wabo wangisola phambi kwekilasi yonke esithi ngingumhlamuki. Lanxa lokho kwakubuhlungu, kwaba yisibusiso ngoba kwanginceda ngabona ukuthi izimfundiso zenkolo esasizifunda esikolo zazingavumelani lalokho okutshiwo liBhayibhili. Ngananzelela ukuthi kwasekumele ngisuke esikolo leso. Ngakhuluma labazali bami futhi bavuma ukuthi ngintshintshe isikolo.

OKWANGENZA NGATHANDA UKUTSHUMAYELA

Ngaqhubeka ngifunda iBhayibhili kodwa ngangingathuthuki kangako ngoba ngisesaba ukutshumayela endlini ngendlu. Inkolo yamaKatolika yayizibambile endaweni le futhi yayiphikisa kakhulu umsebenzi wethu wokutshumayela. UMaurice Duplessis owayengumkhokheli wezombusazwe eQuebec wayezwanana kakhulu labantu besonto le. Wayevumela abantu abanengi ukuthi bahlasele oFakazi njalo babahlukuluze. Ngalesosikhathi kwakudinga ukuthi umuntu abe lesibindi ukuze atshumayele.

Umfowethu owanginceda ukuthi ngilwisane lokwesaba nguJohn Rae owayengene ikilasi yesitshiyagalolunye yeSikolo SeGiliyadi. Wayelolwazi olunengi, elesineke, ethobekile njalo kulula ukumjayela. Kwakukalutshwana ukuthi anginike iseluleko kodwa ngafunda okunengi esibonelweni sakhe esihle. UJohn wayengasazi kangako isiFrench yikho ngangijayele ukuhamba laye ekutshumayeleni ukuze ngimncedise. Ukutshona loJohn kwanginceda ukuthi ngikhethe ukuba nguFakazi kaJehova. Ngabhabhathizwa mhlaka 26 May 1951 sekudlule iminyaka elitshumi ngiqalise ukubonana laboFakazi.

Ibandla lethu eQuebec City lalilincane kodwa lilamaphayona amanengi. Isibonelo sabo esihle sangenza ngaqalisa ukuphayona. Ngalezonsuku sasitshumayela endlini ngendlu sisebenzisa iBhayibhili kuphela. Kwakumele sifunde ukulisebenzisa kuhle njengoba sasingasebenzisi amabhuku. Yikho ngazama ukwazi amavesi eBhayibhili ayezanginceda ukuthi ngilwele iqiniso. Kodwa abanengi babesala ukubala loba yiliphi iBhayibhili elalingavunyelwa yisonto yamaKatolika.

Ngo-1952 ngatshada loSimone Patry udade othembekileyo owayesebandleni engangikulo. Sathuthela eMontreal futhi kungakapheli umnyaka saba lomntwana oyinkazana okuthiwa nguLise. Lanxa ngama ukuphayona sesizatshada, mina loSimone sazama ukuphila impilo engelazinto ezinengi ukuze senze okunengi ebandleni siyimuli.

Kwadlula iminyaka elitshumi ngingakacabangi ngokuthi ngiphinde ngiphayone. Ngo-1962 ngiseSikolo Senkonzo SoMbuso sabadala esenzelwa eBhetheli yeCanada futhi esathatha inyanga, ngacelwa ukuthi ngihlale lomfowethu okuthiwa nguCamille Ouellette. Indlela uCamille ayekutshisekela ngayo ukutshumayela yangimangalisa kakhulu ngoba laye wayelemuli. Ngalezonsuku kwakungajayelekanga eQuebec ukuthi umuntu aphayone yena elemuli, kodwa lokho yikho kanye uCamille ayefuna ukukwenza. Ngesikhathi sisonke wangikhuthaza ukuthi ngicabangisise ngesimo sami. Ngemva kwezinyanga ezilutshwana ngananzelela ukuthi ngingenelisa ukuphinda ngiphayone. Abanye bacabanga ukuthi ngangingenzanga isinqumo esihle kodwa ngaqhubekela phambili ngalokho engasengikukhethile ngoba ngangileqiniso lokuthi uJehova uzangincedisa ngenze okunengi ekutshumayeleni.

UKUBUYELA EQUEBEC CITY SESINGAMAPHAYONA AQAKATHEKILEYO

Ngo-1964 mina loSimone saba ngamaphayona aqakathekileyo eQuebec City idolobho esakhulela kulo futhi sahlala lapho okweminyaka eminengi eyalandelayo. Ngalesosikhathi sasingasaphikiswa njengakuqala kodwa kwakulokhu kulabanye ababesiphikisa.

Ngelinye ilanga kungoMgqibelo emini ngabotshwa eSainte-Marie, idolobho elincane eliseduze leQuebec City. Ipholisa lahamba lami enkambeni lafika langivalela ngenxa yokuthi ngangitshumayela endlini ngendlu ngingelaphemithi (permit). Ngemva kwalokho ngamiswa phambi kukamahluleli okuthiwa nguBaillargeon indoda eyayisesabisa. Wangibuza ukuthi ngubani ozakuba ligqwetha lami. Ngathi ngisithi nguGlen How,a uFakazi owaziwayo owayeligqwetha, umahluleli wethuka wathi: “O bantu! Lowana!” Ngalezonsuku uGlen How wayeligqwetha elalisaziwa kakhulu elalilwela oFakazi bakaJehova. Kungakayi ngaphi umthethwandaba wangitshela ukuthi icala lami selesuliwe.

Ukuphikiswa komsebenzi wethu eQuebec kwenza kwaba nzima ukuthi sithole izindawo ezifaneleyo zokungenela imihlangano yebandla. Ibandla lethu elincane lalingenela egarajini elidala elaliqanda kakhulu ngesikhathi somqando. Abazalwane babesebenzisa umtshina owawusenza kukhudumale. Sasijayele ukubuthana kuwo singakaqalisi imihlangano sixoxe indaba ezikhuthazayo.

Kuyasithokozisa ukubona ukuthi umsebenzi wokutshumayela uphumelele kakhulu. Kudala ngabo-1960 kwakulamabandla amancane ayelabamemezeli abalutshwana eQuebec City, eCôte-Nord laseGaspé Peninsula. Lamuhla endaweni lezo kulabafowethu labodadewethu abanengi futhi bahlangana emaWolu oMbuso amahle.

UMSEBENZI WOKUHAMBELA

Ngo-1970 mina loSimone sacelwa ukuthi senze umsebenzi wokuhambela. Kwathi ngo-1973 ngaba ngumbonisi wesigodi. Ngaleyominyaka, ngafunda izinto ezinengi kubafowethu ababesenza kuhle abagoqela uLaurier Saumurb loDavid Splanec ababengabahambeli. Sonke isikhathi kwakusithi nxa umhlangano wesiqinti ungaphela mina loDavid sinikane amacebo okuthuthukisa indlela esifundisa ngayo. Ngikhumbula ngelinye ilanga uDavid esithi kimi: “Léonce, ngiyikholisile inkulumo yakho yokucina. Ibimnandi, kodwa bengingenza inkulumo ezintathu ngezinto ozikhulumileyo.” Ngangijayele ukufaka izinto ezinengi enkulumeni zami yikho kwakumele ngifunde ukungalandisi kakhulu.

Ababonisi besigodi babelomsebenzi wokukhuthaza ababonisi beziqinti. Manje abamemezeli abanengi eQuebec babengijayele, yikho babehlala befuna ukuhamba lami ekutshumayeleni nxa ngihambela iziqinti. Lanxa ngangikukholisa sibili ukutshumayela labo, ngangingabi lesikhathi eseneleyo lombonisi wesiqinti. Ngesinye isikhathi omunye umbonisi wesiqinti owayelothando wathi kimi: “Kuhle sibili ukuthi uzinika isikhathi sokuba labazalwane, kodwa ungakhohlwa ukuthi leli liviki lami. Lami ngiyakudinga ukukhuthazwa.” Ngafunda okunengi eselulekweni leso esilothando.

Ngo-1976 kwenzakala into eyangizwisa ubuhlungu kakhulu njalo engangingayilindelanga. Umkami engangimthanda uSimone wagula kakhulu wacina esifa. Wayeyinkosikazi enhle ngoba wayeqakathekisa okufunwa ngabanye futhi emthanda kakhulu uJehova. Ukukhuthala ekutshumayeleni kwangiduduza ngesikhathi leso esasinzima njalo ngiyambonga uJehova ngokungisekela. Ngokuhamba kwesikhathi ngatshada loCarolyn Elliott udade oliphayona elikhutheleyo okhuluma isiNgisi owayebuye eQuebec ezoncedisa lapho okwakulabamemezeli abalutshwana khona. UCarolyn ngumuntu okulula ukuxoxa laye futhi olendaba labantu, ikakhulu abalenhloni kumbe abalesizungu. Kwaba yisibusiso ukuba laye emsebenzini wokuhambela.

UMNYAKA OQAKATHEKE KAKHULU

NgoJanuary 1978 ngacelwa ukuthi ngifundise ikilasi yokuqala yeSikolo Senkonzo Samaphayona eQuebec. Ngangisesaba ngoba ngangingakaze ngisingene isikolo leso kumbe ngibone ibhuku elalisetshenziswa kuso yikho konke kwakukutsha kimi lakubafundi. Kodwa okuhle yikuthi ikilasi le yangenwa ngabanengi abasebelesikhathi eside bengamaphayona. Ngafunda okunengi kubafundi lanxa kuyimi engangifundisa.

Ngomnyaka ofananayo kwaba lomhlangano wezizwe owawulesihloko esithi “Victorious Faith” owenzelwa e-Olympic Stadium eMontreal. Kwakulabantu abedlula 80 000 futhi kwakungakaze kube lomhlangano omkhulu kangako eQuebec. Ngangisebenza kuHlangothi Lwezindaba emhlanganweni lo. Ngakhuluma lentatheli ezinengi njalo ngathokoza kakhulu ngoba zabhala izinto ezinhle ngathi. Intatheli zaqeda amahola adlula 20 esehlanganiswe wonke, zixoxa lathi ku-TV lakurediyo futhi zabhala izihloko ezinengi. Lokhu kwenza abantu bakwazi okunengi ngoJehova labantu bakhe.

UKUTHUTHELA ENDAWENI ENTSHA

Ngo-1996 kwaba lontshintsho olukhulu empilweni yami. Kusukela ngibhabhathizwa ngangisendaweni okwakukhulunywa khona isiFrench eQuebec, kodwa ngomnyaka lo ngantshintshwa ngayahambela isigodi sesiNgisi eToronto. Ngangizibona ngingafanelanga futhi ngisesaba ukwenza izinkulumo ngoba ngangikiliza isiNgisi. Kwakumele ngikhuleke kakhulu kuJehova njalo ngimthembe kakhulu.

Lanxa ekuqaliseni ngangisesaba ukuya eToronto, khathesi ngingathi ngayikholisa kakhulu iminyaka emibili ngikhonale. UCarolyn wayengincedisa ngesineke ukuthi ngibe lesibindi sokukhuluma isiNgisi, labazalwane bangisekela njalo bangikhuthaza kakhulu. Masinyane nje sasesilabangane abanengi.

Kwakumele ngenze izinto ezinengi ukuze ngilungiselele imihlangano yesiqinti eyayisiba khona ngempelaviki. Lanxa kunjalo ngangijayele ukutshumayela endlini ngendlu phose okwehola ngaboLwesihlanu ntambama. Abanye babengazibuza ukuthi yindaba ngisiya ekutshumayeleni mina ngizakuba semhlanganweni ngempelaviki. Kodwa ukuba lengxoxo ezimnandi ekutshumayeleni kwakungikhuthaza. Lakhathesi ukutshumayela kungenza ngihlale ngithokoza kakhulu.

Ngo-1998 mina loCarolyn sabuyela eMontreal sesingamaphayona aqakathekileyo. Okweminyaka eminengi okunye engangikwenza yikuhlela ukutshumayela obala kanye lokukhuluma labezindaba ukuze silungisise imibono engaqondanga abantu ababelayo ngaboFakazi. Khathesi mina loCarolyn siyakukholisa ukutshumayeza abantu abathuthele eCanada abalesifiso sokufunda okunengi ngeBhayibhili.

Ngiyabona ukuthi uJehova ungibusisile sibili nxa ngicabanga ngeminyaka engu-68 engiyiqede ngiyinceku yakhe ebhabhathiziweyo. Ngiyathokoza ngoba ngacina sengikukholisa ukutshumayela futhi senganceda abantu abanengi ukuthi bafunde iqiniso. Indodakazi yami uLise lomkayo baba ngamaphayona esikhathi sonke ngemva kokukhulisa abantwababo. Kuyangithokozisa kakhulu ukubona ukuthi ulokhu etshiseka enkonzweni. Ngiyawabonga kakhulu amaKhristu aba yizibonelo ezinhle kimi futhi anginika izeluleko ezangincedayo. Lokhu kwanginceda ukuthi ngithuthuke ekukhonzeni njalo ngenelise ukwenza imisebenzi yenkonzo etshiyeneyo. Sengafunda ukuthi singenelisa ukuqhubeka sisenza lokho inhlanganiso esicela ukuthi sikwenze kuphela nxa sincediswa ngumoya ongcwele kaJehova. (Hubo. 51:11) Ngihlala ngimbonga kakhulu uJehova ngokunginika isibusiso sokudumisa ibizo lakhe.​—Hubo. 54:6.