ISIFUNDO 38
Sisebenzise Kuhle Isikhathi Sokuthula
“Kwakulokuthula elizweni. Kakho owalwa impi laye ngaleyominyaka, ngoba uNkulunkulu wamnika ukuphumula.”—2 IMILAN. 14:6.
INGOMA 60 Bazathola Ukuphila Nxa Belalela
ESIZAKUFUNDAa
1. Kunini lapho okungaba nzima khona ukukhonza uJehova?
UCABANGA ukuthi kunini lapho okunzima khona ukukhonza uJehova, nxa ulenhlupho kumbe nxa izinto zitshelela empilweni yakho? Kulula ukuthi sithembe uJehova nxa silenhlupho. Kodwa senzani nxa izinto zonke zihamba kuhle? Singaphambaniseka yini ekukhonzeni uNkulunkulu? UJehova waxwayisa ama-Israyeli ukuthi lokhu kungenzakala.—Dute. 6:10-12.
INkosi u-Asa yalwisa ngamandla ukuthi iqede ukukhonza kwamanga (Khangela indima 2)d
2. Kuyini okwenziwa yiNkosi u-Asa?
2 INkosi u-Asa yenza kuhle ngoba yathembela kuJehova ngenhliziyo yayo yonke. Yakhonza uJehova ngezikhathi kulobunzima langezikhathi kulokuthula. Kusukela u-Asa esesemncane ‘inhliziyo yakhe yayinamathele kuJehova.’ (1 AmaKho. 15:14) Enye indlela u-Asa atshengisa ngayo ukuthi uzinikele kuJehova ngenhliziyo yonke yikuqeda ukukhonza kwamanga koJuda. IBhayibhili lithi: “Wasusa wonke ama-alithare ezizweni lezindawo zokukhonzela, wadiliza izinsika zakhona lezithombe zikankulunkulukazi u-Ashera.” (2 ImiLan. 14:3, 5) Waze wasusa logogo wakhe uMahakha esikhundleni sakhe embusweni ngoba wayekhuthaza abantu ukuthi bakhonze isithombe.—1 AmaKho. 15:11-13.
3. Sizaxoxa ngani esihlokweni lesi?
3 U-Asa kazange adilize izithombe kuphela kodwa wancedisa abantu bakoJuda ukuthi baphinde babuyele kuJehova. UJehova wabusisa u-Asa labantu bakoJuda ngokubanika isikhathi sokuthula.b Okweminyaka elitshumi yokubusa kuka-Asa “kwakulokuthula elizweni.” (2 ImiLan. 14:1, 4, 6) Esihlokweni lesi sizaxoxa ngokuthi u-Asa wasisebenzisa njani lesosikhathi sokuthula. Sizaphinda sixoxe ngamaKhristu aphila ngesikhathi sabaphostoli alingisela u-Asa ngokusebenzisa kuhle isikhathi sokuthula ayelaso. Sizaphetha ngokuphendula umbuzo lo othi: Nxa uhlala elizweni lapho uhulumende avumela khona oFakazi bakaJehova ukuthi bakhonze bekhululekile ungasisebenzisa njani lesosikhathi sokuthula?
U-ASA WASISEBENZISA NJANI ISIKHATHI SOKUTHULA?
4. Ngokwalokho okutshiwo ku-2 imiLando 14:2, 6, 7, u-Asa wasisebenzisa njani isikhathi sokuthula?
4 Bala u-2 imiLando 14:2, 6, 7. U-Asa watshela abantu ukuthi uJehova nguye ‘owayebanike ukuthula nxazonke.’ Kazange acabange ukuthi isikhathi leso sokuthula sasingesokuziphumulela nje. Kodwa wasisebenzisa ukwakha amadolobho, imiduli lemithangala kanye lamasango. Watshela abantu bakoJuda wathi: “Ilizwe lilokhu lingelethu.” Wayesitshoni? Wayesitsho ukuthi abantu babekhululekile ukubhoda elizweni uNkulunkulu ayebanike lona futhi bakhe kungelazitha ezibaphikisayo. Wabakhuthaza ukuthi basisebenzise kuhle lesosikhathi sokuthula.
5. Kungani u-Asa waqinisa ibutho lakhe?
5 U-Asa waphinda wasebenzisa isikhathi leso sokuthula ukuthi aqinise ibutho lakhe. (2 ImiLan. 14:8) Kodwa lokhu akutsho ukuthi wayengamthembi uJehova. Wayekwazi ukuthi kwakungumsebenzi wakhe njengenkosi ukuthi ancedise abantu balungele ubunzima obabungabehlela esikhathini esizayo. U-Asa wayekwazi ukuthi isikhathi sokuthula sasingaphela futhi yikho kanye okwenzakalayo.
AMAKHRISTU AKUQALA ASISEBENZISA NJANI ISIKHATHI SOKUTHULA?
6. AmaKhristu aphila ngesikhathi sabaphostoli asisebenzisa njani isikhathi sokuthula?
6 Lanxa izikhathi ezinengi amaKhristu aphila ngesikhathi sabaphostoli ayehlukuluzwa, ayeke abe lezikhathi zokuthula. Ayezisebenzisa njani izikhathi lezo? Amadoda labesifazana laba abathembekileyo baqhubeka betshumayela izindaba ezinhle. Ibhuku lemiSebenzi lithi ‘babephila impilo yokumesaba uJehova.’ Abazange bayekele ukutshumayela izindaba ezinhle futhi lokhu kwenza ukuthi ‘baqhubeke besanda.’ Akuthandabuzwa ukuthi uJehova wakubusisa ukutshumayela kwabo ngentshiseko ngezikhathi zokuthula.—ImiSeb. 9:26-31.
7-8. UPhawuli labanye balisebenzisa njani ithuba ababelalo? Chasisa.
7 AmaKhristu akuqala ayetshumayela izindaba ezinhle loba nini lapho ayethola khona ithuba. Ngokwesibonelo, ngesikhathi umphostoli uPhawuli ese-Efesu, wananzelela ukuthi wayevulelwe umnyango omkhulu yikho wahlala edolobheni lelo ukuze atshumayele njalo enze abafundi.—1 Khor. 16:8, 9.
8 UPhawuli lamanye amaKhristu baphinda bathola elinye ithuba lokutshumayeza abantu abanengi ngo-49 C.E.,c ngesikhathi sokulungiswe indaba yokusoka. (ImiSeb. 15:23-29) Amabandla athi esetsheliwe ngesinqumo esasenziwe endabeni le, abafundi basebenza nzima betshumayela “izindaba ezinhle zelizwi likaJehova.” (ImiSeb. 15:30-35) Kwaba layiphi impumela? IBhayibhili lithi “amabandla aqhubeka eqiniswa ekukholweni futhi abazalwane besanda usuku ngosuku.”—ImiSeb. 16:4, 5.
SINGASISEBENZISA NJANI ISIKHATHI SOKUTHULA?
9. Yisiphi isimo esikhona emazweni amanengi futhi yiwuphi umbuzo esingazibuza wona?
9 Emazweni amanengi oFakazi bakaJehova bakhululekile ukutshumayela. Wena uhlala elizweni elinjalo yini? Nxa kunjalo zibuze, ‘Ngisisebenzisa njani isikhathi leso sokuthula?’ Izinsuku lezi zokucina ziyabathokozisa abantu bakaJehova ngoba bakhuthele okuzwayo emsebenzini omkhulu wokutshumayela lokufundisa futhi bawenza ngendlela ongakaze wenziwe ngawo. Kunengi esingakwenza emsebenzini lo.
Abanengi bayathokoza kakhulu ngokuthi bathuthele kwamanye amazwe ukuze bayetshumayela kumbe ngokuthi batshumayeza abantu abakhuluma olunye ulimi (Khangela indima 10-12)e
10. U-2 Thimothi 4:2 usikhuthaza ukuthi senzeni?
10 Ungasisebenzisa njani isikhathi sokuthula? (Bala u-2 Thimothi 4:2.) Hlola izimo zakho ubone langabe ungenelisa yini ukungezelela inkonzo yakho mhlawumbe ngokuba liphayona. Kumbe lingaxoxa liyimuli libone ukuthi ukhona yini ongenelisa ukwenza okunengi enkonzweni mhlawumbe ngokuba liphayona. Lesi ayisisosikhathi sokubuthelela inotho kumbe ukuzifunela izinto ezinengi ngoba izinto lezi zizadlula lomhlaba lo.—Zaga. 11:4; Mat. 6:31-33; 1 Joh. 2:15-17.
11. Kuyini okwenziwe ngabanye abamemezeli ukuze batshumayeze abantu abanengi?
11 Abamemezeli abanengi bafunde olunye ulimi ukuze batshumayele njalo bafundise ngolimi lolo. Inhlanganiso kaNkulunkulu iyabasekela ngokuhumutsha amabhuku asekelwe eBhayibhilini ngezindimi ezinengi. Ngokwesibonelo, ngo-2010 amabhuku ethu ayetholakala ngezindimi ezingaba ngu-500. Kodwa lamuhla asetholakala ngezindimi ezedlula 1 000.
12. Kuyabanceda yini abanye ukuzwa izindaba ezinhle ngolimi lwabo? Nika isibonelo.
12 Abantu bezwa njani nxa befunda ngoJehova ngolimi lwabo? Cabanga ngalokho okwenzakala komunye udade owangena umhlangano wesabelo eMelika. Umhlangano lo wenziwa ngesiKinyarwanda ulimi olukhulunywa kakhulu eRwanda, eCongo (Kinshasa) lase-Uganda. Umhlangano usuphelile udade lo okhuluma isiKinyarwanda wathi: “Ngiyaqala ngqa ukuzwisisa umhlangano wonke selokhe ngathuthela eMelika eminyakeni engu-17 eyadlulayo.” Kuyacaca ukuthi udade lo kwamthinta inhliziyo ukungena umhlangano ngolimi lwakhe. Nxa izimo zakho zikuvumela ungenelisa yini ukufunda olunye ulimi ukuze uncede abanye abasensimini yenu? Lokhu kunganceda sibili ngoba bangabe bekhona abanye ensimini yebandla lakho abakhuluma olunye ulimi. Uzathokoza kakhulu nxa ungasebenza nzima.
13. Abafowethu labodadewethu beRussia basisebenzisa njani isikhathi sokuthula?
13 Kwamanye amazwe abafowethu labodadewethu abenelisi ukutshumayela bekhululekile ngenxa yokuthi uhulumende uvimbele umsebenzi wethu wokutshumayela. Ake sixoxe ngabafowethu labodadewethu abaseRussia. Bahlukuluzwa okweminyaka eminengi kodwa ngoMarch 1991 uhulumende wabavumela ukuthi bakhonze bekhululekile. Ngalesosikhathi kwakulabamemezeli abangaba ngu-16 000. Ngemva kweminyaka engu-20 inani lelo laselisedlula 160 000. Kusegcekeni ukuthi abafowethu labodadewethu basisebenzisa kuhle isikhathi ababelaso sokutshumayela bekhululekile. Kodwa isikhathi leso saphela. Lanxa izinto sezatshintsha elizweni lelo abafowethu labodadewethu balokhu betshiseka ekukhonzeni uJehova. Baqhubeka besenza konke okusemandleni abo ukuthi bamkhonze.
ISIKHATHI SOKUTHULA SIZAPHELA
INkosi u-Asa yathi isikhuleke ngenhliziyo yonke, uJehova wancedisa uJuda ukuthi anqobe ibutho elikhulu (Khangela indima 14 lo-15)
14-15. UJehova watshengisa njani ukuthi ulamandla amakhulu ngesikhathi encedisa u-Asa?
14 Isikhathi sokuthula esasikhona ngensuku zika-Asa sacina siphelile. Kwatheleka ibutho elikhulu futhi elalilamandla elalilamasotsha edlula 1 miliyoni livela eTopiya. Umlawuli webutho lelo uZera wayezitshela ukuthi uzalinqoba ibutho lakoJuda kodwa u-Asa wathembela kuJehova. Wakhuleka wathi: “Sisize, O Jehova Nkulunkulu wethu, ngoba thina sithembele kuwe, ngebizo lakho siphumile ukuba silwe lalelibutho lempi elikhulu kangaka.”—2 ImiLan. 14:11.
15 Ibutho laseTopiya laliphosa liliphinde kabili ibutho lika-Asa, kodwa u-Asa wayekwazi ukuthi uJehova ulamandla amakhulu futhi uzabancedisa abantu bakhe. Lakanye uJehova wabancedisa abantu bakhe, ibutho laseTopiya lanqotshwa.—2 ImiLan. 14:8-13.
16. Sikwazi njani ukuthi isikhathi sokuthula sizaphela?
16 Kasikwazi ukuthi kuyini okuzakwehlela ngamunye wethu esikhathini esizayo, kodwa esikwaziyo yikuthi isikhathi sokuthula abantu bakaNkulunkulu abangabe belaso sizaphela. Khumbula ukuthi uJesu wathi ezinsukwini zokucina abafundi bakhe ‘bazazondwa yizizwe zonke.’ (Mat. 24:9) Umphostoli uPhawuli laye wathi “bonke abazimisele ukuphila bezinikele kuNkulunkulu futhi bemanyene loKhristu uJesu labo bazahlukuluzwa.” (2 Tim. 3:12) USathane ‘uthukuthele kakhulu’ futhi siyabe siziqila nxa sizitshela ukuthi singayibalekela intukuthelo yakhe.—Isam. 12:12.
17. Yiziphi izinto ezinganyikinya ukholo lwethu?
17 Esikhathini esizayo sonke sizahlangana lobunzima obuzanyikinya ukholo lwethu. Sekuseduze ukuthi kube “lokuhlupheka okukhulu okungakaze kube khona kusukela ekuqaleni komhlaba kuze kube khathesi.” (Mat. 24:21) Ngalesosikhathi abangakithi bangasihlamukela futhi umsebenzi wethu ungavinjelwa. (Mat. 10:35, 36) Ngamunye wethu uzalingisela u-Asa yini athembele kuJehova ukuthi uzamncedisa futhi amvikele?
18. Ngokwalokho okutshiwo kuHebheru 10:38, 39, kuyini okuzasinceda sikulungele ukuphela kwesikhathi sokuthula?
18 UJehova ubesincedisa ukuthi siqinise ukholo lwethu. Usebenzisa ‘inceku ethembekileyo lehlakaniphileyo’ ukuthi ‘isinike ukudla ngesikhathi esifaneleyo’ okuzasinceda ukuthi sihlale siqinile ekukhonzeni. (Mat. 24:45) Kodwa ngamunye wethu kumele asebenze nzima ukuze abe lokholo oluqinileyo kuJehova.—Bala uHebheru 10:38, 39.
19-20. Ngokwalokho okutshiwo ku-1 imiLando 28:9, yiphi imibuzo okumele sizibuze yona njalo kungani kumele sizibuze?
19 Kumele ‘sidinge’ uJehova njengeNkosi u-Asa. (2 ImiLan. 14:4, TBS; 2 ImiLan. 15:1, 2) Siqalisa ukumdinga ngokuba mazi langokubhabhathizwa. Nxa sesibhabhathiziwe kumele siqhubeke sisenza konke okusemandleni ethu ukuthi simthande kakhulu. Yikho singazibuza: ‘Ngiyayingena yini sonke isikhathi imihlangano yebandla?’ Emihlanganweni le sithola amandla okuqhubeka sikhonza uJehova futhi sikhuthazwa ngabafowethu labodadewethu. (Mat. 11:28) Nanku umbuzo ongazibuza wona, ‘Ngilibala nsuku zonke yini iBhayibhili?’ Nxa ulemuli, liba lokukhonza kwemuli maviki wonke yini? Nxa ungelayo, ulaso yini isikhathi sokutaditsha uwedwa? Wenza konke okusemandleni akho yini ukuthi utshumayele njalo ufundise abanye?
20 Kungani kumele sizibuze imibuzo le? IBhayibhili lisitshela ukuthi uJehova uhlola imicabango lezinhliziyo zethu yikho lathi kumele senze okufananayo. (Bala u-1 imiLando 28:9.) Nxa singabona ukuthi kumele sitshintshe esifuna ukukwenza lesikucabangayo kufanele sicele uJehova asincedise. Lesi yisikhathi sokuthi silungele izinto ezizakwenzakala esikhathini esizayo. Ungavumeli lutho lukuphambanise ekusebenziseni kuhle isikhathi sokuthula.
INGOMA 62 Ingoma Entsha
a Uhlala elizweni lapho okhululeke khona ukukhonza uJehova yini? Nxa kunjalo, usisebenzisa njani isikhathi leso sokuthula? Esihlokweni lesi sizaxoxa ngokuthi ungamlingisela njani u-Asa inkosi yakoJuda kanye lamaKhristu aphila ngesikhathi sabaphostoli. Basisebenzisa kuhle isikhathi sokuthula ababelaso.
b INGCAZELO YAMABALA: Ibala lesiHebheru elithi “ukuthula” alitsho ukungabi lempi kuphela. Liphinda litsho ukuba lempilakahle, ukuvikeleka lenhlalakahle.
c U-C.E., umela ukuthi “Common Era,” okutsho isikhathi uJesu esebuyile emhlabeni.
d OKUSEMFANEKISWENI: INkosi u-Asa yakhipha ugogo wayo esikhundleni ngoba wayekhuthaza abantu ukuthi bakhonze isithombe. Labo ababeqotho ku-Asa bemsekela bamlandela futhi badiliza izithombe.
e OKUSEMFANEKISWENI: Umfowethu lomkakhe abakhutheleyo enkonzweni baphila bengelazinto ezinengi ukuze bayencedisa lapho okulabamemezeli abalutshwana khona.