Singabancedisa Njani Esifunda Labo IBhayibhili Ukuthi Bathuthuke Baze Babhabhathizwe?—Ingxenye 1

1. U-2 Khorinte 3:1-3 usinceda njani sibone ukuthi ukufundisa umuntu aze abhabhathizwe kuyisibusiso? (Khangela umfanekiso ongaphandle.)

AKUTHANDABUZWA ukuthi uyathokoza nxa umuntu osensimini yebandla lenu ebhabhathizwa. (Mat. 28:19) Khona nxa kunguwe omfundisileyo uyathokoza kakhulu. (1 Thes. 2:19, 20) Abafundi abasanda kubhabhathizwa ‘bazincwadi zokuncoma’ ibandla lonke hatshi labo abafunde labo kuphela.—Bala u-2 Khorinte 3:1-3.

2. (a) Yiwuphi umbuzo esizaxoxa ngawo njalo kungani? (b) Kuyini isifundo seBhayibhili? (Khangela amabala angaphansi.)

² Kuyathokozisa ukuthi eminyakeni emine edlulileyo bekubikwa izifundo zeBhayibhilib ezingaba ngu-10 000 000 inyanga ngayinye emhlabeni wonke. Kanti njalo eminyakeni leyo abantu abangaba ngu-280 000 bebebhabhathizwa umnyaka ngamunye besiba ngoFakazi bakaJehova labafundi abatsha bakaJesu Khristu. Singawancedisa njani amamiliyoni abantu afunda iBhayibhili ukuthi lawo abhabhathizwe? Kumele senze konke okusemandleni ethu ukuthi siwancedise athuthuke aze abhabhathizwe ngoba uJehova ulokhu enika abantu ithuba lokuthi babe ngoFakazi bakhe. Phela isikhathi sesidliwe ngumangoye!—1 Khor. 7:29a; 1 Phet. 4:7.

3. Sizaxoxa ngani esihlokweni lesi?

³ IQula Elibusayo liyananzelela ukuthi kuqakathekile ukuthi senze abafundi khathesi, yikho labuza amawofisi amagatsha ukuthi kungenziwani ukuze kuncediswe abantu abanengi abafunda iBhayibhili ukuthi bathuthuke baze babhabhathizwe. Esihlokweni lesi lakwesilandelayo sizabona ukuthi sifundani kubafowethu labodadewethu asebelesikhathi eside bengamaphayona, bengabanali futhi bengababonisi beziqinti.c (Zaga. 11:14; 15:22) Bachasisa ukuthi kuyini okungenziwa ngofundisayo kanye lomfundi ukuze umfundi ancedakale. Esihlokweni lesi sizaxoxa ngezinto ezinhlanu okumele zenziwe yibo bonke abafunda iBhayibhili ukuze bathuthuke baze babhabhathizwe.

FUNDANI MAVIKI WONKE

4. Kuyini okungasoze kwenzakale nxa sifunda labantu iBhayibhili simi eminyango yabo?

⁴ Abafowethu labodadewethu abanengi bafunda labantu iBhayibhili bemi emnyango womninimuzi. Le yindlela enhle yokunceda abantu ukuthi babe lesifiso sokufunda iBhayibhili kodwa ingxoxo lezo zijayele ukubamfitshane futhi kwesinye isikhathi kazenziwa maviki wonke. Abanye abafowethu labodadewethu bajayele ukucela inamba zefoni zomninimuzi ukuze bamfonele kumbe bamthumezele imeseji bemtshela okuthile okuseBhayibhilini, besenzela ukuthi abe lesifiso esikhulu sokufunda. Lokhu kungaqhubeka okwenyanga ezithile kodwa kasoze azinikele futhi abhabhathizwe nxa kuyikuthi kaziniki isikhathi esinengi sokufunda iLizwi likaNkulunkulu.

5. Ngokwalokho okutshiwo kuLukha 14:27-33, uJesu wagcizelelani okungasinceda emsebenzini wokwenza abafundi?

⁵ UJesu wake wasebenzisa imizekeliso ukuze achasise ukuthi umuntu kumele enzeni nxa efuna ukuba ngumfundi wakhe. Wakhuluma ngomuntu ofuna ukwakha umphotshongo langenkosi efuna ukuya empini. Wathi lowo ofuna ukwakha kumele ‘aqale ahlale phansi abale indleko’ ukuze abone ukuthi izinto alazo ziyenela yini ukuthi akhe aqede. Waphinda wathi inkosi kumele ‘iqale ihlale phansi ibonisane labanye bayo’ ukuze ibone ukuthi iyenelisa yini ukulwisana lenye inkosi. (Bala uLukha 14:27-33.) UJesu wathi lomuntu ofuna ukuba ngumfundi wakhe kumele aqale ahlolisise okumele akwenze ukuze amlandele. Yikho kufanele sikhuthaze esifunda labo iBhayibhili ukuthi sifunde maviki wonke. Singakwenza njani lokhu?

6. Kuyini esingakwenza ukuze abantu esifunda labo iBhayibhili bathuthuke?

⁶ Qala ngokwelula ingxoxo obalazo emnyango womninimuzi. Mhlawumbe ungangezelela amavesi elixoxa ngawo. Nxa umninimuzi esejayele ukuthi umvakatshela okwesikhathi eside kulakuqala, ungambuza ukuthi kungavuma yini ukuthi lihlale phansi ukuze liqhubeke ngengxoxo yenu. Impendulo yakhe izatshengisa ukuthi ukuqakathekisa kangakanani ukufunda iBhayibhili. Ngokuhamba kwesikhathi ungambuza ukuthi uyafuna yini ukuthi afunde kabili ngeviki ngoba lokho kuzamnceda athuthuke masinyane. Kodwa kulokunye okumele akwenze ngaphandle kokufunda kanye kumbe kabili ngeviki.

LUNGISELELA ISIFUNDO NGASINYE

7. Ofundisayo angasilungiselela njani isifundo ngasinye?

⁷ Wena ofundisayo kumele usilungiselele kuhle isifundo ngasinye. Ungaqalisa ngokubala lokho elizakufunda lamavesi akhona. Dinga imicijo eqakathekileyo. Cabangisisa ngesihloko, izihlokwana, imibuzo, amavesi abhalwe ukuthi bala, amapikitsha kanye lamavidiyo angakunceda ukuthi uchasise indaba eliyifundayo. Cabanga langokuthi ungamchasisela njani umfundi wakho ngendlela elula futhi ecacileyo ezamnceda ukuthi azwisise njalo akusebenzise lokho akufundayo.—Neh. 8:8; Zaga. 15:28a.

8. Amazwi omphostoli uPhawuli akuKholose 1:9, 10 asifundisani ngokuthandazela esifunda labo iBhayibhili?

⁸ Okunye okumele ukwenze nxa ulungiselela yikuthandaza kuJehova umtshela ngomfundi wakho kanye lalokho akudingayo. Mcele akuncedise ufundise lokho okuseBhayibhilini ngendlela ezathinta inhliziyo yomfundi. (Bala uKholose 1:9, 10.) Zibuze ukuthi kukhona yini umfundi angakubona kunzima ukuthi akuzwisise kumbe avumelane lakho. Hlala ukhumbula ukuthi inhloso yakho yikumncedisa ukuthi athuthuke aze abhabhathizwe.

9. Ofundisayo angamncedisa njani umfundi wakhe ukuthi alungiselele?

⁹ Silethemba lokuthi ukuhlala lifunda kuzanceda umfundi atshengise ukuthi uyabonga ngalokho uJehova loJesu abakwenzileyo futhi afune ukufunda okunengi. (Mat. 5:3, 6) Umfundi kumele agxilise ingqondo yakhe kulokho akufundayo ukuze ancedakale. Yikho kumele umchasisele ukuthi kuqakatheke ngani ukulungiselela isifundo ngasinye lokucabangisisa ngokuthi akufundayo angakusebenzisa njani. Ungamncedisa njani ukuthi alungiselele? Lungiselela laye ukuze abone ukuthi kwenziwa njani.d Mtshengise ukuthi angazithola njani izimpendulo zemibuzo lokuthi ukudwebela amabala amalutshwana kungamnceda njani ukuthi akhumbule impendulo. Ngemva kwalokho mcele ukuthi aphendule ngamazwi akhe. Lokhu kuzakunceda ubone ukuthi ukuzwisisa kangakanani lokho elikufundayo. Kodwa kulokunye ongakhuthaza umfundi wakho ukuthi akwenze.

MFUNDISE UKUTHI ALALELE UJEHOVA NJALO AKHULUME LAYE NSUKU ZONKE

10. Kungani ukubala iBhayibhili nsuku zonke kuqakathekile njalo umfundi kumele enzeni ukuze kumncede?

¹⁰ Okunye okunganceda umfundi ngaphandle kokufunda iBhayibhili maviki wonke yikwenza ezinye izinto nsuku zonke eyedwa. Kumele alalele uJehova njalo akhulume laye. Angamlalela ngokubala iBhayibhili nsuku zonke. (Josh. 1:8; Hubo. 1:1-3) Mtshengise ukuthi angalusebenzisa njani uhlelo lokubala iBhayibhili olukuwebhusayithi yesiZulu.e Mkhuthaze ukuthi acabangisise ngokuthi akubalayo eBhayibhilini kumfundisani ngoJehova lokuthi angakusebenzisa njani empilweni yakhe ukuze kumncede.—ImiSeb. 17:11; Jak. 1:25.

11. Kuyini okuzanceda umfundi wakho abekwazi indlela eqondileyo yokuthandaza njalo kungani kuqakathekile ukuthi ahlale ethandaza kuJehova?

¹¹ Khuthaza umfundi wakho ukuthi akhulume loJehova ngokuthandaza nsuku zonke. Thandaza ngenhliziyo yonke lingakaqalisi ukufunda lalapho seliqedile futhi umqambe umfundi wakho emithandazweni le. Ngesikhathi elalele imithandazo yakho, uzafunda ukuthandaza ngenhliziyo yonke lokuthi kumele athandaze kuJehova uNkulunkulu ngebizo likaJesu Khristu. (Mat. 6:9; Joh. 15:16) Kakuthandabuzwa ukuthi ukubala iBhayibhili nsuku zonke (ukulalela uJehova) lokuthandaza (ukukhuluma loJehova) kuzanceda umfundi wakho asondele kakhulu kuNkulunkulu! (Jak. 4:8) Nxa angakwenza lokhu nsuku zonke, uzathuthuka azinikele kuNkulunkulu njalo abhabhathizwe. Kuyini okunye okuzamnceda?

MNCEDISE ABE NGUMNGANE KAJEHOVA

12. Ofundisayo angamncedisa njani umfundi ukuthi abe ngumngane kaJehova?

¹² Lokho umfundi akufundayo akumelanga kuphelele engqondweni kodwa kumele kumthinte lenhliziyo ukuze azimisele ukukusebenzisa. UJesu wafundisa abantu izinto ezinengi futhi babekholisa ukumlalela kodwa okwenza bamlandela yikuthi wayethinta lezinhliziyo zabo. (Luk. 24:15, 27, 32) Umfundi wakho kumele abone ukuthi kungenzeka sibili ukuthi abe lobudlelwano loJehova lokuthi angaba nguBaba, uNkulunkulu loMngane wakhe. (Hubo. 25:4, 5) Nxa lifunda, mncede abone ubuntu bukaNkulunkulu wethu. (Eks. 34:5, 6; 1 Phet. 5:6, 7) Lokhu kwenze kuloba yiphi indaba elixoxa ngayo. Nceda umfundi abone ukuthi uJehova ulothando lomusa lozwelo. UJesu wathi ‘umlayo oqakatheke kulayo yonke njalo oyiwo owokuqala yikuthanda uJehova uNkulunkulu wakho.’ (Mat. 22:37, 38) Yikho zama ukunceda umfundi wakho ukuthi amthande uJehova.

13. Nika isibonelo sendlela esinganceda ngayo umfundi ukuthi afunde ngobuntu bukaJehova.

¹³ Nxa lifunda, mchasisele umfundi wakho ukuthi kungani umthanda uJehova. Lokhu kuzamnceda abone ukuthi laye kumele abe ngumngane kaJehova futhi amthande. (Hubo. 73:28) Ngokwesibonelo, kulomutsho yini ebhukwini elilifundayo kumbe evesini olokuthile ngoJehova okukuthinta inhliziyo, kungaba luthando lwakhe, ukuhlakanipha, ukwahlulela kuhle kumbe amandla? Mtshele ngakho umfundi, ubususitsho ukuthi lokhu ngokunye okwenza umthande uBaba wethu osezulwini. Kulokunye futhi umfundi okumele akwenze ukuze athuthuke aze abhabhathizwe.

MKHUTHAZE UKUTHI ANGENE IMIHLANGANO YEBANDLA

14. UHebheru 10:24, 25 angamnceda njani umfundi ukuthi athuthuke?

¹⁴ Sonke siyafuna ukuthi abantu esibafundisayo bathuthuke baze babhabhathizwe. Enye indlela eqakathekileyo esingabancedisa ngayo yikubakhuthaza ukuthi bangene imihlangano yebandla. Abamemezeli asebelesikhathi eside befundisa bathi abafundi abahle bangene imihlangano bathuthuka masinyane. (Hubo. 111:1) Abanye bachasisela abafundi babo ukuthi kunengi abazakufunda emihlanganweni yebandla abangeke bakufunde esifundweni sabo. Bala uHebheru 10:24, 25 lomfundi wakho ubusumtshela ukuthi kuzamnceda ngani ukungena imihlangano yebandla. Mbukelise ividiyo ethi Kuyini Okwenzakala EWolu YoMbuso?f Mncede azimisele ukuhlala ekhona emihlanganweni.

15. Ungenzani ukuze ukhuthaze umfundi ukuthi angene imihlangano yebandla maviki wonke?

¹⁵ Ungenzani nxa umfundi engakaze alugxobe eWolu kumbe engabuyi maviki wonke? Mxoxele ngokunye elisanda kukufunda emihlanganweni yebandla. Lokhu kuzamenza afise ukubuya ukwedlula ukuphongumnxusa. Mnike iNqabayokulinda kumbe uGwalo Lomhlangano olufundwa ngaleyonyanga. Mtshengise ukuthi kuzaxoxwa ngani emhlanganweni olandelayo ubusumbuza ukuthi yikuphi akuthanda kakhulu. Azakuzwa lazakubona mhla eqalisa ukungena imihlangano kuzadlula loba yini ake wayizwa kumbe wayibona esontweni ethile. (1 Khor. 14:24, 25) Uzahlangana labanye abenza kuhle angabalingisela futhi abazamncedisa ukuthi athuthuke aze abhabhathizwe.

16. Singenzani ukuze abantu esibafundisayo bathuthuke baze babhabhathizwe njalo sizaxoxa ngani esihlokweni esilandelayo?

¹⁶ Singenzani ukuze abantu esibafundisayo bathuthuke baze babhabhathizwe? Singanceda umfundi ngamunye ukuthi aqakathekise ukufunda ngokumkhuthaza ukuthi afunde maviki wonke njalo alungiselele isifundo ngasinye. Singamkhuthaza lokuthi alalele uJehova njalo akhulume laye nsuku zonke futhi abe ngumngane wakhe. Kanti njalo singamkhuthaza ukuthi angene imihlangano yebandla. (Khangela ibhokisi “Ncedisa Umfundi Athuthuke Aze Abhabhathizwe.”) Esihlokweni esilandelayo sizaxoxa ngezinye izinto ezinhlanu okumele zenziwe ngofundisayo ukuze ancedise umfundi athuthuke aze abhabhathizwe.