Indlela Ukuthandaza Okungakunceda Ngayo

Ngesikhathi uPamela egula kakhulu wadinga uncedo kubodokotela abazingcitshi. Loba kunjalo, wayethandaza kuNkulunkulu ecela amandla okubekezelela ubuhlungu ayekubo. Kwamnceda yini ukuthandaza?

UPamela uthi: “Ngesikhathi ngisiyakwelatshwa umkhuhlane wemvukuzane, ngangisesaba. Kodwa ngangisithi ngingathandaza kuJehova uNkulunkulu, ngizwe ngihlaliseka futhi sengisenelisa ukucabanga kuhle. Lanxa ngihlala ngisebuhlungwini, ukuthandaza kuyanginceda ukuthi ngingahlali ngidanile. Nxa abantu bengibuza ukuthi ngizwa njani, ngijayele ukubaphendula ngisithi, ‘Kubuhlungu sibili, kodwa ngiyathokoza!’”

Liqiniso ukuthi ukuthandaza akudingi ukuthi siqale sibe phakathi kohlupho olukhulu kumbe sihlaselwe ngumkhuhlane. Sonke siyake sehlelwe zinhlupho, kungaba ngezincane kumbe ezinkulu futhi nxa sesiphakathi kohlupho sijayele ukudinga indlela yokulwisana lalo. Ukuthandaza kungakunceda yini nxa uphakathi kohlupho?

IBhayibhili lithi: “Yethula iziswelo zakho kuJehova yena uzakusekela; akazukuyekela abalungileyo bawe.” (IHubo 55:22) La ngamazwi aduduzayo sibili! Manje ukuthandaza kuzakunceda njani? Nxa ungathandaza kuNkulunkulu ngendlela eqondileyo, uzakunika okudingayo ukuze ulwisane lobunzima ophakathi kwabo.—Khangela ibhokisi elithi “Ukuthandaza Kungakunceda Njani?”

Ukuthandaza Kungakunceda Njani?

Kuyakunceda ukuthi uhlaliseke

“Bekani izicelo zenu kuNkulunkulu ngomthandazo langokumncenga kanye lokumbonga. Nxa lingenza njalo, ukuthula kukaNkulunkulu okwedlula konke ukuzwisisa kuzalinda izinhliziyo zenu lezingqondo zenu ngoKhristu uJesu.” (KwabaseFiliphi 4:6, 7) Nxa ungathululela uNkulunkulu isifuba umtshele okukukhathazayo, uzakunceda ukuthi uhlaliseke njalo ungenzi izinqumo ezingaqondanga ngenxa yokukhathazeka.

Uzathola inhlakanipho evela kuNkulunkulu

“Ngakho nxa ekhona phakathi kwenu osilelayo ekuhlakanipheni kaqhubeke ekucela kuNkulunkulu ngoba yena ubapha ngesihle bonke futhi engelansolo. Uzakuphiwa sibili.” (UJakhobe 1:5) Kwesinye isikhathi nxa siphakathi kwenhlupho senza izinto ngobuthutha. Kodwa nxa singathandaza sicele inhlakanipho, uNkulunkulu uzasinceda ukuthi sikhumbule izinto ezilusizo esazifunda eLizwini lakhe iBhayibhili.

Uzathola amandla lenduduzo

“Ngilamandla okwenza zonke izinto ngenxa yalowo ongipha amandla.” (KwabaseFiliphi 4:13) UJehova uNkulunkulu unguSomandla, ngakho angakunika amandla owadingayo ukuthi ulwisane lezinhlupho zakho futhi wenelise ukuzibekezelela. (U-Isaya 40:29) IBhayibhili liphinda libize uJehova ngokuthi ‘nguNkulunkulu wenduduzo yonke.’ Uyenelisa ukusiduduza “kuzo zonke inhlupho zethu.”—2 KwabaseKhorinte 1:3, 4.

UKUTHANDAZA KUZAKUNCEDA SIBILI

UJehova kakubambi ngamandla ukuthi uthandaze kuye. Lanxa kunjalo uyakucela ngothando ukuthi ukwenze. (UJeremiya 29:11, 12) Kodwa nxa ubona angani imithandazo owayenza kudala kayizange iphendulwe, ungadani loba ulahle ithemba. Ngokwesibonelo, abantwana bayacela izinto abazifunayo ebazalini babo futhi bayabe bekhangelele ukuthi baziphiwe ngesikhathi abasifunayo. Kodwa abazali abalothando bayasazi isikhathi esifaneleyo sokunika abantwababo lokho abakucelayo. Izikhathi ezinengi umzali uyabe elecebo elingcono futhi kayekeli ukubanceda abantwabakhe.

UJehova uNkulunkulu unguBaba olothando ukwedlula bonke futhi uyafuna ukukuncedisa. Nxa ungahlolisisa amacebo esixoxe ngawo lapha njalo uzame ukuwasebenzisa, uNkulunkulu uzayiphendula imithandazo yakho ngendlela obungayicabangeli.—IHubo 34:15; uMathewu 7:7-11.