Kuyini Sibili Okungakunceda Ukwazi Ngekusasa Lakho?
Abantu abanengi bacabanga ukuthi kulamandla angabonakaliyo ahlela ikusasa labo. Lokhu kubangela ukuthi benze izinto ezitshiyeneyo abacabanga ukuthi zizabalethela inhlanhla kumbe zibenze babe lekusasa elihle.
OKUKHOLWA NGABANTU ABANENGI
UKUHLOLA IZINKANYEZI: Abanye abantu bakholwa ukuthi indlela inkanyezi eziyabe zihlelwe ngayo nxa umuntu ezalwa yikho okutshengisa ukuthi ikusasa lakhe lizakuba njani. Bayabala lokho okubhalwe ngabahlola ngezinkanyezi ukuze bakwazi ngekusasa labo njalo kubancedise ukwenza izinqumo.
UKUYA ENYANGENI: Abanye bakholwa ukuthi nxa bangayabuza enyangeni bangathola izizatho zokuthi kungani ezimpilweni zabo kusenzakala izinto ezithile lokuthi kumele benzeni. Nxa sebezitholile sebengaxwaya okubi obekungabehlela futhi bancediswe ukuthi balungise inhlupho zabo ukuze baphumelele.
UKUKHONZA AMADLOZI: Abanye bakholwa ukuthi kumele bakhonze amadlozi kumbe ezinye izinto ezitshiyeneyo ukuze zibavikele futhi zibabusise. Owesifazana okuthiwa nguVana ohlala eVietnam uthi, “Ngangikholwa ukuthi nxa ngingahlonipha amadlozi ami ngizakuba lempilo engcono khathesi futhi mina labantwabami sibe lekusasa elihle.”
UKUPHINDA UKUZALWA: Abanengi bakholwa ukuthi nxa umuntu angafa uyaphinda azalwe eselomunye umzimba futhi bathi lokhu kwenzakala kanenginengi, esifa aphinde azalwe. Bakholwa ukuthi izinto ezenzakala empilweni yabo khathesi, kungaba ngezinhle kumbe ezimbi zibangelwa yilokho abakwenza empilweni yabo yakuqala.
Kodwa kulabanye abanengi abathi abazikholwa kangako izinto lezi. Lanxa kunjalo, benza izinto ezigoqela ukubhula, ukutshaya amathambo, ukukhangela imizila ephakathi kwesandla, ukudinga ingcazelo yamaphupho lemihlolo. Bacabanga ukuthi ukwenza izinto lezi kungabanceda ukuthi balazi ikusasa labo.
KUYANCEDA YINI?
Labo abakholwa futhi benze izinto lezi bayathokoza empilweni njalo balekusasa elihle yini?
Cabanga ngalokho okwenzakala kwenye indoda okuthiwa nguHào ehlala eVietnam. Nxa wayefuna ukwazi ukuthi enzeni wayelandela lokho okutshiwo yilabo abahlola izinkanyezi, ebala amakhadi okwazi ngekusasa futhi ekhonza amadlozi. Kwamnceda yini konke lokhu? Uthi, “Ibhizimusi lami lawa, ngaba lezikwelede, ngangingasazwanani labemuli futhi ngakhathazeka kakhulu.”
Enye indoda ehlala eTaiwan okuthiwa nguQiuming layo yayikholwa lokho okutshiwo ngabahlola izinkanyezi, ikholwa ukuthi umuntu angafa uyazalwa eselomunye umzimba lokuthi izinto zonke zihleliwe. Wayesebenzisa amakhadi okwazi ngekusasa futhi ekhonza amadlozi. Esehlolisise konke ayekukholwa wathi: “Ngananzelela ukuthi izimfundiso lezi kanye lemikhuba kuyaphikisana futhi kunzima ukukuzwisisa. Ngabona ukuthi lokho okwakutshiwo yilabo abahlola izinkanyezi izikhathi ezinengi kwakungaqondanga. Ukukholwa ukuthi umuntu angafa uphinda azalwe eselomunye umzimba lakho akulangqondo. Phela awungeke utshintshe impilo yakho nxa uvele ungakwazi ukuthi wawuphila njani ungakafi.”
“Ngananzelela ukuthi izimfundiso lezi kanye lemikhuba kuyaphikisana futhi kunzima ukukuzwisisa.”—UQIUMING WETAIWAN
UHào loQiuming labanye abanengi sebakunanzelela ukuthi ikusasa lethu aliyi ngalokho okutshiwo zinkanyezi, amadlozi kumbe ukuzalwa usulomunye umzimba futhi alihlelwanga. Kambe lokhu sekusitsho ukuthi akulalutho esingalwenza ukuze sibe lekusasa elihle?
Abanengi bacabanga ukuthi ukuba lemfundo ephezulu kanye lenotho yikho okungenza babe lekusasa elihle. Kubahambele njani abanye abakhetha lokho?
a Esihlokweni lesi lakwezinye ezilandelayo amanye amabizo atshintshiwe.
b Amazwi la atholakala eBhayibhilini Elingcwele kuGalathiya 6:7. Isitsho se-Asia esilamazwi ahambelana lawo sithi: Hlanyela amakhabe uzathola amakhabe; hlanyela indumba uzathola indumba.