Kuyini Okungakunceda Ukuthi Ube Lekusasa Elihle?

Njengoba sibonile ezihlokweni ezidlulileyo, kulezinto ezitshiyeneyo abantu abazithembayo abacabanga ukuthi zingenza babe lekusasa elihle. Abanye bathemba amandla angabonakaliyo abakholwa ukuthi ahlela impilo zabo futhi abanye bathemba imfundo lenotho. Abanye bazama ukuba ngabantu abalungileyo. Ukuthemba izinto lezi kufanana lokuzama ukuya endaweni ongayaziyo usebenzisa imephu engaqondanga. Kambe lokhu sekusitsho ukuthi akulalutho olungasinceda ukuthi sibe lekusasa elihle? Hatshi!

IBHUKU ELINGCONO KULAWO WONKE

Izikhathi ezinengi sijayele ukubuza umuntu omdala njalo ohlakaniphileyo kulathi singakenzi izinqumo. Lasendabeni yokudinga ikusasa elihle kulomuntu omdala futhi ohlakaniphe kakhulu kulathi ongasincedisa. Amacebo akhe singawathola ebhukwini elaqalisa ukubhalwa eminyakeni engaba ngu-3500 eyadlulayo. Ibhuku lelo libizwa kuthiwa liBhayibhili.

Kungani kumele silithembe iBhayibhili? Ngoba owalibhalayo ngumuntu omdala futhi ohlakaniphe kulabo bonke. Limbiza ngokuthi ‘unguSimakade’ okhona “kusukela phakade kuze kube phakade.” (UDanyeli 7:9; IHubo 90:2) Nguye “owadala amazulu, unguNkulunkulu, yena owabumba umhlaba.” (U-Isaya 45:18) Usitshela ukuthi ibizo lakhe nguJehova.—IHubo 83:18.

IBhayibhili aliqakathekisi eminye imihlobo yabantu kuleminye ngoba labhalwa nguMdali wabantu bonke. Amacebo alo awaphelelwa yisikhathi njalo asencede abantu bemihlobo yonke. Litholakala ngezindimi ezinengi lasezindaweni ezinengi ukwedlula wonke amanye amabhuku.a Lokhu kutsho ukuthi kungelani lokuthi umuntu ungaphi komhlaba angalibala ukuze limqondise ekuphileni kwakhe njalo kuvumelana lamazwi aseBhayibhilini athi:

“UNkulunkulu kakhethi, kodwa kuzo zonke izizwe uyamemukela umuntu omesabayo njalo owenza okulungileyo.”—IMISEBENZI 10:34, 35.

Umzali olothando uyabacebisa abantwabakhe. UJehova uNkulunkulu laye unguBaba olothando yikho esinika amacebo amahle esebenzisa iLizwi lakhe iBhayibhili. (2 KuThimothi 3:16) Ungalithemba iLizwi lakhe ngoba nguye owasidalayo njalo uyakwazi okuzasenza sithokoze.

AMACEBO ONGAWATHEMBA

Singakuthemba okutshiwo liBhayibhili ngekusasa ngoba elakutsho eminyakeni engaba ngu-2 000 eyadlulayo mayelana lezinto ezazizakwenzakala emhlabeni kanye lendlela abantu ababezaziphatha ngayo kuyenzakala sibili.

OKWENZAKALA EMHLABENI

‘Isizwe sizavukela isizwe, lombuso uvukele umbuso. Kuzakuba lokuzamazama komhlaba okwesabekayo, futhi ezindaweni ezehlukeneyo kuzakuba lokuswelakala kokudla lemikhuhlane emibi.’—ULUKHA 21:10, 11.

INDLELA ABANTU ABAZIPHATHA NGAYO

“Ezinsukwini zokucina kuzakuba lezikhathi ezinzima, okunzima ukuphila kuzo, ngoba abantu bazakuba ngabazithandayo, labathanda imali, labazigqajayo, labaziphakamisayo, labathukayo, labangalaleli abazali, labangabongiyo, labangathembekanga, labangathandi abanye, labangafuni isivumelwano, labanyundeli, labangazikhuziyo, labalolaka, labangakuthandiyo okuhle, labangabathengisi, labalenkani, labazikhukhumezayo, labathanda injabulo kulokuthanda uNkulunkulu.”—2 KUTHIMOTHI 3:1-4.

Kuyini okwenza ibhuku elabhalwa kudala kangaka litsho zona kanye izinto esizibona zisenzakala lamuhla? Akuthandabuzwa ukuthi uyavumelana lalokho okwatshiwo nguLeung, indoda ehlala eHong Kong, owathi: “Iziphrofetho zeBhayibhili zabhalwa kudaladala. Nxa sikhangela indlela ezigcwaliseka ngayo akwenzi ukuthi sithi ngumuntu owazikhulumayo. Kumele ukuthi iBhayibhili livela emuntwini ohlakaniphe kakhulu kulathi.”

IBhayibhili lileziphrofetho ezinengi esezagcwalisekayo. Lobu yibufakazi bokuthi liyiLizwi likaNkulunkulu sibili. UJehova uthi: “Mina nginguNkulunkulu, kakho onjengami. Mina ngenza isiphetho sazakale kusukela ekuqaleni.” (U-Isaya 46:9, 10) Yikho singakuthemba sibili okutshiwo liBhayibhili mayelana lekusasa.

AMACEBO AZAKUNCEDA KHATHESI KUZE KUBE NINI LANINI

Nxa ungasebenzisa amacebo aseMibhalweni Engcwele uzancedakala. Nanka amanye amacebo akuyo.

IMALI LOKUSEBENZA

“Kungcono ukuphumula kancane kulokusebenza gadalala ungaphumuli njalo uxotshana lomoya.”—UMTSHUMAYELI 4:6, NWT.

OKUNGENZA IMULI YAKHO ITHOKOZE

“Kumele ngamunye wenu athande inkosikazi yakhe ngendlela azithanda ngayo; lenkosikazi kumele iyihloniphe kakhulu indoda yayo.”—KWABASE-EFESU 5:33.

UKUPHILA KUHLE LABANYE

“Xwayana lokuzonda njalo ufulathele intukuthelo; [“ungacaphuki,” NWT], kukhokhelela ebubini kuphela.”—IHUBO 37:8.

Nxa ungenza okutshiwo liBhayibhili uzaphila impilo ethokozisayo khathesi futhi ube lekusasa elihle. EBhayibhilini, uNkulunkulu usithembisa ukuthi sizakuba lekusasa elihle sithole izibusiso ezilandelayo

UKUTHULA LOKUVIKELEKA

‘Bazakholisa ukuthula okukhulu.’—IHUBO 37:11.

INDAWO YOKUHLALA LOKUDLA OKWANELEYO KOMUNTU WONKE

“Bazakwakha izindlu bahlale kuzo; bazahlanyela izivini badle izithelo zazo.”—U-ISAYA 65:21.

AKUSOZE KUBE LOKUGULA LOKUFA

“Ukufa ngeke kusabakhona, loba ukulila loba ukukhala loba ubuhlungu, ngeke kusabakhona.”—ISAMBULO 21:4.

Kumele wenzeni ukuze ube lekusasa elinjalo? Umbuzo lo uzaphendulwa esihlokweni esilandelayo.

a Ukuze uthole okunengi mayelana lokuhunyutshwa lokusakazwa kweBhayibhili hamba ku-www.jw.org, ukhangele ngaphansi kwengxenye ethi OKUFUNDISWA LIBHAYIBHILI > IMBALI YEBHAYIBHILI.