ISIFUNDO 7
Ukuzwisisa Ubunhloko Ebandleni
‘UKhristu uyinhloko yebandla, yena ungumsindisi walowomzimba.’—EFE. 5:23.
INGOMA 137 Abesifazane Abathembekileyo
ESIZAKUFUNDAa
1. Kungani imuli kaJehova imanyene?
KUYASITHOKOZISA ukuba semulini kaJehova. Kuyini okwenza sibe lokuthula lokumanyana? Esinye isizatho yikuthi sonke senza konke okusemandleni ethu ukuthi sihloniphe labo uJehova ababeke ukuthi basikhokhele. Iqiniso yikuthi nxa singayizwisisa ngcono indaba yobunhloko sizamanyana kakhulu.
2. Yiphi imibuzo esizayiphendula esihlokweni lesi?
2 Esihlokweni lesi sizaxoxa ngendaba yobunhloko ebandleni. Sizaphendula lemibuzo elandelayo: Odade balayiphi imisebenzi ebandleni? Kuliqiniso yini ukuthi abafowethu ebandleni bazinhloko zabo bonke odade? Amandla abadala abawaphiweyo ebandleni ayafanana yini lamandla inhloko zemuli eziwaphiweyo? Kodwa asiqaleni ngokuxoxa ngendlela okumele sibabone ngayo odade.
KUMELE SIBABONE NJANI ODADE?
3. Kuyini okuzasinceda ukuthi sibaqakathekise kakhulu odadewethu?
3 Siyazigqaja ngabodadewethu abasebenza nzima ukuthi banakekele izimuli zabo, batshumayele izindaba ezinhle futhi bancedise abanye ebandleni. Okuzasinceda ukuthi sibaqakathekise kakhulu yikuhlola indlela uJehova loJesu abababona ngayo. Sizabona lokuthi singamlingisela njani umphostoli uPhawuli endleleni esibaphatha ngayo.
4. IBhayibhili liveza njani ukuthi uJehova uthanda abesifazana ngendlela athanda ngayo amadoda?
4 IBhayibhili liveza ukuthi uJehova uthanda abesifazana ngendlela athanda ngayo amadoda. Ngokwesibonelo, lisitshela ukuthi ngesikhathi sabaphostoli, uJehova wanika labesifazana umoya ongcwele ukuze benze imisebenzi emangalisayo egoqela ukukhuluma ngezindimi. (ImiSeb. 2:1-4, 15-18) Ugcobe abanye babo ukuthi bayebusa loKhristu ezulwini. (Gal. 3:26-29) Abanye balethemba lokuphila emhlabeni kuze kube nini lanini. (Isam. 7:9, 10, 13-15) Kanti njalo labo baphiwe umsebenzi wokutshumayela lowokwenza abafundi. (Mat. 28:19, 20) Ngokwesibonelo, ibhuku lemiSebenzi lisitshela ngodade okuthiwa nguPrisila. Yena lomkakhe u-Akhwila bachasisela enye indoda eyayifundile okuthiwa ngu-Apholo iqiniso ukuze liyicacele kuhle.—ImiSeb. 18:24-26.
5. ULukha 10:38, 39, 42 utshengisa njani ukuthi uJesu wayebahlonipha abesifazana?
5 UJesu wayebahlonipha abesifazana. Wayengenzi njengabaFarisi ababebakhangelela phansi. Phela babengaxoxi labo ebantwini futhi babengaxoxi labo ngeMibhalo. UJesu yena wayengababandlululi, wayexoxa labo ngezinto ezijulileyo zikaNkulunkulu bendawonye labanye abafundi besilisa.b (Bala uLukha 10:38, 39, 42.) Wayehamba labo ngesikhathi etshumayela. (Luk. 8:1-3) Kanti njalo wanika abesifazana isibusiso sokuthi bayetshela abaphostoli ukuthi usevusiwe.—Joh. 20:16-18.
6. Umphostoli uPhawuli watshengisa njani ukuthi uyabahlonipha abesifazana?
6 Umphostoli uPhawuli wakhumbuza uThimothi ukuthi ahloniphe abesifazana. Wamtshela ukuthi aphathe ‘abesifazana asebekhulile njengabonina labesifazana abasesebatsha njengabodadewabo.’ (1 Tim. 5:1, 2) Lanxa uPhawuli wamnceda kakhulu uThimothi ukuthi abe lokholo oluqinileyo, wavuma ukuthi unina kaThimothi logogo wakhe yibo abaqalisa ukumfundisa “imibhalo engcwele.” (2 Tim. 1:5; 3:14, 15) Ngesikhathi uPhawuli ebhala incwadi eyayisiya kwabaseRoma, wabaqamba ngamabizo odadewethu lapho ebabingelela. Wayeyinanzelela imisebenzi eyayisenziwa ngodadewethu labo futhi eyiqakathekisa.—Rom. 16:1-4, 6, 12; Flp. 4:3.
7. Yiphi imibuzo esizaxoxa ngayo khathesi?
7 Njengoba sibonile kundima 4 kusiya ku-6, iBhayibhili kalitsho ukuthi abafowethu baqakathekile kulabodadewethu. Odadewethu abalothando futhi abaphanayo bayalinceda sibili ibandla njalo abadala bayaqakathekisa abakwenzayo ekuncediseni ukuthi kube lokuthula lokumanyana ebandleni. Kodwa kulemibuzo okumele siyiphendule. Kungani ngezinye izikhathi uJehova efuna odade bagqoke okuthile ekhanda? Njengoba abafowethu kuyibo ababa ngabadala lezinceku ezikhonzayo ebandleni, sekusitsho yini ukuthi ngamunye wabo uyinhloko yabo bonke odade ebandleni?
ABAFOWETHU BAZINHLOKO ZABO BONKE ODADE YINI?
8. Ngokwalokho okutshiwo ku-Efesu 5:23, abafowethu bazinhloko zabo bonke odade yini? Chasisa.
8 Abafowethu bazinhloko zabo bonke odade yini? Hatshi. UKhristu nguye inhloko yabo bonke odade ebandleni. (Bala u-Efesu 5:23.) Emulini, indoda yiyo eyinhloko yomkayo. Umntwana ongumfana obhabhathiziweyo kayisiyonhloko kanina. (Efe. 6:1, 2) Ebandleni, abadala kabasizonhloko zabafowethu labodadewethu. (1 Thes. 5:12; Heb. 13:17) Odade abangatshadanga abangasahlali ngekhaya baqhubeka bebahlonipha abazali babo futhi bayabahlonipha labadala. Kodwa balenhloko eyodwa, uJesu, njengabo bonke abesilisa ebandleni.
Abangatshadanga abangasahlali labazali babo balenhloko eyodwa kuphela, uJesu (Khangela indima 8)
9. Kungani ngezinye izikhathi kumele odade bagqoke okuthile ekhanda?
9 Lanxa amadoda engasonhloko zabo bonke odade, uJehova ukhethe wona ukuthi akhokhele ebandleni. Kanikanga odade amandla lawo. (1 Tim. 2:12) Kungani engabaphanga? Isizatho sakhona siyafanana laleso esenza uJehova wabeka uJesu ukuthi abe yinhloko yendoda, ukuze kube lokuhleleka ebandleni. Nxa kungenzakala ukuthi odade benze umsebenzi okumele wenziwe ngumfowethu, uJehova ukhangelele ukuthi bagqoke okuthile ekhanda.c (1 Khor. 11:4-7) Okwenza athi benze njalo yikuthi ufuna batshengise ukuthi bayabahlonipha labo abanike amandla ebandleni. Kayisikho ukuthi ufuna ukubehlisa isithunzi. Khathesi asiphenduleni umbuzo lo: Yiwaphi amandla aphiwe inhloko zemuli labadala bebandla?
AMANDLA APHIWE INHLOKO ZEMULI LABADALA BEBANDLA
10. Kuyini okungenza umdala afune ukufaka imithetho ebandleni?
10 Abadala bayamthanda uKhristu futhi bayazithanda ‘izimvu’ uJehova loJesu ababanike ukuthi bazeluse. (Joh. 21:15-17) Lokhu kungenza umdala acabange ukuthi uyinhloko yalabo abasebandleni. Angacabanga ukuthi njengoba inhloko yemuli ilelungelo lokufaka imithetho ukuze ivikele imuli yayo, laye angafaka imithetho ukuze avikele izimvu zikaNkulunkulu. Kanti njalo abanye abafowethu labodadewethu bangakhuthaza abadala ukuthi benze njengezinhloko zabo ngokubacela ukuthi babenzele izinqumo. Kodwa abadala bebandla balamandla afanana lawenhloko zemuli yini?
Abadala bayabathanda abasebandleni futhi bayabancedisa ukuthi bahlale beseduze loJehova. UJehova ubanike umthwalo wokuthi basuse ebandleni izoni ezingaphendukiyo (Khangela indima 11 lo-12)
11. Amandla aphiwe inhloko zezimuli ahambelana njani lamandla abadala abalawo?
11 Umphostoli uPhawuli waveza ukuthi amandla aphiwe inhloko zemuli kulalapho ahambelana khona lamandla aphiwe abadala bebandla. (1 Tim. 3:4, 5) Ngokwesibonelo, uJehova ufuna amalunga emuli ayilalele inhloko yemuli. (Kol. 3:20) Kanti njalo ufuna labo abasebandleni balalele abadala. Ukhangelele ukuthi inhloko zezimuli labadala bebandla bancedise labo abangaphansi kwabo ukuthi bamthande. Ukhangelele lokuthi babathande. Abadala kumele balingisele inhloko zemuli eziphatha kuhle imuli zazo ngokuncedisa abafowethu labodadewethu nxa bephakathi kobunzima. (Jak. 2:15-17) UJehova ufuna lokuthi abadala bebandla lenhloko zezimuli bancedise abanye ukuthi balandele imithetho yakhe futhi ubaxwayisa ukuthi ‘bangeqeli ngangale kwalokho okubhalwe’ eBhayibhilini.—1 Khor. 4:6.
Inhloko zemuli zinikwe amandla okuthi zifake imithetho imulini zazo. Inhloko yemuli elothando iyabonisana lomkayo ingakenzi izinqumo (Khangela indima 13)
12-13. Ngokwalokho okutshiwo kuRoma 7:2, amandla aphiwe inhloko zemuli atshiyene njani laphiwe abadala bebandla?
12 Lanxa kunjalo, amandla aphiwe abadala bebandla atshiyene kakhulu lamandla aphiwe inhloko zezimuli. Ngokwesibonelo, uJehova unike abadala umsebenzi wokwahlulela kodwa kawunikanga izinhloko zezimuli. Uphinde wanika abadala umthwalo wokuthi basuse ebandleni izoni ezingaphendukiyo.—1 Khor. 5:11-13.
13 Kodwa uJehova unike inhloko zezimuli amandla angawanikanga abadala bebandla. Ngokwesibonelo, inhloko yemuli ilelungelo lokufaka imithetho lokuba leqiniso lokuthi iyalandelwa. (Bala uRoma 7:2.) Ilamandla okutshela abantwabayo ukuthi bangene sikhathi bani endlini futhi ilelungelo lokubajezisa nxa bengawulaleli umthetho lowo. (Efe. 6:1) Kodwa inhloko yemuli elothando iqala ibonisane lomkayo ingakafaki imithetho. Phela bobabili ‘banyamanye.’d—Mat. 19:6.
HLONIPHA UKHRISTU OYINHLOKO YEBANDLA
UJesu ubekwe nguJehova ukuthi abe yinhloko yebandla futhi alikhokhele (Khangela indima 14)
14. (a) Ngokwalokho okutshiwo kuMakho 10:45, kungani kuqondile ukuthi uJehova wabeka uJesu ukuthi abe yinhloko yebandla? (b) IQula Elibusayo lilawuphi umsebenzi? (Khangela ibhokisi elithi “Umsebenzi WeQula Elibusayo.”)
14 UJehova wasebenzisa igazi leNdodana yakhe ukuze athenge umuntu ngamunye osebandleni laloba ngubani ozakuba lokholo kuyo. (Bala uMakho 10:45; imiSeb. 20:28; 1 Khor. 15:21, 22) Yikho kuqondile ukuthi wabeka uJesu ukuthi abe yinhloko yebandla ngoba wanikela ngokuphila kwakhe ngenxa yethu. Lokhu kwenza abe lelungelo lokufakela umuntu ngamunye, izimuli lebandla imithetho lokuba leqiniso lokuthi iyalandelwa. (Gal. 6:2) UJesu kasifakeli imithetho nje kuphela kodwa uyasinakekela futhi uyasithanda.—Efe. 5:29.
15-16. Ufundani kulokho okwatshiwo nguMarley loBenjamin?
15 Odadewethu batshengisa ukuthi bayamhlonipha uKhristu ngokulandela lokho abakutshelwa ngamadoda awabeke ukuthi abanakekele. Odade abanengi bayavumelana lodadewethu okuthiwa nguMarley ohlala eMelika. Uthi: “Ngiyayiqakathekisa imisebenzi engilayo emulini lasebandleni. Kumele ngihlale ngisebenza nzima ukuze ngihloniphe umkami labadala bebandla ngoba uJehova ubanike amandla. Okwenza kube lula ukuthi ngibahloniphe yikuthi labo bayangihlonipha futhi bayakuqakathekisa engikwenzayo.”
16 Abafowethu batshengisa ukuthi bayabuzwisisa ubunhloko ngokuhlonipha odadewethu. Umfowethu okuthiwa nguBenjamin ohlala eNgilandi uthi: “Impendulo zabodadewethu emihlanganweni yebandla, amacebo abanginike wona ngokuthi ngingataditsha njani lokuthi ngingenzani ukuze ngithuthuke ekutshumayeleni kungincede kakhulu. Umsebenzi abawenzayo uqakathekile sibili.”
17. Kungani kumele sihloniphe ubunhloko?
17 Nxa sonke ebandleni, kungelani lokuthi singamadoda, singabesifazana, sizinhloko zemuli kumbe singabadala sizwisisa futhi sihlonipha ubunhloko, kuzaba lokuthula ebandleni. Kodwa okuqakatheke kakhulu yikuthi sizadumisa uJehova uBaba wethu osezulwini osithandayo.—Hubo. 150:6.
INGOMA 123 Ukulalela Ngokuthobeka
a Odade balayiphi imisebenzi ebandleni? Abafowethu ebandleni bazinhloko zabo bonke odade yini? Amandla aphiwe abadala bebandla ayafanana yini lamandla aphiwe inhloko zemuli? IBhayibhili lizasinceda siphendule imibuzo le.
b Khangela indima 6 esihlokweni esithi “Basekele Odade Abasebandleni Lenu,” ku-Nqabayokulinda kaSeptember 2020.
c Khangela ibhokisi elithi “Kunini Lapho Udade Okumele Agqoke Khona Okuthile Ekhanda?”
d Khangela isihloko esithi “Hlonipha Abantu Bonke Abasebandleni LikaJehova” esiku-Nqabayokulinda ka-August 2020. Bala indima 17-19 ukuze ubone okunengi mayelana lokuthi ngubani okumele enze isinqumo sokuthi imuli izangena laliphi ibandla.
e Khangela ibhuku elithi “Zigcineni Lisethandweni LukaNkulunkulu,” ikhasi 209-212 ukuze ufunde okunengi ngendaba le.
f Khangela iNqabayokulinda kaJuly 1 2013 ikhasi 26-31 ukuze ufunde okunengi ngomsebenzi weQula Elibusayo.