Impilo Ethokozisayo Enkonzweni KaJehova

Ngo-1959 kwenziwa isaziso eBhetheli sokuthi kwakudingakala izisebenzi egatsheni leSouth Africa njengoba kwakuzaba lomtshina omutsha wokuphrinta. Ngabhalisa ngasengikhethwa, futhi lokhu kwangithokozisa. Abanye abazalwane abakhethwayo kwakunguDennis Leech, uBill McLellan loKen Nordin. Satshelwa ukuthi sasizahlala eSouth Africa okwesikhathi eside.

Ngafonela umama ngathi: “Mama kulento engifuna ukukutshela yona. Ngiya eSouth Africa!” Umama wayengumuntu othuleyo kodwa elokholo oluqinileyo futhi engumngane oseduze kaJehova. Kazange atsho okunengi kodwa ngangikwazi ukuthi wayengisekela. Lanxa yena lobaba babedanile ngokuthi ngizabe ngikhatshana, kabazange bake bakhonone.

UKUYA ESOUTH AFRICA

Saqala saya eBhetheli eseBrooklyn okwenyanga ezintathu ukuze siyefundiswa indlela ethile yokuphrinta. Ngemva kwalokho sagada umkhumbi silubangise eCape Town eSouth Africa. Ngangisanda kufikisa iminyaka engu-20. Sathi sesifikile eCape Town sagada isitimela esasuka ntambama sisiya eJohannesburg. Isitimela saqala ukuma emadabukakusa sesisedolobheni elincane eliseKaroo, indawo esankangala. Indawo le yayigcwele uthuli njalo itshisa. Sobane salunguza ngewindi sazibuza ukuthi yindawo bani le. Sakhathazeka ngokuthi kuzabe kunjani endaweni entsha esasisiya kuyo. Ngemva kweminyaka sayivakatshela indawo le njalo sananzelela ukuthi amadolobho amancane ayekuyo ayemahle futhi elokuthula.

Okweminyaka emilutshwana ngangisebenza emtshineni omangalisayo njalo okunzima ukuwusebenzisa okuthiwa yi-Linotype ngilungiselela ukudindwa kwe-Nqabayokulinda le-Vukani! Iwofisi yegatsha yayingaphrinti omagazini ngezindimi zeSouth Africa kuphela, kodwa langezinye izindimi zamazwe amanengi e-Africa. Kwakusithokozisa kakhulu ukubona ukuthi umtshina wokuphrinta owawusisuse eCanada wawusebenza okuzwayo.

Ngokuhamba kwesikhathi ngasebenza kuhlangothi olwalukhangela umsebenzi wokuhumutsha, owokuphrinta lowokuthunyelwa kwamabhuku endaweni ezitshiyeneyo. Ngangilokunengi kokwenza futhi ngangisuthiseka empilweni.

UKUTSHADA KANYE LOMSEBENZI OMUTSHA

Ngo-1968 ngatshada lodade okuthiwa nguLaura Bowen owayehlala duzane leBhetheli. Wayephayona futhi esebenza eBhetheli encedisa uhlangothi lokuhumutsha ngokuthayipha. Ngalezonsuku umuntu owayetshada wayesuka eBhetheli, yikho kwathiwa sibe ngamaphayona aqakathekileyo. Lokhu kwangikhathaza ngoba ngasengihlale iminyaka engu-10 eBhetheli ngiphiwa ukudla lendawo yokuhlala. Pho sasizakwenelisa njani ukubhadala indleko zethu ngemadlana esasiyiphiwa? Ngamunye wethu wayethola 25 rand (ngalesosikhathi eyayilingana le-$35 U.S.) inyanga ngayinye. Kodwa imali le sasiyiphiwa kuphela nxa sifikise amahola lempindela ezifunakalayo futhi sihambise amabhuku okwakukhangelelwe ukuthi siwahambise. Sasiyisebenzisa ukubhadala irenti, ukuthenga ukudla, ukubhadala indleko zokuhamba, ukwelatshwa lezinye izinto esasizidinga.

Kwathiwa siyephayona duzane ledolobho leDurban. Kwakugcwele amaNdiya futhi amanengi awo ayeyizizukulwane zezisebenzi ezabuya eSouth Africa ukuzosebenza emapulazini etshukela ngabo-1875. Lanxa khathesi ayesesenza eminye imisebenzi, kawazange alahle amasiko awo lendlela ayepheka ngayo ukudla kwawo okugoqela amakheri amnandi. Abantu laba babesikhuluma isiKhiwa yikho akuzange kube lesidingo sokuthi sifunde olunye ulimi.

Amaphayona aqakathekileyo kwakumele atshumayele amahola angu-150 ngenyanga. Ngakho ngelanga lokuqala mina loLaura sahlela ukuthi sitshumayele amahola angu-6. Mhlalokho lalikhipha inhlanzi emanzini. Sasingelampindela lezifundo yikho sasizatshumayela endlini ngendlu kuphela. Ngemva kwesikhathi siqalisile ngakhangela iwatshi yami ngabona kukhona kudlule imizuzu engu-40. Ngazibuza ukuthi sizenelisa yini ukufikisa amahola angu-150 okumele atshunyayelwe ngamaphayona aqakathekileyo.

Kungakayi ngaphi sahlela ukuthi sizayenza njani inkonzo yethu. Ilanga ngalinye sasithwala ukudla lekhofi ngefulaski. Sasisithi nxa siphumula sipake imota yethu encane ngaphansi kwesihlahla. Ngezinye izikhathi kwakusiba lokungabantwana okuhle okungamaNdiya okwakusima kusikhangele ngenxa yokuthi sasingumhlobo otshiyeneyo. Ngemva kwensukwana sananzelela ukuthi nxa sesitshumayele amahola amabili kumbe amathathu, usuku lwaluphanga luphele.

Sasikukholisa ukutshumayeza abantu bendawo le ababelomusa. Babehlonipha, belobuntu futhi bemthanda uNkulunkulu. AmaHindu amanengi ayelalela nxa siwatshumayeza. Ayekuthanda ukufunda ngoJehova, ngoJesu, ngeBhayibhili, ngomhlaba omutsha olokuthula kanye lethemba lokuthi abafileyo bazavuswa. Ngemva komnyaka sasesilezifundo zeBhayibhili ezingu-20. Nsuku zonke sasisidla ukudla kwemini lenye yezimuli esasifunda lazo iBhayibhili. Sasithokoza sibili.

Singakaphayoni okwesikhathi esinganani saphiwa omunye umsebenzi. Sacelwa ukuthi siyehambela ezindaweni eziseduze le-Indian Ocean. Iviki ngayinye sasisiba yizethekeli emzini othile futhi sasivakatshela abamemezeli njalo sihamba labo ekutshumayeleni ukuze sibakhuthaze. Abafowethu labodadewethu laba babesiphatha njengamalunga ezimuli zawo futhi sasikholisa ukuba labo labantwababo lokudlalisa izifuyo zabo. Sahambela okweminyaka emibili futhi sakukholisa kakhulu. Sisalibele kwangena ifoni eyayivela ewofisini yegatsha. Umzalwane owafonayo wathi: “Sicela liphenduke eBhetheli.” Mina ngaphendula ngathi: “Siyazikholisela lapha esikhona.” Lanxa kunjalo sasizimisele ukuya loba ngaphi lapho esasingatshelwa ukuthi siyekhona.

UKUBUYELA EBHETHELI

EBhetheli ngafika ngasebenza kuHlangothi Lwenkonzo lapho engangisebenza khona labazalwane ababeqinile ekukhonzeni. Ngalezonsuku ibandla ngalinye lalibhalelwa incwadi eyayisekelwe kulokho umbonisi wesiqinti ayekubhale embikweni wakhe ayewuthumezele egatsheni ngemva kokulihambela. Incwadi lezo zazingezokukhuthaza abamemezeli lokubatshela lokho okwakungabe kudinga ukuthi bakwenze. Abafowethu abangonobhala babesebenza nzima behumutshela esiKhiweni imibiko yababonisi beziqinti eyayibhalwe ngesiXhosa, ngesiZulu langezinye izindimi. Ngemva kwalokho babehumutsha izincwadi ezazivela egatsheni bezisusa esiKhiweni bezisa kwezinye izindimi ze-Africa. Ngiyababonga kakhulu abafowethu laba ababesebenza gadalala abanginceda ukuthi ngizwisise ubunzima abazalwane bethu abansundu ababehlangana labo.

Ngalesosikhathi abantu bemihlobo etshiyeneyo babelendawo ezehlukeneyo okwakumele bahlale kuzo, yikho babengenelisi ukuba ndawonye. Abafowethu labodadewethu abansundu babekhuluma izindimi zabo, betshumayela ngendimi zabo futhi bengena imihlangano yebandla ngendimi zabo.

Balutshwana abantu abansundu engangibazi njengoba amabandla engangingene lawo ayengawesiKhiwa. Kodwa khathesi ngasengizakwenelisa ukufunda ngabo, ngamasiko abo, langendlela ababephila ngayo. Ngafunda ngobunzima abazalwane ababehlangana labo ngenxa yemikhuba eyayisenziwa lapho ababehlala khona lezimfundiso zamatshetshi. Babelesibindi sibili, babengayilandeli imikhuba engasekelwanga eBhayibhilini futhi babengavumi ukwenza izinto zesidimoni lanxa lokho kwakusenza ukuthi baphikiswe okuzwayo ngabemuli lezakhamizi. Emakhaya abantu babezidubekela futhi abanengi babengafundanga kangako kumbe bengazange balugxobe esikolo. Lanxa kunjalo, babelihlonipha iBhayibhili.

Ngaba lesibusiso sokusebenza endabeni zomthetho eziphathelane lokuthi abantwana bangabanjwa ngamandla ukuthi benze izinto zamasonto esikolo lezokungangeni kwezombusazwe. Kwakukhuthaza ukubona indlela abantwana laba abangoFakazi ababexotshwe esikolo ngenxa yokwala ukuthandaza lokuhlabela ingoma zesonto ababeqotho futhi belesibindi ngayo.

Abafowethu labodadewethu kwelinye ilizwe elincane le-Africa elalithiwa yiSwaziland (khathesi eselithiwa yi-Eswatini) labo bahlangana lobunye ubunzima. Ngesikhathi kusifa iNkosi uSobhuza Yesibili, bonke abantu belizwe lelo kwakumele benze imikhuba eyenziwa nxa kulomuntu ofileyo. Amadoda wonke kwakumele agele impabanga, abesifazana batshiye inwele zizimfitshane. Abafowethu labodadewethu abanengi bahlukuluzwa ngenxa yokwala ukuhlanganyela emkhubeni lo wokukhonza amadlozi. Kwasithokozisa sibili ukubona indlela ababeqotho ngayo kuJehova. Ukuthembeka, ubuqotho, lokubekezela kwabafowethu labodadewethu be-Africa kwasifundisa okunengi njalo kwaqinisa ukholo lwethu.

NGAPHINDA NGASEBENZA LAPHO OKUPHRINTWA KHONA

Ngo-1981 ngatshelwa ukuthi ngiphinde ngiyesebenza lapho okwakuphrintwa khona ukuze ngiyencedisa emsebenzini wokuphrintwa kusetshenziswa amakhompiyutha. Leso kwakuyisikhathi esimnandi. Indlela zokuphrinta zasezitshintsha sibili. Enye indoda eyayisebenza ekhampanini ethengisa imitshina yanika igatsha umtshina omutsha njalo yasivumela ukuthi sibone ukuthi usebenza njani kungelambadalo. Lokhu kwenza satshintsha imitshina engu-9 esasilayo safaka engu-5 emitsha. Saphinda safaka umtshina omutsha wokuphrinta. Umsebenzi wokuphrinta wawusumnengi kulakuqala.

Amakhompiyutha asinceda ukuthi sisungule indlela ezintsha zokuhlela amabala emakhasini kusetshenziswa i-MEPS, (Multilanguage Electronic Publishing System). Ezempucuko zazitshintshile sibili kusukela ngesikhathi esafika ngaso eSouth Africa. (Isaya. 60:17) Ngalesosikhathi sonke sobane esavela eBhetheli yeCanada sasesitshade labodade abangamaphayona ababemthanda uJehova. Mina loBill sasilokhu siseBhetheli. UKen loDennis bona basebelezimuli futhi babehlala duzane leBhetheli.

Imisebenzi yayilokhu isiba mnengi egatsheni. Amabhuku asekelwe eBhayibhilini ayehunyutshwa njalo ephrintwa ngendimi ezazilokhu zisanda abesethunyelwa kwamanye amagatsha. Umsebenzi wawusumnengi okokuthi kwasekufuneka iBhetheli entsha. Abazalwane bayakha endaweni enhle esentshonalanga yeJohannesburg njalo yanikelwa ngo-1987. Kwakuyisibusiso ukuhlanganyela emsebenzini lo omkhulu owawusenziwa kanye lokuba lilunga leKhomithi Yegatsha eSouth Africa okweminyaka eminengi.

OMUNYE UMSEBENZI OMUTSHA

Samangala kakhulu ngo-2001 ngesikhathi sicelwa ukuthi siye eMelika ukuze ngiyekuba lilunga leKhomithi Yegatsha eyayisanda kubunjwa. Lanxa kwasidanisa ukutshiya imisebenzi esasiyenza kanye labangane bethu eSouth Africa, sasithokoza ukuqala impilo entsha singamalunga emuli yeBhetheli eMelika.

Kodwa sasikhathazekile ngoba sasizabe sesikhatshana lonina kaLaura owayesegugile. Kulutshwana esasingamenzela khona sesiseNew York kodwa odadewabo bakaLaura abathathu bathi bazamnakekela. Bathi, “Thina kasenelisi ukuba senkonzweni yesikhathi sonke kodwa nxa singanakekela umama lizenelisa ukuqhubeka ngomsebenzi wenu.” Siyababonga sibili ngalokho abakwenzayo.

Umnewethu kanye lomkakhe ababehlala eToronto eCanada labo babenakekela umama owayesengumfelokazi. Ngalesosikhathi kwasekuleminyaka edlula 20 behlala laye. Siyababonga kakhulu ngakho konke abakwenzela umama ngesikhathi bemnakekela kwaze kwaba lilanga afa ngalo, kungelasikhathi eside sifike eNew York. Kumnandi sibili ukuba lamalunga emuli azimisele ukutshintsha impilo zawo ukuze anakekele abazali asebegugile lanxa lokho kungaba ngumsebenzi onzima kakhulu.

Okweminyaka eminengi sengiseMelika bengincedisa emsebenzini wokuphrintwa kwamabhuku osuthuthukisiwe kusetshenziswa ezempucuko njalo wenziwa waba lula. Eminyakeni esanda kwedlula bengisebenza kuHlangothi Lokuthenga. Kuyathokozisa ukuthi okweminyaka engu-20 edlulileyo bengililunga lemuli le enkulu. Khathesi sesilabafowethu labodadewethu abasebenza eBhetheli abangaba ngu-5 000 kanye lama-commuter angaba ngu-2 000.

Eminyakeni engu-60 eyadlulayo ngangingacabangi ukuthi ngizabe ngilapha esengikhona khathesi. ULaura ubengisekela ngenhliziyo yonke okweminyaka yonke le. Impilo yami ibimnandi sibili. Sikholisile ukwenza imisebenzi yenkonzo etshiyeneyo kanye lokusebenza labafowethu labodadewethu abahle, okuhlanganisa lalabo abasemagatsheni amanengi esasiwavakatshela ngesikhathi sihambela amagatsha. Khathesi sengileminyaka edlula 80, yikho angiselamisebenzi eminengi engiyenzayo njengoba kulabafowethu abanengi abasesebatsha abaqeqetshwe ukuthi benze imisebenzi eminengi engangiyenza.

Umhubi wabhala wathi: “Sibusisekile isizwe uNkulunkulu waso onguJehova.” (Hubo. 33:12) Aliqiniso sibili amazwi la. Kuyangithokozisa okwamagama ukuthi ngenelisile ukukhonza uJehova ndawonye labantu bakhe abathokozayo.