Sekela Umkhokheli Wethu UJesu

1. Kuyini okuyintando kaNkulunkulu lamuhla?

INTANDO kaNkulunkulu yikuthi izindaba ezinhle zoMbuso zitshunyayelwe emhlabeni wonke. (Mak. 13:10; 1 Tim. 2:3, 4) Lo ngumsebenzi kaJehova futhi uqakatheke kakhulu okokuthi ukhethe iNdodana yakhe ayithandayo ukuthi iwuqondise. Siyaqiniseka ukuthi umsebenzi wokutshumayela uzaqedwa ngendlela uJehova ayifunayo ukuphela kungakafiki ngoba sikhokhelwa nguJesu.—Mat. 24:14.

2. Sizaxoxa ngani esihlokweni lesi?

² Esihlokweni lesi sizabona ukuthi uJesu uyisebenzisa njani ‘inceku yakhe ethembekileyo lehlakaniphileyo’ ukuthi isinike ukudla okuqinisa ukholo njalo ihlele abalandeli bakhe ukuthi benze umsebenzi omkhulu wokutshumayela. (Mat. 24:45) Sizabona lokuthi singenzani ukuze sisekele uJesu lenceku ethembekileyo.

UJESU UYAKHOKHELA EMSEBENZINI WOKUTSHUMAYELA

3. UJesu unikwe amandla okwenzani?

³ UJesu nguye okhokhelayo emsebenzini wokutshumayela. Kungani sisitsho njalo? Esezakuya ezulwini wahlangana labanye abalandeli bakhe entabeni eseGalile. Wabatshela wathi: “Sengiphiwe amandla wonke ezulwini lasemhlabeni.” Nanzelela ukuthi waqhubeka esithini: “Ngakho-ke hambani liyekwenza abantu bezizwe zonke babe ngabafundi.” (Mat. 28:18, 19) Yikho amanye amandla awaphiweyo ngawokuqondisa umsebenzi wokutshumayela.

4. Kungani sisithi uJesu ulokhu ekhokhela emsebenzini wokutshumayela?

⁴ UJesu wathi umsebenzi wokutshumayela lowokwenza abafundi wawuzakwenziwa ‘ezizweni zonke’ njalo wayezakuba labafundi bakhe “kuze kube yisiphetho somumo lo wezinto.” (Mat. 28:20) Amazwi la asitshengisa ukuthi uJesu wayezaqhubeka ekhokhela emsebenzini wokutshumayela kuze kube sesikhathini sethu.

5. Kuyini esikwenzayo okugcwalisa isiphrofetho esikuHubo 110:3?

⁵ UJesu wayekwazi ukuthi izisebenzi zazingasoze ziswelakale ekupheleni komumo lo wezinto. Wayekwazi ukuthi amazwi omhubi ayezagcwaliseka. Athi: “Amabutho akho azazinikela mhla uphuma impi.” (Hubo. 110:3) Nxa utshumayela izindaba ezinhle uyabe usekela uJesu lenceku ethembekileyo njalo uncedisa ukugcwalisa isiphrofetho lesi. Umsebenzi wokutshumayela uqhubekela phambili kodwa zikhona inhlupho esihlangana lazo.

6. Yiluphi olunye uhlupho abamemezeli boMbuso abahlangana lalo?

⁶ Olunye uhlupho abamemezeli boMbuso abahlangana lalo yikuphikiswa. Abahlamuki labakhokheli benkolo labezombusazwe batshela abantu amanga ngomsebenzi wethu. Nxa izihlobo zethu labantu esibajayeleyo kanye lesisebenza labo bengakhohliswa ngamanga la bangazama ukusenza siyekele ukukhonza uJehova lokutshumayela. Kwamanye amazwe izitha zethu ziyasethusela, zibophe abafowethu labodadewethu njalo zivalele abanye emajele. Lokhu akusimangalisi ngoba uJesu wathi: “Lizazondwa yizizwe zonke ngenxa yebizo lami.” (Mat. 24:9) Ukuzondwa ngabantu kutshengisa ukuthi esikwenzayo kuyamthokozisa uJehova. (Mat. 5:11, 12) UDeveli nguye obangela ukuthi siphikiswe. Kodwa uJesu ulamandla kulaye. Uyasincedisa ukuthi sitshumayele izindaba ezinhle ezizweni zonke.

7. Kuyini okutshengisa ukuthi iSambulo 14:6, 7 siyagcwaliseka?

⁷ Olunye uhlupho esilalo yikuthi sitshumayeza abantu abakhuluma indimi ezitshiyeneyo. Embonweni kaJohane, uJesu wamtshengisa ukuthi izindaba ezinhle zazizatshunyayelwa lanxa abantu bekhuluma izindimi ezitshiyeneyo. (Bala iSambulo 14:6, 7.) Lokhu kwenzakala njani? Namuhla sinceda abantu abanengi ukuthi bazwe izindaba ezinhle zoMbuso. Abantu emhlabeni jikelele bayenelisa ukubala izinto ezisekelwe eBhayibhilini kuwebhusayithi yethu i-jw.org ngoba itholakala ngezindimi ezedlula 1 000. IQula Elikhokhelayo lanika imvumo yokuthi kuhunyutshwe ibhuku esilisebenzisa ukwenza abafundi elithi Ungathokoza Kuze Kube Nini Lanini! ngezindimi ezedlula 700. Kanti njalo kwenziwe lamavidiyo olimi lwezandla ukuze kuncedwe labo abangakhulumiyo njalo kwenziwe lamabhuku e-braille alabo abangaboniyo. Iziphrofetho zeBhayibhili zigcwaliseka sikhangele sibili. Abantu ‘abaphuma kuzo zonke izindimi lezizwe’ bafunda ukukhuluma ulimi ‘oluhlambulukileyo’ lweqiniso eliseBhayibhilini. (Zek. 8:23; Zef. 3:9) Konke lokhu kuyenzakala ngoba uJesu Khristu nguye osikhokhelayo.

8. Umsebenzi wethu wokutshumayela uphumelele kangakanani?

⁸ Lamuhla inhlanganiso kaJehova ibunjwa ngabantu abedlula 8 miliyoni abasemazweni angu-240, futhi umnyaka ngamunye kubhabhathizwa izinkulungwane. Kodwa okuqakatheke kakhulu ukwedlula inani labantu ababa ngoFakazi ‘yibuntu obutsha’ asebelabo. (Kol. 3:8-10) Abanengi batshiya ukuziphatha okubi kwezemacansini, udlakela, ubandlululo lokuzigqaja ngesizwe sakibo. Lokhu kugcwalisa isiphrofetho esiku-Isaya 2:4 esithi ‘abasoze bafundele ukulwa izimpi futhi.’ Nxa sisebenza nzima ukuthi sigqoke lobuntu obutsha singanceda abantu abasibonayo babuye enhlanganisweni kaNkulunkulu njalo siyabe sitshengisa ukuthi silandela uKhristu uJesu umkhokheli wethu. (Joh. 13:35; 1 Phet. 2:12) Lokhu akuzenzakaleli nje. UJesu nguye osincedisayo ukuthi sikwenze.

UJESU UBEKA INCEKU

9. Ngokwalokho okutshiwo kuMathewu 24:45-47, uJesu wathi kwakuzakwenzakalani ngesikhathi sokucina?

⁹ Bala uMathewu 24:45-47. UJesu wathi ezinsukwini zokucina wayezabeka ‘inceku ethembekileyo lehlakaniphileyo’ ukuthi isinike ukudla okusiqinisa ukholo. Yikho inceku le isebenza nzima khathesi ngoba siphila ezinsukwini zokucina. Umkhokheli wethu usebenzisa iqenjana lamadoda agcotshiweyo ukuze anike abantu bakaNkulunkulu kanye lalabo abalesifiso sokufunda iqiniso ‘ukudla ngesikhathi esifaneleyo.’ Amadoda la awaziboni engababusi bokholo lwabanye. (2 Khor. 1:24) Ayakwazi ukuthi uJesu Khristu nguye “umkhokheli lomlawuli” wabantu bakhe.—Isaya. 55:4.

10. Yiliphi ibhuku elisemfanekisweni elakunceda ukuthi ufunde ngoJehova?

¹⁰ Kusukela ngo-1919, inceku ethembekileyo ibidinda amabhuku ancede abalesifiso sokufunda ngoJehova ukuthi bathole iqiniso eliseLizwini likaNkulunkulu. Ngo-1921 inceku yadinda ibhuku elithi The Harp of God ukuze kuncedwe labo abalesifiso sokufunda ukuthi balazi iqiniso leBhayibhili eliyisisekelo. Njengoba izikhathi zazitshintsha kwadindwa amanye. Wena yiliphi elakunceda ukuthi umazi njalo umthande uBaba wethu osezulwini? Ngelithi “Let God Be True” yini, elithi The Truth That Leads to Eternal Life, elithi Ungaphila Phakade EPharadesi Emhlabeni, elithi Ulwazi Oluholela Ekuphileni Okumi Phakade, elithi IBhayibhili Lifundisani Sibili?, elithi IBhayibhili Lisifundisani? kumbe libhuku lethu elitsha elithi Ungathokoza Kuze Kube Nini Lanini! Amabhuku la enzelwa ukuthi sincede abantu babe ngabafundi njalo abesethulwa ngesikhathi lapho abedingeka khona kakhulu.

11. Kungani kuqakathekile ukuthi sonke sibe lolwazi olunengi ngoJehova langeBhayibhili?

¹¹ Abalesifiso sokufunda iqiniso ayisibo bodwa okumele babe lolwazi olujulileyo ngoJehova langeBhayibhili. Sonke siyaludinga. Umphostoli uPhawuli wabhala wathi: “Ukudla okuqinileyo ngokwabantu abavuthiweyo.” UPhawuli waphinda wathi ukusebenzisa lokho esikufunda eBhayibhilini kuyasinceda ukuthi ‘sehlukanise okuhle lokubi.’ (Heb. 5:14) Namuhla kungaba nzima ukulandela imithetho kaJehova ngoba abantu abanengi abasaziphathanga. Kodwa uJesu usinceda ukuthi singabalingiseli ngokuba leqiniso lokuthi siyakuthola ukudla okuqinisa ukholo lwethu. Konke asinika khona kusekelwe eLizwini likaNkulunkulu eliphefumulelweyo. Inceku ethembekileyo isilungiselela njalo isinike ukudla iqondiswa nguJesu.

12. Silibona njani ibizo likaNkulunkulu?

¹² Siyalikhazimulisa ibizo likaNkulunkulu njengoJesu. (Joh. 17:6, 26) Ngokwesibonelo ngo-1931 saqalisa ukubizwa ngebizo elisekelwe eBhayibhilini elithi oFakazi bakaJehova sitshengisa ukuthi siyaliqakathekisa ibizo likaBaba wethu osezulwini lokuthi sifuna ukubizwa ngalo. (Isaya. 43:10-12) Kusukela ngo-October ngomnyaka lowo ibizo likaNkulunkulu laqalisa ukubhalwa kukhasi lokuqala lemagazini le. Kanti njalo ku-Nguqulo Yomhlaba Omutsha sibuyisele ibizo likaNkulunkulu endaweni elalivele litholakala kuzo kudala. Lokhu kutshiyene lokwenziwe zinkolo zamanga ezikhiphe ibizo likaJehova emaBhayibhilini azo amanengi.

UJESU UHLELA ABALANDELI BAKHE

13. Kuyini okwenza ungathandabuzi ukuthi uJesu usebenzisa ‘inceku ethembekileyo lehlakaniphileyo’ lamuhla? (UJohane 6:68)

¹³ UJesu usebenzise ‘inceku ethembekileyo lehlakaniphileyo’ ukuze ahlele abalandeli bakhe babe yinhlanganiso emangalisayo emhlabeni esekela ukukhonza kweqiniso. Wena uyibona njani inhlanganiso le? Engxenye lawe uzizwa njengoPhetro owaphendula uJesu esithi: “Singaya kubani? Wena ulamazwi okuphila okungapheliyo.” (Joh. 6:68) Ngabe singaphi lamuhla aluba asizange siyazi inhlanganiso kaJehova? UKhristu usebenzise yona ukuze asinike konke okusinceda sihlale siqinile ekukhonzeni. Uyasifundisa lokuthi siwenze njani umsebenzi wokutshumayela. Uphinda asincedise ukuthi sigqoke “ubuntu obutsha” ukuze sithokozise uNkulunkulu.—Efe. 4:24.

14. Ukuba senhlanganisweni kaJehova kukuncede njani ngesikhathi somkhuhlane we-COVID-19?

¹⁴ UJesu utshengise ukuthi uhlakaniphile ngokusinika iziqondiso ezisincedayo ngezikhathi ezinzima. Sazibonela ukuthi iziqondiso asinika zona ziyasinceda ngesikhathi kuqala umkhuhlane we-COVID-19. Abantu abanengi babengakwazi ukuthi benzeni kodwa uJesu waba leqiniso lokuthi sithola iziqondiso ezisinceda ukuthi sihlale sivikelekile. Sakhuthazwa ukuthi sigqoke okokuvala umlomo lamakhala nxa sisebantwini lokuthi siqhelelane labanye. Abadala bakhuthazwa ukuthi bahlale bethintana labamemezeli ukuze bakwazi ukuthi kuyini abangabe bekudinga okokuziphilisa kumbe okuzabanceda ukuthi baqine ekukhonzeni. (Isaya. 32:1, 2) Imibiko evela kubafowethu beQula Elikhokhelayo yasinika ezinye iziqondiso njalo yasikhuthaza.

15. Yiziphi iziqondiso esazitholayo mayelana lokungena imihlangano lokutshumayela ngesikhathi se-COVID-19 futhi kwaba layiphi impumela?

¹⁵ Ngesikhathi somkhuhlane we-COVID-19 saphinda sanikwa iziqondiso ezimayelana lokungena imihlangano lokutshumayela. Kungakayi ngaphi saqalisa ukungena imihlangano yebandla lemihlangano emikhulu sisebenzisa ezempucuko. Saqalisa lokutshumayela ngefoni langencwadi. UJehova ukubusisile konke ebesikwenza. Amagatsha amanengi abike ukuthi abamemezeli bande kakhulu ngesikhathi lesi. Kunengi okukhuthazayo okwenzakeleyo.—Khangela ibhokisi elithi “UJehova Uyawubusisa Umsebenzi Wokutshumayela.”

16. Kuyini esingakuthandabuziyo?

¹⁶ Abanye bangabe babecabanga ukuthi iziqondiso esasiziphiwa yinhlanganiso mayelana le-COVID-19 zazingadingeki kodwa zikhathi zonke babecina bezibonela ukuthi iziqondiso lezi zazisivikela. (Mat. 11:19) Nxa singacabangisisa ngendlela uJesu akhokhela kuhle ngayo abantu bakhe asisoze sithandabuze ukuthi uJehova leNdodana yakhe bazahlala belathi loba kungaze kwenzakaleni.—Bala uHebheru 13:5, 6.

17. Uzizwa njani ngokukhokhelwa nguJesu?

¹⁷ Kuyisibusiso ukusebenza sikhokhelwa nguJesu. Siyingxenye yenhlanganiso emanyeneyo kungelani lokuthi silamasiko atshiyeneyo, sivela endaweni ezitshiyeneyo njalo sikhuluma indimi ezitshiyeneyo. Sithola imfundo eqinisa ukholo njalo siyaqeqetshwa ukuze siwenze kuhle umsebenzi wokutshumayela. Kanti njalo sonke siyancediswa ukuthi sigqoke ubuntu obutsha njalo sifundiswa ukuthi sithandane. Silezizatho ezinengi zokuzigqaja ngomkhokheli wethu uJesu!