Ungayithola Njani Intokozo Yeqiniso?

1. Kuyini esikudingayo empilweni futhi kuhambelana njani lentokozo?

INTOKOZO yeqiniso ayisikho kuzizwa uthokoza nje okwesikhatshana. Yona ungaba layo okwempilo yakho yonke. UJesu wakuchasisa lokhu eNtshumayelweni yaseNtabeni lapho esithi: “Bayathokoza abakunanzelelayo ukuthi bayamdinga uNkulunkulu.” (Mat. 5:3) UJesu wayekwazi ukuthi abantu badalwa belesifiso esikhulu sokwazi lokukhonza uMdali wabo uJehova uNkulunkulu. Njengoba uJehova ‘enguNkulunkulu othokozayo’ labo abamkhonzayo labo bangathokoza.—1 Thim. 1:11.

2-3. (a) UJesu wathi ngobani abanye abathokozayo? (b) Sizaxoxa ngani esihlokweni lesi njalo kungani kumele sixoxe ngakho?

² Kumele singabi lenhlupho yini ukuze sithokoze? Hatshi. Entshumayelweni yakhe uJesu wakhuluma amazwi angasimangalisa. Wathi “abalilayo” bangathokoza, kungelani lokuthi balila ngenxa yezono abazenzayo loba inhlupho abaphakathi kwazo. UJesu watsho okufananayo ngalabo “asebeke bahlukuluzwa ngenxa yokwenza okulungileyo” loba ‘abathethiswa’ ngenxa yokuba ngabalandeli bakaKhristu. (Mat. 5:4, 10, 11) Kodwa kungenzakala njani ukuthi umuntu athokoze okweqiniso ezimeni ezinje?

³ UJesu wayesifundisa ukuthi okungenza sithokoze yikusondela kuNkulunkulu hatshi ukungabi lenhlupho. (Jak. 4:8) Esihlokweni lesi sizaxoxa ngesingakwenza ukuze sithole intokozo yeqiniso.

FUNDA NGOJEHOVA

4. Kuyini okokuqala okumele sikwenze ukuze sithole intokozo yeqiniso? (IHubo 1:1-3)

⁴ OKOKUQALA: Kumele sifunde ngoJehova ukuze sithole intokozo yeqiniso. UJesu wafanisa iLizwi likaNkulunkulu lokudla. Abantu lezinyamazana bayakudinga ukudla ukuze baqhubeke bephila. Kodwa abantu yibo bodwa abangafunda ngoJehova uNkulunkulu futhi kumele bakwenze lokho. Yikho uJesu wathi: “Umuntu akumelanga aphile ngesinkwa sodwa, kodwa langawo wonke amazwi aphuma emlonyeni kaJehova.” (Mat. 4:4) Akumelanga kube lelanga elidlulayo singazange sibale amazwi aligugu aseLizwini likaNkulunkulu. Umhubi wathi: ‘Uyajabula umuntu othokoziswa ngumthetho kaJehova, ubala umthetho kaNkulunkulu ubusuku lemini.’—Bala iHubo 1:1-3.

5-6. (a) Kuyini esikutshelwa liBhayibhili? (b) Ukufunda iBhayibhili kungasinceda njani?

⁵ UJehova uyasithanda yikho esitshengisa eLizwini lakhe lokho okumele sikwenze ukuze sithokoze. Uyasitshela ukuthi wasidalelani. Uyasifundisa lokho okumele sikwenze ukuze sisondele kuye lokumele sikwenze ukuze sithethelelwe izono. Uphinda asitshele ngezinto ezinhle azasenzela zona esikhathini esizayo. (Jer. 29:11) Izinto lezi esizifunda eBhayibhilini zenza sithokoze sibili.

⁶ Siyakwazi ukuthi iBhayibhili liphinda libe lamacebo asinceda nsuku zonke. Siyathokoza nxa siwalandela. Nxa udanile ngenxa yenhlupho zinike isikhathi esinengi sokubala iLizwi likaNkulunkulu njalo ucabangisise ngalokho okubalayo. UJesu wathi: “Abathokozayo yilabo abalizwayo ilizwi likaNkulunkulu balilandele!”—Luk. 11:28.

7. Kuyini okungakunceda ukuthi uthole okunengi nxa ubala iLizwi likaNkulunkulu?

⁷ Nxa ubala iLizwi likaNkulunkulu ungajahi. Zinike isikhathi sokukholisa okubalayo. Nanku umzekeliso: Ake sithi omunye umuntu ukuphekele ukudla okuthanda kakhulu. Kodwa ngenxa yokuthi udla uphangisa kumbe ulokunengi okucabangayo awukunambithi ukuze uzwe ukuthi kumnandi kangakanani. Usuqedile ukudla uyananzelela ukuthi udle uphangisa ubusufisa ukuthi ngabe udle kancane kancane wakukholisa konke ukudla okade ukufaka emlonyeni. Kunjalo langokufunda iBhayibhili. Nxa singalibala sigijima singehluleka ukukholisa esikubalayo. Zinike isikhathi eseneleyo sokulibala, ukubone ngelihlo lengqondo okubalayo, uwezwe amazwi akhulunywa ngabantu njalo ucabangisise ngokubalayo. Konke lokhu kuzakwenza uthokoze.

8. “Inceku ethembekileyo lehlakaniphileyo” iwenza njani umsebenzi wayo? (Khangela lamabala angaphansi.)

⁸ UJesu wabeka “inceku ethembekileyo lehlakaniphileyo” ukuze isinike ukudla okuqinisa ukholo ngesikhathi esifaneleyo futhi asilambi.b (Mat. 24:45) Konke inceku ethembekileyo esinika khona kuthethwe eMibhalweni ephefumulelweyo. (1 Thes. 2:13) Yikho ukudla lokhu kwenza siyazi imicabango kaJehova eseBhayibhilini. Lesi yiso isizatho esenza sibale iNqabayokulinda le-Vukani! kanye lezihloko ezitholakala ku-jw.org. Siyalungiselela imihlangano yaphakathi kweviki leyangempelaviki. Kanti njalo siyabukela uhlelo lwe-JW Broadcasting^® inyanga ngayinye. Nxa singaba leqiniso lokuthi siyalibala iBhayibhili njalo silitaditshe sizakwenelisa ukwenza okwesibili okungasinceda ukuthi sithole intokozo yeqiniso.

LALELA IMITHETHO KAJEHOVA

9. Yikuphi okwesibili okungenza sithole intokozo yeqiniso?

⁹ OKWESIBILI: Kumele silalele imithetho kaJehova ukuze sibe lentokozo yeqiniso. Umhubi wabhala wathi: “Bayathokoza bonke abesaba uJehova, labo abahamba ezindleleni zakhe.” (Hubo. 128:1) Ukwesaba uJehova kutsho ukuthi simhlonipha kakhulu okokuthi asifuni ukwenza loba yini engamdanisa. (Zaga. 16:6) Yikho siyazama ngamandla wonke ukulandela imithetho eseLizwini lakhe emayelana lokuqondileyo lokungaqondanga. (2 Khor. 7:1) Sizathokoza nxa singenza lokho uJehova akuthandayo njalo sixwaye izinto azizondayo.—Hubo. 37:27; 97:10; Rom. 12:9.

10. Kumele senzeni nxa sesiyazi intando kaNkulunkulu? (URoma 12:2)

¹⁰ Bala uRoma 12:2. Umuntu angabe ekwazi ukuthi uJehova ulelungelo lokutsho ukuthi okulungileyo lokungalunganga yikuphi kodwa kumele azikhethele ukuthi uzayilandela yini imithetho kaNkulunkulu. Ngokwesibonelo, umuntu engabe ekwazi ukuthi uhulumende ulelungelo lokutsho ukuthi umuntu kumele agijime ngesiqubu esinganani emgwaqweni. Kodwa angabe engazimiselanga ukulandela imithetho enjalo. Yikho angagijima ngesiqubu esedlula leso esibekiweyo. Ngendlela efananayo, indlela esiphila ngayo yiyo etshengisa ukuthi siyakholwa yini ukuthi ukulandela imithetho kaJehova kuyanceda. (Zaga. 12:28) UDavida wayezizwa ngaleyondlela yikho wathi ngoJehova: “Uyangifundisa indlela okumele ngiphile ngayo, kuyangithokozisa kakhulu ukuba phambi kwakho, esandleni sakho sokudla kulentokozo engapheliyo.”—Hubo. 16:11.

11-12. (a) Kuyini okumele sikunanzelele nxa sikhathazekile loba sidanile? (b) Amazwi akuFiliphi 4:8 angasinceda njani nxa sikhetha okokuzilibazisa?

¹¹ Nxa sikhathazekile loba sidanile singafisa ukwenza into ezakwenza sikhohlwe inhlupho zethu. Lokhu kuyazwisiseka kodwa kumele sinanzelele ukuthi singenzi izinto uJehova azizondayo.—Efe. 5:10-12, 15-17.

¹² Encwadini umphostoli uPhawuli ayibhalela abaseFiliphi wabakhuthaza ukuthi bacabange ngakho konke ‘okulungileyo, konke okumsulwa, konke okuthandekayo, langakho konke okuhle.’ (Bala uFiliphi 4:8.) Lanxa uPhawuli wayengakhulumi ngokuzilibazisa, lokho akutshoyo kungasinceda nxa sikhetha okokuzilibazisa. Ngokwesibonelo, lapho okulebala elithi “konke” evesini le, cabanga ngengoma ozilalelayo, amafilimu owabukelayo, amabhuku owabalayo lemidlalo yamavidiyo oyithandayo. Ukwenza lokhu kungakunceda ukwazi lokho uJehova akwamukelayo lalokho angakwamukeliyo. Sifuna indlela esiphila ngayo ihambelane lemithetho kaJehova ephakemeyo. (Hubo. 119:1-3) Lokhu kuzakwenza sibe lomzwangedwa ohlanzekileyo futhi senelise ukwenza okwesithathu okungenza sibe lentokozo yeqiniso.—Imiseb. 23:1.

QAKATHEKISA UKUKHONZA UJEHOVA

13. Kuyini okwesithathu okwenza sithole intokozo yeqiniso? (UJohane 4:23, 24)

¹³ OKWESITHATHU: Woba leqiniso lokuthi uqakathekisa ukukhonza uJehova ukwedlula loba yini. Kufanele simkhonze uJehova njengoba enguMdali wethu. (Isam. 4:11; 14:6, 7) Yikho okumele sikuqakathekise kakhulu yikumkhonza ngendlela yena ayifunayo, “ngomoya langeqiniso.” (Bala uJohane 4:23, 24.) Sifuna umoya ongcwele kaNkulunkulu usiqondise ukuze indlela esimkhonza ngayo ihambelane leqiniso eliseLizwini lakhe. Kumele siqakathekise ukukhonza lanxa sihlala elizweni lapho umsebenzi wethu ongavunyelwa khona. Khathesi kulabafowethu labodadewethu abedlula 100 abasemajele ngenxa yokuthi bangoFakazi bakaJehova.c Lanxa kunjalo bayathokoza ngoba benza loba yini abangayenza ukuze bathandaze, bataditshe futhi batshele abanye ngoNkulunkulu wethu langoMbuso wakhe. Lanxa singathethiswa loba sihlukuluzwe siyathokoza ngoba siyakwazi ukuthi uJehova ulathi njalo uzasibusisa.—Jak. 1:12; 1 Phet. 4:14.

ISIBONELO SENTOKOZO YEQINISO

14. Kuyini okwenzakala komunye umzalwane osakhulayo eTajikistan futhi kungani kwenzakala?

¹⁴ Abanye abafowethu labodadewethu benelisile ukuba lentokozo yeqiniso lanxa bephakathi kobunzima ngenxa yokuthi benze izinto ezintathu esesixoxe ngazo. Ngokwesibonelo, ngesikhathi uJovidon Bobojonov oweTajikistan eleminyaka engu-19 wala ukuba sebuthweni lelizwe. Ngo-October 4 2019, wathathwa wavalelwa ejele okwezinyanga, ephathwa njengesigangi. Indaba le yasakazwa emazweni amanengi. Kwabikwa ukuthi watshaywa yiziphathamandla zizama ukumbamba ngamandla ukuthi asekele ibutho lokuthi agqoke iyunifomu yalo. Ngemva kwalokho watholakala elecala, wagwetshwa wasevalelwa futhi wayesetshenziswa nzima ejele. Wacina ekhululwe ngumongameli welizwe. Kusenzakala konke lokhu, uJovidon waqhubeka eqotho futhi ethokoza. Wakwenza njani lokhu? Wahlala eqakathekisa ukukhonza uNkulunkulu.

15. Kuyini okwanceda uJovidon ukuthi aqhubeke efunda ngoJehova ejele?

¹⁵ UJovidon waqhubeka efunda ngoJehova lanxa wayengelaBhayibhili loba amabhuku ethu ejele. Abafowethu labodadewethu bakuleyondawo babemphathela ukudla futhi babebhala umbhalo wosuku emigodleni eyayilokudla. Lokhu kwamnceda ukuthi enelise ukubala iBhayibhili njalo acabangisise ngalo nsuku zonke. Esephumile ejele wacebisa labo abangakaze bahlukuluzwe wathi: “Kuqakathekile ukuthi usebenzise inkululeko olayo khathesi ukuthi ufunde okunengi ngoJehova ngokubala iLizwi lakhe lamabhuku ethu.”

16. Kuyini uJovidon ayecabanga ngakho kakhulu?

¹⁶ Umfowethu uJovidon walalela imithetho kaJehova. Waqhubeka ecabanga ngoJehova lalokho akuqakathekisayo kulokuthi acabange ngezinto ezimbi loba aziphathe kubi. UJovidon wayebuka izinto ezidalwe nguJehova. Nsuku zonke wayevuka esizwa inyoni zihlabela njalo ebusuku wayebuka inyanga lezinkanyezi. Uthi: “Izipho lezi ezivela kuJehova zangenza ngathokoza futhi zangiqinisa.” Nxa singaqakathekisa lokho uJehova asinika khona lalokho asifundisa khona, sizathokoza njalo intokozo leyo izasinceda ukuthi siqinisele nxa sisebunzimeni.

17. Amazwi aku-1 Phetro 1:6, 7 angasebenza njani emuntwini osebunzimeni obuhambelana lobukaJovidon?

¹⁷ UJovidon waqakathekisa ukukhonza uJehova. Wayekwazi ukuthi kuqakathekile ukuthi ahlale eqotho kuNkulunkulu. UJesu wathi: “NguJehova uNkulunkulu wakho okumele umkhonze njalo nguye yedwa okumele umenzele inkonzo engcwele.” (Luk. 4:8) Abakhokheli bebutho kanye lamasotsha babefuna uJovidon ayekele ukuba nguFakazi kaJehova. Kodwa wathandaza kakhulu emini lebusuku ecela uJehova ukuthi amncedise angakhalali kodwa ahlale ethembekile. Lanxa wayephathwa kubi, wahlala ethembekile. Khathesi uyathokoza ngenxa yokuthi uselokholo oluqinileyo olwaqiniswa yikubotshwa, ukutshaywa lokuvalelwa ejele.—Bala u-1 Phetro 1:6, 7.

18. Singenzani ukuze sihlale sithokoza?

¹⁸ UJehova uyakwazi ukuthi kuyini okungenza sithole intokozo yeqiniso. Nxa ungenza izinto ezintathu esixoxe ngazo uzahlala uthokoza lanxa uhlangana lobunzima. Lawe uzatsho amazwi athi: “Bayathokoza abantu abenza uJehova abe nguNkulunkulu wabo.”—Hubo. 144:15.