“Ilangabi LikaJah” Kalihlale Livutha

1. IBhayibhili lisitshelani ngothando lweqiniso?

“AMALANGABI othando angumlilo ovuthayo, ilangabi likaJah. Impophoma zamanzi ngeke zilucitshe uthando, lemifula ngeke ilukhukhule.”b (Ingoma. 8:6, 7) Amavesi la aluchasisa kuhle uthando lweqiniso. Aqinisekisa abantu abatshadileyo ukuthi uthando lwabo lungahlala luvutha lungapheli.

2. Kuyini okungenziwa ngabatshadileyo ukuze uthando lwabo luhlale luvutha?

² Abatshadileyo kungumsebenzi wabo ukuthi bagcine uthando lwabo luvutha. Ngokwesibonelo, nxa umlilo ukhwezelwa uyaqhubeka ubhebha kodwa nxa ungasakhwezelwa ucina usucitshile. Lothando lwendoda lomfazi lungahlala luvutha nxa besenza izinto eziluqinisayo. Kwezinye izikhathi abatshadileyo bangabona angathi uthando lwabo soluphela, ikakhulu nxa belenhlupho zemali, ezempilakahle kumbe bethwala nzima ukukhulisa abantwababo. Pho nxa litshadile lingenzani ukuze uthando lwenu luhlale luvutha ‘njengelangabi likaJah’? Esihlokweni lesi sizaxoxa ngezinto ezintathu ezingenza ukuthi lihlale lithandana futhi lithokoza.c

QHUBEKANI LIQINISA UBUDLELWANO BENU LOJEHOVA

3. Ukuthanda uJehova kungabanceda njani abatshadileyo ukuthi bahlale bethandana? (UmTshumayeli 4:12) (Khangela lomfanekiso.)

³ Indoda lomkayo kumele basebenze nzima, baqinise ubudlelwano babo loJehova ukuze “ilangabi likaJah” lihlale livutha. Lokhu kuzabanceda njani? Nxa abatshadileyo bemthanda uJehova kuzakuba lula ukuthi benze lokho akutshoyo. Nxa bangenza njalo kuzabanceda ukuthi balwisane lenhlupho ezingenza ukuthi uthando lwabo luphele. (Bala umTshumayeli 4:12.) Abangane bakaJehova benza okusemandleni abo ukuthi bamlingisele. Ngokwesibonelo, bayazama ukuba ngabantu abalomusa, ababekezelayo futhi abathethelelayo. (Efe. 4:32–5:1) Nxa abatshadileyo belobuntu lobu kubalula ukuthi uthando lwabo luqhubeke luvutha. Udadewethu okuthiwa nguLena oseleminyaka edlula 25 etshadile uthi, “Nxa umuntu emthanda uJehova kulula ukuthi umhloniphe futhi umthande.”

4. Kungani uJehova wakhetha uJosefa loMariya ukuthi kube yibo abazali bakaMesiya?

⁴ Ake sixoxe ngabanye ababetshadile okukhulunywa ngabo eBhayibhilini. Kungani uJehova wakhetha uJosefa loMariya phakathi kwabo bonke abosendo lukaDavida ukuthi kube yibo abazali bakaMesiya? Ngamunye wabo wayelobudlelwano obuqinileyo loJehova futhi uJehova wayekwazi ukuthi nxa sebetshadile babezaqakathekisa ukumkhonza ukwedlula loba yini. Nxa litshadile lingamlingisela njani uJosefa loMariya?

5. Amadoda angafundani kuJosefa?

⁵ UJosefa wayengaphuzi ukwenza ayekutshelwa nguJehova futhi lokhu kwenza ukuthi ayikhokhele kuhle imuli yakhe. Kwaba lezikhathi ezintathu lapho uNkulunkulu amtshela okwakumele akwenze. Wayekwenza masinyane ayekutsheliwe lanxa kwezinye izikhathi kwakungalula. (Mat. 1:20, 24; 2:13-15, 19-21) UJosefa wamvikela uMariya, wamsekela futhi wamnakekela ngenxa yokuthi wayelalela lokho okwakutshiwo nguNkulunkulu. Kumele ukuthi okwenziwa nguJosefa kwenza ukuthi uMariya amthande futhi amhloniphe kakhulu. Madoda, lingalingisela uJosefa ngokwenza lokho okutshiwo liBhayibhili mayelana lokuthi kumele liyiphathe njani imuli yenu.d Nxa lingalandela okutshiwo liBhayibhili lanxa kwezinye izikhathi kusitsho ukuthi litshintshe indlela elenza ngayo izinto, liyabe litshengisa ukuthi liyabathanda omkenu futhi lokho kuzakwenza ukuthi uthando lwenu luvuthe. Udadewethu ohlala eVanuatu oseleminyaka edlula 20 etshadile uthi: “Okwenza ngimhloniphe kakhulu umkami yikuthi uyadinga ukuthi uJehova uthini, abesesenza lokho akutshoyo. Lokho kwenza ngihlaliseke futhi ngizithembe izinqumo azenzayo.”

6. Amakhosikazi afundani kuMariya?

⁶ UMariya wayemthanda uJehova. Wayengameleli ukuthi uJosefa kube nguye oqinisa ukholo lwakhe. Wayeyazi kuhle iMibhalo. (Khangela umcijo wokutaditsha ku-Nguqulo Yomhlaba Omutsha yesikhiwa kuLukha 1:46.) Wayezinika lesikhathi sokucabangisisa. (Luk. 2:19, 51) Kumele ukuthi uMariya wayeyinkosikazi eyayisenza kuhle ngenxa yokuthi wayengumngane kaJehova. Lalamuhla manengi amakhosikazi azama ukwenza njengoMariya. Ngokwesibonelo udadewethu okuthiwa ngu-Emiko uthi: “Ngingakatshadi ngangilohlelo lwami lokwenza izinto eziphathelane lokukhonza. Kodwa ngathi sengitshadile ngananzelela ukuthi ngasengithembe yena ukuthi aqinise ukholo lwami ngoba nguye owayesikhulekela futhi nguye owayekhokhela ezintweni eziphathelane lokukhonza. Ngacina nginanzelela ukuthi kumele ngizithwalele umthwalo wami wokuqinisa ubungane bami loJehova. Khathesi sengizinika isikhathi sokuthi ngiqinise ubungane bami loNkulunkulu. Ngiyakhuleka, ngiyabala iBhayibhili futhi ngiyacabangisisa ngalokho engikubalayo.” (Gal. 6:5) Makhosikazi, nxa lingaqhubeka liqinisa ubungane benu loJehova omkenu bazalithanda kakhulu futhi bazahlala belincoma.—Zaga. 31:30.

7. Abatshadileyo bangafundani kuJosefa loMariya endabeni yokukhonza bendawonye?

⁷ UJosefa loMariya babencedisana ukuthi bahlale bengabangane bakaJehova. Babekuzwisisa sibili ukuthi kuqakathekile ukuthi bakhonze uJehova bendawonye. (Luk. 2:22-24, 41; 4:16) Kungenzakala ukuthi lokhu kwakunzima ngoba imuli yabo yayiqhubeka ikhula. Kodwa abazange bakhalale, baqhubeka bekwenza. Abatshadileyo bangafunda okunengi kakhulu kubo. Lani nxa lilabantwana njengoJosefa loMariya kungaba nzima ukuthi liye emihlanganweni kumbe ukuthi lenze ukukhonza kwemuli. Kungaba nzima lokuthi lithole isikhathi sokutaditsha lokuthandaza libabili. Kodwa lingakhohlwa ukuthi nxa likhonza uJehova ndawonye liyasondela kuye futhi lothando lwenu luyakhula. Yikho qakathekisani izinto eziphathelane lokukhonza ukwedlula loba yini.

8. Abantu abalenhlupho emulini yabo bangenzani ukuze bakholise ukukhonza kwemuli?

⁸ Nxa lilenhlupho emulini yenu kungaba nzima ukuthi lihlale phansi lenze ukukhonza kwemuli. Manje lingenzani? Qalisani ngokwenza ukukhonza kwemuli okungathathi isikhathi eside futhi lixoxe ngezinto elizikholisayo lobabili njalo elivumelana ngazo. Lokhu kungenza lizwanane futhi libe lesifiso sokwenza izinto eziphathelane lokukhonza lindawonye.

ZINIKENI ISIKHATHI SOKUBA NDAWONYE

9. Kungani kumele indoda lomkayo bazinike isikhathi sokuba ndawonye?

⁹ Okunye elingakwenza ukuze uthando lwenu luhlale luvutha yikuzinika isikhathi sokuba ndawonye. Lokho kuzalinceda lihlale likwazi ukuthi omunye ucabangani lokuthi uzwa njani. (Gen. 2:24) ULilia loRuslan sebeleminyaka edlula 15 betshadile. Zwana ukuthi bathi kuyini abakunanzelelayo besanda kutshada. Udadewethu uthi: “Sasicabanga ukuthi sizathola isikhathi esinengi sokuba ndawonye kodwa sananzelela ukuthi kwakunzima ukusithola. Isikhathi sethu esinengi sasisiqedela emisebenzini yethu, emisebenzini yasendlini futhi ngemva kwesikhathi sasisiqedela ebantwaneni bethu. Sananzelela ukuthi nxa sasingaziniki isikhathi sokuba ndawonye sobabili singacina singasathandani ngendlela esasithandana ngayo.”

10. Abatshadileyo bangasisebenzisa njani isimiso esiku-Efesu 5:15, 16?

¹⁰ Abatshadileyo bangenzani ukuze bathole isikhathi sokuba ndawonye? Okunye okunganceda yikuthi bahlele ukuba lesikhathi sokuba ndawonye. (Bala u-Efesu 5:15, 16.) Omunye umfowethu weNigeria okuthiwa ngu-Uzondu uthi: “Nxa ngihlela imisebenzi yami ngiyafaka lesikhathi sokuthi sibe babili lomkami futhi isikhathi leso ngiyasiqakathekisa kakhulu.” (Flp. 1:10) U-Anastasia, umkambonisi wesiqinti eMoldova, usisebenzisa kuhle isikhathi sakhe. Uthi: “Ngiyazama ukwenza imisebenzi yami ngesikhathi umkami esabhizi ngemisebenzi yakhe. Ngingenza njalo siyathola isikhathi sokuba ndawonye nxa sonke sesiqedile.” Kodwa lingenzani nxa imisebenzi yenu isenza kube nzima ukuthi lithole isikhathi sokuba ndawonye?

11. Yiphi imisebenzi u-Akhwila loPrisila ababeyenza bendawonye?

¹¹ Abatshadileyo bangafunda okunengi ku-Akhwila loPrisila. Imuli le yayithandwa ngamaKhristu amanengi okuqala. (Rom. 16:3, 4) Lanxa iBhayibhili lingasitsheli okunengi ngempilo yabo, liveza ukuthi babesebenza ndawonye, betshumayela ndawonye futhi bencedisa abanye bendawonye. (Imiseb. 18:2, 3, 24-26) Kanti njalo sonke isikhathi nxa iBhayibhili likhuluma ngo-Akhwila loPrisila libaqamba bendawonye.

12. Indoda lomkayo bangenzani ukuze bathole isikhathi esinengi sokuba ndawonye? (Khangela lomfanekiso.)

¹² Abatshadileyo bangamlingisela njani u-Akhwila loPrisila? Cabangani ngemisebenzi okumele liyenze. Ikhona yini elingayenza ndawonye kulokuthi yenziwe ngumuntu oyedwa? U-Akhwila loPrisila babetshumayela ndawonye. Mhlawumbe lani lingahlela ukuhamba ndawonye ekutshumayeleni izikhathi ezinengana. U-Akhwila loPrisila babesebenza ndawonye. Lanxa wena lomkakho lingasebenzi ndawonye, kungavuma yini ukuthi lenze imisebenzi yendlini lonke? (Umtshu. 4:9) Nxa lingancedisana ukwenza umsebenzi othile, liyabambana futhi liyathola lethuba lokuxoxa. URobert loLinda sebeleminyaka edlula 50 betshadile. URobert uthi: “Sengikhuluma iqiniso, asilasikhathi esinengi sokuzilibazisa sindawonye. Kodwa nxa ngigezisa imiganu umkami yena ethawula kumbe nxa ngisebenza engadini abesebuya azosebenza lami ngiyathokoza kakhulu. Ukwenza izinto sindawonye kwenza ukuthi sibambane, lothando lwethu luqhubeke luvutha.”

13. Indoda lomkayo kumele benzeni ukuze bamanyane?

¹³ Kodwa kumele likhumbule ukuthi ukuba ndawonye nje akutsho ukuthi libambene. Enye inkosikazi ehlala eBrazil ithi: “Khathesi kunengi kakhulu okokwenza okokuthi singacina sizitshela ukuthi sisitholile isikhathi sokuba ndawonye ngenxa nje yokuthi sihlala sonke. Sengifunde ukuthi ukuba ndawonye ayisikho kodwa okuqakathekileyo. Okunye okuqakatheke kakhulu yikuthi sixoxe futhi ngimlalelisise.” UBruno lomkakhe uTays baba leqiniso lokuthi bayakwenza lokhu. UBruno uthi: “Nxa sithole isikhathi sokuba ndawonye siyafaka amafoni khatshana sizikholisele nje.”

14. Abatshadileyo bangenzani nxa bengakholisi ukuba ndawonye?

¹⁴ Lingenzani nxa kuyikuthi alikukholisi ukuba ndawonye? Mhlawumbe kungaba yikuthi izinto elizithandayo azifanani kumbe vele lihlala licaphulana. Manje lingenzani? Cabanga ngomzekeliso womlilo esike sakhuluma ngawo. Umlilo lo awuphongulavuka uqalisa ukubaswa. Uyabe ulokhu ufakwa inkuni eziqatha kancane kancane. Lani lingaqala ngokuzinika isikhathi esincane nje sokuba ndawonye nsuku zonke. Ngesikhathi leso yenzani izinto elizikholisayo lobabili, lingenzi izinto ezizacina zilixabanisa. (Jak. 3:18) Nxa lingaqala ngokwenza izinto lezi ezincane lingaluvuselela uthando lwenu.

HLONIPHANANI

15. Kuqakatheke ngani ukuthi abantu abatshadileyo bahloniphane?

¹⁵ Ukuhloniphana kuqakathekile ebantwini abatshadileyo. Ukuhloniphana kunjengomoya oyenza umlilo uqhubeke ubhebha. Phela nxa umoya ungaswelakala umlilo uyacitsha masinyane nje. Labatshadileyo bangayekela ukuhloniphana uthando lwabo luyaphela masinyane nje. Kodwa nxa besenza okusemandleni abo ukuthi bahloniphane bayabe besenza ukuthi uthando lwabo luqhubeke luvutha. Kodwa khumbula ukuthi indaba ayikho ekuthini wena uthi uyamhlonipha umkakho kodwa isekuthini umkakho uyakubona yini ukuthi uyamhlonipha. UPenny lo-Aret sebeleminyaka edlula 25 betshadile. UPenny uthi: “Emulini yethu siyathandana ngoba siyahloniphana kakhulu. Sikhululekile ukukhuluma okusezinhliziyweni zethu ngoba siyakwazi ukuthi akulamuntu oyeyisa umbono womunye.” Manje ungenzani ukuze umkakho angathandabuzi ukuthi uyamhlonipha? Cabanga ngo-Abhrahama loSara.

16. Amadoda afundani ku-Abhrahama? (U-1 Phetro 3:7) (Khangela lomfanekiso.)

¹⁶ U-Abhrahama wayemhlonipha uSara. Wayeyilalela imibono yakhe futhi elendaba lendlela azizwa ngayo. Ngesinye isikhathi uSara wayekhathazekile, watshela u-Abhrahama okwakumkhathaza waze wamsola ngokwakwenzakele. U-Abhrahama wavuka ngolaka yini? Hayi kenzanga njalo. Wayekwazi ukuthi uSara wayezehlisa kuye futhi esekela izinqumo ayezenza. U-Abhrahama wamlalela wasezama ukulungisisa uhlupho olwalukhona. (Gen. 16:5, 6) Sifundani kulokhu? Madoda, yini elilomlandu wokwenza izinqumo emulini zenu. (1 Khor. 11:3) Lanxa kunjalo, indoda itshengisa ukuthi iyamthanda umkayo ngokuqala izwe ukuthi ucabangani ingakenzi isinqumo, ikakhulu nxa kuyisinqumo esizamthinta. (1 Khor. 13:4, 5) Kwezinye izikhathi inkosikazi yakho ingabe ikhathazekile ifuna ukukhuluma okusenhliziyweni yayo. Uyatshengisa yini ukuthi uyayihlonipha ngokuyilalelisisa nxa ikhuluma? (Bala u-1 Phetro 3:7.) U-Angela loDmitry sebesiyafikisa iminyaka engu-30 betshadile. U-Angela uyasitshela indlela umkakhe amhlonipha ngayo. Uthi: “UDmitry uhlala ezimisele ukungilalela lanxa ngicaphukile kumbe ngifuna nje ukuthi sixoxe. Uyangibekezelela lanxa kwezinye izikhathi ngiyabe ngitshinga.”

17. Amakhosikazi afundani esibonelweni sikaSara? (U-1 Phetro 3:5, 6)

¹⁷ USara wayetshengisa ukuthi uyamhlonipha u-Abhrahama ngokusekela izinqumo zakhe. (Gen. 12:5) Ngelinye ilanga u-Abhrahama wemukela abantu bemzini ababengabakhangelelanga. Watshela uSara ukuthi atshiye ayekwenza apheke isinkwa esinengi esasizadliwa ngabantu bemzini. (Gen. 18:6) USara wahle wakwenza masinyane okwakutshiwo ngu-Abhrahama. Makhosikazi, lingalingisela uSara ngokungaphikisani lezinqumo zabomkenu. Nxa lingabambisana labomkenu lizakwenza ukuthi uthando lwenu luvuthe. (Bala u-1 Phetro 3:5, 6.) UDmitry esikhulume ngaye endimeni edlulileyo uyasitshela indlela umkakhe amhlonipha ngayo. Uthi: “U-Angela ngimthandela ukuthi uyazisekela izinqumo zami lanxa kwezinye izikhathi imibono yethu iyabe itshiyene. Lanxa ngiyabe ngikhuthe ugatsha kangichothozi.” Kulula sibili ukuthanda umuntu okuhloniphayo!

18. Kubanceda njani abatshadileyo ukuthi bagcine uthando lwabo luvutha?

¹⁸ Lamuhla uSathane uzimisele ukucitsha ilangabi lothando ezimulini. Uyakwazi ukuthi nxa abatshadileyo bengasathandani kulula ukuthi bacine bengasamthandi uJehova. Kodwa uthando lweqiniso ngeke lucitsheke. Uthando olusemulini yenu kalube njengothando oluchasiswa ebhukwini leNgoma Yezingoma. Zimiseleni ukuqakathekisa uJehova emulini yenu, lizinike isikhathi sokuba ndawonye, lihloniphane futhi libe lendaba lokuthi omunye uzizwa njani lokuthi ufunani. Nxa lingenza njalo, uJehova okuvela kuye uthando lweqiniso uzadunyiswa njalo lothando lwenu luzahlala luvutha njengomlilo ohlala ukhwezelwa.