Uzakhethani Phakathi Kokuqondileyo Lokungaqondanga?
Indlela esikhetha ukuphila ngayo yiyo ezakutsho ukuthi impilo yethu izakuba njani futhi uJehova uNkulunkulu uyakwazi lokhu. Yikho esikhuthaza ukuthi silandele lokho asitshela khona.
UJehova ufuna sithokoze empilweni njalo sibe lokuthula.
“Mina Jehova nginguNkulunkulu wakho, lowo okufundisayo ukuze uncedakale, lowo okukhokhela endleleni okufanele uhambe ngayo. Aluba ubungayilalela imithetho yami, ukuthula kwakho bekuzakuba njengomfula, lokulunga kwakho kube njengamagagasi olwandle.”—U-Isaya 48:17, 18.
Njengoba uNkulunkulu enguMdali wethu uyakwazi ukuthi kumele siphile njani. Ufuna silalele lokho asitshela khona ngoba uyakwazi ukuthi kuzasinceda kakhulu. Nxa singalandela esikutshelwa nguNkulunkulu, kasisoze sikhathazeke ngezinqumo esizenzayo sisesaba ukuthi engxenye izinto azisoze zisihambele kuhle. Sizahlala sisenza izinqumo ezinhle ezizasinceda ukuthi sibe lokuthula futhi sithokoze.
UJehova kasiceli ukuthi senze into akwaziyo ukuthi ngeke siyenelise.
“Umthetho lo engilinika wona lamuhla awunzima kini futhi awukhatshana lani.”—UDutheronomi 30:11.
Ukulandela imithetho kaNkulunkulu kungatsho ukuthi kumele sitshintshe indlela esicabanga ngayo lezinto esizenzayo. Iqiniso yikuthi lokho uJehova asicela ukuthi sikwenze akukho nzima. Phela njengoMdali wethu usazi kuhle, uyakwazi lokho esenelisa ukukwenza. Kanti njalo nxa singaqhubeka sifunda okunengi ngoJehova, sizabona ukuthi “imilayo yakhe kayinzima.”—1 UJohane 5:3.
UJehova uthembisa ukubancedisa labo abafuna ukuphila ngendlela yakhe.
“Mina Jehova, uNkulunkulu wakho, ngibambe isandla sakho sokudla, ngithi kuwe, ‘Ungesabi. Ngizakunceda.’”—U-Isaya 41:13.
Singenelisa ukuphila ngendlela ethokozisa uNkulunkulu ngoba uthembisa ukuthi uzasincedisa. Eyinye indlela asincedisa ngayo yikusebenzisa iLizwi lakhe iBhayibhili, elisikhuthazayo futhi elenza ukuthi sibe lethemba.
Amamiliyoni abantu emhlabeni wonke asezibonele ukuthi ukulandela lokho okutholakala eBhayibhilini kwenze impilo yabo yaba ngcono kakhulu. Sicela ukuthi uke uzinike isikhathi sokuhlola amacebo atholakala eBhayibhilini. Ungaqalisa ngokusebenzisa ibhukwana elithi Ungathokoza Kube Kube Nini Lanini! elitholakala mahala ku-jw.org. Lilezihloko ezilandelayo:
IBhayibhili Lingakunceda Yini?
IBhayibhili Lisithembisa Impilo Enhle Kakhulu
Kuyini Okungenza Ulithembe IBhayibhili?
Ngesikhathi uhlola iLizwi likaNkulunkulu iBhayibhili uzazibonela ukuthi lokho elikutshoyo akuphelelwa yisikhathi njalo ‘singakuthemba kuze kube nini lanini.’ (IHubo 111:8) Singakulandela konke esikufunda eBhayibhilini sizathokoza sibili. Kodwa uNkulunkulu kasoze asibambe ngamandla ukuthi silandele lokho asitshela khona. (UDutheronomi 30:19, 20; UJoshuwa 24:15) Ngamunye wethu kumele azenzele isinqumo endabeni le.