Ungaphumi Epharadayisi Esikulo

1. Liyini ipharadayisi esikulo njalo kumele sizimisele ukwenzani? (Khangela amabala angaphansi.)

LAMUHLA emhlabeni kulepharadayisi elilabantu abanengi abenza okuhle. Abantu abakulo bahlalisane ngokuthula futhi bazimisele ukungaphumi kulo. Bafisa lokuthi abantu abanengi labo babuye bazongena epharadayisia leli.

2. Kuyini okumangalisayo uJehova akwenzileyo ezinsukwini lezi zokucina?

² Kuyamangalisa ukuthi uJehova wenze kwaba labantu abalokuthula futhi abamanyeneyo emhlabeni lo obuswa nguSathane oyingozi futhi ogcwele abantu abazondanayo labenza okubi. (1 Joh. 5:19; Isam. 12:12) UNkulunkulu wethu olothando uyabona ukuthi umhlaba lo uyingozi kangakanani yikho esenza ukuthi abantu bakhe bavikeleke ukuze baqhubeke bemkhonza bethokoza. ILizwi likaNkulunkulu lithi ipharadayisi esikulo “liyindawo yokuphephela” futhi ‘linjengengadi ethelelwa kuhle.’ (Isaya. 4:6; 58:11) Labo abasepharadayisi leli bayathokoza futhi bavikelekile ensukwini lezi zokucina ngoba uJehova uyababusisa.—Isaya. 54:14; 2 Thim. 3:1.

3. U-Isaya 65 wagcwaliseka njani kudala?

³ UJehova wasebenzisa umphrofethi u-Isaya ukuthi achasise ukuthi ipharadayisi esikulo khathesi lalizabe linjani. Lokho akubhalayo siyakuthola ku-Isaya isahluko 65, njalo kwagcwaliseka okokuqala ngo-537 B.C.E. Ngalesosikhathi amaJuda ayesephendukile akhululwa eBhabhiloni lapho ayethunjwe khona asebuyela elizweni lawo. UJehova wababusisa abantu bakhe wabancedisa ukuthi bavuselele idolobho leJerusalema, balenze liphinde libe lihle njalo bakhe kutsha ithempeli lapho ababezamkhonzela khona.—Isaya. 51:11; Zak. 8:3.

4. U-Isaya isahluko 65 ugcwaliseka njani khathesi?

⁴ Isiphrofetho sika-Isaya saqalisa ukugcwaliseka okwesibili ngo-1919 lapho abantu bakaJehova bekhululwa eBhabhiloni Enkulu. Ngemva kwalokho ipharadayisi esikulo laqalisa ukukhula kancane kancane. Abamemezeli boMbuso ababekhuthele ekutshumayeleni baqalisa ukubumba amabandla amanengi. Amadoda labesifazana ababelodlakela futhi bengaziphathanga baqalisa ‘ukugqoka ubuntu obutsha obadalwa ngentando kaNkulunkulu.’ (Efe. 4:24) Izibusiso ezinengi u-Isaya akhuluma ngazo zizagcwaliseka esikhathini esizayo emhlabeni omutsha. Lanxa kunjalo zinengi izibusiso esizitholayo khathesi epharadayisi esiliphiwe nguJehova. Kasixoxeni ngokuthi ipharadayisi leli lisinceda njani lokuthi kungani kungamelanga siphume kulo.

IZIBUSISO ESIZITHOLAYO NGOKUBA SEPHARADAYISI ESILIPHIWE NGUJEHOVA

5. Kuyini esikukholisayo epharadayisi esikulo okukhulunywa ngakho ku-Isaya 65:13?

⁵ Siyafundiswa njalo siyavuselelwa. Isiphrofetho sika-Isaya siyawucacisa umehluko okhona phakathi kwalabo abasepharadayisi esikulo lalabo abangekho phakathi kwalo. (Bala u-Isaya 65:13.) UJehova uyasinika konke esikudingayo ukuze siqhubeke singabangane bakhe. Usinike umoya wakhe ongcwele leLizwi lakhe kanye lolwazi olunengi olusekelwe eBhayibhilini ukuze ‘sidle, sinathe [futhi] sithokoze.’ (Khangela loSambulo 22:17.) Kodwa labo abangekho epharadayisi esiphakathi kwalo ‘bayalamba, bayoma [futhi] bayayangeka’ ngoba kabamazi uNkulunkulu.—Amos. 8:11.

6. UJoweli 2:​21-24 utshengisa ukuthi yiziphi izinto uJehova asinika zona njalo izinto lezo zisinceda njani?

⁶ UJoweli laye esiphrofethweni sakhe wakhuluma ngezinto ezinjengamabele lewayini kanye lamafutha ama-oliva ukuze atshengise ukuthi uJehova wayezanika abantu bakhe konke abakudingayo, okugoqela lezinto ezinengi ezazizabaqinisa ukholo. (Jow. 2:​21-24) Ngokwesibonelo usinika iBhayibhili, lamavidiyo, lamabhuku asekelwe eBhayibhilini, lewebhusayithi yethu, lemihlangano yebandla, leyesiqinti kanye leyesabelo. Nxa sisebenzisa izinto lezi siyavuseleleka, sibe lokholo oluqinileyo.

7. Kuyini okusenza sithokoze loba ‘sichelese’? (U-Isaya 65:14)

⁷ Siyathokoza njalo siyasuthiseka. Abantu bakaNkulunkulu ‘bayamemeza ngentokozo’ ngoba bayambonga uJehova ngakho konke abenzela khona. (Bala u-Isaya 65:14.) Iqiniso elisiqinisayo esilifunda eLizwini likaNkulunkulu, lezithembiso ezisiduduzayo ezikulo kanye lethemba esilithola ngenxa yomhlatshelo wenhlawulo kaKhristu kwenza ‘sichelese enhliziyweni.’ Ukuxoxa labafowethu labodadewethu ngezinto lezi kusenza sithokoze kakhulu.—Hubo. 34:8; 133:​1-3.

8. Yiziphi izinto ezimbili eziqakatheke kakhulu ezitholakala epharadayisi esikulo?

⁸ Uthando lokumanyana okuphakathi kwabantu bakaJehova yizinto ezimbili eziqakathekileyo ezitholakala epharadayisi esikulo. ‘Ukumanyana’ esilakho lamuhla kusinika inzwisa yokuthi kuzabe kunjani emhlabeni omutsha ngoba ngalesosikhathi abantu bakaNkulunkulu bazabe sebethandana futhi bemanyene kakhulu ukwedlula lamuhla. (Kol. 3:14) Omunye udadewethu nxa ekhuluma ngalokho akubonayo ngesikhathi ehlangana labantu bakaJehova okokuqala uthi: “Ngangingakaze ngithokoze empilweni yami njalo lasemulini yami ngangingathokozi. Uthando ngalubonela kuboFakazi bakaJehova.” Loba ngubani ofuna ukuthokoza lokusuthiseka empilweni kumele abuye epharadayisi esiliphiwe nguJehova. Izinceku zikaJehova ziqakathekile kuye lakubafowethu labodadewethu kungelani lokuthi umhlaba uthini ngazo.—Isaya. 65:15.

9. U-Isaya 65:​16, 17 uthi kuzakwenzakalani ngenhlupho zethu?

⁹ Sihlalisekile futhi asesabi lutho. U-Isaya 65:14 uthi labo abangafuni ukungena epharadayisi esikulo ‘bayakhala ngenxa yobuhlungu benhliziyo [futhi] bahlaba umkhosi ngenxa yokudabuka emoyeni.’ Kodwa kuzakwenzakalani ngezinto ezizwisa abantu bakaNkulunkulu ubuhlungu khathesi futhi ezibenza bahlupheke? “Zizakhohlakala, zisuswe emehlweni [kaNkulunkulu].” (Bala u-Isaya 65:​16, 17.) UJehova uzasusa konke okusikhathazayo njalo ngokuhamba kwesikhathi sizakhohlwa lokuthi inhlupho lezo zazisizwisa ubuhlungu obunganani.

10. Kuyini okwenza ukuthande ukuba ndawonye labafowenu labodadewenu abangamaKhristu? (Khangela lomfanekiso.)

¹⁰ Sizizwa sihlalisekile nxa sisemihlanganweni yebandla ngoba siyabe sichelesile futhi singacabangi ngezinto ezisihluphayo. Nxa silezithelo zomoya ezigoqela uthando, ukuthokoza, ukuthula, umusa kanye lokuba mnene, siyabe sisenza ukuthi abafowethu labodadewethu bahlaliseke futhi bakholise epharadayisi esikulo. (Gal. 5:​22, 23) Kuyisibusiso esikhulu sibili ukuba senhlanganisweni kaNkulunkulu. Labo abaqhubeka besepharadayisi leli bazasibona sigcwaliseka isithembiso sikaNkulunkulu sokuthi kuzakuba ‘lamazulu amatsha lomhlaba omutsha.’

11. Sizwa njani ngepharadayisi elenziwe nguJehova? (U-Isaya 65:​18, 19)

¹¹ Siyabonga ngezibusiso esilazo. U-Isaya uphinda asitshengise ukuthi silezizatho ‘zokuthokoza sithabe’ nxa sisepharadayisi esiliphiwe nguNkulunkulu. Phela ipharadayisi leli lenziwe nguJehova ngokwakhe. (Bala u-Isaya 65:​18, 19.) Yikho kungasimangalisi ukuthi uyasisebenzisa ukuthi sincede abantu baphume enhlanganisweni zomhlaba lo ezingabafundisi iqiniso ngoNkulunkulu, besesibancedisa ukuthi babuye epharadayisi lethu elihle. Izibusiso esizithola ngokuba seqinisweni zisenza sithokoze njalo silesifiso esikhulu sokutshela abanye ngazo.—Jer. 31:12.

12. Uzwa njani ngezithembiso okukhulunywa ngazo ku-Isaya 65:​20-24 njalo kungani?

¹² Okunye okwenza sithokoze futhi simbonge uJehova lithemba asinika lona ngenxa yokuthi singabangane bakhe. Cabanga ngazo zonke izinto esizazibona lesizazenza emhlabeni omutsha kaNkulunkulu. Nanku okunye esikuthenjiswa liBhayibhili: “Akusoze kuphinde kube losane oluphila insuku ezilutshwana, kumbe ixhegu elehluleka ukugcwalisa izinsuku zalo.” ‘Sizakwakha izindlu sihlale kuzo, silime amasimu amagilebisi sidle izithelo zawo.’ ‘Asisoze sisebenzele ize’ ngoba siyabe singabantu “ababusiswe nguJehova.” Usithembisa impilo emnandi lapho esizabe sihlaliseke khona futhi singakhathazeki ngalutho. Uthi abantu bakhe ‘bengakambizi lokumbiza’ uzabe esekwazi lokho abakufunayo futhi ‘uzasuthisa izifiso zakho konke okuphilayo.’—Isaya. 65:​20-24; Hubo. 145:16.

13. U-Isaya 65:25 uthi yiluphi utshintsho abantu abalwenzayo empilweni zabo nxa bangaqalisa ukukhonza uJehova?

¹³ Silokuthula njalo sivikelekile. Abantu abanengi ababelobuntu obufanana lobezinyamazana benza utshintsho olukhulu empilweni zabo bencediswa ngumoya kaNkulunkulu. (Bala u-Isaya 65:25.) Sebesebenze nzima ukuthi batshiye izinto ezimbi ababezenza kanye lobuntu ababelabo. (Rom. 12:2; Efe. 4:​22-24) Kodwa njengoba silokhu silesono sizaqhubeka siwenza amaphutha. Lanxa kunjalo uJehova usemanyanise “yonke imihlobo yabantu.” (Tit. 2:11) Abantu laba ubenze bathandana futhi bahlalisana ngokuthula. Akula omunye umuntu obengakwenza lokhu ngaphandle kukaNkulunkulu uSomandla.

14. U-Isaya 65:25 wagcwaliseka njani komunye umzalwane?

¹⁴ Abantu bangenelisa yini ukutshintsha indlela abaphila ngayo? Ake sixoxe ngokunye okwake kwenzakala. Kulejaha elathi lifikisa iminyaka engu-20 selingene kanengi ejele. Laliziphethe kubi futhi lilodlakela. Lalibotshelwe ukutshontsha izimota, ukugqekeza kanye lamanye amacala amakhulu. Kanti njalo lalikuthanda ukulwa. Ijaha leli lathi liqalisa ukufunda iBhayibhili lokuya emihlanganweni yaboFakazi bakaJehova laba kwazi ukuthi liphilelani ngoba laseliqalisa ukukhonza uJehova epharadayisi esikulo. Selibhabhathiziwe lalihlala licabanga ngokuthi u-Isaya 65:25 wagcwaliseka njani kulo. Laselitshiye udlakela laba ngumuntu olokuthula, laseliyimvu sibili.

15. Kungani sifisa ukuncedisa abanye ukuthi babuye epharadayisi esikulo futhi singakwenza njani lokho?

¹⁵ U-Isaya 65:13 uqalisa ngamazwi la: “Nanku okutshiwo yiNkosi Enkulu uJehova.” Uvesi 25 yena uphetha ngamazwi athi, “kutsho uJehova.” Amazwi akhe ayagcwaliseka loba sekutheni. (Isaya. 55:​10, 11) UJehova ulenzile sibili ipharadayisi khathesi ngoba sikulo. Usenze saba yimuli emanyeneyo yabafowethu labodadewethu. Phakathi kwabantu bakaJehova kulokuthula futhi sizizwa sivikelekile emhlabeni lo ogcwele udlakela. (Hubo. 72:7) Lokhu kwenza sifise ukuncedisa abantu abanengi ukuthi babuye bazokhonza lathi. Singabancedisa ngokuqakathekisa umsebenzi wokwenza abafundi.—Mat. 28:​19, 20.

YENZA ABANYE BAFISE UKUBA SEPHARADAYISI ESIKULO

16. Kuyini okukhanga abantu ukuthi babuye epharadayisi esikulo?

¹⁶ Sonke kukhona esingakwenza ukuze abantu bafise ukuba sepharadayisi esikulo. Singabakhanga ngokulingisela uJehova. Kabambi muntu ngamandla ukuthi abuye enhlanganisweni yakhe nxa engafuni. Kodwa nxa umuntu efuna ‘uyamdonsa’ amlethe kuye. (Joh. 6:44; Jer. 31:3) Nxa abantu abalenhliziyo ezinhle befunda ngobuntu bukaJehova obuhle kanye lothando lwakhe bezwa kusithi basondele kuye. Ukuziphatha kwethu kuhle kanye lobuntu bethu kungabadonsa njani abantu ukuthi babuye epharadayisi esikulo?

17. Kuyini esingakwenza ukuze sikhange abanye ukuthi babuye epharadayisi esikulo?

¹⁷ Enye indlela esingakhanga ngayo abantu ukuthi babuye epharadayisi esikulo yikuba lothando lomusa kubafowethu labodadewethu. Labo abayabe beqalisa ukufika emihlanganweni sifisa ukuthi labo benze njengabantu abangakholwayo okumele ukuthi babehamba emihlanganweni yebandla leKhorinte kudala. Bathi: “UNkulunkulu uphakathi kwenu sibili.” (1 Khor. 14:​24, 25; Zak. 8:23) Yikho kumele siqhubeke silalela iseluleko esithi: “Hlalisanani ngokuthula.”—1 Thes. 5:13.

18. Kuyini okungenza abantu bafune ukubuya enhlanganisweni yethu?

¹⁸ Kumele sihlale sizama ukubona abafowethu labodadewethu ngendlela uJehova ababona ngayo. Lokhu singakwenza ngokuhlala sikhangela okuhle abakwenzayo kulokuthi sikhangele amaphutha abo ngoba esikhathini esizayo bayabe bengasawenzi. Nxa singaba ‘lomusa komunye lomunye, sizwelane njalo sithethelelane ngenhliziyo yonke’ sizenelisa ukulungisisa loba yikuphi ukungazwanani okungaba khona phakathi kwethu. (Efe. 4:32) Nxa singenza njalo abantu abafuna ukuphathwa ngendlela le elothando bazafisa ukubuya epharadayisi esikulo.b

QHUBEKA USEPHARADAYISI ESIKULO

19. (a) Abantu okukhulunywa ngabo ebhokisini elithi “Baphuma Baphinda Baphenduka” bathini sebephendukile epharadayisi esikulo? (b) Kuyini esizimisele ukukwenza? (Khangela lomfanekiso.)

¹⁹ Siyambonga kakhulu uJehova ngepharadayisi asiphe lona. Liqhubeka lisiba lihle kakhulu futhi selilabantu abanengi abadumisa uJehova. Kwangathi singahlala sikubona kuligugu kakhulu ukuba sepharadayisi leli esilenzelwe nguJehova. Loba ngubani ofuna ukuvuselelwa, ukusuthiseka, lokuhlaliseka kanye lokuvikeleka kumele abuye epharadayisi esikulo futhi angaqali ukuphuma kulo. Kodwa kumele ananzelele ngoba uSathane uzama ngamandla wonke ukusihuga ukuthi siphume kulo. (1 Phet. 5:8; Isam. 12:9) Akumelanga sivume ukuthi asinqobe. Asisebenzeni gadalala ukuthi sivikele ipharadayisi esikulo ukuze lihlale lilihle, limsulwa futhi lilokuthula.