Tshengisa Ukuthi Uyazibonga “Izipho Ezingabantu”

1. Yiziphi ezinye izipho esiziphiwe nguJesu?

EMHLABENI akulamuntu ophana njengoJesu. Ngesikhathi esemhlabeni wayehlala esenza izimangaliso ukuze ancede abantu. (Luk. 9:​12-17) Isipho esikhulu kulazo zonke asinika sona kwakuyikunikela ngempilo yakhe ngenxa yethu. (Joh. 15:13) Kodwa wavuswa futhi lakhathesi ulokhu eqhubeka ephana ukuze asincedise. Ulokhu ecela uJehova ukuthi asithululele umoya wakhe ongcwele ukuze usifundise njalo usiduduze njengoba nje wasithembisa. (Joh. 14:​16, 17, amabala angaphansi; 16:13) Kanti njalo uJesu usebenzisa imihlangano yebandla ukuze asifundise ukuthi singawenza njani umsebenzi wokwenza abafundi emhlabeni wonke.—Mat. 28:​18-20.

2. Ngobani “izipho ezingabantu” okukhulunywa ngazo ku-Efesu 4:​7, 8?

² Kulesinye futhi isipho esisiphiwe nguJesu. Umphostoli uPhawuli wabhala ukuthi uJesu wathi eseqanse waya phezulu “wanika ibandla izipho ezingabantu.” (Bala u-Efesu 4:​7, 8.) UPhawuli wachasisa ukuthi uJesu wasinika izipho lezi ukuze zincedise ibandla ngendlela ezitshiyeneyo. (Efe. 1:​22, 23; 4:​11-13) Lamuhla “izipho ezingabantu” zigoqela inceku ezikhonzayo, labadala bebandla lababonisi beziqinti.a Kodwa ayisikho ukuthi amadoda la awaphambanisi ngoba lawo alesono. (Jak. 3:2) Lanxa kunjalo iNkosi yethu uJesu Khristu iyawasebenzisa ukuthi asincedise, yikho ayizipho esiziphiwe nguye.

3. Nika isibonelo esitshengisa ukuthi singazisekela njani “izipho ezingabantu.”

³ UJesu wanika “izipho ezingabantu” umsebenzi wokwakha ibandla. (Efe. 4:12) Kodwa lathi sonke singenelisa ukuwancedisa amadoda la abekiweyo ukuze awenze kuhle umsebenzi lo oqakathekileyo. Lokhu singakufanisa lokwenzakala nxa kusakhiwa iWolu yoMbuso. Kulabanye abasebenza ekwakhiweni kweWolu, kube labanye abancedisa abenza umsebenzi lo ngokubaphekela ukudla langokuthwala izinto okuyabe kumele zisetshenziswe futhi abanye bancedisa langezinye izindlela ezitshiyeneyo. Ngakho lathi singasekela izinceku ezikhonzayo, labadala bebandla lababonisi beziqinti ngalokho esikutshoyo langesikwenzayo. Asixoxeni ngokuthi umsebenzi wabo usinceda njani lokuthi singatshengisa njani ukuthi siyawabonga amadoda la lokuthi siyambonga uJesu owasinika “izipho ezingabantu.”

INCEKU EZIKHONZAYO ‘ZINCEDA ABANYE’

4. Yiphi eminye imisebenzi eyayisenziwa zinceku ezikhonzayo eyayinceda abanye?

⁴ Ngesikhathi samaKhristu akuqala abanye abafowethu babebekwa ukuthi babe zinceku ezikhonzayo. (1 Thim. 3:8) Kungenzakala ukuthi yibo ‘ababenceda abanye’ uPhawuli ayekhuluma ngabo. (1 Khor. 12:28) Kukhanya angani inceku ezikhonzayo zazisenza imisebenzi eminengi eqakathekileyo ukuze abadala bakhululeke ukwenza umsebenzi wabo wokufundisa lowokwelusa. Ngokwesibonelo, inceku ezikhonzayo zingabe zazincedisa ngokukopa iMibhalo kumbe zingabe zazithenga izinto ezazisetshenziswa nxa ikotshwa.

5. Yiphi eminye imisebenzi enceda ibandla eyenziwa zinceku ezikhonzayo?

⁵ Cabanga ngeminye imisebenzi enceda ibandla eyenziwa zinceku ezikhonzayo. (1 Phet. 4:10) Inceku ezikhonzayo zingaphiwa umsebenzi wokukhangela izimali zebandla lokukhangela insimu yebandla. Ezinye zilomsebenzi wokufaka izicelo zamabhuku lokubona ukuthi abamemezeli bayawathola. Ezinye inceku ezikhonzayo zidlala ingoma lamavidiyo njalo zilungise lamamayikhi. Ezinye ziba ngabalindi futhi ziyancedisa nxa kulungisiswa iWolu yoMbuso. Yonke imisebenzi le eqakathekileyo inceda ukuthi izinto zihambe kuhle ebandleni. (1 Khor. 14:40) Kanti njalo ezinye inceku ezikhonzayo ziyaphiwa izinkulumo emhlanganweni Wempilo Lenkonzo futhi ziyaphiwa lezinkulumo zikazulu wonke. Inceku ekhonzayo ingabekwa ukuthi ibe ngumsizi wombonisi weqembu. Kwezinye izikhathi inceku ezikhonzayo ezifaneleyo ziyahamba labadala nxa besiyakwelusa.

6. Kuyini okwenziwa zinceku ezikhonzayo okwenza sizibonge kakhulu?

⁶ Imisebenzi eyenziwa zinceku ezikhonzayo ilinceda njani ibandla? Omunye udadewethu okuthiwa nguBeberlyb ohlala eBolivia uthi: “Ngiyazibonga kakhulu inceku ezikhonzayo ngoba ngenxa yazo ngiyayikholisa imihlangano. Ngiyahlabela, ngiphendule, ngilalele izinkulumo, ngibukele amavidiyo, ngibone lemifanekiso ngenxa yomsebenzi owenziwa zinceku ezikhonzayo. Ziyalinda eWolu yoMbuso futhi ziyalungisa ezempucuko ukuze abanye balalele imihlangano besendlini. Nxa imihlangano isiphelile ziyancedisa ukuklina iWolu, zibale izimali zeminikelo njalo ziba leqiniso lokuthi siyawathola amabhuku esiwafunayo. Ngiyababonga kakhulu abafowethu laba!” Omunye udadewethu okuthiwa nguLeslie ohlala eColombia olomkakhe ongumdala webandla uthi: “Umkami uthembe izinceku ezikhonzayo ukuthi zenze imisebenzi etshiyeneyo. Aluba azikho ngabe uyandelwa ngumsebenzi. Yikho ngiyazibonga izinceku ezikhonzayo ngokusebenza kwazo nzima langokuzimisela ukuncedisa.” Wena uzwa njani ngomsebenzi owenziwa zinceku ezikhonzayo ebandleni lakho?—1 Thim. 3:13.

7. Singatshengisa njani ukuthi siyazibonga izinceku ezikhonzayo? (Khangela lomfanekiso.)

⁷ Kuliqiniso sibili ukuthi sonke siyawuqakathekisa umsebenzi owenziwa zinceku ezikhonzayo. Kodwa iBhayibhili lithi: “Tshengisani ukuthi lingabantu ababongayo.” (Kol. 3:15) Omunye umdala webandla okuthiwa nguKristofer ohlala eFinland uthi: “Ngiyathumezela inceku ekhonzayo ikhadi kumbe ngiyibhalele imeseji besengifaka umbhalo ngiyitshele indlela engikhuthaze ngayo lokuthi kungani ngiwubonga umsebenzi wayo.” Le yiyo indlela umfowethu lo atshengisa ngayo ukuthi uyazibonga inceku ezikhonzayo. UPascal loJael abahlala eNew Caledonia bona bayathandaza baziqambe ngamabizo inceku ezikhonzayo. UPascal uthi: “Kulezinsuku imithandazo yethu yokucela, lokuncenga lokubonga ibimayelana labafowethu laba ababekiweyo abasebandleni lethu.” UJehova uyayizwa imithandazo enjalo futhi iyalinceda ibandla.—2 Khor. 1:11.

ABADALA BEBANDLA ‘BASEBENZA NZIMA PHAKATHI KWENU’

8. Kungani uPhawuli wathi abadala bamabandla ‘babesebenza nzima’? (U-1 Thesalonika 5:​12, 13)

⁸ Ngesikhathi samaKhristu akuqala abadala babesebenza nzima emabandleni. (Bala u-1 Thesalonika 5:​12, 13; 1 Thim. 5:17) ‘Babekhokhela’ ibandla ngokuqhuba imihlangano langokwenza izinqumo beliqula labadala. Babevikela ibandla ‘ngokweluleka’ abafowabo labodadewabo kodwa lokho babekwenza ngomusa. (1 Thes. 2:​11, 12; 2 Thim. 4:2) Kanti njalo babesebenza nzima ukuthi bondle izimuli zabo futhi bezincedisa ukuthi ziqinise ukholo lwazo.—1 Thim. 3:​2, 4; Tit. 1:​6-9.

9. Yiphi eminye imisebenzi eyenziwa ngabadala?

⁹ Lalamuhla abadala benza imisebenzi eminengi. Bangabavangeli. (2 Thim. 4:5) Bayizibonelo ezinhle ekutshumayeleni ngoba bakhuthele emsebenzini lo. Bayahlela umsebenzi wokutshumayela ebandleni abakulo futhi bayancedisa abamemezeli ukuthi benelise ukutshumayela lokufundisa kuhle. Omunye umsebenzi wabadala ngowokwahlulela. Bangabahluleli abalesihawu futhi ababandlululi. Nxa umKhristu angenza isono esikhulu abadala benza konke okusemandleni abo ukuthi bamncedise alungisise ubungane bakhe loJehova. Lanxa kunjalo baba leqiniso lokuthi bagcina ibandla limsulwa. (1 Khor. 5:​12, 13; Gal. 6:1) Umsebenzi oqakathekileyo abadala abawenzayo ngowokwelusa. (1 Phet. 5:​1-3) Bayalungiselela kuhle izinkulumo ezisekelwe eBhayibhilini. Bazama ngamandla wonke ukuthi babekwazi wonke umuntu ebandleni njalo bayavakatshela abamemezeli besiyabelusa. Phezu kwemisebenzi le abanye abadala bayancedisa emsebenzini wokwakha amaWolu oMbuso lokuwalungisa, abanye bahlela imihlangano Emikhulu. Abanye bakumaKhomithi Asebenzelana Lezibhedlela futhi abanye basemaQenjini Avakatshela Izigulane. Abadala basebenza nzima sibili!

10. Kuyini okwenza sibabonge kakhulu abadala abasebenza nzima?

¹⁰ UJehova wathi abelusi babezasinakekela kuhle futhi ‘kasisoze siphinde sethuke loba sesabe.’ (Jer. 23:4) Omunye udadewethu okuthiwa nguJohanna ohlala eFinland wakubona ukuthi amazwi la aliqiniso ngesikhathi unina ebanjwe ngumkhuhlane omubi. Uthi: “Kuyanginzimela ukuthi ngitshele abanye indlela engizizwa ngayo. Kodwa omunye umdala wangibekezelela wathandaza lami lanxa ngangingamjayelanga kangako. Wangiqinisekisa ukuthi uJehova uyangithanda. Angikhumbuli kuhle ukuthi wangitshelani, engikukhumbulayo yikuthi wangenza ngahlaliseka. Ngileqiniso lokuthi uJehova nguye owamthumayo ukuthi azongincedisa ngesikhathi leso esasinzima.” Wena abadala abasebandleni okulo bakuncedise njani?

11. Singatshengisa njani ukuthi siyababonga abadala? (Khangela lomfanekiso.)

¹¹ UJehova ufuna sitshengise ukuthi siyababonga ngenhliziyo yonke abadala “ngenxa yomsebenzi wabo.” (1 Thes. 5:​12, 13) UHenrietta ohlala eFinland uthi: “Abadala bazimisele sibili ukuncedisa abanye. Kodwa lokho akutsho ukuthi balesikhathi esinengi ukwedlula abanye lokuthi balamandla angapheliyo kumbe ukuthi abalazo inhlupho empilweni. Kwezinye izikhathi ngiyake ngibatshele ngithi, ‘Mfowethu uwenza kuhle kakhulu umsebenzi wakho, ngifisa uhlale ukwazi khonokho.’” Omunye udadewethu okuthiwa nguSera ohlala eTürkiyec uthi: “Abadala bayakudinga kakhulu ukukhuthazwa ukuze baqhubeke bewenza kuhle umsebenzi wabo. Singababhalela ikhadi, sibanxuse emizini yethu kumbe sihambe labo ekutshumayeleni.” Ukhona yini umdala ofisa ukumbonga ngenxa yemisebenzi emihle ayenzayo ebandleni? Nxa ekhona dinga izindlela zokutshengisa ukuthi uyambonga ngalokho akwenzayo.—1 Khor. 16:18.

ABABONISI BEZIQINTI BAYASIKHUTHAZA

12. Ngobani abanye ababekhuthaza amabandla ngesikhathi samaKhristu akuqala? (U-1 Thesalonika 2:​7, 8)

¹² UJesu Khristu waphinda wanika ibandla ezinye “izipho ezingabantu” ezenza omunye umsebenzi. Abadala ababeseJerusalema bekhokhelwa nguJesu bathuma uPhawuli loBhanabha labanye abafowethu ukuthi babe ngababonisi abahambelayo. (Imiseb. 11:22) Ngenxa yani? Babefuna bakhuthaze amabandla njalo bawancedise njengalokho okwenziwa zinceku ezikhonzayo labadala. (Imiseb. 15:​40, 41) Amadoda la ayezimisela ukudela izinto ezinengi empilweni aze afake lempilo zawo engozini ukuze afundise futhi akhuthaze abanye.—Bala u-1 Thesalonika 2:​7, 8.

13. Yiphi eminye imisebenzi eyenziwa ngababonisi beziqinti?

¹³ Ababonisi beziqinti bahlala besiya ezindaweni ezitshiyeneyo. Abanye bahamba amakhilomitha amanengi kakhulu besuka kwelinye ibandla besiya kwelinye. Iviki ngayinye umbonisi wesiqinti wenza inkulumo ezitshiyeneyo, avakatshele abamemezeli esiyabelusa, aqhube umhlangano wamaphayona, lomhlangano wabadala, lomhlangano wokuya ekutshumayeleni. Uyalungiselela izinkulumo futhi ahlele lemihlangano yeziqinti leyezabelo. Uyafundisa ezikolo zamaphayona, ahlele umhlangano oqakathekileyo lamaphayona asesiqintini sakhe. Iwofisi yegatsha iyamnika leminye imisebenzi eqakathekileyo okumele ayenze, kwezinye izikhathi imisebenzi le kuyabe kumele ayenze ngokuphangisa.

14. Kuyini okwenza sibathande ababonisi beziqinti abasebenza nzima?

¹⁴ Ababonisi beziqinti bawanceda njani amabandla? Omunye umfowethu ohlala eTürkiye wathi ekhuluma ngendlela ababonisi abahambelayo abamnceda ngayo wathi: “Sonke isikhathi nxa bangavakatshela ibandla lethu, ngisala sengikuqakathekisa ukuthi ngizinike isikhathi esinengi sokuncedisa abafowethu labodadewethu. Sengahanjelwa ngababonisi beziqinti abanengi kodwa phakathi kwabo akula owangitshiya ngibona angani kalasikhathi sokuxoxa lami ngenxa yokuthi yena ulemisebenzi eminengi kakhulu yokwenza.” UJohanna esike sakhuluma ngaye wake watshumayela lombonisi wesiqinti kodwa babeswela abantu mhlalokho. Uthi: “Lanxa kunjalo angisoze ngalikhohlwa ilanga lelo. Osisi bami ababili babesanda kuthutha futhi ngangibakhanuka kakhulu. Umbonisi wesiqinti wangikhuthaza wanginceda ngabona ukuthi lanxa khathesi izihlobo zethu zingabe zihlala khatshana kakhulu lathi, emhlabeni omutsha sizathola isikhathi esinengi kakhulu sokuba ndawonye.” Abafowethu labodadewethu abanengi bayabathanda ababonisi beziqinti ababahambelayo ngenxa yokuthi bayabancedisa ngendlela ezitshiyeneyo.—Imiseb. 20:37–21:1.

15. (a) Kuyini okukhulunywa ngakho ku-3 Johane 5-8 esingakwenza ukuze sitshengise ukuthi siyababonga ababonisi beziqinti? (Khangela lomfanekiso.) (b) Kungani kumele sitshengise ukuthi siyawabonga amakhosikazi amadoda abekiweyo njalo singakwenza njani lokho? (Khangela ibhokisi elithi “Ungawakhohlwa Amakhosikazi Abo.”)

¹⁵ Umphostoli uJohane wakhuthaza uGayu ukuthi abamukele ngazo zombili abafowethu ababevakatshile lokuthi ‘nxa sebesuka abancedise ngendlela ezathokozisa uNkulunkulu.’ (Bala u-3 Johane 5-8.) Eyinye indlela esingakwenza ngayo lokhu yikunxusa umbonisi wesiqinti emizini yethu. Okunye esingakwenza yikusekela inhlelo zokuya ekutshumayeleni ngeviki ayabe esivakatshele ngayo. ULeslie esike sakhuluma ngaye uleyinye indlela atshengisa ngayo ukuthi uyabonga. Uthi: “Ngiyathandaza kuJehova ngicela ukuthi abanakekele. Mina lomkami siyake sibabhalele incwadi sibatshela ukuthi basincede njani ngesikhathi besebandleni lethu.” Okunye okumele sihlale sikukhumbula yikuthi ababonisi beziqinti labo bayehlelwa zinhlupho. Bayake bagule, bakhathazeke kumbe bazizwe bephela amandla. Nxa ungabatshela amazwi akhuthazayo kumbe ubanike isipho esincane nje, ungabe usetshenziswa nguJehova ukuthi uphendule imithandazo yabo.—Zaga. 12:25.

KUFUNEKA EZINYE “IZIPHO EZINGABANTU”

16. Yiphi imibuzo abazalwane abangazibuza yona ukuze benze lokho okukhulunywa ngakho kuZaga 3:27?

¹⁶ Emhlabeni wonke nje kufuneka abazalwane abanengi abangaba ‘yizipho ezingabantu.’ Nxa ungumzalwane obhabhathiziweyo uyenelisa yini ‘ukuthi uncedise’? (Bala iZaga 3:27.) Uzimisele yini ukusebenza nzima ukuthi ube yinceku ekhonzayo? Nxa kuyikuthi uyinceku ekhonzayo uyafuna yini ukuthuthuka ukuze ube ngumdala?d Zikhona yini izinto ongazitshintsha empilweni yakho ukuze wenelise ukufaka isicelo sokuya eSikolo Sabavangeli BoMbuso? Ozakufunda esikolo lesi kuzakunceda ukuthi uJesu akusebenzise ezintweni ezinengi. Nxa ubona angani ngeke wenelise ukukwenza konke lokhu thandaza kuJehova. Mcele ukuthi akunike umoya wakhe ongcwele ozakuncedisa ukuthi uwenze kuhle loba yiwuphi umsebenzi ozawuphiwa.—Luk. 11:13; Imiseb. 20:28.

17. “Izipho ezingabantu” zitshengisani ngeNkosi yethu uKhristu uJesu?

¹⁷ Abafowethu abasebenza nzima futhi ababekwe nguJesu ukuthi babe ‘yizipho ezingabantu’ bayibufakazi bokuthi uJesu nguye sibili osikhokhelayo kulezinsuku zokucina. (Mat. 28:20) Uzwa njani ngokuthi sileNkosi elothando, ephanayo, elendaba lathi futhi esinika abazalwane abafaneleyo ukuthi basikhangele? Nxa kuyikuthi uyayibonga, dinga izindlela zokutshengisa ukuthi uyawabonga amadoda la asebenza nzima phakathi kwethu. Kanti njalo akumelanga ukhohlwe ukubonga uJehova onguye osipha “zonke izipho ezinhle lazo zonke izipho ezipheleleyo.”—Jak. 1:17.