Ungenzani Nxa Kulezinto Ozibuza Zona?

1-2. (a) Yiphi eminye imibuzo abantu bakaJehova abangabe bezibuza yona? (b) Sizaxoxa ngani esihlokweni lesi?

KUNGELANI lokuthi singakanani, sonke siyake sizibuze izinto ezithile.a Ngokwesibonelo, cabanga ngosakhulayo ozibuza ukuthi uJehova ulendaba laye yini sibili. Engabe engelaqiniso lokuthi kumele abhabhathizwe yini. Cabanga ngomfowethu ongazange agijimisane lezinto zomhlaba lo ngesikhathi esesemncane, kodwa wakhetha ukuthi aqakathekise izinto eziphathelane loMbuso. Khathesi kungabe sekunzima ukuthi ondle imuli yakhe, abesecina esezibuza ukuthi kambe wakhetha kuhle yini. Cabanga langodade osekhulile ongaselamandla okwenza okunengi. Angabe edanile ngoba kasenelisi ukwenzela uJehova lokho ayekwenza kuqala. Wena sewake wazibuza imibuzo enjengale elandelayo yini? ‘UJehova uyangibona yini? Kambe kangidlalisanga isikhathi sami yini ngizinikela kuJehova ukuthi ngenze okunengi? Ngiseseluncedo yini kuJehova?’

² Nxa singayekela ukuthola impendulo zemibuzo le, singacina singaselakholo njalo singasamkhonzi uJehova. Esihlokweni lesi sizaxoxa ngamavesi azasinceda nxa sizibuza ukuthi (1) uJehova ulendaba lathi yini? (2) lokuthi izinqumo esazenzayo zaziqondile yini? (3) kanye lokuthi siseseluncedo yini kuJehova?

UNGENZANI NXA ULEMIBUZO OZIBUZA YONA?

3. Kuyini okunye esingakwenza nxa kulemibuzo esizibuza yona?

³ Okunye esingakwenza nxa silemibuzo esizibuza yona yikubala iLizwi likaNkulunkulu sidinga izimpendulo zemibuzo leyo. Nxa singenza njalo sizathola amandla, sizathuthuka ekukhonzeni njalo sizenelisa ‘ukuqina ekholweni.’—1 Khor. 16:13.

4. Singenzani ukuze ‘sihlolisise zonke izinto’? (U-1 Thesalonika 5:21)

⁴ Bala u-1 Thesalonika 5:21. Nanzelela ukuthi iBhayibhili lisikhuthaza ukuthi ‘sihlolisise zonke izinto.’ Singakwenza njani lokhu? Nxa kulokunye okusihluphayo esingelaqiniso lakho, kumele sihlolisise iBhayibhili sizwe ukuthi lithini ngakho. Ngokwesibonelo, cabanga ngosakhulayo ozibuza ukuthi uqakathekile yini kuNkulunkulu. Kumele agoqe izandla yini azitshele ukuthi vele kaqakathekanga kuNkulunkulu? Hayi, kumele ‘ahlolisise zonke izinto,’ ataditshe iBhayibhili ukuze abekwazi ukuthi uJehova umbona njani.

5. Kuyini okungasinceda ukuthi sithole impendulo zemibuzo yethu?

⁵ Nxa sibala iLizwi likaNkulunkulu, kuyabe kungani sizwa uJehova ekhuluma lathi. Yikho nxa kulombuzo osihluphayo, kuyabe kumele sisebenze nzima ukuze sizwe ukuthi uJehova usiphendula njani. Nxa sibala iBhayibhili, kumele sidinge amavesi azasinceda sithole impendulo yombuzo esingabe silawo. Singachwayisisa ngendaba esihluphayo sisebenzisa amabhuku okuchwayisisa esiwaphiwa yinhlanganiso kaJehova. (Zaga. 2:​3-6) Nxa sichwayisisa kumele sithandaze sicele uJehova asincedise ukuthi sizwisise lokuthi sibone ukuthi uthini ngendaba esihluphayo. Nxa sesenze njalo, singadinga izimiso zeBhayibhili lalokho okungasinceda ukuthi sithole impendulo yombuzo esingabe sizibuza wona. Okunye okungasinceda yikubala ngabantu ababelenhlupho ezinjengezethu okukhulunywa ngabo eBhayibhilini.

6. Ukungena imihlangano zikhathi zonke kungasinceda njani?

⁶ UJehova uphinda akhulume lathi emihlanganweni yebandla. Nxa singalovi emihlanganweni, singezwa inkulumo loba impendulo yomunye engasinceda sibekwazi ukuthi uJehova uthini ngalokho okusihluphayo. (Zaga. 27:17) Khathesi kasixoxeni ngokuthi singenzani nxa sizibuza ukuthi uJehova ulendaba lathi yini kumbe ukuthi senza isinqumo esihle yini loba siseseluncedo yini kuJehova.

NXA UZIBUZA UKUTHI UJEHOVA ULENDABA LAWE YINI

7. Yiwuphi umbuzo abanye abangazibuza wona?

⁷ Sewake wazibuza ukuthi uJehova uyakubona yini? Nxa ubona angani awuqakathekanga ungacabanga ukuthi akwenzi ukuthi ube ngumngane woMdali womhlaba wonke, uyabe ubona angathi ukhatshana kakhulu lawe. Mhlawumbe lokhu yikho okwake kwacatshangwa yiNkosi uDavida. Kwakuyimangalisa ukuthi uJehova uyababona abantu, yaze yathi: “Awu Jehova, umuntu uyini ukuthi usungaze uzihluphe ngaye? Iyini indodana yomuntu ukuthi usungaze ube lendaba layo?” (Hubo. 144:3) Manje nxa uzibuza ukuthi uJehova ulendaba lawe yini ungayithola ngaphi impendulo?

8. Kuyini uJehova akubonayo ebantwini? (U-1 Samuyeli 16:​6, 7, 10-12)

⁸ IBhayibhili lisitshela ukuthi uJehova uyabananzelela labo abangakhanya bengaqakathekanga kwabanye abantu. Ngokwesibonelo, uJehova wathuma uSamuyeli endlini kaJese ukuthi ayegcoba eyinye yamadodana akhe ukuthi ibe yinkosi yako-Israyeli esikhathini esizayo. UJese wayelamadodana angu-8 kodwa wabiza angu-7 ukuthi azobonwa nguSamuyeli. Watshiya uDavida owayenguye omncane kulabo bonke.b Kodwa uJehova wakhetha yena uDavida. (Bala u-1 Samuyeli 16:​6, 7, 10-12.) UJehova wambona uDavida ukuthi wayengumuntu onjani sibisibili. Wayekwazi ukuthi ijaha leli lalimthanda kakhulu.

9. Kuyini okungenza ube leqiniso lokuthi uJehova ulendaba lawe? (Khangela lomfanekiso.)

⁹ Cabanga ngezinye indlela uJehova atshengise ngazo ukuthi uyakubona. Uyakunika amacebo angakunceda ukuthi ulwisane lalokho okukuhluphayo. (Hubo. 32:8) Pho ubengakwenza yini lokhu yena engakwazi kuhle? (Hubo. 139:1) Nxa ungasebenzisa amacebo esiwanikwa nguJehova, uzibonele ngawakho indlela akuncedisa ngayo, awusoze uthandabuze ukuthi ulendaba lawe sibili. (1 Imilan. 28:9; Imiseb. 17:​26, 27) UJehova uyakubona konke okwenzayo ukuze uqhubeke umkhonza futhi umlalela. Uyakwazi ukuthi wena ungumuntu onjani sibili futhi ufuna ukuba ngumngane wakho. (Jer. 17:10) Ufisa ukuthi lawe ube ngumngane wakhe.—1 Joh. 4:19.

NXA UZIBUZA UKUTHI WAWENZE ISINQUMO ESIHLE YINI

10. Nxa sicabanga ngezinqumo esazenza kudala, yiphi imibuzo esingazibuza yona?

¹⁰ Ngokuhamba kwesikhathi abanye bangacabanga ngezinqumo abazenza kudala besebezibuza ukuthi babekhethe kuhle yini. Mhlawumbe babetshiye umsebenzi omuhle kumbe ibhizimusi ukuze benzele uJehova okunengi. Kodwa ngemva kweminyaka eminengi bangaqalisa ukubona abanye ababaziyo abagijimisa izinto lezi sebekhanya bekhomba ngophakathi futhi belemali enengi. Yikho bangazibuza bathi, ‘Kambe kwanceda yini ukuthi ngazidela ukuze ngenzele uJehova okunengi kumbe ngakhutha amathuba okwenza imali?’

11. Kuyini okwakukhathaza umlobi weHubo 73?

¹¹ Nxa lawe uyake uzibuze imibuzo enjalo, cabanga ngalokho okwenzakala kumlobi weHubo 73. Wayebona abanye bekholisa impilo, beqine saka, bekhanya bephumelela futhi bengelanhlupho. (Hubo. 73:​3-5, 12) Wathi ebakhangela wabona angathi bayaphumelela wasecabanga ukuthi wayedlalisa isikhathi ngokukhonza uJehova. ‘Wayesehlelwa zinhlupho usuku lonke’ kumbe ekhathazekile usuku lonke. (Hubo. 73:​13, 14) Manje wenzani ngalokho?

12. Umlobi weHubo wenzani ngalokho okwakumhlupha? (IHubo 73:​16-18)

¹² Bala iHubo 73:​16-18. Umhubi waya endaweni engcwele kaJehova. Wathi esefike lapho yikho okwathi dlwe khona, wazwisisa ukuthi lanxa abanye kungakhanya angathi impilo iyabahambela babengelalo ithemba lekusasa elihle. Lokhu kwamenza wahlaliseka ngoba wayesezwisisa ukuthi ukwenza izinto eziphathelane lokukhonza uJehova yinto enhle ukwedlula zonke. Lokhu kwamenza wazimisela ukuqhubeka ekhonza uJehova.—Hubo. 73:​23-28.

13. Kuyini okungakunceda ukuthi uhlaliseke nxa uzibuza ukuthi izinqumo owazenza kudala zaziqondile yini? (Khangela lomfanekiso.)

¹³ Lawe iLizwi likaNkulunkulu lingakunceda ukuthi uhlaliseke. Njani? Cabanga ngakho konke okuligugu olakho okugoqela ukwamukelwa nguJehova, ubusukhumbula ukuthi abantu abangamkhonziyo kabalaso isibusiso leso. Ithemba labo lonke lisezintweni abalazo khathesi ngoba abakhangelelanga ukuthola enye impilo engcono esikhathini esizayo. Kodwa wena uJehova uthembisa ukukunika izibusiso ezinengi kakhulu. (Hubo. 145:16) Nanku okunye ongacabanga ngakho: Ukhona yini ongabakwazi ukuthi impilo yakhe yayizakuba njani aluba wenza isinqumo esitshiyene laleso asenzayo? Iqiniso elikhona yikuthi labo abenza izinqumo ezitshengisa ukuthi bayamthanda uNkulunkulu lokuthi bayabathanda omakhelwane babo bayathokoza kakhulu.

NXA UZIBUZA UKUTHI USESELUNCEDO YINI KUJEHOVA

14. Kuyini okwenza abanye bakhathazeke futhi yiwuphi umbuzo abangabe bezibuza wona?

¹⁴ Abanye abantu bakaJehova bathwele nzima ngenxa yokuguga, ukugula kumbe ukukhubazeka. Lokhu kungenza babone angathi abaqakathekanga kuJehova. Bangacina bezibuza umbuzo lo, ‘Ngiseseluncedo yini kuJehova?’

15. Kuyini umlobi weHubo 71 ayengakuthandabuzi?

¹⁵ Umlobi weHubo 71 laye kwakumkhathaza lokho. Wathandaza wathi: “Ungangitshiyi nxa sengiphele amandla.” (Hubo. 71:​9, 18) Lanxa kunjalo, wayengathandabuzi ukuthi nxa wayengaqhubeka ekhonza uJehova eqotho, uJehova wayezamkhokhela futhi amsekele. Umhubi wazwisisa ukuthi uJehova uyathokoza ngalabo abenza konke okusemandleni abo ukuthi bamkhonze kungelani lezimo zabo.—Hubo. 37:​23-25.

16. Kuyini okungenziwa ngasebegugile okwenza babe luncedo kuJehova? (IHubo 92:​12-15)

¹⁶ Nxa kuyikuthi usugugile zama ukucabanga ukuthi uJehova ukubona njani. Angakunceda ukuthi uqhubeke umkhonza uthembekile lanxa usuphela amandla. (Bala iHubo 92:​12-15.) Ungacabangi kakhulu ngalokho ongenelisi ukukwenza kodwa cabanga ngalokho owenelisa ukukwenza. Ngokwesibonelo, ungakhuthaza abanye ngokuqhubeka ukhonza uthembekile langokuba lendaba labo. Ungabaxoxela indlela uJehova akuncedise ngayo iminyaka yonke le umkhonza, ubusubatshela langezithembiso zeBhayibhili ozilindele ngabomvu. Kanti njalo ungayithathi kancane imithandazo oyenzela abanye ngoba iyabanceda kakhulu. (1 Phet. 3:12) Sonke kukhona esingakwenzela uJehova lesingakwenzela abanye kungelani lokuthi izimo zethu zinjani.

17. Kungani kungamelanga siziqathanise labanye?

¹⁷ Nxa kukudanisa ukuthi awusenelisi ukwenzela uJehova okunengi, qiniseka ukuthi uyakuqakathekisa konke owenelisa ukumenzela khona. Kwezinye izikhathi ungakhangela okwenziwa ngabanye ubusuziqathanisa labo. Zama ukuthi ungakwenzi lokho ngoba uJehova yena kasiqathanisi labanye. (Gal. 6:4) Ngokwesibonelo uMariya wathatha amafutha anukelelayo futhi adula kakhulu wawathela enyaweni zikaJesu. (Joh. 12:​3-5) Kodwa umfelokazi owayedubeka yena wanikela ngokuzinhlamvu kwemali okubili okungatsho lutho. (Luk. 21:​1-4) Lanxa kunjalo, uJesu kazange abaqathanise. Akubonayo yikuthi babelokholo. LoJehova laye uyakuqakathekisa kakhulu lokho esimenzela khona ngoba simthanda futhi sizinikele kuye lanxa thina singabona angathi kuncane.

18. Kuyini okungasinceda nxa silemibuzo esikhathazayo? (Khangela lebhokisi elithi “ILizwi LikaJehova Lingakunceda Nxa Kukhona Osukuthandabuza.”)

¹⁸ Sonke siyake sibe lento esikhathazayo esiyabe sizibuza yona. Kodwa njengoba sibonile, iLizwi likaNkulunkulu iBhayibhili lingasinceda ukuthi sithole impendulo yalokho esiyabe sizibuza khona. Yikho yenza konke okusemandleni akho ukuthi udinge izimpendulo zemibuzo yakho. Ungenza njalo awusoze ukhathazeke kodwa uzahlaliseka. Qiniseka ukuthi uJehova uyakubona. Uyakuqakathekisa konke ukuzidela kwakho futhi uthembisa ukuthi uzakunika umvuzo. Qiniseka ukuthi uJehova uyasithanda futhi ulendaba lazo zonke izinceku zakhe eziqotho.