Khuthala Ekutshumayeleni NjengoJesu

1. Abantu bakaJehova batshiyene njani labanye abazithi bangamaKhristu?

ABANTU bakaJehova bakukhuthalele ukutshumayeza abanye. Lokhu kwenza batshiyane kakhulu labanye abazithi bangamaKhristu. (Tit. 2:14) Kodwa kwezinye izikhathi abanye bangezwa kungatsho ukuthi batshumayele. Omunye umfowethu ongumdala webandla futhi owenza kuhle umsebenzi wakhe wathi: “Kwezinye izikhathi ngiyabe ngisizwa kusala ukuthi ngiye ekutshumayeleni.” Mhlawumbe lawe uyake uzwe njalo ngezinye izikhathi.

2. Kuyini okungenza kube nzima ukuthi sikhuthale ekutshumayeleni?

² Kungenzakala ukuthi kuleminye imisebenzi yenkonzo esikholisa ukuyenza ukwedlula ukutshumayela. Kuyini okungabangela ukuthi kube njalo? Nxa sisakha izakhiwo zenhlanganiso futhi sizilungisa loba nxa sincedisa abehlelwe ngumonakalo kumbe sikhuthaza abafowethu labodadewethu siyathokoza ngoba sikubona masinyane ukuthi esikwenzileyo kubancede njani abanye. Kumnandi kakhulu ukusebenza labafowethu labodadewethu njalo siyakwazi ukuthi bayawuqakathekisa umsebenzi esiyabe siwenza. Kanti njalo singabe sesileminyaka leminyaka sitshumayeza abantu ensimini yethu kodwa bengathuthuki babhabhathizwe. Kwezinye izikhathi sihlangana labantu abangafuniyo ukusilalela. Siyakwazi ukuthi njengoba ukuphela kuqhubeka kusondela, abantu abanengi bazabe bengasafuni ukulalela izindaba ezinhle. (Mat. 10:22) Pho kuyini okungasinceda ukuthi sihlale sikutshisekela ukutshumayela?

3. Umzekeliso okuLukha 13:​6-9 utshengisa njani ukuthi uJesu wayekhuthele?

³ Okunye okungasinceda ukuthi sikukhuthalele ukutshumayela yikulingisela uJesu. Kazange akuvilaphele ukutshumayela kodwa wayelokhu engezelela indlela ayetshiseka ngayo. (Bala uLukha 13:​6-9.) UJesu wayefanana lomuntu owayelesihlahla somkhiwa ensimini yakhe yamagilebisi owasihlakulela wasihlakulela okweminyaka emithathu kodwa kwehlula ukuthi sizale. UJesu laye watshumayeza amaJuda okweminyaka engaba mithathu kodwa abanengi abazange bamlalele. Njengoba umuntu owayelesihlahla somkhiwa engazange asikhalale masinya isihlahla leso, uJesu laye kazange abakhalale abantu kumbe aqalise ukudonda ukutshumayela. Wasebenza gadalala ezama ukubancedisa ukuthi bamukele izindaba ezinhle.

4. Yiziphi izinto ezine esizaxoxa ngazo?

⁴ Esihlokweni lesi sizaxoxa ngokwenziwa nguJesu okutshengisa ukuthi wayetshiseka. Sizahlola lokho akwenza ngezinyanga eziyisithupha zokucina zenkonzo yakhe. (Khangela umcijo wokutaditsha okuLukha 10:1 othi “after these things” ku-Nguqulo Yomhlaba Omutsha yesiNgisi okuthiwa yi-Study Bible.) Okuzasinceda ukuthi lathi sitshiseke yikukhangela lokho akwenzayo lokudinga izifundo kulokho ayekufundisa. Nanzi izinto ezine ezenziwa nguJesu esizakhuluma ngazo: (1) Wayeqakathekisa ukwenza intando kaJehova, (2) wayezihlolisisa iziphrofetho eziseBhayibhilini, (3) wayehlala ethembele kuJehova njalo, (4) kazange alahle ithemba lokuthi kulabantu ababezamlalela.

WAYEQAKATHEKISA UKWENZA INTANDO KAJEHOVA

5. UJesu watshengisa njani ukuthi wayekuqakathekisa ukwenza intando kaNkulunkulu?

⁵ UJesu wayekutshisekela ukutshumayela “izindaba ezinhle zoMbuso” ngoba wayekwazi ukuthi uNkulunkulu wayefuna enze umsebenzi lo. (Luk. 4:43) Wayeqakathekisa ukutshumayela ukwedlula loba yini. Langesikhathi esezaqeda inkonzo yakhe wayehamba “idolobho ngedolobho lesigaba ngesigaba” efundisa abantu. (Luk. 13:22) Kanti njalo wafundisa abafundi bakhe abanengi ukuthi labo benelise ukwenza umsebenzi wokutshumayela.—Luk. 10:1.

6. Eminye imisebenzi yenkonzo iwusekela njani umsebenzi wokutshumayela? (Khangela lomfanekiso.)

⁶ Lalamuhla uJehova loJesu bafuna siwuqakathekise kakhulu umsebenzi wokutshumayela izindaba ezinhle. (Mat. 24:14; 28:​19, 20) Yonke imisebenzi yenkonzo esiyenzayo isekela umsebenzi wokutshumayela. Ngokwesibonelo, sakha amaWolu oMbuso ukuze abantu esibatshumayezayo babuye bazokhonza kuwo ndawonye lathi njalo lemisebenzi eyenziwa eBhetheli isekela umsebenzi wokutshumayela. Kanti njalo nxa kungaba lomonakalo abafowethu labodadewethu bayancediswa ukuze baqalise masinyane imisebenzi yenkonzo egoqela lokutshumayela. Nxa singabakwazi ukuthi umsebenzi wokutshumayela uqakathekile, sikhumbule lokuthi yiwo umsebenzi omkhulu uJehova afuna siwenze, sizakuqakathekisa ukutshumayeza abantu. Omunye umdala webandla ohlala eHungary okuthiwa nguJanos uthi: “Akulamsebenzi wenkonzo ongathatha indawo yokutshumayela ngoba ukutshumayela ngumsebenzi oqakatheke kakhulu.”

7. Kungani uJehova efuna siqhubeke sitshumayela? (1 KuThimothi 2:​3, 4)

⁷ Okunye okungasinceda ukuthi sikhuthale ekutshumayeleni yikubona abantu ngendlela uJehova ababona ngayo. Ufuna abantu abanengi bazizwe izindaba ezinhle futhi baqalise ukumkhonza. (Bala u-1 Thimothi 2:​3, 4.) Lokhu yikho okwenza asifundise ukuthi siwenze njani umsebenzi lo onganceda abantu ukuthi bathole ukuphila. Ngokwesibonelo, ibhukwana elithi Thanda Abantu Ubenze Babe Ngabafundi, lilamacebo asincedayo ukuthi senelise ukuxoxa labantu, siqalise lokubafundisa iBhayibhili ukuze babe ngabafundi. Lanxa abanye bengasoze basilalele khathesi, kungenzakala basilalele ukuhlupheka okukhulu kungakapheli. Bangakhumbula lokho esiyabe sibatshele khona khathesi besebesiba lesifiso sokukhonza uJehova. Kodwa nxa singatshumayelanga, bazakwenza njani khonalokho?

WAYEZIZWISISA IZIPHROFETHO EZISEBHAYIBHILINI

8. Ukwazi iziphrofetho eziseBhayibhilini kwamnceda njani uJesu?

⁸ UJesu wayezwisisa ukuthi ezinye iziphrofetho eziseBhayibhilini zazizagcwaliseka njani. Wayekwazi ukuthi wayezatshumayela okweminyaka emithathu lenyanga eziyisithupha. (Dan. 9:​26, 27) Wayezazi leziphrofetho ezazikhuluma ngokuthi wayezakufa nini lokuthi wayezakufa njani. (Luk. 18:​31-34) Lokhu kwamnceda ukuthi asisebenzise kuhle kakhulu isikhathi sakhe. Ngakho wayetshiseka ekutshumayeleni ukuze awuqede umsebenzi ayewuphiwe.

9. Iziphrofetho eziseBhayibhilini zisinceda njani ukuthi sikutshisekele ukutshumayela?

⁹ Nxa lathi sizizwisisa iziphrofetho eziseBhayibhilini sizakutshisekela ukutshumayela. Siyakwazi ukuthi sekusele isikhathi esincane kakhulu ukuthi umumo lo wezinto uphele. Siyananzelela ukuthi lokhu okwenzakala khathesi kanye lalokho okwenziwa ngabantu kutshengisa ukuthi sesisezinsukwini zokucina. Siyaqedisisa ukuthi ukulwisana kwe-Anglo-America (umbuso weBritain le-America) lombuso weRussia kanye lamazwe ayisekelayo kuyasigcwalisa isiphrofetho seBhayibhili esimayelana lenkosi yaseningizimu lenkosi yasenyakatho ezazizabakhona “ngesikhathi sokucina.” (Dan. 11:40) Siyazwisisa lokuthi umbuso weBritain le-America yiwo omelwa zinyawo zesithombe okukhulunywa ngaso kuDanyeli 2:​43-45. Iziphrofetho lezi zenza siqiniseke ukuthi sekuseduze ukuthi uMbuso kaNkulunkulu utshabalalise bonke ohulumende abasemhlabeni. Zonke iziphrofetho lezi ziyasinceda sibekwazi ukuthi singaphi kwesikhathi. Lokhu besekusinceda ukuthi siwutshisekele umsebenzi wokutshumayela.

10. Iziphrofetho eziseBhayibhilini zingasinceda njani ukuthi sikutshisekele ukutshumayela?

¹⁰ Siyakutshisekela ukutshela abanye iziphrofetho eziseBhayibhilini ezilamazwi akhuthazayo. Omunye udadewethu okuthiwa nguCarrie ohlala eDominican Republic uthi: “UJehova usithembisa ikusasa elihle kakhulu. Lokhu kwenza ngikhuthale ukutshela abanye izithembiso lezo. Ngiyakubona ukuthi izithembiso lezi azincedi mina ngedwa kodwa zinganceda labanye ngoba abantu bathwele nzima.” Iziphrofetho eziseBhayibhilini ziyasikhuthaza ukuthi sitshumayele ngamandla ngoba siyakwazi ukuthi uJehova uyasisekela emsebenzini lo. ULeila ohlala eHungary uthi: “Isiphrofetho esiku-Isaya 11:​6-9 singenza ngitshumayeze labantu abakhanya angathi ngeke bazamukele izindaba ezinhle. Ngiyakwazi ukuthi uJehova angancedisa loba ngubani ukuthi atshintshe.” Omunye umfowethu ohlala eZambia okuthiwa nguChristopher uthi: “Izindaba ezinhle ziyasabalala emhlabeni wonke njengoba nje kutshiwo kuMakho 13:10. Ngikubona kuyisibusiso ukuncedisa ekugcwalisekeni kwesiphrofetho lesi.” Wena yiziphi iziphrofetho eziseBhayibhilini ezikwenza ube ledlabuzane lokutshumayela?

WATHEMBELA KUJEHOVA

11. Kungani kwakumele uJesu athembele kuJehova? (ULukha 12:​49, 53)

¹¹ UJesu wayethembele kuJehova ukuthi amncedise aqhubeke ekutshisekela ukutshumayela. Lanxa uJesu wayekwazi ukuthi kumele akhulume njani labantu ayebatshumayeza wayekwazi ukuthi izindaba ezinhle zoMbuso zazizabazondisa abanye abantu lokuthi abanengi babezaphikisana lalokho ayekutsho. (Bala uLukha 12:​49, 53.) Abakhokheli benkolo bazama kanengi ukumbulala ngenxa yokuthi wayetshumayela. (Joh. 8:59; 10:​31, 39) Lanxa kunjalo uJesu kazange ayekele ukutshumayela ngoba wayekwazi ukuthi uJehova wayemsekela. Wathi: ‘Angingedwa, uBaba ongithumileyo ulami. Kangitshiyanga ngedwa ngoba ngihlala ngisenza izinto ezimthokozisayo.’—Joh. 8:16, 29.

12. UJesu wabancedisa njani abafundi bakhe ukuthi baqhubeke betshumayela lanxa behlukuluzwa?

¹² UJesu wakhumbuza abafundi bakhe ukuthi kwakumele bathembele kuJehova. Wabatshela kanengi ukuthi uJehova wayezabancedisa lanxa babengahlukuluzwa. (Mat. 10:​18-20; Luk. 12:​11, 12) Wabakhuthaza lokuthi bananzelele izingozi ezazingabakhona. (Mat. 10:16; Luk. 10:3) Wabafundisa ukuthi bangabambi abantu ngamandla ukuthi babalalele. (Luk. 10:​10, 11) Wabatshela lokuthi nxa behlukuluzwa babaleke. (Mat. 10:23) UJesu wayetshiseka futhi ethembele kuJehova kodwa kazange azifake engozini.—Joh. 11:​53, 54.

13. Kuyini okungenza ungathandabuzi ukuthi uJehova uzakuncedisa?

¹³ Lathi lamuhla basithwalise amagabha avuzayo ngenxa yokuthi sitshumayela izindaba ezinhle. Yikho kuqakathekile ukuthi sicele uJehova asincedise ukuze siqhubeke sikhuthele emsebenzini lo. (Isam. 12:17) Kuyini okungenza uqiniseke ukuthi uJehova uzakuncedisa? KuJohane 17 uJesu wathandaza ecela ukuthi uJehova abancedise abaphostoli bakhe futhi uJehova wawuphendula umthandazo wakhe. Ibhuku lemiSebenzi liyasitshela ukuthi uJehova wabancedisa njani abaphostoli ukuthi baqhubeke bekutshisekela ukutshumayela lanxa babehlutshwa. UJesu wacela uJehova ukuthi akhangele lalabo ababezakholwa izindaba ezinhle ezazizatshunyayelwa ngabaphostoli. Lawe ubaliwe ebantwini labo. UJehova ulokhu ewuphendula umthandazo kaJesu. Uzakuncedisa ngoba labaphostoli wabancedisa.—Joh. 17:​11, 15, 20.

14. Sikwazi njani ukuthi sizenelisa ukuqhubeka sikutshisekela ukutshumayela? (Khangela lomfanekiso.)

¹⁴ Njengoba ukuphela kuqhubeka kusondela kungaba nzima ukuthi siqhubeke sikhuthele ekutshumayeleni. Nxa kungaba njalo uJehova uzaqhubeka esincedisa. (Luk. 21:​12-15) Silingisela uJesu labafundi bakhe ngokungabambi abantu ngamandla ukuthi basilalele lokuthi singaphikisani labo kungelasidingo. Kwezinye izikhathi abafowethu labodadewethu bangayaliswa ukutshumayela. Nxa kungaba njalo kabathembeli emandleni abo kodwa bathembela kuJehova baqhubeke betshumayela. UJehova wabanika uJesu labaphostoli bakhe amandla okuthi baqhubeke betshumayela. Lathi lamuhla uzasinika amandla ukuze “umsebenzi wokutshumayela wenziwe ngokupheleleyo” langendlela ayifunayo. (2 Thim. 4:17) Qiniseka ukuthi nxa ungathembela kuJehova uzenelisa ukuqhubeka ukutshisekela ukutshumayela.

KAZANGE ALAHLE ITHEMBA

15. Kuyini okutshengisa ukuthi uJesu wayethemba ukuthi kwakulabantu ababezalalela izindaba ezinhle?

¹⁵ UJesu wayehlala elethemba lokuthi bakhona ababezalalela izindaba ezinhle. Lokhu kwamnceda ukuthi ahlale etshiseka emsebenzini wokutshumayela. Ngokwesibonelo, kwathi sekusiyaphela umnyaka ka-30 C.E., uJesu wabona ukuthi abanengi babezimisele ukumlalela, yikho wabafanisa lamasimu aselindele ukuvunwa. (Joh. 4:35) Kwathi sekwedlule umnyaka waphinda watshela abafundi bakhe wathi: “Manengi amabele okumele avunwe.” (Mat. 9:​37, 38) Ngemva kwesikhathi waphinda wagcizelela wathi: ‘manengi amabele okumele avunwe. Ncengani iNkosi yokuvuna ukuthi ithumele izisebenzi emsebenzini wayo wokuvuna.’ (Luk. 10:2) UJesu kazange ake azitshele ukuthi abantu abasoze balalele izindaba ezinhle futhi wayethokoza nxa wayebabona belalela.—Luk. 10:21.

16. Imizekeliso kaJesu emibili yabanceda njani abafundi bakhe? (ULukha 13:​18-21) (Khangela lomfanekiso.)

¹⁶ UJesu wakhuthaza abafundi bakhe ukuthi bangazitsheli ukuthi abantu babengasoze balalele izindaba ezinhle. Lokhu kwakuzakwenza bahlale bekhuthele emsebenzini lo. Ake sixoxe ngemizekeliso yakhe emibili. (Bala uLukha 13:​18-21.) Komunye umzekeliso uJesu watshela abafundi bakhe ngentanga yemastadi eyakhula yaba yisihlahla esikhulu. Umzekeliso lo wawubafundisa ukuthi abantu abanengi babezalalela izindaba ezinhle zoMbuso lokuthi akulalutho olwaluzamisa ukuthi lokhu kwenzakale. Waphinda wasebenzisa umzekeliso wemvubelo ukuze atshengise ukuthi izindaba ezinhle zazizasabalala ezindaweni ezinengi lokuthi zazizakwenza ukuthi abantu batshintshe. Kodwa utshintsho lolu lwalungasoze lubonakale masinyane ebantwini. UJesu wabancedisa sibili abafundi bakhe ukuthi babone ukuthi umsebenzi wabo wokutshumayela wawuzaphumelela.

17. Kuyini okungenza singalahli ithemba lokuthi abantu bazazamukela izindaba ezinhle?

¹⁷ Okunye okwenza siwukhuthalele umsebenzi wokutshumayela yikucabanga ngendlela izindaba ezinhle ezisabalala ngayo emhlabeni wonke. Minyaka yonke kulamamiliyoni abantu ababuyayo eSikhumbuzweni futhi kulabantu abanengi abafunda lathi iBhayibhili. Kanti njalo izinkulungwane lezinkulungwane zabantu ziyabhabhathizwa futhi zisebenze lathi emsebenzini wokutshumayela. Asikwazi ukuthi bazakuba banengi kangakanani abantu abazasilalela kodwa esikwaziyo yikuthi uJehova uqoqa ixuku elikhulu elizasinda ekuhluphekeni okukhulu okuzayo. (Isam. 7:​9, 14) UJehova iNkosi yokuvuna uyakwazi ukuthi banengi abantu abazakwamukela izindaba ezinhle. Yikho lathi kumele siqhubeke sikhuthele ekutshumayeleni.

18. Kuyini esifuna ukuthi abantu bakunanzelele?

¹⁸ Abafundi bakaJesu beqiniso baziwa ngokukhuthala ekutshumayeleni izindaba ezinhle. Abantu bathi bebona abaphostoli betshumayela ngesibindi “bananzelela ukuthi (abaphostoli laba) babeloJesu.” (Imiseb. 4:13) Lathi sifuna ukuqhubeka siwutshisekela umsebenzi wokutshumayela izindaba ezinhle. Nxa singenza njalo abantu bazabona ukuthi silingisela uJesu.