“Khethani Ukuthi Lizakhonza Bani”

1. Kuyini okumele sikwenze ukuze sithokoze? (Isaya 48:​17, 18)

UBABA wethu osezulwini uyasithanda kakhulu futhi ufuna sikholise impilo khathesi lasesikhathini esizayo. (Umtshu. 3:​12, 13) Wasidala sileziphiwo ezitshiyeneyo kodwa kasinikanga ilungelo lokuzibusa kumbe elokuzikhethela ukuthi okuqondileyo lokungaqondanga yikuphi. (Umtshu. 8:9; Jer. 10:23) UJehova uyakwazi ukuthi okuzasenza sithokoze empilweni yikumkhonza lokulandela imithetho yakhe.—Bala u-Isaya 48:​17, 18.

2. Yiwaphi amanga uSathane afuna abantu bawakholwe futhi uJehova wenzeni ngakho?

² USathane ufuna sikholwe ukuthi abantu bangathokoza futhi baphumelele nxa bezibusa. (Gen. 3:​4, 5) Ukuze uJehova aveze egcekeni amanga kaSathane, uvumele abantu ukuthi bazibuse okwesikhatshana. Esikubona kusenzakala lamuhla emhlabeni kutshengisa ukuthi abantu bayazehlulekela, abenelisi ukuzibusa. IBhayibhili lisitshela ngamadoda labesifazana ababethokoza ngenxa yokuthi babekhokhelwa nguJehova. Omunye owayethokoziswa yikukhonza uJehova nguJesu uKhristu. Sizaqala sixoxe ngokuthi kungani uJesu wakhetha ukukhonza uJehova. Ngemva kwalokho sizaxoxa ngokuthi kungani kunguJehova kuphela okumele akhonzwe. Sizaphetha ngokuxoxa ngokuthi kungani kumele sikhonze uJehova.

KUNGANI UJESU WAKHETHA UKUKHONZA UJEHOVA?

3. USathane wamthembisani uJesu futhi uJesu wathini?

³ Ngesikhathi uJesu esemhlabeni kwakumele akhethe ukuthi uzakhonza bani. Wathi esanda nje kubhabhathizwa, uSathane wamlanda wathi uzamupha yonke imibuso yomhlaba nxa angamkhonza kanye nje kuphela. UJesu wamphendula wathi “Suka Sathane! Phela kubhaliwe ukuthi: ‘NguJehova uNkulunkulu wakho okumele umkhonze njalo nguye yedwa okumele umenzele inkonzo engcwele.’” (Mat. 4:​8-10) Asixoxeni ngezizatho ezenza uJesu wakhetha ukukhonza uJehova.

4-5. Yiziphi ezinye izizatho ezenza uJesu wakhetha ukukhonza uJehova?

⁴ Isizatho esiqakatheke kulazo zonke esenza uJesu wakhetha ukukhonza uYise yikuthi umthanda ngenhliziyo yonke. (Joh. 14:31) Okunye okwenza enze njalo yikuthi uyakwazi ukuthi uJehova nguye kuphela okumele akhonzwe. (Joh. 8:​28, 29; Isam. 4:11) Uyakwazi ukuthi uJehova nguye osinika ukuphila lokuthi uthembekile njalo ulomusa. (Hubo. 33:4; 36:9; Jak. 1:17) UJehova wayehlala etshela uJesu iqiniso futhi nguye owamnika konke ayelakho. (Joh. 1:14) Kodwa uSathane kanjalo, yena ungusomangase, uyisihwaba, kabathandi abantu futhi nguye obangela ukufa. (Joh. 8:44) UJesu wayekwazi konke lokhu ngoSathane yikho wayengafuni ngitsho lakancane ukumlingisela, ahlamukele uJehova.—Flp. 2:​5-8.

⁵ Okunye okwenza uJesu wakhetha ukukhonza uJehova yikuthi wayefuna ukungcwelisa ibizo likaYise lokukhulula abantu esonweni lasekufeni. (Heb. 12:2) Kodwa lokhu kwakuzakwenzakala nxa wayengaqhubeka ethembekile.

KUNGANI KUMELE SIKHONZE UJEHOVA?

6-7. Kuyini okwenza abantu abanengi bangakhonzi uJehova lamuhla futhi kungani kumele sikhonze yena kuphela?

⁶ Okwenza abanye bangakhonzi uJehova lamuhla yikuthi abakwazi ukuthi unguNkulunkulu onjani futhi abazazi lezinto ezinhle abenzele zona. Bafanana labantu base-Athene abatshunyayezwa nguPhawuli. Abantu laba babengamazi uNkulunkulu.—Imiseb. 17:​19, 20, 30, 34.

⁷ UPhawuli wabachasisela ukuthi uNkulunkulu weqiniso “nguye onika abantu bonke ukuphila lokuphefumula lazo zonke izinto.” Waphinda wathi: “Phela siyaphila, siyahamba futhi sikhona ngenxa yakhe.” UNkulunkulu unguMdali yikho kumele simkhonze ngoba “ngomuntu oyedwa wenza zonke izizwe zabantu.”—Imiseb. 17:​25, 26, 28.

8. Kuyini uJehova angasoze akwenze? Chasisa.

⁸ UJehova nguMdali futhi nguMbusi wendawo yonke. Uyenelisa ukwenza loba yini ayifunayo. Nxa efuna angabamba wonke umuntu ngamandla ukuthi amkhonze kodwa uJehova kasoze akwenze lokhu. Akwenzileyo nje yikusinika ubufakazi obutshengisa ukuthi ukhona lokuthi uyasithanda kakhulu. Ufuna abantu bemihlobo yonke babe ngabangane bakhe baphile kuze kube nini lanini. (1 Thim. 2:​3, 4) Yikho esincedisa ukuthi sifundise abanye ngalokho azabenzela khona lokuthi uzakwenza njani. (Mat. 10:​11-13; 28:​19, 20) Usifake emabandleni atshiyeneyo alabadala abasithandayo futhi abasincedisayo ekukhonzeni.—Imiseb. 20:28.

9. Kukhanya njani ukuthi uJehova uyabathanda abantu?

⁹ Uthando lukaJehova siyalubona lasendleleni aphatha ngayo abantu abangamkhonziyo. Cabanga ngalokhu, sekuleminyaka abantu bengafuni ukulalela uJehova, bekhetha ukuzenzela umathanda. Lanxa kunjalo uJehova ubanike konke okubenza baqhubeke bephila futhi bekholisa impilo. (Mat. 5:​44, 45; Imiseb. 14:​16, 17) Ngenxa yothando lwakhe bayenelisa ukuba labangane lezihlobo ezibathandayo. Bayenelisa ukuba labantwana futhi basebenze ukuze bondle izimuli zabo. (Hubo. 127:3; Umtshu. 2:24) Lokhu kutshengisa ukuthi uBaba wethu osezulwini uyabathanda kakhulu abantu. (Eks. 34:6) Khathesi asixoxeni ngokuthi kuyini okusenza sikhonze uJehova lokuthi ubabusisa njani labo abakhetha ukumkhonza.

KUYINI OKWENZA SIKHONZE UJEHOVA?

10. (a) Kuyini okwenza sikhonze uJehova? (Mathewu 22:37) (b) Ukubekezela kukaJehova kukuncede njani? (Hubo 103:​13, 14)

¹⁰ Sibonile ukuthi okwenza uJesu akhonze uJehova yikuthi uyamthanda. Lathi siyamkhonza uJehova ngenxa yokuthi siyamthanda kakhulu. (Bala uMathewu 22:37.) Ukufunda ngoJehova kwenza simthande. Akucabange ngendlela uJehova asibekezelela ngayo. Ngesikhathi abako-Israyeli bemhlamukela wabancenga wathi: “Phendukani litshiye izindlela zenu ezimbi.” (Jer. 18:11) UJehova ukwazi kuhle ukuthi silesono, uyakwazi ukuthi siluthuli. (Bala iHubo 103:​13, 14.) Ukucabangisisa ngendlela uJehova asibekezelela ngayo kanye lobuhle bakhe kwenza sifise ukumkhonza kuze kube nini lanini.

11. Yiziphi ezinye izizatho ezenza sikhonze uBaba wethu osezulwini?

¹¹ Okunye okwenza sikhonze uJehova yikuthi nguye yedwa okumele akhonzwe. (Mat. 4:10) Nxa singakhonza uJehova sithembekile sizangcwelisa ibizo lakhe, simthokozise futhi siveze egcekeni ukuthi uSathane ungusomangase. Nxa singakhetha ukukhonza uJehova lamuhla sizazimisela lokumkhonza kuze kube nini lanini.—Joh. 17:3.

12-13. Sifundani endabeni kaJane loPam?

¹² Singenelisa ukumthanda uJehova lanxa sisesebancane futhi uthando lolo lungaqhubeka lukhula njengoba lathi siyabe sikhula. Ake sixoxe ngokunye okwenzakala kwezinye izelamani uJane loPam.a Ngesikhathi beqalisa ukufunda iBhayibhili uJane wayeleminyaka engu-11, uPam ele-10. Abazali babo babengafuni ukufunda iBhayibhili kodwa bavuma ukuthi uJane loPam bafunde laboFakazi. Babatshela ukuthi lanxa befunda laboFakazi akumelanga balove esontweni yangakibo. UJane uthi: “Engangikufundiswa ngoFakazi kwanginceda ukuthi ngingavumi ukuyengwa ngabanye esikolo ngicine sengisebenzisa izidakamizwa kumbe ngicine ngingaziphathanga.”

¹³ Ngokuhamba kwesikhathi amantombazana la aba ngabamemezeli. Aqalisa ukuphayona ngapha enakekela abazali bawo abasebekhulile. UJane uqhubeka esithi: “Ngazibonela ngawami ukuthi uJehova kabalahli abangane bakhe njengoba nje u-2 Thimothi 2:19 esitshela ukuthi, ‘UJehova uyabazi abangabakhe.’” Kuyazicacela ukuthi uJehova kabathontisi labo abamthandayo futhi abakhetha ukumkhonza.

14. Singalilwela njani ibizo likaJehova? (Khangela lemifanekiso.)

¹⁴ Sifuna abantu balazi iqiniso ngoNkulunkulu wethu uJehova. Ake sithi ulomngane olomusa, ophanayo njalo othethelelayo kodwa ngelinye ilanga ubususizwa omunye umuntu esithi umngane wakho lo ulolunya futhi ulimenemene. Ubuzakwenzani? Ubuzamlwela umngane wakho. USathane labantu abamlandelayo bangcolisa ibizo likaNkulunkulu ngokukhuluma amanga ngaye kodwa thina siyamlwela uJehova ngokutshela abantu iqiniso ngaye. (Hubo. 34:1; Isaya. 43:10) Konke esikwenzayo lesikukhulumayo kumele kutshengise ukuthi siyafuna ukukhonza uJehova ngenhliziyo yonke.

15. Yiziphi izibusiso ezatholwa ngumphostoli uPhawuli? (Filiphi 3:​7, 8)

¹⁵ Sizimisele ukutshintsha ezinye izinto ekuphileni kwethu ukuze sithokozise uJehova njalo simenzele okunengi. Ngokwesibonelo, umphostoli uPhawuli watshiya isikhundla ayelaso ukuze abe ngumlandeli kaKhristu njalo akhonze uJehova. (Gal. 1:14) Lokhu kwamenza wathokoza empilweni njalo wathola lesibusiso sokuyabusa loKhristu ezulwini. Kazange azisole ngitsho lakancane ngokukhonza uJehova. Lathi asisoze safa sazisola.—Bala uFiliphi 3:​7, 8.

16. Sifundani kulokho okwenzakala kuJulia? (Khangela lemifanekiso.)

¹⁶ Nxa singaqakathekisa ukukhonza uJehova sizakholisa impilo khathesi lasesikhathini esizayo. Asixoxeni ngodadewethu okuthiwa nguJulia. Esasemncane wayekukwaya esontweni ayeyingena. Eyinye ingcitshi kwezomculo yananzelela isiphiwo sakhe yasimsondeza eduze yaqalisa ukumqeqetsha. UJulia wahamba kwesinye isikolo esidumileyo esiyafundela ukuhlabela. Ekhonale omunye umzalwane waxoxa laye ngoNkulunkulu wamtshela ukuthi ibizo likaNkulunkulu nguJehova. Kungakayingaphi uJulia wayesefunda iBhayibhili kabili ngeviki. Ngokuhamba kwesikhathi watshiya ukuhlabela wakhonza uJehova. Lesi kwakungasiso sinqumo sokudlala sibili. UJulia uthi: “Abantu abanengi babesithi ngidlalisa isiphiwo. Kodwa mina ngasengizifunela ukukhonza uJehova kuphela.” Udadewethu uthini ngesinqumo lesi asenza eminyakeni engu-30 eyadlulayo? Uthi: “Ngihlalisekile, ngiyamthemba uJehova ngoba ngiyakwazi ukuthi uzakwenza konke engikufisayo esikhathini esizayo.”—Hubo. 145:16.

QHUBEKA UKHONZA UJEHOVA

17. Labo asebekhethe ukukhonza uJehova lalabo abangakamkhonzi kumele benzeni khathesi?

¹⁷ Selidumela emansumpeni. Maduze nje umumo lo wezinto uzadlula. Umphostoli uPhawuli wathi “Ngesikhatshana nje, lowo ozayo uzafika, kasoze aphuze.” (Heb. 10:37) Kutshoni lokhu? Okukhona yikuthi isikhathi esesisele ukuthi abantu bakhonze uJehova sincane kakhulu. (1 Khor. 7:29) Nxa kuyikuthi sesikhethe ukukhonza uJehova siyakwazi ukuthi inhlupho kazisoze zisikhekheleze. Lanxa kunjalo, kumele sikhumbule ukuthi ‘zizabe zingezesikhatshana’ nje.

18. UJehova loJesu bafuna senzeni?

¹⁸ UJesu wakhuthaza abantu ukuthi babe ngabalandeli bakhe futhi baqhubeke bemlandela. (Mat. 16:24) Nxa kuyikuthi sesileminyaka sikhonza uJehova kasizimiseleni ukuqhubeka sibambelele kuye. Iqiniso yikuthi akusoze kube lula ngazo zonke izikhathi kodwa kumele sizimisele ukuqhubeka simkhonza ngoba yena uzasibusisa.—Hubo. 35:27.

19. Sifundani endabeni kaGene?

¹⁹ Abanye abantu bacabanga ukuthi ukukhonza uJehova kuzabenza bangathokozi. Nxa kuyikuthi ungosakhulayo uyake uzibone angani uyakhutheka yini ngenxa yokuthi ukhonza uJehova? Omunye umfowethu osakhulayo okuthiwa nguGene uthi: “Ngangizitshela ukuthi ukuba nguFakazi kwenza ngingakholisi. Ngangibona abanye abantwana ababelingana lami bezikholisela. Babesiya emaphathini, abanye bekhomba, abanye bekhombisa, bedlala imidlalo yamavidiyo elodlakela, besekuthiwa mina ngiye ekutshumayeleni lasemihlanganweni yebandla.” Ukucabanga ngale indlela kwabangela ukuthi uGene acine esenzani? Uthi yena: “Ngaqalisa ukwenza ababekwenza futhi kwakukhanya kumnandi kodwa injabulo yakhona kwakungumlilo wamaphepha. Ngaqalisa ukucabangisisa ukuthi kunceda ngani ukulalela lokho okutshiwo liBhayibhili ngasengikhetha ukukhonza uJehova ngenhliziyo yonke. Kusukela khonapho kukhanya uJehova ubeyiphendula yonke imithandazo yami.”

20. Kuyini okumele sizimisele ukukwenza?

²⁰ Omunye umhubi wathi: “Uyathokoza umuntu omkhethayo umsondeze eduze kwakho, ukuze ahlale emagumeni akho.” (Hubo. 65:4) Kwangathi lathi singenza khona kanye okwakhulunywa nguJoshuwa. Wathi: “Mina lemuli yami sizakhonza uJehova.”—Josh. 24:15.