“Impi NgekaJehova”

Indaba yaqala ngo-1999 lapho uhulumende weFrance esithi igatsha leFrance kumele libhadale umthelo wemali eyayingene ku-account yegatsha kusukela ngo-1993 kusiya ku-1996. Satshitsha sisatshitsha emithethwandaba yeFrance kodwa kukhanya babengasizwa ukuthi sithini. Uhulumende wacina ethatha imali engange-6 300 000 ku-account yegatsha. Yikho sabona kungcono ukuthi indaba siyidlulisele eMthethwandaba WaseYurophu Olwela Amalungelo Oluntu. Kodwa umthethwandaba wathi kuzamele sihlangane lamagqwetha amela uhulumende weFrance labanye abavela emthethwandaba lo ukuze sibone ukuthi indaba le ingalungiswa njani ingakayihlalelwa phansi.

Sasicabanga ukuthi ummeli womthethwandaba lo uzathi sibhadale imadlana ethile kuhulumende weFrance. Kodwa sasikwazi ukuthi loba yimalini esasingayikhipha sasiyabe sephule umthetho kaJehova. Iminikelo yabafowethu labodadewethu yayingeyokusekela umsebenzi woMbuso futhi yayingelani lohulumende weFrance. (Mat. 22:21) Lanxa kunjalo, sahamba emhlanganweni lo ngoba yikho umthethwandaba owawuthe sikwenze.

Umhlangano esaba lawo awuqalisanga kuhle. Ummeli womthethwanda weYurophu wathi oFakazi bakaJehova kwakumele babhadale eyinye imali yomthelo owawufunwa nguhulumende weFrance. Sahle sambuza sathi, “Uyakwazi yini ukuthi uhulumende lo okhuluma ngaye usethethe imali edlula 6 miliyoni ku-account yegatsha laboFakazi bakaJehova eliseFrance?”

Wethuka esizwa simtshela lokho. Wathi esizwa labameli bakahulumende weFrance bekuvuma lokho, yonke into yahle yatshintsha. Wabasola kakhulu wahle wagoqa umhlangano. Sazibonela ukuthi uJehova nguye owayesilwela endabeni le. Sasuka lapho sithokoza futhi singelankani ngalokho okwakwenzakele.

Mhlaka 30 June, 2011, uMthethwandaba WaseYurophu Olwela Amalungelo Oluntu wathi uhulumende weFrance kalalungelo lokubhadalisa oFakazi umthelo. Yikho kwakumele abisele imali ayeyithathele oFakazi aphinde abhadale leyinye phezulu. Isinqumo lesi sanceda oFakazi ukuthi bakhonze bekhululekile eFrance. Umbuzo esawubuza ummeli womthethwandaba mhlalokhuyana wawuphonguzifikela nje singazange sike sixoxe langawo. Umbuzo lo wawunjengelitshe elaphoswa nguDavida lafika latshaya uGoliyathi esiphaqeni lamlahla phansi. Kuyini okwenza sanqoba? Sibuyela emazwini akhulunywa nguDavida kuGoliyathi athi: “Impi ngekaJehova.”—1 Sam. 17:​45-47.

Lokhu kwakungayisikho okokuqala kumbe okokucina ukuthi sinqobe emithethwandaba. Lanxa ohulumende abalamandla labezenkolo belwisana lathi sesinqobe izindaba ezedlula 1 225 ngokusemthethweni emazweni adlula-70. Ukunqoba izindaba ezitshiyeneyo emithethwandaba kuyasinceda ukuthi silwele ilungelo lethu lokubhalisa ukuze kwaziwe ukuthi siyinkolo esemthethweni, senelise ukutshumayela sikhululekile, singabanjwa ngamandla ukuthi singenele kwezombusazwe futhi sizikhethele lendlela zokwelatshwa singazange sifakwe igazi.

Mina ngisebenza emawofisini amakhulu aboFakazi bakaJehova eNew York, e-U.S.A., manje kwasekutheni sengitholakala eYurophu?

ABAZALI BAMI BABENGAMAMISHINARI

Abazali bami uGeorge loLucille bangena ikilasi yesi-12 yeGiliyadi njalo babese-Ethiopia ngo-1956 okuyiwo umnyaka engazalwa ngawo. Bangetha ibizo elithi Philip, ibizo likaFiliphi umvangeli. (Imiseb. 21:8) Ngo-1957 uhulumende we-Ethiopia wathi oFakazi abasavunyelwa elizweni lelo. Lanxa ngangisasemncane ngiyazikhumbula leziyana nsuku sikhonza sicatshile. Ngangikukholisa mina lokho! Ngo-1960 iziphathamandla zathi siphume siphele e-Ethiopia.

Imuli yangakithi yathuthela eWichita, eKansas, e-U.S.A. njalo abazali bami baqhubeka beyikhuthalele inkonzo njengalapho besasengamamishinari. Babelithanda okuzwayo iqiniso futhi bangincedisa mina lodadewethu uJudy lomnawami uLeslie ukuthi lathi simthande uJehova. Sonke sazalelwa e-Ethiopia. Ngabhabhathizwa sengileminyaka engu-13. Ngemva kweminyaka emithathu imuli yangakithi yasuka e-U.S.A. yaqonda e-Arequipa, ePeru ukuze siyetshumayela endaweni elabamemezeli abalutshwana.

Ngo-1974 ngileminyaka engu-18, igatsha lePeru lacela mina labanye abafowethu abathathu ukuthi sibe ngamaphayona aqakathekileyo. Sasitshumayela endaweni eyayingakaze itshunyayelwe ezintabeni ze-Andes. Sasitshumayeza labantu abakhuluma isiQuechua lesi-Aymara. Imota esasihamba ngayo yiyo futhi esasihlala kuyo. Sasiyibiza ngokuthi ngumkhumbi ngoba yayinjengebhokisi elikhulu. Lalamuhla lokhe ngiwakhumbula amavesi esasiwabalela abantu laba akhuluma ngokuthi uJehova uzabuqeda bonke ubuyanga, lokugula kanye lokufa. (Isam. 21:​3, 4) Abantu abanengi balamukela iqiniso.

UKUYASEBENZA EMAWOFISINI AMAKHULU

Ngomnyaka ka-1977, umfowethu u-Albert Schroeder, owayelilunga leQula Elikhokhelayo laboFakazi bakaJehova wavakatshela ePeru. Wangikhuthaza ukuthi ngifile ifomu ngicela ukuyasebenza eBhetheli emawofisini amakhulu. Ngaqalisa ukusebenza eBhetheli eseBrooklyn, mhlaka 17 June 1977. Okweminyaka engu-4 eyalandelayo ngangisebenza kuhlangothi lokuklina lolokugcina izinto ezitshiyeneyo zisesimeni esihle.

NgoJune 1978, emhlanganweni wezizwe owenzelwa eNew Orleans eLouisiana ngahlangana lo-Elizabeth Avallone. Laye wakhuliswa ngabazali abathanda uJehova njengami. Wayeleminyaka emine eliphayona lesikhathi sonke futhi efuna ukuqhubeka esenkonzweni le. Saqalisa ukubhalelana izincwadi futhi kungakayingaphi uthando lwaseluvutha amalangabi. Satshada mhlaka 20 October 1979, sasesisiya sebenza eBhetheli.

Sangena lebandla elisebenzisa ulimi lweSpanish eBrooklyn futhi abafowethu labodadewethu abalapho basamukela ngazo zombili. Lakwamanye amabandla amathathu esesingene lawo abafowethu labodadewethu bebehlala besikhuthaza ukuthi siqhubeke sisebenza eBetheli. Siyazibonga kakhulu izihlobo zethu, abafowethu labodadewethu labanye abangane bethu abasincede ukuthi sinakekele abazali bethu asebekhulile.

UKUSEBENZA KUHLANGOTHI LWEZOMTHETHO

Ngasala ngingelankani ngoJanuary 1982 lapho engacelwa khona ukuthi ngisebenze loHlangothi Lwezomthetho eBhetheli. Ngemva kweminyaka emithathu ngacelwa ukuthi ngiye eyunivesithi ukuze ngifundele ukuba ligqwetha. Ngafunda ukuthi abantu base-United States lakwamanye amazwe balenkululeko yokwenza izinto ezitshiyeneyo ngenxa yezindaba ezanqotshwa ngoFakazi bakaJehova emithethwandaba. Indaba lezi kwakuxoxwa ngazo kanengi eyunivesithi.

Ngathi sengileminyaka engu-30 ngo-1986, ngacelwa ukuthi ngikhangele uHlangothi Lwezomthetho. Ngathokoza sibili ukwamukela umsebenzi lo kodwa ngangisesaba ngoba ngangingelalwazi oluya ngaphi.

Ngaba ligqwetha ngo-1988, kodwa kuyadanisa ukuthi ubuntu bami basebutshintshile lobungane bami loJehova basebulenga ngomnxeba. Kulula kakhulu ukuthi umuntu ofunde eyunivesithi azibone esengcono kulabanye abangazange bafunde khona. Umkami wangincedisa ukuthi ngikhuthalele ukwenza izinto ezazizanginceda ukuthi ngilungisise ubungane bami loJehova futhi ngokuhamba kwesikhathi ubungane bami loJehova basebuqinile. Engidlule kukho kungincede ngazwisisa ukuthi ukuba lolwazi olunengi ayisikho okuqakathekileyo empilweni. Okwenza umuntu athokoze sibisibili yikuba ngumngane kaJehova lokumthanda ngenhliziyo yonke yena labantu bakhe.

UKUVIKELA IZINDABA EZINHLE NGOKUSEMTHETHWENI

Ngathi sengiqedile ukufundela ukuba ligqwetha ngasengisebenzisa isikhathi sami esinengi ngincedisa kuHlangothi Lwezomthetho lapha eBhetheli ukuze sibone ukuthi singayivikela njani inhlanganiso kaJehova lelungelo lethu lokutshumayela izindaba ezinhle. Ngangiwukholisa sibili umsebenzi wami kodwa wawungalula ngoba inhlanganiso yethu yayiqhubeka ikhula futhi kulezinto ezinengi ezazitshintsha. Kwasekuleminyaka eminengi inhlanganiso icela iminikelo ebantwini abafuna amabhuku ethu kodwa kusukela ngo-1990 lokhu kwakuzatshintsha. Yikho sacelwa ukuthi sibone ukuthi kungenziwani ukuze indlela entsha isetshenziswe. Kusukela lapho amabhuku ethu ayesephiwa abantu mahala. Lokhu kwenza umsebenzi wethu wabalula kakhulu futhi sasingasahluphani leziphathamandla ngendaba zemithelo. Abanye abantu babecabanga ukuthi utshintsho lolu lwaluzakwenza ukuthi inhlanganiso ingabi lemali eyeneleyo yokudinda amabhuku ayezasetshenziswa ekutshumayeleni. Kodwa kakubanga njalo. Phela kusukela ngo-1990, inani labantu abakhonza uJehova belilokhu liqansa kakhulu njalo abanengi namuhla sebesenelisa ukufunda ngoJehova ngoba amabhuku ethu bawaphiwa mahala. Ngizibonele ukuthi uJehova nguye oyenza loba yiluphi utshintsho olwenziwa enhlanganisweni luphumelele futhi nguye okhokhela inceku ethembekileyo lehlakaniphileyo.—Eks. 15:2; Mat. 24:45.

Okwenza sinqobe emithethwandaba ayisikho ukuthi silamagqwetha akhaliphileyo kodwa kungenxa yendlela abantu bakaJehova abaziphatha ngayo. Ngakubona lokhu ngo-1998 ngesikhathi amalunga eQula Elikhokhelayo labomkabo besiya emihlanganweni eqakathekileyo eCuba. Babelomusa futhi behlonipha okwenza iziphathamandla zangathandabuzi ukuthi oFakazi bakaJehova abangeni kwezombusazwe.

Lanxa kunjalo kulezinye izikhathi lapho okuyabe sekumele ‘sivikele izindaba ezinhle futhi sizimise ziqine ngokusemthethweni.’ (Flp. 1:7) Ngokwesibonelo, kwadlula iminyaka eminengi iziphathamandla ezikwamanye amazwe ase-Yurophu laseSouth Korea zingavumi ukuthi oFakazi bakaJehova benze eminye imisebenzi ngaphandle kokuba ngamasotsha. Lokhu kwenza ukuthi abafowethu abangu 18 000 emazweni aseYurophu labedlula 19 000 eSouth Korea bavalelwe emajele ngenxa yokuthi babesala ukungena esisotsheni.

Kodwa konke kwacina kulungile ngoba mhlaka 7 July, ngo-2011, uMthethwandaba WaseYurophu Olwela Amalungelo Oluntu wenza isinqumo sokuthi wonke amazwe aseYurophu avumele loba ngubani ongafuniyo ukuba lisotsha ukuthi enze loba yiwuphi umsebenzi onceda umphakathi. Umthethwandaba weSouth Korea lawo wakhipha isinqumo esifananayo mhlaka 28 June , ngo-2018. Aluba nje abafowethu bangenela kwezombusazwe kwakungasoze kwenziwe izinqumo lezi.

Abafowethu abasikhokhelayo labo bonke abakuHlangothi Lwezomthetho emagatsheni atshiyeneyo basebenza nzima ukuze bavikele umsebenzi woMbuso. Kuyasithokosiza kakhulu ukuncedisa abafowethu labodadewethu abathwaliswe nzima ngohulumende. Kungelani lokuthi siyanqoba emithethwandaba kumbe hatshi, esikwenzayo kunika ubufakazi phambi kwababusi lamakhosi lasezizweni. (Mat. 10:18) Abahluleli, iziphathamandla zikahulumende, abezindaba lomphakathi nje uwonke, kuyabe kumele uhlolisise amavesi esiyabe siwakhulumile lalawo abhalwe emaphepheni esiwahambisa emithethwandaba. Abanye bacina bebazi ngcono oFakazi bakaJehova njalo bazibonele ukuthi abakukholwayo bakuthatha eBhayibhilini. Sikhuluma nje, abanye balabo bantu sebengoFakazi bakaJehova.

SIYABONGA JEHOVA!

Okweminyaka engu-40 edlulileyo, ngibe lesibusiso sokusebenza labafowethu labodadewethu abakuHlangothi Lwezomthetho emagatsheni atshiyeneyo ngaphinda ngaba lesibusiso sokuma phambi kweziphathamandla ezihlonitshwayo emithethwandaba emikhulu. Ngiyabathanda kakhulu abafowethu labodadewethu abasebenza kuHlangothi Lwezomthetho emawofisini ethu amakhulu lakuwo wonke amagatsha. UJehova ungibusise ngendlela emangalisayo futhi angizisoli ngitsho lakancane ngokumsebenzela.

Umkami engimthanda kakhulu u-Elizabeth ube elokhe engisekela okweminyaka yonke le engu-45 ngezikhathi ezinzima langezikhathi ezimnandi. Angimthontisi ngitsho ngoba uyangisekela lanxa engaphilanga kuhle emzimbeni.

Sizibonele ngawethu ukuthi obekusenza sinqobe yikuthi sisekelwa nguJehova. Sivumelana lamazwi kaDavida athi: “UJehova ungamandla abantu bakhe.” (Hubo. 28:8) Asikuphumputhi ukuthi, “impi ngekaJehova.”