Funda Ezimfundisweni Eziyisisekelo

1. Iqiniso owaqalisa ukulifunda eBhayibhilini lakutshintsha njani ukuphila kwakho?

IQINISO eliyisisekelo esalifunda ngesikhathi siqalisa ukufunda iBhayibhili lakutshintsha ukuphila kwethu. Ngokwesibonelo, sathi sifunda ukuthi ibizo likaNkulunkulu nguJehova sahle sazimisela ukuba ngabangane bakhe. (Isaya. 42:8) Ukwazi ukuthi abantu abafileyo kabazi lutho kuyasinceda ukuthi singathatheki ngezimfundiso zamanga ezinjengokuthi abantu bayatshiswa esihogweni. (Umtshu. 9:10) Asisakhathazeki ngokuthi elakusasa lethu lizabe linjani ngoba siyasazi isithembiso sikaNkulunkulu sokuthi uzakwenza umhlaba lo ube lipharadayisi elihle. Sesikwazi ukuthi asidalelwanga ukuphila iminyaka engu-70 kusiya kwengu-80 nje kuphela kodwa sadalelwa ukuphila kuze kube nini lanini.—Hubo. 37:29; 90:10.

2. Kungani umphostoli uPhetro wakhumbuza amaKhristu ukuthi ahlale ecabanga ngezinto ayezifundile? (U-2 Phetro 1:​12, 13)

² Kumele siziqakathekise izinto esaqalisa ukuzifunda eBhayibhilini lanxa zingakhanya zilula. Umphostoli uPhetro wathi ebhala incwadi yakhe yesibili wayevele eyibhalela amaKhristu ayeqinile ekukhonzeni. (Bala u-2 Phetro 1:​12, 13.) Kodwa ebandleni kwasokulabantu abaxhwalileyo ababefuna ukuphambanisa amaKhristu la. (2 Phet. 2:​1-3) Yikho umphostoli uPhetro wayefuna ukuncedisa abafowabo labodadewabo ukuthi bangathatheki ngezimfundiso zamanga. Wabakhumbuza ngezinto ababezifunde ngesikhathi besamukela iqiniso. Izinto lezo yizo ezazizabanceda ukuthi bahlale beqotho kuze kube sekucineni.

3. Kungani kumele amaKhristu acabangisise ngezinto aqala ukuzifunda ngesikhathi esamukela iqiniso?

³ Lanxa singabe sesileminyaka eminengi sikhonza uJehova akumelanga sizikhohlwe izimfundiso esazifunda siqala ukufunda iBhayibhili. Ake sisebenzise isibonelo esilandelayo: Ake sithi umama lendodakazi yakhe baphiwe impuphu lamanzi kwathiwa ngamunye wabo kapheke isitshwala. Ucabanga ukuthi isitshwala esizabe simnandi kakhulu ngesiphekwe ngubani? Lanxa bonke besebenzise izinto ezifananayo, okwenza isitshwala esiphekwe ngumama sibe mnandi yikuthi useleminyaka epheka. Ngendlela efananayo, labo asebelesikhathi eside bekhonza uJehova bangaqhubeka bethola izifundo ezitshiyeneyo eqinisweni eliyisisekelo abalifunda kudala mhlawumbe ezingeke zitholwe yilabo abasanda kuqalisa ukufunda iBhayibhili. Kungenzakala ukuthi izimo zethu lemisebenzi esiyenzela uJehova isitshintshile kusukela ngesikhathi esabhabhathizwa ngaso. Nxa singacabangisisa ngezinto esazifunda eBhayibhilini kudala singananzelela ukuthi okunye kwakhona kuyasebenza lakhathesi. Asiboneni ukuthi abantu asebelesikhathi eside bekhonza uJehova bangafundani ezimfundisweni eziseBhayibhilini eziyisisekelo. Sizaxoxa ngezibonelo ezintathu nje kuphela.

UJEHOVA NGUMDALI

4. Ukwazi ukuthi uJehova nguMdali kukuncede njani?

⁴ IBhayibhili lithi: “Umakhi wezinto zonke nguNkulunkulu.” (Heb. 3:4) Siyakwazi ukuthi umhlaba lakho konke okukuwo kwadalwa nguNkulunkulu olamandla futhi ohlakaniphileyo. Njengoba kunguye owasidalayo usazi esiqonda, uyasithanda futhi uyakwazi ukuthi kuyini okwenza sithokoze. Ukwazi lokho kuyitshintshe kakhulu impilo yethu ngoba sesikwazi ukuthi siphilelani.

5. Kuyini okumele sikukhumbule ngoJehova? (U-Isaya 45:​9-12)

⁵ Ukwazi ukuthi uJehova nguMdali kungasifundisa ukuthi sithobeke. Kulesikhathi lapho uJobe ake akhohlwa khona ngoJehova uMdali olamandla. Wayesekhathazeke ngenhlupho zakhe langalokho okwakukhulunywa ngabantu kodwa uJehova wamkhumbuza ukuthi yena unguMdali ophakemeyo. (Jobe. 38:​1-4) Lokhu kwanceda uJobe wakhumbula ukuthi izindlela zikaJehova ziphakeme kulezabantu. Yikho lo-Isaya wakucacisa ukuthi abantu akumelanga bazibone behlakaniphile futhi bengcono kuloMdali wabo. Wathi: “Kambe ibumba lingabuza uMbumbi walo lithi ‘Kanti wenzani?’”—Bala u-Isaya 45:​9-12.

6. Kuzasinceda ngani ukucabanga ngenhlakanipho kaJehova? (Khangela lemifanekiso.)

⁶ Umuntu oselesikhathi eside ekhonza uJehova angalingeka ukuthi acine esezithemba kulokuthi avume ukukhokhelwa nguJehova lokuhlola ukuthi iLizwi lakhe lithini. (Jobe. 37:​23, 24) Kuyini okunganceda umKhristu ongabe esecabanga njalo? Yikucabangisisa ngokuthi uJehova nguMdali olenhlakanipho ejulileyo esingeke siyizwisise. (Isaya. 40:22; 55:​8, 9) Ukukhumbula lokho kuzamnceda ukuthi ahlale ethobekile njalo angakhohlwa ukuthi uJehova nguye yedwa ohlala esenza okuqondileyo.

7. Kuyini okwanceda uRahela ukuthi amukele utshintsho olwenziwa yinhlanganiso?

⁷ Udadewethu okuthiwa nguRahela ohlala eSlovenia uthi okumnceda amukele utshintsho olwenziwa yinhlanganiso yikucabangisisa ngokuthi uJehova nguMdali wethu. Uthi: “Kuyake kungithwalise nzima ukwamukela utshintsho olwenziwa enhlanganisweni. Ngokwesibonelo, ngangiwubukelile sibili umbiko weQula Elikhokhelayo namba 8 ka-2023 owawulesaziso sokuthi abafowethu bakhululekile ukugcina indevu nxa befuna. Lanxa kunjalo akungihambanga kuhle ukubona umfowethu olendevu esenza inkulumo. Yikho ngathandaza kuJehova ngimcela ukuthi angincedise ngilwamukele utshintsho lolu.” URahela uyakunanzelela ukuthi njengoba uJehova enguMdali wamazulu lomhlaba akulalutho olungamvimbela ukuthi aqondise inhlanganiso yakhe ngendlela ayifunayo. Nxa kuyikuthi lawe kukuthwalisa nzima ukuzwisisa kumbe ukwamukela utshintsho olwenziwe yinhlanganiso, sicela uthandaze kuJehova uphinde ucabangisise ngenhlakanipho yakhe ejulileyo langamandla akhe amakhulu.—Rom. 11:​33-36.

KUNGANI UNKULUNKULU EVUMELA UKUHLUPHEKA?

8. Ukwazi ukuthi kungani uNkulunkulu evumela ukuhlupheka kukuncede njani?

⁸ Kungani uNkulunkulu evumela ukuhlupheka? Abanye abangayaziyo impendulo yombuzo lo bacina bezondela uNkulunkulu kumbe bazitshele ukuthi kakho. (Zaga. 19:3) Kodwa wena uyakwazi ukuthi ukuhlupheka kwabantu akubangelwa nguJehova. Abantu bathwala nzima ngenxa yokuthi balesono. Okunye osukufundile yikuthi ukubekezela kukaJehova sekuncede amamiliyoni abantu ukuthi afunde ngaye lokuthi uJehova uzakuqeda ukuhlupheka kwabantu. (2 Phet. 3:​9, 15) Iqiniso leli likududuzile njalo lakunceda ukuthi usondele kakhulu kuJehova.

9. Kuyini okungenza kube nzima ukuzwisisa ukuthi kungani uJehova evumela ukuhlupheka?

⁹ Kumele sibekezele njengoba sisalindele ukuthi uJehova aqede konke ukuhlupheka. Kodwa nxa kuyikuthi sesifelwe ngabantu esibathandayo, kasiphathwanga kuhle kumbe kulobunye ubunzima esiphakathi kwabo singacina sizibuza ukuthi kungani uJehova engaphangisi ukulungisa izinto. (Hab. 1:​2, 3) Okuzasinceda kakhulu ngezikhathi ezinjalo yikucabangisisa ngokuthi kungani uJehova evumela abantu abalungileyo ukuthi bahlupheke.a (Hubo. 34:19) Okunye okumele sicabangisise ngakho yisithembiso uJehova asenzileyo esokuthi uzakuqeda konke ukuhlupheka.

10. Kuyini okwanceda u-Anne waqinisela?

¹⁰ Ukwazi ukuthi kungani uJehova evumela ukuhlupheka kuyasinceda ukuthi siqinisele nxa sisebunzimeni. U-Anne ohlala esihlengeni seMayotte e-Indian Ocean uthi: “Ngafelwa ngumama eminyakeni eyadlulayo futhi lokho kwangizwisa ubuhlungu kakhulu. Ngihlala ngizikhumbuza ukuthi inhlupho esihlangana lazo kazibangelwa nguJehova. Yena sokumphuzele ukuvusa abafileyo lokuqeda du konke okusihluphayo. Ukucabangisisa ngalokho kungenza ngihlaliseke.”

11. Kumele siwubone njani umsebenzi wokutshumayela?

¹¹ Ukwazi ukuthi kungani uNkulunkulu evumela ukuhlupheka kungasinceda ukuthi sikhuthale emsebenzini wokutshumayela. Ngemva kokuchasisa ukuthi ukubekezela kukaNkulunkulu kwakuzakwenza abanye abantu basindiswe, uPhetro wabhala wathi: “Cabangani ngokuthi kumele libe ngabantu abanjani. Ukuziphatha kwenu kufanele kube ngcwele njalo kumele lenze imisebenzi yokuzinikela kuNkulunkulu.” (2 Phet. 3:11) “Imisebenzi yokuzinikela kuNkulunkulu” igoqela ukutshumayela. Lathi siyabathanda abantu njengoNkulunkulu wethu njalo siyafisa ukuthi baphile emhlabeni omutsha. UJehova uyababekezelela abantu abahlala endaweni yakini yikho ebanika ithuba lokuthi bafunde ngaye futhi bamkhonze. Wena ulesibusiso esikhulu sokusebenza loNkulunkulu ekuncediseni abantu labo ukuthi bafunde ngaye ukuphela kungakafiki.—1 Khor. 3:9.

SIPHILA “EZINSUKWINI ZOKUCINA”

12. Ukwazi ukuthi siphila ezinsukwini zokucina kusinceda njani?

¹² IBhayibhili likwenza kucace ukuthi abantu ‘bensuku zokucina’ bazabe benjani. (2 Thim. 3:​1-5) Lokhu kusegcekeni ngoba abantu esiphila labo nsuku zonke basitshiya singathandabuzi ukuthi isiphrofetho lesi siyagcwaliseka. Ukubona abantu besenza izinto ezimbi kusa kwamalanga kwenza sikukholwe sibili ukuthi iLizwi likaNkulunkulu liliqiniso.—2 Thim. 3:​13-15.

13. Yiphi imibuzo okumele sizibuze yona? (ULukha 12:​15-21)

¹³ Ukukhumbula ukuthi siphila ensukwini zokucina kusinceda sazi izinto eziqakathekileyo. Lokhu kuyazicacela emzekelisweni owakhulunywa nguJesu otholakala kuLukha 12:​15-21. (Bala.) Kungani kwathiwa indoda le iyisithutha? Uhlupho yikuthi yayingakwazi okuqakathekileyo empilweni hatshi ukuthi yayinothile. Indoda le ‘yayibuthelele inotho enengi kodwa inganothanga kuNkulunkulu.’ Kuyini okutshengisa ukuthi yayingakhethanga kuhle? UNkulunkulu wayitshela wathi “Lamuhla ebusuku uzakufa.” Njengoba siphila ekupheleni kwensuku zokucina nansi imibuzo okumele sizibuze yona: ‘Engikhetha ukukwenza kuyatshengisa yini ukuthi ngiyakwazi okuqakathekileyo empilweni? Ngibakhuthazani abantwabami? Indlela engisebenzisa ngayo amandla ami, isikhathi sami lezinto engilazo itshengisa ukuthi ngigijimisa engikufunayo yini kumbe ngizigcinela inotho ezulwini?’

14. Ukucabangisisa ngokuthi siphila ensukwini zokucina kuzasinceda njani? Nika isibonelo.

¹⁴ Ukucabangisisa ngokuthi siphila ezinsukwini zokucina kuzasinceda ukuthi sikhethe kuhle. Lokhu yikho kanye okwanceda udadewethu okuthiwa nguMiki. Uthi: “Ngathi ngisanda kuqeda isikolo ngangifuna ukuyafundela ukunakekela izinyamazana kodwa okunye engangikufuna yikuphayona lokuyatshumayela endaweni elabamemezeli abalutshwana. Abangane bami abaqinileyo ekukhonzeni bangincedisa ngahlolisisa ukuthi ngangizenelisa yini ukwenza lokho engangikuhlelile ekukhonzeni ngapha ngisenza umsebenzi lo engangiwufuna. Bangikhumbuza ukuthi siphila ensukwini zokucina lokuthi emhlabeni omutsha ngizabe sengilesikhathi esinengi sokufunda ngezinyamazana. Yikho ngakhetha ukwenza i-course eyayingasoze ingithathele isikhathi eside. I-course le yanginceda ukuthi ngithole umsebenzi ongivumela ukuthi ngibe liphayona lesikhathi sonke njalo ngokuhamba kwesikhathi ngathuthela e-Ecuador ukuyancedisa lapho okulabamemezeli abalutshwana khona.” UMiki lomkakhe lokhe bese-Ecuador futhi umkakhe ngumbonisi wesiqinti.

15. Kuyini okutshengisa ukuthi abantu bangatshintsha? Nika isibonelo. (Khangela lemifanekiso.)

¹⁵ Akumelanga sidane kumbe siphele amandla nxa abantu bengazilaleli izindaba ezinhle. Phela abantu bangatshintsha loba nini. Ake sixoxe ngoJakhobe umfowabo kaJesu. Wakhula loJesu, wambona esiba nguMesiya njalo wazizwela ukuthi akulamuntu owayefundisa njengomfowabo. Lanxa kunjalo, uJakhobe kazange abe ngumfundi kaJesu ngalesosikhathi. Waze wabangumfundi uJesu esevusiwe futhi wayetshiseka kakhulu.b (Joh 7:5; Gal. 2:9) Ungakhalali ukufundisa izihlobo zakho ngoJehova lokutshumayeza labo abake bala ukufunda. Hlala ukhumbula ukuthi siphila ensukwini zokucina, yikho abantu kumele bazizwe khathesi izindaba ezinhle. Obatshela khona lamuhla bangakukhumbula esikhathini esizayo, mhlawumbe bangatshintsha lalapho ukuhlupheka okukhulu sokuqalisile.c

HLALA UZIQAKATHEKISA IZIKHUMBUZO EZIVELA KUJEHOVA

16. Izikhumbuzo ezivela kuJehova zikuncede njani? (Khangela lebhokisi elithi “Zisebenzise Ukunceda Abanye.”)

¹⁶ Ezinye izinto esizifundiswa yinhlanganiso ziyabe zenzelwe abantu abangelalwazi olutheni ngeBhayibhili. Ngokwesibonelo, inkulumo zikazulu esibalazo maviki wonke, ezinye izihloko lamavidiyo okutholakala ku-jw.org labanye omagazini, kuyabe kulungiswe kucatshangwa kakhulu labo abangakabi ngoFakazi. Lanxa kunjalo izinto lezi ziyasinceda lathi. Ziyasinceda ukuthi simthande kakhulu uJehova, silithembe iLizwi lakhe njalo senelise ukuchasisela abanye izimfundiso eziyisisekelo eziseBhayibhilini ngendlela elula.—Hubo. 19:7.

17. Ukukhumbula izimfundiso ezasenza saba ngabangane bakaJehova kuzasinceda njani?

¹⁷ OFakazi bakaJehova bayathokoza kakhulu nxa sebezwisisa iqiniso eliseBhayibhilini ngeyinye indlela, kodwa bayazithanda lezimfundiso abazifunda kuqala ezenza bamthanda uJehova. Ukukhumbula ukuthi inhlanganiso le iqondiswa nguMdali olamandla futhi olenhlakanipho ejulileyo kuzasinceda ukuthi sithobeke njalo samukele loba yiluphi utshintsho olwenziwayo. Ukucabangisisa ngokuthi kungani uJehova evumela ukuhlupheka kuzasinceda ukuthi siqinisele nxa siphakathi kobunzima. Ukukhumbula ukuthi siphila ezinsukwini zokucina kuzasinceda ukuthi siwasebenzise kuhle amandla ethu, isikhathi sethu lalokho esilakho. Kwangathi ukusebenzisa izikhumbuzo oziphiwa nguJehova kungakunceda ukuthi uhlakaniphe njalo uqhubeke umkhonza uthembekile.