Uyasuthiseka Yini?

1. Kutshoni ukusuthiseka?

UYASUTHISEKA yini? Umuntu osuthisekayo uyathokoza ngalokho akuphiwe nguJehova futhi ukuqakathekisa konke. Kathwali imikhono ekhanda futhi kazondi nxa kuyikuthi kulezinye izinto angalazo. Kodwa lokho akutsho ukuthi umuntu osuthisekayo ukhohliwe nje ngempilo. Yinto enhle kakhulu ukuthi umKhristu azimisele ukwenza okunengi emsebenzini kaJehova. (Rom. 12:1; 1 Thim. 3:1) Lanxa kunjalo, umKhristu lo kadani nxa kuyikuthi imisebenzi yenkonzo alesifiso sokuyenza kayitholi ngesikhathi asikhangeleleyo.

2. Kungani ukungasuthiseki kuyingozi?

² Ukungasuthiseki kungasithela emanyaleni. Ngokwesibonelo, abanye abantu abangasuthisekiyo bacina bephilela ukusebenza ukuze bathole imali yokuthenga izinto ezingaqakathekanga kangako empilweni. Kuyadanisa ukuthi amanye amaKhristu acina etshontsha imali kumbe ezinye izinto ayabe efisa ukuba lazo. UmKhristu onjalo engabe ezitshela ukuthi, ‘into leyi ngiyifuna khathesi,’ ‘lami kumele ngibe lento enhle kangaka,’ ‘vele ngiyabe ngingatshontshi ngoba imali yakhona ngizayibisela.’ Kodwa ukutshontsha yinto embi futhi akumthokozisi uJehova kungelani lokuthi umuntu uziyenga esithini. (Zaga. 30:9) Nxa abanye bengayiphiwanga imisebenzi yenkonzo abayifisayo bayazonda okokuthi bacina bekhalala lokukhonza uJehova. (Gal. 6:9) Kanti kuyabe sekutheni nxa inceku kaJehova isisenza izinto ezinjalo? Kungenzakala ukuthi umuntu onjalo uyabe engasasuthiseki ngalakho.

3. Sifundani kuFiliphi 4:​11, 12?

³ Sonke siyenelisa ukufunda ukusuthiseka. Umphostoli uPhawuli wathi: “Sengifunde ukusuthiseka kungelani lokuthi umumo engikuwo unjani.” (Bala uFiliphi 4:​11, 12.) Amazwi la wawabhala ngesikhathi esejele. Lanxa kunjalo, wayelokhe ethokoza ngoba ‘wayesefundile’ ukusuthiseka. Ukukhangela lokho okwenzakala kumphostoli uPhawuli lamazwi awabhalayo kungasinceda nxa kuyikuthi kusithwalisa nzima ukusuthiseka. Iqiniso elikhona yikuthi ukusuthiseka akuphonguzenzakalela kodwa kumele sikufunde. Manje singakufunda njani? Asixoxeni ngezinto ezizasinceda sisuthiseke.

WOBA NGOBONGAYO

4. Kusinceda ngani ukuba ngabantu ababongayo? (U-1 Thesalonika 5:18)

⁴ Izikhathi ezinengi umuntu obongayo uyasuthiseka ngalokho alakho. (Bala u-1 Thesalonika 5:18.) Ngokwesibonelo, nxa singabantu ababongayo sizakuqakathekisa esilakho empilweni kulokuthi sizikhathaze ngezinto esingelazo lanxa singabe sifisa ukuba lazo. Nxa simbonga kakhulu uJehova ngomsebenzi wenkonzo asinike wona, sizawenza ngenhliziyo yonke kulokukhathazeka ngomunye esingabe sifisa ukuwenza. UJehova usikhuthaza ukuthi sihlale sithandaza simbonga. Singenza njalo ‘uzasibusisa ngokuthula kwakhe okwedlula konke ukuzwisisa.’—Flp. 4:​6, 7.

5. Kuyini uJehova ayekwenzele ama-Israyeli? (Khangela lomfanekiso.)

⁵ Ake sibuyisele ingqondo emuva kulokho okwenzakala kwabako-Israyeli. Babehlala bekhonona besithi bayafa ngendlala, sebekhumbula ukudla ababekudla eGibhithe. (Nani. 11:​4-6) Khona liqiniso ukuthi impilo yabo enkangala yayingekho lula. Kodwa kuyini okwakungabanceda ukuthi basuthiseke? Kwakumele bacabangisise ngezinto ezinengi uJehova ayebenzele zona. Phela babeyizigqili eGibhithe futhi babehlukuluzwa kodwa uJehova wehlisela izitha zabo inhlupho ezilitshumi wasekhulula abantu bakhe. Bathi sebephuma lapho ‘bayibutha inotho yamaGibhithe’ egoqela isiliva, igolide kanye lempahla enengi. (Eks. 12:​35, 36) Bathi bengasakwazi ukuthi benzeni eLwandle Olubomvu, uJehova wehlukanisa amanzi basebezichaphela emhlabathini owomileyo. Akula ngitsho lelanga elilodwa abalala khona ngendlala ngesikhathi besenkangala ngoba uJehova wayebanika imana. Kanti manje ama-Israyeli ayesengenwe yini esekhonona? Ayesidla esesulela phansi njengenkukhu. Ayengakuqakathekisi lokho ayekwenzelwe nguJehova.

6. Singenzani ukuze sibe ngabantu ababongayo?

⁶ Ungenzani ukuze ube ngumuntu obongayo? Okokuqala, cabangisisa ngezinto ezinhle ezenzakala kuwe ilanga ngalinye. Mhlawumbe ungakhetha ukuzibhala phansi lezozinto. (Izili. 3:​22, 23) Okwesibili, bonga nxa kulolutho olwenzelweyo. Batshele abantu abakwenzele ulutho oluthile ukuthi uyabonga futhi ungakhohlwa lokuhlala umbonga uJehova. (Hubo. 75:1) Okwesithathu, khetha kuhle abangane bakho. Nxa ulabangane ababongayo lawe uzaba ngumuntu obongayo kodwa nxa ulabangane abatshona bekhonona lawe uzahlala ukhonona. (Dute. 1:​26-28; 2 Thim. 3:​1, 2, 5) Nxa singazifundisa ukuba ngabantu ababongayo sizasuthiseka futhi sithokoze.

7. Kuyini okwanceda u-Aci ukuthi aphinde athokoze?

⁷ Asixoxeni ngokwenzakala kudadewethu okuthiwa ngu-Aci ohlala e-Indonesia. Uthi: “Ngesikhathi somkhuhlane weCOVID-19, ngaqalisa ukuziqathanisa labanye abafowethu labodadewethu futhi lokho kwenza ngangathokozi.” (Gal. 6:4) Manje wenzani ukuze aphinde athokoze? Uqhubeka esithi: “Ngaqalisa ukunanzelela lokubona izinto ezitshiyeneyo engizenzelwa nguJehova lezinye izibusiso ezinengi engilazo ngenxa yokuba senhlanganisweni yakhe. Ngangihlala ngithandaza kuJehova ngimbonga ngezibusiso lezi futhi ngasengithokoza.” Nxa kuyikuthi izimo okuzo zenza kube nzima ukuthi uthokoze zama ukulingisela lokho okwenziwa ngu-Aci.

THOBEKA NJALO UNGAPHONGUTHATHEKA

8. Kwenzakalani kuBharukhi?

⁸ Kulesikhathi lapho uBharukhi umabhalani womphrofethi uJeremiya ayengasathokozi khona. Bobabili kwakumele batshele abako-Israyeli ukuthi uJehova wayezabajezisa ngenxa yokungalaleli kwabo. Kodwa ngokuhamba kwesikhathi kukhanya angani umsebenzi lo wawusumsinda. Kungenzeka wayesegijimisa lokho yena ayekufuna kulokuthi aqakathekise okufunwa nguJehova. Yikho uJehova wasebenzisa uJeremiya ukuthi akhuze uBharukhi. Wamkhuza wathi: “Wena uzifunela izinto ezinkulu yekela ukudinga izinto ezinjalo.” (Jer. 45:​3-5) Kwakungani uJehova uthi kuBharukhi: “Suthiseka ngalokho olakho.” UBharukhi wamlalela uJehova futhi waqhubeka engumngane wakhe.

9. Sifundani ku-1 Khorinte 4:​6, 7? (Khangela lemifanekiso.)

⁹ Kungenzakala ukuthi umKhristu azitshele ukuthi kulomsebenzi wenkonzo okumele awuphiwe. UmKhristu lo engabe ezitshela ukuthi seleminyaka eminengi ekhonza uJehova, uyingcitshi emsebenzini awenzayo futhi usebenza nzima. Kodwa abesebona abanye kuyibo abaphiwa wonalowo umsebenzi akade ewufuna. Kuyabe sekumele enzeni esimeni esinjalo? Okungamnceda yikucabangisisa ngamazwi abhalwa ngumphostoli uPhawuli, ku-1 Khorinte 4:​6, 7. (Bala.) Loba yiziphi iziphiwo esingabe silazo kumbe imisebenzi yenkonzo esiyenzayo ivela kuJehova. Ukuphiwa izibusiso lezi akutsho ukuthi singcono kulabanye. Kumele sikhumbule ukuthi uJehova usinika izinto zonke lezi ngenxa yomusa wakhe omkhulu.—Rom. 12:​3, 6; Efe. 2:​8, 9.

10. Kuyini okuzasinceda ukuthi sithobeke?

¹⁰ Okungasinceda sibe ngabantu abathobekileyo yikucabangisisa ngalokho okwenziwa nguJesu ngesikhathi egezisa abafundi bakhe inyawo. Nanku okwabhalwa ngumphostoli uJohane: ‘(Lanxa uJesu) wayekwazi ukuthi [1] uYise wayefake izinto zonke esandleni sakhe lokuthi [2] yena wayevela kuNkulunkulu futhi [3] wayesiya kuNkulunkulu, waqalisa ukugezisa abafundi bakhe inyawo.’ (Joh. 13:​3-5) UJesu wayengazitshela ukuthi abafundi bakhe yibo okumele bamgezise inyawo. Lanxa wayeyiNdodana kaNkulunkulu, kazange acabange ukuthi kumele abe lenkalakatha yendlu, abe ngumaliyavuza njalo azihlalele kuhle ekhomba ngophakathi. (Luk. 9:58) UJesu wayethobekile njalo esuthiseka. Kwangathi sonke singamlingisela.—Joh. 13:15.

11. Ukuthobeka kwamnceda njani uDennis?

¹¹ Umfowethu okuthiwa nguDennis, ohlala eNetherlands uyazama ukuthobeka njengoJesu lanxa lokho kungalula. Uthi: “Ngiyake ngibe lomhawu nxa ngibona omunye umuntu ephiwa umsebenzi wenkonzo engilesifiso sokuwenza. Ngezikhathi ezinjalo ngijayele ukubala izihloko ezikhuluma ngokuthobeka. Kulamavesi lamavidiyo akhuluma ngokuthobeka engiwagcinileyo ku-JW Library^® app futhi ngihlala ngiwabuyelela.a Isifiso sami ngesokuthi konke engikwenzayo kwenze abantu badumise uJehova hatshi ukusala bebabaza mina. Thina kuncane kakhulu esikwenzayo nxa sikuqathanisa lalokho okwenziwa nguJehova.” Nxa ungasathokozi ngenxa yokuthi kulomsebenzi wenkonzo owufisayo kodwa awukawutholi qhubeka ulwisa ukuba ngumuntu othobekileyo. Lokhu kuzakwenza ukuthi ube ngumngane kaJehova njalo uthokoze.—Jak. 4:​6, 8.

UNGAKULIBALI ESIKUTHENJISWE NGUJEHOVA

12. Yiziphi izibusiso esizazikholisa? (U-Isaya 65:​21-25)

¹² Ukuhlala sicabanga ngalokho uJehova asithembise khona kuzasenza sithokoze. UJehova uyabubona bonke ubunzima esiphakathi kwabo futhi usithembise ukuthi uzabuqeda du. (Bala u-Isaya 65:​21-25.) Sizakwakha izindlu ezinhle sihlale kuzo sivikelekile. Sizayikholisa yonke imisebenzi esiyenzayo njalo sidle ukudla okumnandi okwakha umzimba. Akula ngitsho lelanga elilodwa lapho esizahlalela khona evalweni sisesaba ukuthi kulengozi engasehlela kumbe into embi engenzakala ebantwaneni bethu. (Isaya. 32:​17, 18; Hez. 34:25) Asithandabuzi ngitsho lakancane ukuthi konke lokho uJehova asithembise khona uzakwenza.

13. Kuzasinceda ngani ukucabangisisa ngalokho esikuthenjiswe nguJehova?

¹³ Kungani kuqakathekile ukuthi sihlale sicabangisisa ngalokho uJehova asithembise khona? Ngenxa yokuthi siphila “ezinsukwini zokucina okunzima ukuphila kuzo.” (2 Thim. 3:1) Lanxa kunjalo, uJehova uyasincedisa nsuku zonke ngendlela ezitshiyeneyo ukuthi sibekezelele ubunzima esihlangana labo aphinde asikhokhele njalo asiqinise. (Hubo. 145:14) Mhlawumbe usebenza nzima uzama ukuzinakekela wena lemuli yakho kodwa imadlana oyitholayo ihle iphele nje ungakenzi lutho. Engxenye uzitshela ukuthi uzazifela ungumyanga. Nxa kunjalo ungakhathazeki kakhulu ngoba uJehova ukuthembise izibusiso ezinengi ozazikholisa ePharadayisi. (Hubo. 9:18; 72:​12-14) Engxenye ulomkhuhlane osukuthwalise nzima okweminyaka eminengi, kumbe uhlulukelwe loba kulokunye nje okungahambi kuhle. Ubona angani uzahlala usizwa ubuhlungu yini? Ngitsho. Phela uNkulunkulu uthembisa ukuthi kuyabe kungasela kugula lokufa emhlabeni omutsha. (Isam. 21:​3, 4) Ukucabangisisa ngezithembiso zonke lezi kuzasinceda ukuthi singadani kumbe sizonde ngenxa yezinto ezenzakala kithi khathesi. Kuyini okuzasinceda ukuthi siqhubeke sithokoza lanxa siphathwa kubi, sigula, sifelwe ngumuntu esimthandayo kumbe siphakathi kobunye nje ubunzima? Yikukhumbula ukuthi “ukuhlupheka ngokwesikhatshana” njengoba umhlaba omutsha ususeduze.—2 Khor. 4:​17, 18.

14. Singenzani ukuze sigcine ithemba lethu livutha?

¹⁴ Sesibonile ukuthi ukuba lethemba kuyasinceda ukuthi sisuthiseke. Manje singenzani ukuze sigcine ithemba lethu livutha? Njengoba nje umuntu olohlupho lwamehlo kungadingeka ukuthi agqoke amangilazi ukuze abone izinto ezikhatshana, lathi lanxa silenhlupho khathesi ukucabangisisa ngezithembiso ezivela kuJehova kuzasinceda sizibone sesiphila emhlabeni omutsha. Ukucabanga ngokuthi emhlabeni omutsha kasisoze siyidinge imali lokuthi akulamuntu ozabe engumyanga kuzasinceda ukuthi singakhathazeki ngokuswela imali khathesi. Nxa kuyikuthi sikhathazekile ngokungaphiwa umsebenzi wenkonzo esiwufisayo khathesi, kumele sikhumbule ukuthi silesibusiso esikhulu sokukhonza uJehova kuze kube nini lanini. (1 Thim. 6:19) Zinengi izinto ezingasikhathaza okokuthi kungacina kusiba nzima ukuthi sicabange ngekusasa lethu. Kodwa ukuhlala sicabangisisa ngezithembiso zikaJehova kuzasinceda ukuthi singakhathazeki kakhulu ngenhlupho esilazo.

15. Ufundani endabeni kaChrista?

¹⁵ Ukuba lethemba kumncede kakhulu uChrista, umkaDennis esike sakhuluma ngaye. Uthi: “Ngilomkhuhlane ohlasela imisipha futhi umkhuhlane lo wenza ngehluleke ukuhamba. Nxa kulalapho okumele ngiye khona ngisebenzisa i-wheelchair. Izikhathi ezinengi ngitshona ngilele ngoba ngiyabe ngisizwa ubuhlungu. Udokotela wangitshela ukuthi angisoze ngibe ngcono. Wathi esitsho njalo ngasenginanzelela ukuthi mina laye sibona izinto ngendlela ezitshiyeneyo. Lanxa ngisebuhlungwini ngihlala ngicabanga ngezithembiso zikaNkulunkulu njalo lokhu kwenza ngihlaliseke. Ngizaqhubeka ngibekezela khathesi njengoba ngisalindele umhlaba omutsha lapho engizayikholisa khona impilo.”

“ABAMESABAYO ABASWELI LUTHO”

16. Kuyini okwenza uDavida wathi abesaba uJehova “abasweli lutho?”

¹⁶ Ukusuthiseka ngalokho esilakho akutsho ukuthi asisahlangani lobunzima. INkosi uDavida yehlelwa yibunzima obutshiyeneyo. Yake yaqanjelwa amanga, yalahliswa ngabantu eyayibathemba, yahlala iminyaka eminengi egangeni ibalekela izitha zayo futhi kufanele ukuthi yezwa ubuhlungu ngesikhathi ifelwa ngamadodana ayo. Lanxa uDavida wayecwile phakathi kwenhlupho zonke lezi wakunanzelela ukuthi: “Abamesabayo (uJehova) abasweli lutho.” (Hubo. 34:​9, 10) Kuliqiniso yini akukhulumayo? Ye, kuliqiniso sibili ngoba lanxa uJehova engasoze azivimbe zonke inhlupho ezingasehlela uzahlala esipha esikudingayo. (Hubo. 145:16) Siyakwazi ukuthi uJehova uzasincedisa ukuthi sibekezelele loba yibuphi ubunzima obungasehlela. Lokhu kwenza sisuthiseke futhi sithokoze.

17. Kungani kumele usuthiseke?

¹⁷ UJehova ufuna abantu bakhe basuthiseke ngalokho abalakho. (Hubo. 131:​1, 2) Yikho zimisele ukusebenza nzima ukuze usuthiseke. Nxa ungaba ngumuntu obongayo, othobekileyo lohlala eqinisa ithemba lakhe, uzatsho ngenhliziyo emhlophe uthi: “Ngisuthisekile”—Hubo. 16:​5, 6.