Imibuzo Ebuzwa Ngabafundi
Wayesitshoni umlobi weZaga 30:18, 19 lapho esithi ‘indlela yejaha entombini’ iyamphica?
Ku-Nguqulo Yomhlaba Omutsha iZaga 30:18, 19 zithi: “Kulezinto ezintathu ezingiphicayo njalo zine engingazizwisisiyo: Indlela yokhozi emoyeni, indlela yenyoka edwaleni, indlela yomkhumbi elwandle lendlela yejaha entombini.” Amazwi la ayabaphica abantu abanengi, aphica ngitsho lezikhwicamfundo.
Kudala sasicabanga ukuthi amazwi athi ‘indlela yejaha entombini’ atsho into embi eyenziwa lijaha. Phela amanye amavesi esahlukweni lesi akhuluma ngezinto “ezingasuthiyo.” (Zaga. 30:15, 16) Ikanti ivesi 20 ikhuluma ngowesifazana ofebayo kodwa aphike embe phansi. Njengoba nje kungelamuntu ongalonda umkhondo wokhozi oluphapha emoyeni, lendlela yenyoka edwaleni kanye lendlela yomkhumbi elwandle, sasicabanga ukuthi ijaha lingenza okuthile entombini kodwa kusale kungelamuntu okwaziyo elikwenzileyo. Sasicabanga ukuthi ivesi le ikhuluma ngejaha elihuga intombi elalise inkophe lihlose ukulala layo.
Kodwa ukuhlolisisa amavesi lawa kutshengisa ukuthi akulalutho olubi olwenziwa lijaha leli. Umlobi wayemangaliswa nje yizinto eziqanjwe emavesini la.
Imibhalo yakudala yesiHebheru layo itshengisa ukuthi amavesi la akhuluma ngezinto ezimangalisayo hatshi ezimbi. Ibhuku okuthiwa yi-Theological Lexicon of the Old Testament, lithi amazwi ahunyutshwe ngokuthi “izinto ezingiphicayo” akuZaga 30:18 atsho izinto eziyisimanga sezimanga ezitshiya umuntu etshe amathe kumbe ephelelwe.
Isikhwicamfundo okuthiwa nguCrawford H. Toy oseyunivesithi yeHarvard kweleMelika laye wathi amavesi la awakhulumi ngolutho olubi olwenziwa lijaha. Wathi: “Lapha kukhulunywa ngezinto ezitshiyeneyo ezimangalisayo.”
Konke lokhu kutshengisa ukuthi iZaga 30:18, 19 zikhuluma ngezinto ezisitshiya sibambe owangaphansi, okunzima ukuzizwisisa. Lathi siyamangala sibili nxa sibona ukhozi lundiza, sibabaze nxa sibona inyoka ihuba ngesisu edwaleni. Sitsha amathe nxa sicabanga ngendlela inkalakatha yomkhumbi edabula ngayo elwandle. Siyaphelelwa nxa sibona uthando lwentombi lejaha luvutha amalangabi baze bacine besakha umuzi.