IMIBUZO EBUZWA NGABASAKHULAYO

Kumele Ngibhabhathizwe Yini?—Ingxenye 1: Kutshoni Ukubhabhathizwa?

Minyaka yonke abasakhulayo abanengi abakhulele emulini zaboFakazi bayabhabhathizwa. Lawe usufuna ukubhabhathizwa yini? Nxa kunjalo kumele uqale uzwisise ukuthi kutshoni ukuzinikela lokubhabhathizwa.

Kutshoni ukubhabhathizwa?

Ukubhabhathizwa okukhulunywa ngakho eBhayibhilini kuqakathekile njalo kutsho ukucwiliswa ngokupheleleyo emanzini hatshi ukuphongufafazwa ngamanzi.

Ukucwiliswa emanzini ngesikhathi ubhabhathizwa kutshengisa umuntu wonke ukuthi awusaphileli ukwenza lokho okufunwa nguwe.
Ukuphuma emanzini kutshengisa ukuthi usuqalise ukuphilela ukwenza lokho okufunwa nguNkulunkulu.

Ukubhabhathizwa kutshengisa ukuthi uyavuma phambi kwabantu ukuthi uJehova nguye olelungelo lokusitshela lokho okuqondileyo lokungaqondanga futhi uyabe ukwenza kucace ukuthi uzakwenza lokho akufunayo.

Ongacabangisisa ngakho: Kungani kumele utshengise phambi kwabantu ukuthi usuzimisele ukulalela imithetho kaJehova? Khangela u-1 Johane 4:19 loSambulo 4:11.

Kutshoni ukuzinikela?

Ungakathathi inyathelo lokubhabhathizwa kumele uqale uzinikele kuJehova. Ungakwenza njani lokhu?

Thandaza kuJehova umthembisa ukuthi uzamkhonza kuze kube nini lanini lokuthi uzakwenza lokho akufunayo kungelani lokuthi kwenzakalani kumbe ukuthi abanye abantu bakhetha ukwenzani.

Nxa ubhabhathizwa uyabe usutshengisa phambi kwabantu bonke ukuthi usuzinikele kuJehova. Kutshengisa abantu ukuthi awusaziphileli kodwa usuphilela ukwenza intando kaJehova.—UMathewu 16:24.

Ongacabangisisa ngakho: Kungani impilo yakho ingaba ngcono nxa ungakhetha ukuzinikela kuJehova? Khangela u-Isaya 48:17, 18 loHebheru 11:6.

Kungani ukubhabhathizwa kuqakathekile?

UJesu wathi wonke umuntu owayefuna ukuba ngumfundi wakhe kwakumele abhabhathizwe. (UMathewu 28:19, 20) Yikho wonke umuntu ongumKhristu kumele abhabhathizwe. IBhayibhili lithi ukubhabhathizwa kuqakathekile ukuze umuntu asindiswe.—1 Phetro 3:21.

Kodwa ukuthanda kwakho uJehova lokuqakathekisa ukumkhonza yikho okumele kukwenze ufune ukubhabhathizwa. Kumele ube lombono onjengowomhubi owabhala wathi: “Ngingambonga ngani uJehova ngabo bonke ubuhle bakhe kimi? . . . Ngimemeze ibizo likaJehova. Ngizazigcwalisa izifungo zami kuJehova.”—IHubo 116:12-14.

Ongacabangisisa ngakho: Kuyini okuhle uJehova akwenzele khona futhi ungambonga ngani? Khangela uDutheronomi 10:12, 13 lo-KwabaseRoma 12:1.

Okungamanga lalokho okuliqiniso

AMANGA— Abantu abadala yibo kuphela okumele babhabhathizwe.

IQINISO— Akukhangelwa ukuthi umuntu uleminyaka emingaki ukuze kukhanye ukuthi uqinile ekukhonzeni kodwa ukuthanda uJehova lokuzimisela ukumlalela yikho okwenza kucace lokho. UJosefa, loSamuyeli kanye loJosiya batshengisa ukuthi babelokholo oluqinileyo lanxa babesesebancane futhi banengi abasakhulayo abenza okufananayo lamuhla.

Okutshiwo liBhayibhili: “Lomntwana waziwa ngezenzo zakhe, ngokuthi isimilo sakhe sihle, siqotho.”—IZaga 20:11.

AMANGA— Nxa abangane bakho sebebhabhathizwa lawe sekumele ubhabhathizwe.

IQINISO— Umuntu kumele azinikele kuJehova futhi abhabhathizwe nxa kuyikuthi yena ngokwakhe uyafuna ukukwenza lokho. Ukubhabhathizwa akusiyonto yokwenza ngenxa nje yokuthi usukhulile kumbe ngenxa yokuthi abanye abantu bafuna ubhabhathizwe.

Okutshiwo liBhayibhili: “[Abantu bakaNkulunkulu] bazazinikela.”—IHubo 110:3.

AMANGA— Nxa ungabhabhathizwanga awulamlandu kuJehova.

IQINISO— Okwenza umuntu abe lomlandu kuJehova yikwazi okuqondileyo lokungaqondanga, kungelani lokuthi ubhabhathiziwe loba hatshi.

Okutshiwo liBhayibhili: “Nxa umuntu ekwazi ukuthi angakwenza njani okuqondileyo kodwa angakwenzi, wenza isono.”—UJakhobe 4:17.

ICEBO: Nxa usesaba ukuzinikela lokubhabhathizwa kungani ungazihloli ubone ukuthi yindaba usesaba lokuthi ungakunqoba njani? Ungakwenza lokhu ngokubala iSahluko 37 sebhuku lesiZulu elithi Intsha Iyabuza—Izimpendulo Ezisebenzayo, UMqulu 2.