Lisaqakathekile Yini Iqiniso?

Abantu abanengi lamuhla bakholwa into kusiya ngokuthi bayithandile yini hatshi ukuthi iliqiniso. Lawe ukuthola kunzima yini ukwehlukanisa iqiniso lamanga? Lezinsuku abantu abasalithandi ngitsho iqiniso, abanengi babo bathi akuselanto okuthiwa liqiniso.

Umcabango lo awuzange uqalise khathesi. Eminyakeni engu-2 000 edlulileyo, umbusi weRoma okuthiwa nguPhontiyu Philathu wabuza uJesu wathi: “Kuyini iqiniso?” (UJohane 18:38) Umbuzo lo wawumuhle kakhulu kodwa okudanisayo yikuthi uPhilathu kazange alindele ukuzwa impendulo yawo. IBhayibhili lisinceda sizwisise ukuthi kuyini sibili iqiniso futhi ukulazi kuzakunceda ukuthi ungaphonguthatheka ngalokho okuzwayo.

Kambe lisasekhona yini iqiniso?

Ye likhona sibili. IBhayibhili lisebenzisa ibala elithi “iqiniso” nxa likhuluma ngento eqondileyo esingayithemba. Lithi uJehovaa uNkulunkulu ungumthombo weqiniso ngoba ‘unguNkulunkulu weqiniso.’ (IHubo 31:5) IBhayibhili limumethe iqiniso elivela kuNkulunkulu. Lifanisa iqiniso lokukhanya ngoba liyasinceda ukuthi singathatheki ngamanga akhulunywa ngabantu bomhlaba lo.—IHubo 43:3; UJohane 17:17.

Ungalithola njani iqiniso?

UNkulunkulu kafuni ukuthi siphongukholwa nje iqiniso eliseBhayibhilini kodwa ufuna sihlolisise ukuze sizibonele ngawethu ukuthi lokho elikutshoyo kuliqiniso sibili. (KwabaseRoma 12:1) Ufuna simazi njalo simthande ‘ngengqondo yethu yonke’ futhi ufuna sizibonele ukuthi lokho esikufunda eBhayibhilini kuliqiniso.—UMathewu 22:37, 38; ImiSebenzi 17:11.

Amanga avela ngaphi?

IBhayibhili lithi amanga aqalisa ngoSathane uDeveli oyisitha sikaNkulunkulu njalo obizwa ngokuthi ‘nguyise wamanga.’ (UJohane 8:44) Waqamba amanga ngoNkulunkulu ngesikhathi ekhuluma lo-Eva. (UGenesisi 3:1-6, 13, 17-19; 5:5) Kusukela lapho uSathane ubelokhu efafaza amanga ngoNkulunkulu.—ISambulo 12:9.

Yindaba amanga egcwele kangaka lamuhla?

IBhayibhili lithi siphila “ezinsukwini zokucina”’ lapho uSathane asedukise khona abantu abanengi ukwedlula loba nini. Abantu sebejayele ukuqamba amanga ukuze bakhohlise abanye kumbe babaqile. (2 KuThimothi 3:1, 13) Kanti njalo amanga asegcwele lasemasontweni. IBhayibhili lavela latsho ukuthi ensukwini lezi abantu ‘bazabuthelela abafundisi abanengi abazabatshela lokho abafuna ukukuzwa, bayekele ukulalela iqiniso.’—2 KuThimothi 4:3, 4.

Kungani iqiniso liqakathekile?

Iqiniso lenza abantu bathembane. Nxa kungela kuthembana ubungane kuyaphela futhi labantu ababambani emphakathini. IBhayibhili lithi uNkulunkulu ufuna simkhonze ngeqiniso. Lithi: “Abamkhonzayo kumele bamkhonze ngomoya langeqiniso.” (UJohane 4:24) Ukuze uthole ukuthi iqiniso eliseBhayibhilini lingakunceda njani ukuthi uwabone amanga afundiswa emasontweni lokuthi ungenzani ukuze ungathatheki ngawo, bala iNqabayokulinda elesihloko esithi “Uyawazi Yini Amanga Enza Kubenzima Ukuthanda UNkulunkulu?”

Kungani uNkulunkulu efuna ube lazi iqiniso?

UNkulunkulu ufuna usindiswe yikho kumele ufunde iqiniso ngaye. (1 KuThimothi 2:4) Nxa ungenza izinto azithandayo uzakuba ngumngane wakhe oseduze. (IHubo 15:1, 2) UNkulunkulu wathuma uJesu emhlabeni ukuze ancede abantu ukuthi bafunde iqiniso ngaye. Ufuna silalele lalokho uJesu ayekufundisa.—UMathewu 17:5; UJohane 18:37.

UNkulunkulu uzabenzani abantu abaqamba amanga?

UNkulunkulu uyabazonda abantu abaqamba amanga labaqila abanye. Uthembisa ukubabhubhisa bonke abaqhubeka bekhuluma amanga. (IHubo 5:6) Nxa uNkulunkulu esekwenza lokhu uzaphinda agcwalise lesithembiso lesi: “Umlomo okhuluma iqiniso uzahlala kuze kube nini lanini.”—IZaga 12:19.