OFakazi BakaJehova Bathini Ngokubulawa KwamaJuda Okwenzakala Ngesikhathi Sempi Yomhlaba Yesibili?—IBhayibhili Lithini?

Mhlaka 27 January 2023, abantu abanengi emhlabeni wonke bazabe bekhumbula amaJuda abulawa ngesikhathi sempi yomhlaba yesibili. Ilanga leli libizwa ngokuthi yi-International Holocaust Remembrance Day. Ukuhlukuluzwa lokubulawa kwabantu ngendlela elesihluku okwenzakala eminyakeni engaphezu kwengu-75 eyadlulayo kungenza abantu abanengi bazibuze ukuthi kungani uNkulunkulu wakuvumela lokho.

• Ukuze uthole ukuthi iBhayibhili lithini bala isihloko esithi, “Kungani UNkulunkulu Engazange Angenele Ngesikhathi Kubulawa AmaJuda Amanengi?”

AmaJuda athwala nzima kakhulu ngesikhathi lesi njalo angamamiliyoni abulawa ngabomu. Labanye abangasomaJuda bahlukuluzwa njalo babulawa ngesikhathi lesi. Abanye bakhona kwakungoFakazi bakaJehova futhi bathwala nzima ngenxa yokuthi babelandela lokho okufundiswa liBhayibhili.

• Ukuze uthole okunengi bala isihloko esithi, “Kwenzakalani KuboFakazi BakaJehova Ngesikhathi SeMpi Yomhlaba Yesibili?”

“Ithemba kanye lekusasa elihle”

Abanengi bahlalela evalweni becabanga ukuthi mhlawumbe kungaphinda kubulawe abantu abanengi abangelacala njengalokhu okwenzakala ngesikhathi sempi yomhlaba yesibili. Kuyaduduza ukwazi ukuthi iBhayibhili lisitshela ngesikhathi lapho izinto lezi ezibuhlungu kangaka ezingasoze ziphinde zibe khona.

• “‘Ngikwazi kuhle lokho engikucabangayo ngani,’ kutsho uJehova, ‘ngifuna libe lokuthula, hatshi ukuthi lehlelwe ngokubi, ngifuna ukulinika ithemba kanye lekusasa elihle.’”—UJeremiya 29:11.a

Lokhu kuzakwenzakala ngesikhathi uJehova uNkulunkulu eqeda bonke ububi njalo elungisa lomonakalo obekhona. Sekuseduze ukuthi uJehova:

• Asuse bonke abahlukuluza abanye.—IZaga 2:22.

• Aqede ubuhlungu obubangelwe yizinto ezimbi.—ISambulo 21:4.

• Avuse abantu abasemathuneni ukuze baphile futhi emhlabeni.—UJohane 5:28, 29.

Ungazikholwa sibili izithembiso lezi eziduduzayo eziseBhayibhilini. Nxa ufuna ukwazi okunengi, hlela ukufunda iBhayibhili usebenzisa ikhosi yokufunda ekuwebhusayithi yethu.