Kuyini Okwenzakala Emitshadweni YaboFakazi BakaJehova?
OFakazi bakaJehova benza imitshado yabo ngendlela ehloniphekayo futhi kuqaliswa ngentshumayelo esekelwe eBhayibhilini. Ngemva kwalokho kujayele ukulandela idili lomtshado lapho okudliwa khona abantu bezikholisela.a UJesu laye wake wanxuswa edilini lomtshado edolobheni leKhana esanda kuqalisa inkonzo yakhe.—UJohane 2:1-11.
Kwenzakalani emitshadweni yaboFakazi bakaJehova?
Into eqakatheke kakhulu emitshadweni yaboFakazi yintshumayelo ethatha imizuzu engu-30 eyenziwa ngumzalwane ongumdala webandla. Intshumayelo le inceda abatshadayo babone ukuthi imithetho eseBhayibhilini ingabanceda njani ukuthi bahlale bethandana njalo bethokoza.—Kwabase-Efesu 5:33.
Emazweni amanengi ohulumende banika oFakazi bakaJehova imvumo yokutshadisa abantu ngokusemthethweni. Yikho kulamadoda akhethiweyo ukuthi enze umsebenzi lo. Ezimeni ezinjalo abatshadayo benza izifungo zabo nxa inkulumo isiphela. Lokhu kungahlanganisa lokugqokisana amaringi. Ngemva kwalokho otshadisayo uyabethula ukuthi sebeyindoda lomfazi.
Kwamanye amazwe umthetho uthi abatshadayo kumele bahlanganiselwe emawofisini kahumelende. Yikho abatshadayo bayahamba bayekwenza lokhu inkulumo yomtshado ingakenziwa. Nxa abatshadayo bengenzanga izifungo emawofisini kahulumende kumele bazenze ekucineni kwenkulumo yomtshado. Nxa bezenzile bangakhetha ukuziphinda futhi kodwa kumele basebenzise amazwi atshengisa ukuthi sebezenzile kudala. Intshumayelo le iphetha ngomthandazo kucelwa ukuthi uNkulunkulu abusise abatshadayo.
Yenzelwa ngaphi imitshado yabo?
OFakazi abanengi bakhetha ukuhlanganiselwa emaWolu oMbuso nxa ekhona lapho abahlala khona.b Nxa kuzaba ledili lomtshado ngemva kwalokho, abatshadayo bayazikhethela indawo abazakwenzela kuyo idili labo.
Ngobani abavunyelwa ukuba khona emtshadweni?
Nxa umtshado uzakwenzelwa eWolu yoMbuso, abatshadayo bakhululekile ukunxusa lalabo abangayisibo oFakazi. Nxa abatshadayo bezakwenza idili bayazikhethela bona ukuthi bazanxusa bani.
Kugqokwa njani nxa usiya khona?
Lanxa kungelamthetho wokuthi umuntu kumele agqoke njani nxa ebuya eWolu yoMbuso, oFakazi bakaJehova balandela lokho iBhayibhili elikutshoyo yikho begqoka ngendlela elesithunzi futhi ehloniphekayo emitshadweni. Abakufisayo yikuthi wonke umuntu obuya emitshadweni yabo agqoke ngendlela elesithunzi. (1 KuThimothi 2:9) Lasezindaweni esenzela kuzo amadili siyabe sifisa ukuthi wonke umuntu agqoke ngendlela elesithunzi.
Abantu bayavunyelwa yini ukukhunga?
IBhayibhili lisikhuthaza ukuthi sibe ngabaphanayo. (IHubo 37:21) OFakazi bakaJehova bayakuqakathekisa ukupha kanye lokwamukela izipho. (ULukha 6:38) Lanxa kunjalo abamemezeli izipho kumbe amabizo alabo abakhungileyo futhi ababambi bantu ngamandla ukuthi bakhunge. (UMathewu 6:3, 4; 2 KwabaseKhorinte 9:7; 1 Phetro 3:8) Imibhalo ayikukhuthazi lokhu ngoba kwenza abanye abantu bazibone bengasilutho.
Umkhuba wokutshayanisa ama-glass (i-toast) uyenziwa yini?
IBhayibhili kalikwali ukuthi abantu batshayanise amaglasi kumbe ukuthi benze i-toast. Kodwa abanye bangacela ukuthi abantu bangakwenzi lokho emtshadweni wabo ukuze bangakhubi abanye.—KwabaseRoma 14:21.
Umakoti lomkhwenyana bayahazwa yini ngerayisi loba okunye?
Hatshi. Kwezinye indawo abantu bajayele ukuhaza umakoti lomkhwenyana ngerayisi loba okunye nje. Bakholwa ukuthi lokhu kuzakwenza abatshadayo babe lenhlanhla, bathokoze baze bakhokhobe. Ukufisela abantu inhlanhla kanye leminye imikhuba eyenziwayo akuvumelani lalokho okutshiwo liBhayibhili yikho oFakazi bakaJehova bengakwenzi.—U-Isaya 65:11.
Ukudla lokunathwayo kuyabe kukhona yini?
Nxa abatshadayo behlanganiselwa eWolu yoMbuso akubi lokudla loba okunathwayo khonapho. Kodwa nxa bezaba ledili kwenye indawo, yikho okungabakhona khona lokudla lokunathwayo. (UmTshumayeli 9:7) Nxa kuzaba lotshwala, kumele bananzelele bungabi bunengi kakhulu futhi bungaphiwa abantwana abancane abangakafikisi iminyaka esemthethweni yokunatha.—ULukha 21:34; KwabaseRoma 13:1, 13.
Kuyatshaywa yini izingoma abantu bagide?
Nxa abatshadayo bezakwenza idili bayazikhethela ukuthi kuzatshaywa yini izingoma abantu bagide loba hatshi. (UmTshumayeli 3:4) Lanxa bekhululekile ukuzikhethela ingoma abazithandayo, baba leqiniso lokuthi batshaya ingoma ezilesithunzi futhi ezihloniphekayo. LaseWolu yoMbuso siyatshaya ingoma kodwa kuba yilezo esizisebenzisa ekukhonzeni kuphela.
OFakazi bakaJehova bayawenza yini ama-anniversary?
IBhayibhili alisitsheli lutho ngokukhumbula ilanga lomtshado, yikho oFakazi abatshadileyo bayazikhethela ukuthi bayafuna yini ukwenza i-anniversary. Nxa bekhethe ukwenza njalo, kukubo ukuthi bazayenza bebodwa yini kumbe bazanxusa izihlobo labangane.
a Imithetho kahulumende emayelana lemitshado kanye lamasiko lemikhuba kuyatshiyana kusiya ngendawo.
b Umdala owenza intshumayelo yomtshado kabhadalwa futhi iWolu yoMbuso isetshenziswa mahala.