Uyini UMbuso KaNkulunkulu?
Impendulo yeBhayibhili
UMbuso kaNkulunkulu nguhulumende okhona sibili owasungulwa nguJehova. IBhayibhili liphinda liwubize ngokuthi ‘nguMbuso wezulu’ ngoba ubusa usezulwini. (UMakho 1:14, 15; UMathewu 4:17) UMbuso kaNkulunkulu ufanana lemibuso yabantu ngezindlela ezinengi kodwa wona ungcono kakhulu kulayo.
Ababusayo. UNkulunkulu ukhethe uJesu Khristu ukuthi abe nguMbusi woMbuso wakhe njalo wamupha lamandla edlula awaloba ngubani. (UMathewu 28:18) UJesu uwasebenzisa kuhle amandla akhe. Lokhu kwakhanya ngendlela ayesenza ngayo ngesikhathi esemhlabeni. (UMathewu 4:23; UMakho 1:40, 41; 6:31-34; ULukha 7:11-17) UNkulunkulu usebenzisa uJesu ukuthi akhethe abantu azabusa labo. Abantu laba bakhethwa ezizweni zonke ukuze ‘babuse emhlabeni.’—ISambulo 5:9, 10.
Isikhathi sokubusa. Imibuso yabantu iyaphelelwa yisikhathi kodwa okaNkulunkulu wona ‘awusoze ubhidlizwe lanini.’—UDanyeli 2:44.
Abazabuswa. Loba ngubani owenza intando kaNkulunkulu angaba yisizalwane soMbuso lo kungelani lokuthi ungumhlobo bani.—ImiSebenzi 10:34, 35.
Imithetho. EMbusweni kaNkulunkulu kulemithetho eqondisa izizalwane zawo ukuthi zibalekele imikhuba emibi futhi ziziphathe kuhle. Ngokwesibonelo iBhayibhili lithi: “‘Thanda iNkosi uNkulunkulu wakho ngenhliziyo yakho yonke langomphefumulo wakho wonke langengqondo yakho yonke.’ Yiwo oyingqala njalo odlula yonke imilayo. Owesibili unjengawo: ‘Thanda umakhelwana wakho njengalokhu uzithanda wena.’” (UMathewu 22:37-39) Ukuthanda uNkulunkulu lomakhelwana kwenza izizalwane zoMbuso kaNkulunkulu zizimisele ukunceda abanye.
Imfundo. Ababuswa nguMbuso kaNkulunkulu bafundiswa indlela okumele baziphathe ngayo.—U-Isaya 48:17, 18.
Inhloso. UMbuso kaNkulunkulu kawuhuquluzi imali zabantu ukuze unothise ababusayo. Okuhle yikuthi uzakwenza ukuthi intando kaNkulunkulu yenziwe emhlabeni lokuthi bonke abathanda uNkulunkulu baphile epharadayisi kuze kube nini lanini.—U-Isaya 35:1, 5, 6; UMathewu 6:10; ISambulo 21:1-4.