IMIBUZO EBUZWA NGABASAKHULAYO
Yindaba Ngingelabangane?
Ake sithi ubuka amapikitsha kwezokuxhumana awephathi ekade isenziwa. Unanzelela ukuthi bonke abangane bakho bebekhona futhi kukhanya bebezikholisela. Nguwe wedwa obungekho.
Uyazibuza, ‘Kanti yindaba benganginxusanga?’
Lokhu kwenza uzwe ubuhlungu. Ucabanga ukuthi bonke abangane bakho sebekuhlamukele lokuthi ubudlelwano benu sobuphelele emoyeni. Uqalisa ukuzwa ulesizungu ubusuzibuza ukuthi yindaba ungelabangane.
Ungathini?
Ye kumbe Hatshi
Nxa ulabangane abanengi awusoze ube lesizungu.
Nxa usebenzisa ezokuxhumana awusoze ube lesizungu.
Nxa ungatshonela ukuthumela abanye amameseji awusoze ube lesizungu.
Nxa ungahlala unceda abanye awusoze ube lesizungu.
Impendulo yemibuzo le ngu-hatshi.
Yindaba?
Iqiniso mayelana labangane lokuba lesizungu
Ukuba labangane abanengi akutsho ukuthi awusoze ube lesizungu.
“Ngiyabathanda abangane bami kodwa ngezinye izikhathi ngiyake ngicabange ukuthi bona abalandaba lami. Kubuhlungu kakhulu ukuba labangane abanengi kodwa abangakuthandiyo kumbe abangelandaba lawe. Uyabe ulesizungu esingenziyo.”—U-Anne.
Ukusebenzisa ezokuxhumana akutsho ukuthi awusoze ube lesizungu.
“Abanye abantu balabangane abanengi kakhulu. Kodwa lokhu akubancedi ngoba abangane bakhona bayabe bengabathandi. Nxa usehluleka ukuba lobungane labantu obabonayo iqiniso yikuthi abangane obathola kwezokuxhumana ngeke bakuncede.”—U-Elaine.
Ukutshona uthumela abanye amameseji akutsho ukuthi awusoze ube lesizungu.
“Ngezinye izikhathi nxa ulesizungu uyabe ulokhu ukhangela ifoni yakho ufuna ukubona ukuthi abangane bakho abakuthumezelanga yini amameseji. Nxa kungela ngitsho loyedwa okubhaleleyo isizungu sakhona sihle singezeleleke!”—USerena.
Ukuhlala unceda abanye akutsho ukuthi awusoze ube lesizungu.
“Ngihlala nginika abangane bami izinto ezitshiyeneyo kodwa bona abangenzeli lutho. Angizisoli ukuthi ngihlala ngibenzela okuhle kodwa kuyamangalisa ukuthi bona abazihluphi ngokunginceda.”—URichard.
Umcijo nanku: Omunye osakhulayo okuthiwa nguJeanette uthi, ‘Isizungu siqalisela kuwe ngokwakho, akuyi ngokuthi ulabangane abanengi kumbe abalutshwane.’
Ungenzani nxa ungelabangane kumbe ulesizungu?
Ongakwenza
Ungazikhangeleli phansi.
“Ukuzikhangelela phansi kungenza ube lesizungu. Nxa uzitshela ukuthi akulamuntu ongaba lendaba lawe kuba nzima ukuthi ube labangane.”—UJeanette.
IBhayibhili lithi: “Kumele uthande umakhelwane wakho ngendlela ozithanda ngayo.” (KwabaseGalathiya 5:14) Ukuze sibe lobungane obuhle labanye kumele sikhumbule ukuthi lathi siqakathekile. Kodwa lokhu akutsho ukuthi kumele siziphakamise.—KwabaseGalathiya 6:3, 4.
Ungacabangi okufunwa nguwe kuphela.
“Kulula ukuthi umuntu abe lesizungu. Nxa ungagoqa izandla, ungenzi lutho singacina sikukhulela futhi kungaba nzima ukuthi kube lomuntu okuncedayo.”—U-Erin.
IBhayibhili lithi: ‘Uthando aluzifuneli okwalo.’ (1 KwabaseKhorinte 13:4, 5) Nxa singahlala sicabanga okufunwa yithi kuphela, kuba nzima ukuthi sibe lozwelo futhi lokhu kwenza abanye bangakukhwabithi ukuba ngabangane bethu. (2 KwabaseKhorinte 12:15) Awungeke uphumelele empilweni nxa uhlala ucabanga ngalokho okwenziwa ngabanye. Phela kunzima ukuthi uthokoze nxa uhlala ucabanga ukuthi, “Akulamuntu ongifonelayo” kumbe “Akulamuntu oyake anginxuse.” Akumelanga uzikhathaze kakhulu ngokuthi abanye abantu abakwenzeli lutho.
Khetha kuhle abangane.
“Abantu abalesizungu bacina besamukela loba ngubani ukuthi abe ngumngane wabo ngoba bona abakufunayo yikuthandwa nje kuphela. Abanye abantu bangakhanya angani balendaba lawe kodwa bezifunela ukukusebenzisa. Lokhu kungenza ube lesizungu sibili.”—UBrianne.
IBhayibhili lithi: “Ohamba labahlakaniphileyo uzahlakanipha, kodwa ozwanana lezithutha uzangena emanyaleni.” (IZaga 13:20) Umuntu obulewe yindlala angadla loba yini. Banjalo abantu abangelabangane, bacina besiyabadinga endaweni ezingayisizo. Lokhu kungenza bazwanane labantu abangamaqili bengananzeleli futhi bacine bethwala nzima.
Isiphetho: Sonke siyake sibe lesizungu ngezinye izikhathi. Kodwa abanye siyabakhulela okuzwayo. Kubuhlungu sibili ukuba lesizungu kodwa ngezinye izikhathi sibangelwa yizinto esizicabangayo. Nxa singacabanga ngendlela eyakhayo sizakuzwa ngcono.
Akumelanga ukhangelele ukuthi abanye benze abangakwenelisiyo. UJeanette esike sakhuluma ngaye uthi, “Ayisuye wonke umuntu ozahlala engumngane wakho omkhulu. Lanxa kunjalo uzabathola abantu abalendaba lawe. Lokhu yikho okuqakathakeliyo ngoba kwenza singabi lesizungu.”
Ungathanda ukuzwa okunengi? Bala ibhokisi elithi “Ungesabi Ukuba Labangane.” Dawuniloda lesihloko esithi “Ukulwisana Nesizungu.”