Kutshoni Ukuvuswa Kwabafileyo?
Impendulo yeBhayibhili
EBhayibhilini ibala elihunyutshwe ngokuthi ukuvuswa kwabafileyo ngelithi a·naʹsta·sis ngesiGrikhi futhi litsho ukuphakama kumbe ukuphinda ume. Umuntu ovuswe kwabafileyo ngobefile wasevuswa waphinda waba yilokho akade eyikho engakafi.—1 KwabaseKhorinte 15:12, 13.
Lanxa umutsho othi “ukuvuswa kwabafileyo” ungekho eMibhalweni YesiHebheru ejayele ukubizwa langokuthi yiThestamente Elidala, imfundiso yakhona ikhona eMibhalweni le. Ngokwesibonelo umphrofethi uHosiya wabhala ngesithembiso sikaNkulunkulu wathi: “Ngizabahlenga emandleni engcwaba, ngizabakhulula ekufeni.”—UHosiya 13:14; UJobe 14:13-15; U-Isaya 26:19; UDanyeli 12:2, 13.
Abafileyo bazavuswa baye ngaphi? Abanye abantu bazavuselwa ezulwini ukuze bayebusa loKhristu. (2 KwabaseKhorinte 5:1; ISambulo 5:9, 10) IBhayibhili lithi lokhu ’yikuvuswa kwabafileyo kwakuqala’ njalo liphinda lithi ’bazaqala ukuvuswa kwabafileyo.’ Imitsho le itshengisa ukuthi kulokunye ukuvuswa kwabafileyo okuzakwenzakala. (ISambulo 20:6; KwabaseFiliphi 3:11) Lapha kukhulunywa ngokuvuswa kwalabo abazaphila emhlabeni okuzatholwa ngabantu abanengi kakhulu.—IHubo 37:29.
Abafileyo bazavuswa njani? UNkulunkulu wanika uJesu amandla okuvusa abafileyo. (UJohane 11:25) Ngakho uJesu uzavusa ’bonke abasemathuneni’ futhi umuntu ngamunye uzavuka elobuntu ayelabo njalo ekhumbula izinto ezenzakalayo empilweni yakhe. (UJohane 5:28, 29) Labo abazavuselwa ezulwini bazathola umzimba womoya ikanti labo abazavuswa baphile emhlabeni bazathola umzimba wenyama oyabe uqine saka njalo uphelele.—U-Isaya 33:24; 35:5, 6; 1 KwabaseKhorinte 15:42-44, 50.
Ngobani abazavuswa? IBhayibhili lithi “abafileyo bazavuswa, abalungileyo labangalunganga.” (ImiSebenzi 24:15) Abalungileyo yilabo ababethembekile kuNkulunkulu njengoNowa, uSara lo-Abrahama. (UGenesisi 6:9; KumaHebheru 11:11; UJakhobe 2:21) Abangalunganga yilabo abangazange bathole ithuba lokufunda ngemithetho kaNkulunkulu lokuyilandela.
Kodwa labo abenza izinto ezimbi ngabomo futhi bengafuni ukutshintsha abasoze bavuswe. Nxa abantu abanjalo bangafa abaselathemba lokuphinda baphile futhi.—UMathewu 23:33; KumaHebheru 10:26, 27.
Abafileyo bazavuswa nini? IBhayibhili latsho kuseselesikhathi ukuthi labo abazavuselwa ukuyaphila ezulwini bazavuswa ngesikhathi sokubakhona kukaKhristu okwaqala ngo-1914. (1 KwabaseKhorinte 15:21-23) Ukuvuswa kwalabo abazaphila emhlabeni khona kuzakwenzakala ngesikhathi sokubusa kukaJesu Khristu kweminyaka eyinkulungwane. Ngalesosikhathi umhlaba uzatshintshwa ube lipharadayisi.—ULukha 23:43; ISambulo 20:6, 12, 13.
Kuyini okwenza sikholwe ukuthi abafileyo bazavuswa? IBhayibhili lisitshela ngokuvuswa kwabantu abangu-9 okwafakazelwa ngabantu abakubona kusenzakala. (1 AmaKhosi 17:17-24; 2 AmaKhosi 4:32-37; 13:20, 21; ULukha 7:11-17; 8:40-56; UJohane 11:38-44; ImiSebenzi 9:36-42; ImiSebenzi 20:7-12; 1 KwabaseKhorinte 15:3-6) Ukuvuswa kukaLazaro kwakumangalisa kakhulu ngoba wayeselamalanga amane esethuneni. UJesu wenza isimangaliso sokuvusa uLazaro phambi kwexuku labantu. (UJohane 11:39, 42) Lababeyizitha zikaJesu abazange bakuphike ukuthi uLazaro wayevusiwe yikho bahle benza icebo lokubulala uJesu loLazaro.—UJohane 11:47, 53; 12:9-11.
IBhayibhili litshengisa ukuthi uNkulunkulu ulamandla okuvusa abafileyo lokuthi ulesifiso sokukwenza lokhu. Uyamkhumbula umuntu ngamunye azamvusa futhi uzamvusa enjengoba enjalo ngoba ulamandla okukwenza lokho. (UJobe 37:23; UMathewu 10:30; ULukha 20:37, 38) Nxa iBhayibhili likhuluma ngokuvuswa kwabafileyo lithi uNkulunkulu ’uzafisa ukuphinda ababone ngoba wabenza ngezandla zakhe.’—UJobe 14:15.
Imibono engaqondanga mayelana lokuvuswa kwabafileyo
Okungaqondanga: Ukuvuswa kwabafileyo kutsho ukuthi umzimba uyabe usuhlanganiswa lomphefumulo.
Okuqondileyo: IBhayibhili lisitshela ukuthi umphefumulo ngumuntu ngokwakhe, hatshi into engaphakathi komuntu esala iphila nxa angafa. (UGenesisi 2:7; UHezekheli 18:4) Ngakho ukuvuswa kwabafileyo akutsho ukuhlanganiswa komzimba lomphefumulo. Kutsho ukuthi bayavuka babe yimiphefumulo ephilayo.
Okungaqondanga: Abanye abantu bazavuswa besebebhujiswa.
Okuqondileyo: IBhayibhili lithi ’labo ababesenza izinto ezimbi bazavukela ukwahlulelwa.’ (UJohane 5:29) Kodwa bazakwahlulelwa ngenxa yalokho abazakwenza sebevusiwe hatshi abakwenza bengakafi. UJesu wathi: “Isikhathi siyeza futhi sesifikile lapho abafileyo abazalizwa khona ilizwi leNdodana kaNkulunkulu njalo ababelalela bazaphila.” (UJohane 5:25) Amabizo alabo ’abazalalela’ lokho abazakufundiswa sebevusiwe azabhalwa ’encwadinimgoqwa yokuphila.’—ISambulo 20:12, 13.
Okungaqondanga: Abantu abazavuswa bazavuswa belemizimba ababelayo bengakafi.
Okuqondileyo: Nxa umuntu angafa umzimba wakhe uyabola.—UmTshumayeli 3:19, 20.