Kuyini I-Amagedoni?

Impendulo yeBhayibhili

I-Amagedoni yimpi yokucina ezabakhona phakathi kukaNkulunkulu labohulumende abasemhlabeni. Ohulumende laba kanye labasekeli babo bayala ukuzehlisa kuNkulunkulu. (IHubo 2:2) Impi ye-Amagedoni yiyo ezaqeda imibuso yabantu.—UDanyeli 2:44.

Ibala elithi “Amagedoni” litholakala kanye kuphela eBhayibhilini, kuSambulo 16:16. Isiphrofetho esikuSambulo sithi “endaweni ebizwa ngokuthi yiAmagedoni ngesiHebheru,” ‘amakhosi omhlaba wonke” azaqoqana “ndawonye empini yosuku olukhulu lukaNkulunkulu uSomandla.”—ISambulo 16:14.

Ngubani ozabe esilwa empini ye-Amagedoni? UJesu Khristu nguye ozabe ekhokhela ibutho elisezulwini ukuze linqobe izitha zikaNkulunkulu. (ISambulo 19:11-16, 19-21) Izitha lezi zigoqela labo abaphikisana loNkulunkulu lalabo abangamhloniphiyo uNkulunkulu.—UHezekheli 39:7.

I-Amagedoni izalwelwa emazweni aseMpumalanga yini? Hatshi. Ayisoze ilwelwe endaweni eyodwa kodwa izagoqela umhlaba wonke.—UJeremiya 25:32-34; UHezekheli 39:17-20.

Ibala elithi Amagedoni ngezinye izikhathi elibizwa ngokuthi “Har–Magedon” (ngesiHebheru Har Meghiddohnʹ), litsho ukuthi “Intaba YaseMegido.” IMegido kwakungelinye lamadolobho ayeselizweni elalihlala ama-Israyeli kudala. Imbali ilandisa ngezimpi ezalwelwa endaweni le okugoqela lezinye ezibhalwe eBhayibhilini. (ABahluleli 5:19, 20; 2 AmaKhosi 9:27; 23:29) Lanxa kunjalo, i-Amagedoni ayisiyondawo eseduzane leMegido yasendulo. Ngoba akulantaba enjalo endaweni leyo futhi lanxa indawo leyo ibingahlanganiswa lengxenye yedolobho leJeziriyeli bebengeke benela bonke abazakulwa loNkulunkulu. Yikho, i-Amagedoni yimpi yokucina lapho izizwe ezizakulwa khona zimelane loNkulunkulu.

Kuzabe kunjani ngempi ye-Amagedoni? Asikwazi ukuthi uNkulunkulu uzawasebenzisa njani amandla akhe ngesikhathi leso. Mhlawumbe uzasebenzisa indlela azisebenzisa kudala ezinjengesiqhotho, ukuzamazama komhlaba, izikhukhula, umlilo lesalufa, umbane kumbe isifo. (UJobe 38:22, 23; UHezekheli 38:19, 22; UHabhakhukhi 3:10, 11; UZekhariya 14:12) Ngenxa yokudideka kungenzakala ezinye izitha zikaNkulunkulu zibulalane zodwa, kodwa ekucineni zizananzelela ukuthi bezisilwa loNkulunkulu.—UHezekheli 38:21, 23; UZekhariya 14:13.

Umhlaba uzaphela yini nge-Amagedoni? Hatshi, ngoba phela umhlaba likhaya labantu kuze kube nini lanini. (IHubo 37:29; 96:10; UmTshumayeli 1:4) I-Amagedoni ayisoze itshabalalise abantu ngoba “ixuku elikhulu” labantu abakhonza uNkulunkulu lizasinda.—ISambulo 7:9, 14; IHubo 37:34.

Ngezinye izikhathi nxa iBhayibhili likhuluma “ngomhlaba” liyabe likhuluma ngomphakathi wabantu ophikisana loNkulunkulu. (1 UJohane 2:15-17) Yikho i-Amagedoni izaletha “ukuphela komhlaba.”—UMathewu 24:3, King James Version.

Izafika nini i-Amagedoni? Ngesikhathi uJesu ekhuluma ‘ngokuhlupheka okukhulu’ okuyikho okuzaphehla impi ye-Amagedoni wathi: “Kakho olaziyo lelolanga lalelohola, kwala zona izingilosi zamazulu ngitsho leNdodana, kodwa nguBaba kuphela.” (UMathewu 24:21, 36) Kanti njalo iBhayibhili litshengisa ukuthi i-Amagedoni izakuba khona ngesikhathi sokubakhona kukaJesu esaqalisa ngo-1914.—UMathewu 24:37-39.