Ngubani UMikhayeli Ingilosi Enkulu?

Impendulo yeBhayibhili

Ezinye inkolo zibiza uMikhayeli ngokuthi “uMikhayeli Ongcwele.” Leli libizo uJesu aliphiwa engakabuyi emhlabeni langesikhathi esebuyele ezulwini.a UMikhayeli waphikisana loSathane ngemva kokufa kukaMosi. Waphinda wancedisa eyinye ingilosi eyayithunywe ukuhambisa umlayezo kumphrofethi uDanyeli. (UDanyeli 10:13, 21; UJuda 9) Ibizo elithi Mikhayeli litsho ukuthi “Ngubani OnjengoNkulunkulu?” UMikhayeli wenza khona kanye okutshiwo libizo lakhe ngoba ulwela ubukhosi bukaNkulunkulu futhi ulwisana lezitha zikaNkulunkulu.​—UDanyeli 12:1; ISambulo 12:7

Ake sibone ukuthi kungani sisithi uMikhayeli nguJesu.

• UMikhayeli ‘yingilosi enkulu.’ (UJuda 9) Ibala elithi ‘ingilosi enkulu’, litsho ukuthi “induna yezingilosi” futhi litholakala kabili eBhayibhilini. Indlela elisetshenziswe ngayo emavesini lawo yenza kube segcekeni ukuthi kukhulunywa ngengilosi eyodwa. Eyinye yalawo mavesi ithi uJesu ‘uzakwehla evela ezulwini, ngelizwi elikhulu, ngelizwi lengilosi enkulu.’ (1 KwabaseThesalonika 4:16) UJesu ulelizwi “lengilosi enkulu” ngoba nguye uMikhayeli ingilosi enkulu.

• UMikhayeli ukhokhela amabutho ezingilosi

  IBhayibhili lithi: “UMikhayeli lezingilosi zakhe balwa lomgobho” kumbe uSathane. (ISambulo 12:7) UMikhayeli ubizwa ngokuthi ngomunye “wamakhosana amakhulu” langokuthi ‘umbusi omkhulu.’ (UDanyeli 10:13, 21; 12:1) Usikhwicamfundo uDavid E. Aune uthi amabizo la okuhlonipha atshengisa ukuthi uMikhayeli “yinduna yamabutho ezingilosi.”

  IBhayibhili liphinda lisebenzise ibizo elithi Jesu nxa likhuluma ngengilosi ephiwe amandla okukhokhela ezinye. Lithi: ‘Lapho iNkosi uJesu isibonakaliswa ezulwini phakathi komlilo ovuthayo ilezingilosi zayo ezilamandla izabajezisa labo abangamaziyo uNkulunkulu.’ (2 KwabaseThesalonika 1:7, 8; UMathewu 16:27) Enye ivesi ithi izingilosi leziphathamandla lezikhulu zezulwini zehliselwe ngaphansi kukaJesu. (1 UPhetro 3:21, 22) UNkulunkulu ubengeke afake uJesu loMikhayeli esikhundleni esifananayo sokukhokhela izingilosi. Lokhu kwenza sibone ukuthi ibizo elithi Jesu lelithi Mikhayeli atsho ingilosi eyodwa.

• UMikhayeli “uzavela” ngesikhathi “sokuhlukumezeka okungazange kube khona.” (UDanyeli 12:1) Ngezinye izikhathi ibhuku likaDanyeli lisebenzisa ibala elithi “kuzavela” nxa likhuluma ngenkosi ethatha inyathelo. (UDanyeli 11:2-4, 21) UJesu Khristu obizwa ngokuthi “iNkosi yamakhosi” langokuthi ‘nguLizwi kaNkulunkulu,’ uzathatha inyathelo ngokubhubhisa izitha zikaNkulunkulu kanye lokuvikela abantu bakhe. (ISambulo 19:11-16) Lokhu uzakwenza ngesikhathi “sokuhlupheka okukhulu, okungazange kube khona kulokhu kwadabuka umhlaba.”​—UMathewu 24:21, 42.