UNkulunkulu Utholakala Yonke Indawo Yini?
Impendulo yeBhayibhili
UNkulunkulu uyenelisa ukubona zonke izinto futhi angenza loba yini afuna ukuyenza kungelani lokuthi kungaphi. (IZaga 15:3; KumaHebheru 4:13) Lanxa kunjalo iBhayibhili kalifundisi ukuthi uNkulunkulu utholakala kuyo yonke indawo kodwa likwenza kucace ukuthi kulendawo lapho ahlala khona.
Unjani uNkulunkulu?: UNkulunkulu ungumoya. (UJohane 4:24) Abantu ngeke benelise ukumbona. (UJohane 1:18) Imibono uNkulunkulu ayeyitshengisa abantu iveza ukuthi kulendawo eyodwa ahlala kuyo hatshi ukuthi utholakala yonke indawo.—U-Isaya 6:1, 2; ISambulo 4:2, 3, 8.
UNkulunkulu uhlala ngaphi?: UNkulunkulu uhlala ezulwini futhi indawo le itshiyene kakhulu lomhlaba. IBhayibhili lithi ‘ikhaya lakhe lisezulwini.’ (1 AmaKhosi 8:30) Liphinda lisitshele ukuthi ngelinye ilanga izingilosi zaziletha phambi kukaJehova.a Lokhu kutshengisa ukuthi uNkulunkulu ulendawo ahlala kuyo.—UJobe 1:6.
Nxa uNkulunkulu ehlala ezulwini kambe ukuthi angaba lendaba lami yini?
Ye, uNkulunkulu ulendaba lawe kakhulu. Lanxa ehlala khonale ezulwini, uyababona bonke abantu abasemhlabeni abafuna ukumthokozisa futhi uyabancedisa. (1 AmaKhosi 8:39; 2 ImiLando 16:9) Ake sibone ukuthi uJehova utshengisa njani ukuthi uyabaqakathekisa abantu bakhe:
Nxa uthandaza: Ngesikhathi uqalisa nje ukukhuleka uJehova uyabe ekulalele.—2 ImiLando 18:31.
Nxa ukhathazekile: “UJehova useduze labo abalezinhliziyo ezephukileyo asindise labo abadabukileyo emoyeni.”—IHubo 34:18.
Nxa ufuna ukwelulekwa: UJehova ‘uzakufundisa indlela okumele uhambe ngayo’ esebenzisa iLizwi lakhe iBhayibhili.—IHubo 32:8.
Imibono engaqondanga mayelana lokuthi uNkulunkulu uhlala ngaphi
Okungaqondanga: UNkulunkulu ukhona lasezintweni ezidaliweyo.
Okuqondileyo: UNkulunkulu kahlali emhlabeni loba ezintweni ezidaliweyo. (1 AmaKhosi 8:27) Liqiniso sibili ukuthi izinkanyezi lakho konke okudaliweyo ‘kufakaza inkazimulo kaNkulunkulu.’ (IHubo 19:1) Kodwa lokhu akutsho ukuthi uNkulunkulu uhlala ezintweni azidalileyo njengoba nje lomuntu odwebayo engeke ahlale entweni ayidwebileyo. Lanxa kunjalo, ukukhangela into edwetshwe ngomunye kuyasitshela okuthile ngaye. Lokukhangela izinto ezidaliweyo kwenza sibone ubuntu boMdali wazo obugoqela amandla, ukuhlakanipha lothando.—KwabaseRoma 1:20.
Okungaqondanga: UNkulunkulu kumele abesendaweni yonke ukuze akwazi okwenzakalayo futhi kukhanye lokuthi ulamandla.
Okuqondileyo: UNkulunkulu usebenzisa amandla akhe amakhulu abizwa ngokuthi ngumoya ongcwele. Uyawusebenzisa loba nini umoya lo ekhonale ezulwini.—IHubo 139:7.
Okungaqondanga: IHubo 139:8 lifundisa ukuthi uNkulunkulu ukuyo yonke indawo ngoba lithi: “Ngingakhuphukela emazulwini ukhona lapho; uma ngilala ezinzikini, ukhona lapho.”
Okuqondileyo: Ivesi le kayikhulumi ngalapho uNkulunkulu ahlala khona kodwa isifundisa ukuthi uNkulunkulu uyasibona lokuthi uzimisele ukusincedisa kungelani lokuthi singaphi.
a UJehova libizo likaNkulunkulu elitholakala eBhayibhilini.