UMariya Ngunina KaNkulunkulu Yini?

Impendulo YeBhayibhili

Hatshi. IBhayibhili kalitsho ukuthi uMariya ngunina kaNkulunkulu njalo akula lapho elithi sikhonze uMariya loba simhloniphe.a Cabanga ngalokhu okulandelayo:

UMariya kazange athi wayengunina kaNkulunkulu. IBhayibhili lithi wazala “iNdodana kaNkulunkulu,” hatshi uNkulunkulu ngokwakhe.—UMakho 1:1; ULukha 1:32.
UJesu Khristu laye kazange athi uMariya wayengunina kaNkulunkulu kumbe ukuthi kumele akhonzwe. Ngelinye ilanga waqondisa omunye umama owakhuluma amazwi atshengisa ukuthi wayeqakathekisa uMariya. Wamtshela wathi: “Ababusisiweyo yilabo abalizwayo iLizwi likaNkulunkulu balilalele.—ULukha 11:27, 28.
Ibizo elithi ‘Nina kaNkulunkulu” lelithi “Theotokos” (ozala uNkulunkulu) awatholakali eBhayibhilini.
Ibizo elithi ‘Ndlovukazi yaseZulwini’ liyatholakala eBhayibhilini kodwa kalitsho uMariya. Libizo likankulunkulukazi owayekhonzwa ngama-Israyeli ayesehlamukile. (UJeremiya 44:15-19) Kungenzakala ukuthi “iNdlovukazi yaseZulwini” kwakungunkulunkulukazi waseBhabhiloni okwakuthiwa ngu-Ishtar (kumbe Astarte)
AmaKhristu akuqala ayengamkhonzi uMariya kumbe amqakathekise kakhulu. Omunye umlobi wezembali uthi amaKhristu la ‘ayengamqakathekisi kakhulu uMariya ngoba lokhu kwakungenza abanye bacabange ukuthi asekhonza onkulunkulukazi.’—Ibhuku elithi In Quest of the Jewish Mary.
IBhayibhili lithi uNkulunkulu kalasiqalo, wayevele ekhona. (IHubo 90:1, 2; U-Isaya 40:28) Yikho akungeke kwenze ukuthi abe lomama. Kanti njalo uMariya wayengeke amthwale uNkulunkulu esiswini sakhe ngoba iBhayibhili lithi lamazulu awenelisi ukumthwala.—1 AmaKhosi 8:27.

UMariya Ngunina KaJesu Hatshi OkaNkulunkulu

UMariya wayengumJuda njalo eyisizukulwane seNkosi uDavida. (ULukha 3:23-31) UJehova wayemthanda ngenxa yokuthi wayelokholo njalo ezinikele kuye. (ULukha 1:28) Ngakho wamkhetha ukuthi abe ngunina kaJesu. (ULukha 1:31, 35) UJosefa loMariya babelabanye abantwana futhi.—UMakho 6:3.

Lanxa iBhayibhili liveza ukuthi uMariya waba ngumfundi kaJesu kalisitsheli okunengi ngaye.—ImiSebenzi 1:14

Kungani abanye besithi uMariya ngunina kaNkulunkulu?

Ubufakazi bokukhonzwa kukaMariya baqalisa eminyakeni yabo-400 C.E. Ngalesosikhathi isonto yamaKatolika yaba yinkolo esemthethweni eMbusweni wamaRoma. Ngenxa yalokhu abahedeni abanengi baba ngamaKhristu. Isonto le yathatha lemfundiso yoButhathu bukaNkulunkulu engekho emibhalweni.

Imfundiso yoButhathu bukaNkulunkulu yenza abantu abanengi bacabanga ukuthi nxa uJesu enguNkulunkulu kutsho ukuthi uMariya wayengunina kaNkulunkulu. Ngo-431 C.E isonto le yamemezela komunye umhlangano wayo owawuse-Efesu ukuthi uMariya “nguMama kaNkulunkulu.” Ukukhonzwa kukaMariya kwahle kwasabalala ngemva komhlangano lo. Njengoba abahedeni basebephendukele esontweni yamaKatolika, baqalisa ukukhonza isithombe seNtombi uMariya esikhundleni sabonkulunkulukazi babo benzalo abanjengo-Arithemisi (owayesaziwa ngokuthi nguDiana kumaRoma) kanye lo-Isis.

Ngo-432 .C.E uPapa weRoma uSixtus III wathi kwakhiwe isonto yokuhlonipha “uNina kaNkulunkulu.” Isonto le yakhiwa eduze lalapho okwakulethempeli likankulunkulukazi wamaRoma okwakuthiwa nguLucina. Omunye umlobi ekhuluma ngesakhiwo lesi wathi sasiyibufakazi bokuthi isonto yamaKatolika yantshintsha ukukhonzwa kukankulunkulukazi wamahedeni kwaba yikukhonza uMariya.—Ibhuku elithi Mary—The Complete Resource.

a Amasonto amanengi afundisa ukuthi uMariya ngunina kaNkulunkulu. Ambiza ngokuthi ‘yiNdlovukazi yaseZulwini’ kumbe Theotokos ibizo lesiGrikhi elitsho ukuthi ‘ozala uNkulunkulu.’