Kuyini Okungakunceda Ukuthi Usebenzise Kuhle Isikhathi Sakho?

• Kungani kumele usebenzise kuhle isikhathi?

• Ongakwenza

• Okutshiwo ngabentanga yakho

Kungani kumele usebenzise kuhle isikhathi?

• Isikhathi sinjengemali. Ungasidlalisa, ngeke usithole nxa ususidinga. Kodwa nxa ungasihlela kuhle uzathola isikhathi esinengi sokwenza izinto ozithandayo.

  IBhayibhili lithi: “Ivila liyaloyisa kodwa lingazuzi lutho, kodwa izifiso zokhutheleyo ziyagcwaliseka.”​—IZaga 13:4.

  Umcijo yilo: Ukuhlela kuhle isikhathi sakho kwenza uthole esinengi sokwenza izinto ozithandayo.

• Ukufunda ukusebenzisa kuhle isikhathi kuzakunceda kakhulu nxa usukhulile. Kungakunceda lokuthi ungaxotshwa emsebenzini. Wena ubungamgcina yini umuntu ohlala ephuzile nxa ubungaba lenkampani?

  IBhayibhili lithi: “Umuntu othembeke kokuncane uthembekile lakokukhulu.”​—ULukha 16:10.

  Umcijo yilo: Indlela osebenzisa ngayo isikhathi yenza abantu babone ukuthi ungumuntu onjani.

Iqiniso yikuthi akulula ukusebenzisa kuhle isikhathi. Nanku okunye okwenza kube nzima.

Okokuqala: Abangane

“Nxa abangane bami bangathi siyevakatsha, ngihle ngivumele phezulu lanxa ngiyabe ngingelaso isikhathi sakhona. Ngiyabe ngizitshela ukuthi imisebenzi engilayo ngizabuya ngiyenza. Lokho yikuziyenga ngoba kucina kungibisela emuva.”​—UCynthia oleminyaka engu-17.

Okwesibili: Ezempucuko

“Ukubukela i-TV kuyakuqedela isikhathi ungananzeleli. Uyalingeka ukutshona ubukele ama-movie lenhlelo ezitshiyeneyo eziphumayo.”​—U-Ivy oleminyaka engu-12.

“Isikhathi sami esinengi ngisiqeda ngisebenzisa i-tablet. Ngima nxa sokuphele ibhatri kuphela. Kuyangiyangisa kakhulu lokhu.”​—UMarie oleminyaka engu-23.

Okwesithathu: Ukubalisa

“Ngihlala ngibalisa ukwenza imisebenzi yesikolo leminye nje okuyabe kumele ngiyenze. Khonapho ngiyabe ngisenza izinto ezingelamsebenzi. Lo ngumkhuba omubi sibili.”​—UBeth oleminyaka engu-18.

Ongakwenza

1. Bhala phansi okuqakathekileyo okumele ukwenze. Ngokwesibonelo, bhala imisebenzi yendlini kanye leyesikolo okhangelelwe ukuthi uyenze ngeviki. Bhala lesikhathi osiqeda usenza imisebenzi le.

   IBhayibhili lithi: “Libe leqiniso lokuthi yiziphi izinto eziqakatheke kakhulu.”​—KwabaseFiliphi 1:​10.

2. Bhala izinto othanda ukuzenza. Kungahlanganisa ukubukela i-TV loba ukusebenzisa ezokuxhumana zakulezinsuku. Bhala lesikhathi osiqeda usenza izinto lezi.

   IBhayibhili lithi: “Qhubekani liphila ngendlela elokuhlakanipha . . . , lisisebenzise kuhle kakhulu isikhathi senu.”​—KwabaseKholose 4:5.

3. Qathanisa. Khangela osukubhalile ubusubona ukuthi isikhathi esinengi usiqeda usenzani. Uyabe usenza imisebenzi eqakathekileyo yini? Kulesidingo sokuthi wehlise isikhathi osiqeda usenza izinto ezingaqakathekanga yini?

   Zama lokhu: Bhala izinto ofuna ukuzenza ngelanga. Faka ukhwetshu kulezo osuzenzile.

   IBhayibhili lithi: “Amalungiselelo abakhutheleyo anika umvuzo.”​—IZaga 21:5.

4. Landela okubhalileyo. Kwezinye izikhathi kungadingakala ukuthi wale nxa unganxuswa ukuze wenelise ukwenza izinto eziqakathekileyo. Ungenza njalo uzathola isikhathi sokwenza ezinye izinto ozithandayo.

   IBhayibhili lithi: “Khuthalani, lingabi ngamavila”​—KwabaseRoma 12:11.

5. Qeda konke okumele ukwenze ubusuphumula. Intombazana okuthwa nguTara ithi: “Ngiyabhala phansi sibili izinto engifuna ukuzenza kodwa kwesinye isikhathi ngicina ngibukela i-TV ngingakaqedi engikwenzayo. Ngiyabe ngizitshela ukuthi ngizabukela okwemizuzu engu-15 kuphela, kodwa icina isingu-30 ngithi ngiyathi, ngibone sekwedlule amahora amabili.”

   Nanku okungakunceda nxa kuyake kwenzakale lakuwe lokhu: Ukuphumula kubone njengembadalo oyithola ngemva kokuqeda umsebenzi obuwuphiwe.

   IBhayibhili lithi: “Akukho okungcono emuntwini ngaphandle kokuthi . . . azuze ukusuthiseka ngomsebenzi wakhe.”​—UmTshumayeli 2:24.