Imali Yimpande Yesono Yini?

Impendulo yeBhayibhili

Hatshi. IBhayibhili alitsho ukuthi imali ayilunganga kumbe ukuthi imali yiyo ebangela zonke izinto ezimbi. Kodwa kulamazwi ajayelekileyo acutshwa eBhayibhilini athi “imali yimpande yesono.” Indlela asetshenziswa ngayo ayisiyo ngoba bawaqalisela phakathi futhi enza kuzwakale angani imali imbi. Lona iBhayibhili lithi “ukuthanda imali kuyimpande yazo zonke izono.”a—1 KuThimothi 6:10, King James Version, ibala elithi ukuthanda yithi esilifake ngamabala amnyama aqatha.

IBhayibhili lithini ngemali?

IBhayibhili lisitshela ukuthi imali “iyisiphephelo” futhi ingasinceda nxa singayisebenzisa kuhle. (UmTshumayeli 7:12) Kanti njalo iBhayibhili liyabancoma abantu abaphanayo ngokusebenzisa izimali zabo ukuze bancedise abanye.—IZaga 11:25.

Kodwa iBhayibhili liphinda lisixwayise ngokuqakathekisa kakhulu imali empilweni. Lithi: “Ekuphileni kwenu lingabi ngabantu abathanda imali kodwa suthisekani ngalokho elilakho.” (KumaHebheru 13:5) Isifundo esisithola lapha ngesokuthi kumele sisebenzise kuhle imali hatshi ukugijimisana lenotho. Futhi kumele sisuthiseke nxa silezinto esizidingayo empilweni njengokudla, izigqoko lendawo yokuhlala.—1 KuThimothi 6:8.

**Kungani iBhayibhili lisixwayisa ngokuthanda imali?**

Abantu abayizihwaba abasoze bayithole impilo engapheliyo. (Kwabase-Efesu 5:5) Ngoba phela ubuhwaba bubi njengokukhonza izithombe kumbe ukukhonza kwamanga. (KwabaseKholose 3:5) Esinye isizatho yikuthi nxa umuntu oyisihwaba efuna ukuthola lokho akufisayo, kanenginengi wephula imithetho okumele ilandelwe. UZaga 28:20 uthi: “Ojahe ukunotha ngeke ahlale engelacala.” Ngoba angaba sesilingweni sokwenza ubugebengu, ubuqili, ukuthumba abantu lokubulala.

Lanxa ukuthanda imali kungeke kubangele ukuthi umuntu enze izinto ezimbi kodwa kungaba lesiphetho esingasihle. IBhayibhili lithi: “Labo abazimisele ukunotha bawela esilingweni, lasemjibileni kanye lasezifisweni ezinengi ezingelangqondo leziyingozi.”—1 KuThimothi 6:9.

Okutshiwo liBhayibhili mayelana lemali kungasinceda njani?

Nxa sisenza izinto eziqondileyo futhi ezithokozisa uNkulunkulu, sizahlala sithokoza futhi sizakwamukelwa nguNkulunkulu. UNkulunkulu uthembisa labo abazimisele ukumthokozisa esithi: “Angisoze ngikutshiye loba sekutheni, angisoze ngikulahle loba sekutheni.” (UHebheru 13:5, 6) Uphinda asitshele ukuthi: “Umuntu othembekileyo uzathola izibusiso ezinengi.”—IZaga 28:20.

Amavesi akhuluma ngemali

UmTshumayeli 7:12: ‘Imali iyisivikelo.’

Okutshiwo yivesi le: Imali ingasinceda sibili nxa singayisebenzisa kuhle.

ULukha 12:15: “Lanxa umuntu elokunengi, izinto alazo ayisizo ezimnika impilo.”

Okutshiwo yivesi le: Imali ayisiyo eqakathekileyo empilweni futhi ayisoze isisindise.

1 KuThimothi 6:10: “Phela ukuthanda imali kuyimpande yazo zonke izinto ezilimazayo njalo ngenxa yokubasela lolothando, abanye badukisiwe ekukholweni, bazigwaza yonke indawo ngezinhlungu ezinengi.”

Okutshiwo yivesi le: Imali ngokwayo ayimbi. Kodwa abantu abathanda imali futhi abayiqakathekisayo empilweni bazilethela inhlupho ezinjengokungazwanani emulini kumbe ukugula ngenxa yokusebenza kakhulu.

UHebheru 13:5: “Ekuphileni kwenu lingabi ngabantu abathanda imali kodwa suthisekani ngalokho elilakho.”

Okutshiwo yivesi le: Kulokuthi sigijimisane lenotho kumele sisuthiseke nxa silezinto esingeke siphile singelazo empilweni .

UMathewu 19:24: “Kulula ukuthi ikamela lingene esikhaleni senalithi kulokuthi umuntu onothileyo angene eMbusweni kaNkulunkulu.”

Okutshiwo yivesi le: UJesu wayesanda kunxusa indoda eyayinothile ukuthi ibe ngumlandeli wakhe. Indoda le yala ngoba yayithanda kakhulu inotho yayo. Lapha uJesu wayesixwayisa ngokuthi umuntu oqakathekisa inotho usengozini yokulahlekelwa yimpilo engapheliyo.

a Ivesi le iphinda ihunyutshwe ngalndlela: “Ukuthanda imali kuyimpande yazo zonke izinto ezilimazayo.”