Ijeli ye-Hagfish

Sekulesikhathi eside abezesayensi bemangaliswa yijeli ekhitshwa yinhlanzi okuthiwa yi-hagfish. Kungani befuna ukwazi okunengi ngayo? Kuthiwa ijeli yayo iyanembuluka futhi ibuthakathaka ukwedlula loba yini efakwa ngokodotela emzimbeni womuntu ukuze elapheke masinya.

Cabanga ngalokhu: I-hagfish yinhlanzi esanyoka ehlala elwandle. Nxa kulokunye okufuna ukuyidla, inhlanzi le ikhipha ijeli elama-protein amanengi azintambontambo. Ama-protein la ayahlangana abesetshintsha amanzi akhonapho abe yijeli enembulukayo. Ijeli le yenza inyamazana efuna ukuhlasela inhlanzi le yehluleke ukuphefumula, ibisiyitshiya ihambe.

Ijeli ekhitshwa yinhlanzi le iyamangalisa. Intambo ngayinye yama-protein atholakala phakathi kwejeli le icake kakhulu kulonwele lomuntu kodwa iqine ukwedlula inayiloni ngokuphindwe ka-10. Nxa inhlanzi le ingakhipha ijeli yayo ibisihlangana lamanzi, leyojeli iba njengesitsha esenelisa ukuthwala amanzi alesisindo sayo siphindwe ka-26 000.

Abezesayensi bayehluleka ukwenza ijeli efanana leye-hagfish. Esinye isikhwicamfundo sithi kunzima ukuzwisisa indlela ijeli ye-hagfish eyenziwe ngayo. Lanxa kunjalo bafuna ukwenza ama-protein azintambontambo anjengawejeli ye-hagfish besebenzisa ama-bacteria. Bafisa ukuwasebenzisa ukwenza izinto ezingasindiyo, ezingadabukiyo, ezinanabukayo njalo ezibola lula nxa zingalahlwa. Kanti njalo bafuna lokwenza amalembu aqinileyo lezinto ezingasetshenziswa ngodokotela. Kukhanya kunengi abezesayensi abahlose ukukwenza.

Ubona njani? Ijeli ye-hagfish emangalisa kangaka yazenzakalela yini kumbe yadalwa?