U-Isaya 40:31—“Labo Abathemba UJehova Bazaphinda Babe Lamandla”

“Kodwa labo abathemba uJehova bazaphinda babe lamandla. Bazaphapha baqonge angathi balempiko njengezinkozi. Bazagijima kodwa bangadinwa, bazahamba kodwa bangapheli amandla.”—U-Isaya 40:31, INguqulo Yomhlaba Omutsha.

“Kodwa abalindela iNKOSI bazavuselela amandla; bazaqonga ngempiko njengenkonzi, bagijime bangadinwa, bahambe bangapheli amandla.”—U-Isaya 40:31, TBS.

Okutshiwo ngu-Isaya 40:31

UJehovaa uNkulunkulu uthembisa abantu abamkhonzayo ukuthi uzabanika amandla okuthi baqinisele kumbe banqobe loba yibuphi ubunzima obungabehlela.

“Labo abathemba uJehova bazaphinda babe lamandla.” Labo abathemba ukuthi uNkulunkulu ulamandla lokuthi uyafuna ukunceda abantu bakhe bangaqiniseka ukuthi uzabancedisa. (IZaga 3:5, 6) Enye indlela uNkulunkulu aqinisa ngayo abantu bakhe yikubanika amandla esebenzisa umoya ongcwele.—ULukha 11:13.

“Bazaphapha baqonge angathi balempiko njengezinkozi.” Amazwi la achasisa indlela amandla kaNkulunkulu angasebenza ngayo emuntwini. Kuba lula ukuthi ukhozi luphaphe luqonge luye khonale nxa kulomoya okhudumalayo osemkhathini. Nxa ukhozi lungathola lapho okulomoya okhudumalayo, luyavula impiko zalo umoya lo ubusuluncedisa ukuthi luqhubeke luqansa. Umoya lo yiwo owenza ukhozi lwenelise ukundiza emoyeni okwesikhathi eside lungasebenzisanga amandla alo amanengi luze luyefika lapho olufuna ukuyakhona.

“Bazagijima kodwa bangadinwa.” Inhlupho esihlangana lazo empilweni zingasiqeda amandla futhi zisenze sidane kodwa amandla esiwaphiwa nguNkulunkulu ayasinceda senelise ukubekezela. Aphinda asincedise ukuthi senelise ukwenza okulungileyo lanxa siphakathi kobunzima. Umphostoli uPhawuli wabekezelela ubunzima obunengi kakhulu, yikho wabhala wathi: “Ngilamandla okwenza zonke izinto ngenxa yalowo ongipha amandla.”—KwabaseFiliphi 4:13.

Amanye amavesi asinceda sizwisise u-Isaya 40:31

UNkulunkulu waphefumulela umphrofethi u-Isaya ukuthi abhale amazwi la eminyakeni engaba ngu-2 700 eyadlulayo. Lanxa amazwi la esebenza kuzo zonke izikhonzi zikaNkulunkulu ezithembekileyo, kumele ukuthi uJehova wawakhuluma ukuze akhuthaze amaJuda ayezathunjwa ayehlala eBhabhiloni okweminyaka engu-70. AmaJuda abuyela eJerusalema evela ekuthunjweni akubona ukugcwaliseka kwamazwi la. (U-Isaya 40:1-3) UNkulunkulu wawanika amandla ukuze enelise ukuhamba umango omude futhi owawunzimab esuka eBhabhiloni esiya eJerusalema ngo-537 B.C.E.—U-Isaya 40:29.