UMathewu 11:28-30—‘Wozani Kimi Ngizaliphumuza’

“Wozani kimi lina lonke elikhatheleyo lelisindwayo, ngizaliphumuza. Thwalani ijogwe lami lifunde kimi ngoba ngimnene futhi ngithobekile enhliziyweni. Lingenza njalo lizathola ukuphumula ngoba ijogwe lami lilula, lomthwalo wami awusindi.”—UMathewu 11:28-30, INguqulo Yomhlaba Omutsha.

“Wozani kimi lina lonke elikhatheleyo lelisindiweyo, mina ngizaliphumuza. Thwalani ijokwe lami phezu kwenu, lifunde kimi ngoba ngimnene ngithobekile; kung’khona imiphefumulo yenu izafumana ukuphumula. Ngoba ijokwe lami lilula, lomthwalo wami ulula.”—UMathewu 11:28-30, The Holy Bible in Ndebele.

Okutshiwo nguMathewu 11:28-30

UJesu wayenxusa labo ababemlalele ukuthi baze kuye. Wabaqinisekisa ukuthi nxa bangafunda kuye bazathokoza njalo bathole ukuphumula.

“Wozani kimi lina lonke elikhatheleyo lelisindwayo.” Labo ababenxuswa nguJesu ukuthi baze kuye ‘babesindwa’ yimithetho lamasiko ababebanjwa ngamandla ngabakhokheli benkolo ukuthi bayilandele. (UMathewu 23:4; UMakho 7:7) Okunye okwakubakhathaza yikuthi kwakumele basebenze nzima futhi okwesikhathi eside ukuze bathole okokuziphilisa.

“Ngizaliphumuza.” UJesu wathi uzabaphumuza labo abasamukelayo isicelo sakhe. Wabaphumuza ngokubanceda bazwisise ukuthi uNkulunkulu wayefuna baphile njani. (UMathewu 7:24, 25) Ukwazi lokhu kwabakhulula ezimfundisweni zamanga lasemasikweni ayebacindezela. (UJohane 8:31, 32) Lanxa kwakumele basebenze nzima ukuze benze lokho uJesu ayebafundisa khona, ukwenza njalo kwakuzabaphumuza.

“Thwalani ijogwe lami lifunde kimi.” Ngezikhathi zeBhayibhili abantu babejayele ukuthwala ijogwe emahlombe elalenziwe ngesigodo ukuze benelise ukuthwala izinto ezinzima. Yikho ibala elithi “ijogwe” laliphinda lisetshenziswe nxa kukhulunywa ngomuntu ongaphansi komunye, elandela lokho amtshela khona kumbe imithetho yakhe. (ULevi 26:13; U-Isaya 14:25; UJeremiya 28:⁠4) Umutsho othi “lifunde kimi” ungahunyutshwa langokuthi “wobani ngabalandeli bami (kumbe abafundi).” UJesu wayekhuthaza labo ababemlalele ukuthi babe ngabafundi bakhe ngokumlandela langokumlingisela.—UJohane 13:13-15; 1 UPhetro 2:21.

“Lizathola ukuphumula.” UJesu kazange aqede konke okwakuhlupha abantu ngalesosikhathi. Kodwa lokho akutshela labo ababemlalele kwabaduduza njalo kwabenza baba lethemba. (UMathewu 6:25-32; 10:29-31) Labo abakhetha ukuba ngabalandeli bakhe njalo balalela lokho ayebafundisa khona bazibonela ukuthi ukukhonza uNkulunkulu kwakungasomthwalo kodwa kwakubenza bathokoze.—1 UJohane 5:3.

“Ngoba ijogwe lami lilula, lomthwalo wami awusindi.” UJesu wayetshiyene sibili labakhokheli benkolo ababengamaJuda ngoba yena wayethobekile futhi emnene. (UJohane 7:47-49) Wayengelasihluku njalo engacindezeli muntu kodwa wayelomusa engeneka. Wayezwisisa futhi engakhangelelanga ukuthi abalandeli bakhe benze okungaphezu kwamandla abo. (UMathewu 7:12; UMakho 6:34; ULukha 9:11) Wabatshela lalokho okumele bakwenze ukuze uNkulunkulu abe lesihawu kubo waphinda wabafundisa lokuthi ukuba lomzwangedwa ohlanzekileyo kuzabenza bathokoze. (UMathewu 5:23, 24; 6:14) Ubuntu obuhle uJesu ayelabo benza abantu bamthanda njalo bamukela ijogwe lakhe baba ngabafundi bakhe.

Amanye amavesi asinceda sizwisise uMathewu 11:28-30

UJesu wakhuluma amazwi akuMathewu 11:28-30 ngesikhathi etshumayela eGalile ngomnyaka ka-31 C.E. Umphostoli uMathewu nguye yedwa owabhala amazwi la akhulunywa nguJesu. UMathewu wayeyazi mhlophe indlela abantukazana ababecindezelwa ngayo njengoba wayeke waba ngumthelisi futhi engumJuda. Babebhadaliswa imithelo ngamaRoma njalo beqilwa ngabakhokheli abangamaJuda. Yikho kumele ukuthi kwamduduza uMathewu ukuzwa uJesu enxusa abantu abakhatheleyo labathwele nzima ukuthi baze kuye. Wazibonela sibili ukuthi uJesu uwasebenzisa kuhle amandla awaphiwe nguYise uJehova.a—UMathewu 11:25-27.

IVangeli likaMathewu lisitshengisa ukuthi uJesu ukufanele sibili ukuba nguMesiya kanye lokuba yiNkosi yoMbuso kaNkulunkulu.—UMathewu 1:20-23; U-Isaya 11:1-5.

Bukela ividiyo le emfitshane ukuze ubone okumunyethwe libhuku likaMathewu.