ISambulo 21:1—“Izulu Elitsha Lomhlaba Omutsha”

“Ngasengibona izulu elitsha lomhlaba omutsha ngoba izulu lakuqala lomhlaba wakuqala kwasekudlulile njalo lolwandle lwalungasekho.”—ISambulo 21:1, INguqulo Yomhlaba Omutsha.

“Ngabuya ngabona izulu elitsha lomhlaba omutsha, ngoba izulu lakuqala lomhlaba wakuqala kwasekudlule, njalo ulwandle lwalungasekho.”—ISambulo 21:1, Holy Bible in Ndebele.

Okutshiwo nguSambulo 21:1

Ivesi le isebenzisa amabala amela okuthile ukuze itshengise ukuthi uMbuso kaNkulunkulu uzasusa bonke ohulumende babantu kusale kubusa wona. UMbuso lo uzasusa labo bonke abantu ababi kusale labo abavuma ukubuswa yiwo.

Ibhuku leSambulo lilemibono kumbe “izibonakaliso.” (ISambulo 1:1) Yikho kulengqondo ukuphetha ngokuthi izulu lomhlaba okukhulunywa ngakho evesini le kumela okuthile. Kanti njalo “amazulu amatsha lomhlaba omutsha” okukhulunywa ngakho lapha kuyatholakala lakwamanye amavesi aseBhayibhilini. (U-Isaya 65:17; 66:22; 2 UPhetro 3:13) Ukuqathanisa amavesi la lamanye kungasinceda sizwisise ukuthi atshoni.

“Izulu elitsha.” Ngezinye izikhathi iBhayibhili lisebenzisa ibala elithi “izulu” nxa likhuluma ngemibuso kumbe ohulumende. (U-Isaya 14:12-14; UDaniyeli 4:25, 26) Elinye ibhuku elichasisa iBhayibhili nxa likhuluma ngeziphrofetho lithi: “Izulu limela amandla okubusa loba uhulumende.”a KuSambulo 21:1 “izulu elitsha” limela uMbuso kaNkulunkulu. Ngezinye izikhathi uMbuso lo ubizwa ngokuthi ‘nguMbuso wezulu’ njalo kukhulunywa ngawo izikhathi ezinengi ebhukwini leSambulo lakwamanye amabhuku aseBhayibhilini. (UMathewu 4:17; ImiSebenzi 19:8; 2 KuThimothi 4:18; ISambulo 1:9; 5:10; 11:15; 12:10) Sekuseduze ukuthi uMbuso kaNkulunkulu oleNkosi enguJesu ususe “izulu lakuqala” okutsho bonke ohulumende babantu.—UDaniyeli 2:44; ULukha 1:31-33; ISambulo 19:11-18.

“Umhlaba omutsha.” IBhayibhili lithi umhlaba awusoze ubhidlizwe besekudalwa omunye. (IHubo 104:5; UmTshumayeli 1:4) Manje umhlaba umelani? Izikhathi ezinengi nxa iBhayibhili lisebenzisa ibala elithi “umhlaba” liyabe lisitsho abantu. (UGenesisi 11:1; 1 ImiLando 16:31) Yikho “umhlaba omutsha” okukhulunywa ngawo umela umphakathi wabantu abazimisele ukulalela lokuhlonipha uhulumende kaNkulunkulu. “Umhlaba wakuqala” wona utsho umphakathi wabantu abaphikisana loMbuso kaNkulunkulu futhi lowomphakathi uzasuswa.

‘Ulwandle lwalungasekho.’ Ulwandle lwaziwa ngokuhlala lulamagagasi futhi luhuba. Yikho ‘ulwandle’ okukhulunywa ngalo kuSambulo 21:1 lumela abantu abaxokozelayo abehlukaniswe loNkulunkulu. (U-Isaya 17:12, 13; 57:20; ISambulo 17:1, 15) Abantu abanjalo labo bazasuswa. IHubo 37:10 lithi: “Sekusele isikhathi esincane nje ukuthi ababi babe bengasekho. Uzakuthi ukhangela lapho ababekhona, ubone bengasekho.”

Amanye amavesi asinceda sizwisise iSambulo 21:1

Ibhuku leSambulo lakhuluma ngalokho okwakuzakwenzakala ‘osukwini lweNkosi.’ (ISambulo 1:10) Ezinye iziphrofetho eziseBhayibhilini zitshengisa ukuthi usuku lolo lwaqala ngo-1914 lapho uJesu abekwa khona ukuthi abe yiNkosi yoMbuso kaNkulunkulu.b Kodwa wayengasoze ahle aqalise ukubusa emhlabeni ngalesosikhathi ngoba ezinye iziphrofetho eziseBhayibhilini zitshengisa ukuthi ekuqaliseni ‘kosuku lweNkosi’ izinto zazizaqhubeka zisiba zimbi kakhulu emhlabeni. Isikhathi leso sibizwa ngokuthi ‘zinsuku zokucina.’ (2 KuThimothi 3:1-5, 13; UMathewu 24:3, 7; ISambulo 6:1-8; 12:12) Ekupheleni kwensuku zokucina okunzima ukuphila kuzo, uMbuso kaNkulunkulu uzasusa amazulu amadala lomhlaba omdala ubusuletha amazulu amatsha lomhlaba omutsha okuzabe kulokuthula lokulunga. Labo abazabuswa nguMbuso kaNkulunkulu bazakholisa ukuphila phakade emhlabeni omuhle beqine saka.—ISambulo 21:3, 4.

Bukela ividiyo le emfitshane ukuze ubone okumunyethwe libhuku leSambulo.