INDLELA IMINIKELO ESETSHENZISWA NGAYO
Inala Yabanye Ivala Ukuswela Kwabanye
OCTOBER 1, 2020
OFakazi bakaJehova benza imisebenzi eminengi ephathelane lokukhonza kanye lokusiza abanye emazweni adlula 200. Kodwa phakathi kwamazwe wonke lawa, kulangu-35 kuphela athola iminikelo eyeneleyo yokubhadala izindleko zawo. Manje kwenziwani emazweni angenelisiyo ukuthola iminikelo eyeneleyo?
IQula Elibusayo laboFakazi bakaJehova liyahlola ukuthi kuyini okudingwa ngoFakazi emhlabeni wonke ukuze baqhubeke bekhonza uJehova njalo betshumayela izindaba ezinhle. Kuyahlelwa kuhle ukuthi imali izasentshenziswa njani. Nxa igatsha lingathola imali enengi ukwedlula elingayisebenzisa ngaleso sikhathi, liyadlulisela eyinye kwamanye amagatsha. Lokhu kwenziwa kulandelwa isibonelo samaKhristu okuqala ngoba lawo ayencedisana ukuze “kube lokulingana.” (2 KwabaseKhorinte 8:14) AmaKhristu ayelokunengi ayencedisa ayelokulutshwana.
Abafowethu abancedwa ngamanye amagatsha bayabonga kakhulu. Ngokwesibonelo, abantu abanengi eTanzania baphila ngemali engaphansi kwe-$2 (yaseMelika) ngelanga. Yikho enye imali eyavela kwamanye amagatsha yasetshenziswa ukulungisa iWolu yoMbuso esetshenziswa libandla leMafinga. Ibandla lelo labhala lathi: “Kusukela kwalungisiswa iWolu yethu, inani labantu abangena imihlangano seliqansile. Siyayibonga kakhulu inhlanganiso kaJehova kanye labazalwane bethu emhlabeni wonke ngomusa abasitshengise wona. Khathesi iWolu yethu isinhle okunye okumangalisayo.”
Abanye abafowethu eSri Lanka bahlaselwe yindlala ngenxa yomkhuhlane we-COVID-19. Abanye bakhona ngudadewethu u-Imara Fernando lendodana yakhe u-Enosh. Kodwa benelisile ukuthola ukudla ngenxa yosizo oluvela kwamanye amagatsha. Babhala ikhadi lokubonga bathi: “Siyababonga abafowethu ngothando abasitshengise lona ngesikhathi lesi esinzima kangaka. Siyathokoza ngokuba semulini kaJehova futhi sikhulekela ukuthi bonke abafowethu baqhubeke bethola usizo olunjengalolu.”
U-Imara Fernando lomntanakhe u-Enosh
Kungelani lokuthi abafowethu labodadewethu bangaphi, bahlala bezimisele ukwabelana labanye lokho abalakho. Ngokwesibonelo, u-Enosh wenza ibhokisi lakhe elincane aphosela kulo imali yokunikela ukuze ancedise abanye. Udadewethu okuthiwa nguGuadalupe Alvarez laye ngomunye onikela ngalokho akwenelisayo lanxa indawo ahlala kuyo eMexico ilabantu abanengi abahola imali encane. Wabhala wathi: “Ngiyambonga uJehova ngothando lwakhe. Ngiyakwazi ukuthi iminikelo yami izahlanganiswa leyabanye ibisisetshenziswa ukunceda abafowethu labodawethu.”
Amagatsha athola iminikelo ethe xaxa ahlala ezimisele ukuncedisa amanye. U-Anthony Carvalho, olilunga leKhomithi yeGatsha eBrazil uthi: “Okweminyaka eminengi igatsha lethu belincediswa ngamanye amagatsha endabeni zemali futhi lokhu kwenze umsebenzi wethu wathuthuka kakhulu. Khathesi sesithola iminikelo ethe xaxa yikho lathi sesisenelisa ukusiza abanye. Abafowethu bakhangela ukuthi bangasiza ngaphi ukuze umsebenzi wokwenza abafundi uqhubekele phambili emhlabeni wonke.”
Kuyini oFakazi bakaJehova abangakwenza ukuze bancedise abafowabo labodadewabo abadinga usizo? Akudingeki ukuthi lithumele imali kwamanye amagatsha kodwa elingakwenza nje kuphela yikunikela ukuze lisekele umsebenzi owenziwa emhlabeni wonke. Lokhu lingakwenza ngokufaka iminikelo ebhokisini eliseWolu yoMbuso elibhalwe ukuthi “Umsebenzi Womhlaba Wonke” kumbe ngokunikela lisebenzisa iwebhusayithi ku-donate.jw.org. Siyalibonga kakhulu ngeminikelo yenu