Labangezwayo Endlebeni Baqakathekile

UJehova uNkulunkulu ufuna bonke abantu bafunde ngaye langoMbuso wakhe kungelani lokuthi bayezwa endlebeni kumbe kabezwa. (1 KuThimothi 2:3, 4) Lokhu yikho okwenza oFakazi bakaJehova bahumutshe amaBhayibhili lamabhuku atshiyeneyo ukuze abantu abanengi okuhlanganisa labangezwayo endlebeni benelise ukuwathola. Sikhuluma sisenzenje inhlanganiso yethu isihumutshe amavidiyo amanengi kakhulu ngolimi lwezandlaa njalo atholakala ngezindimi zezandla ezedlula 100. Ayenziwa njani amavidiyo la futhi abantu bawathola njani? Yiluphi utshintsho olubekhona endleleni amavidiyo la abesenziwa ngayo eminyakeni edlulileyo?

Ayenziwa Njani Amavidiyo Olimi Lwezandla?

Amavidiyo olimi lwezandla ahunyutshwa ngabahumutshi abasezindaweni ezitshiyeneyo emhlabeni wonke. Abahumutshi baqala balibale balizwisise ibhuku okumele balihumutshe. Ngemva kwalokho bayaxoxa ngokuthi bangahumutsha njani ngendlela ezwisisekayo ngolimi lwezandla. Nxa sebekwenzile lokho bayarekhoda ividiyo. Amaqembu angu-60 ahlala ehumutsha amabhuku ethu ngolimi lwezandla besekusithi angu-40 ahumutsha lapha lalapha.

Kudala kwakudula ukwenza amavidiyo olimi lwezandla ngoba amakhamera leminye imitshina eyayifunakala kwakudula ukwedlula khathesi. Kanti njalo amavidiyo akhona kwakumele arekhodelwe estudiyo okwakumele sisakhe kumbe sithenge isakhiwo besesisilungisisa. Iqembu labahumutshi lalidinga imali edlula $30 000b ukuze libe lakho konke elikufunayo.

Ukuze kusetshenziswe kuhle iminikelo, inhlanganiso ibilokhu idinga izindlela zokuthuthukisa umsebenzi lo ngapha inciphisa lezindleko. Yikho isisebenzisa imitshina yakulezinsuku engaduliyo. Khathesi abahumutshi abasasebenzeli estudiyo kodwa sebesenelisa ukurekhoda amavidiyo besemawofisini abo befake ilembu eliluhlaza emidulini yamawofisi abo ukuze amavidiyo aphume kuhle. Nxa ividiyo izadinga abantu abanengi, abafowethu labodadawethu bangarekhoda besezindlini zabo kumbe ewofisini yabahumutshi. Akusadingakali ukuthi baye estudiyo.

Inhlanganiso iphinde yenza le-application enceda abahumutshi bolimi lwezandla ukuthi bawenze kuhle umsebenzi wabo. Lokhu kuncede ukuthi kuphungulwe isikhathi abahumutshi abasiqeda behumutsha ividiyo ethile. Abafowethu labodadewethu bayayibonga kakhulu intuthuko yonke le. Omunye umfowethu okuthiwa ngu-Alexander wathi: “Khathesi amavidiyo olimi lwezandla asephuma ngobunengi ukwedlula kuqala. Kuyangithokozisa kakhulu lokhu futhi sengiwabukela nsuku zonke amavidiyo lawa.”

Khathesi imitshina edingwa liqembu elilodwa nje kuphela labahumutshi ibiza imali engaphansi kwe-$5 000. Lokhu kwenza senelise ukwenza amavidiyo olimi lwezandla ngezindimi ezinengi.

Abantu Bawathola Njani Amavidiyo Olimi Lwezandla?

Nxa abahumutshi bangaqeda ukuhumutsha ividiyo, iyabe isikulungele ukubukelwa. Kudala amavidiyo ayefakwa kuma-videocassettes lakuma-DVD kodwa lokhu kwakusebenzisa nzima, kudula kakhulu njalo kuthatha isikhathi esinengi. Amavidiyo lawa ayehanjiswa ekhampanini eyenza amakhasethi lama-DVD ukuze bawenze abe manengi. Ngemva kwalokho amakhasethi la kanye lama-DVD ayethunyelwa emabandleni atshiyeneyo. Ngo-2013 kuphela, kwasetshenziswa imali edlula 2 miliyoni ukuze kwenziwe ama-DVD olimi lwezandla.

Abantu abangezwayo endlebeni babebonga kakhulu ngelungiselelo leli. Kodwa kwakungalula ukuwasebenzisa amakhasethi lama-DVD ngoba ayelokhu eqhubeka esiba manengi. Ngokwesibonelo, kwesinye isikhathi kwakusetshenziswa ama-DVD amanengi ukuze kurekhodwe ibhuku leBhayibhili elilodwa nje kuphela. Umfowethu okuthiwa nguGilnei ohlala eBrazil uthi: “Nxa wawufuna ukubala umbhalo kwakumele uqale udinge ikhasethi eyiyo ubusudinga ke umbhalo wakhona. Kwakunzima sibili.” Udadewethu okuthiwa nguRafayane owake wasebenzisa amavidiyo olimi lwezandla laye uthi: “Kwakudinisa ukufunda iBhayibhili uwedwa. Wawuqeda isikhathi esinengi kakhulu udinga imibhalo kumbe amabhuku athile.” Abafowethu labodadewethu babethwala ama-DVD lamakhasethi nxa besekutshumayeleni besebewadlala ngeTV yomnikazi wendlu. Abanye abafowethu babehamba leyabo imitshina yokudlala ama-DVD. Ngokuya kwesikhathi kwasekulemitshina ethwalekayo yokudlala ama-DVD ele-screen futhi abafowethu basebesebenzisa yona. UBobby ohlala e-United States uthi: “Nxa wawusanda kutshengisa umninimuzi umbhalo futhi usufuna ukumtshengisa omunye, kwakumele ukhiphe i-DVD yonaleyo ufake eyinye. Lokhu kwakuthatha isikhathi futhi kwakusenza kube nzima ukuthi singenise iBhayibhili ezingxoxweni zethu.”

Ngo-2013 inhlanganiso yenza i-application okuthiwa yi-JW Library Sign Language enceda abafowethu labodadewethu ukuthi benelise ukudawuniloda lokudlala amavidiyo emafonini lakuma-tablet abo. Abaqala baphiwa imvumo yokusebenzisa i-application le ngabakhuluma ulimi lwezandla lwase-America. Ngo-2017 i-application le yayisisetshenziswa ngabantu abakhuluma izindimi ezitshiyeneyo zolimi lwezandla. Lokhu kwabathokozisa kakhulu abafowethu labodadewethu emhlabeni wonke. Umfowethu okuthiwa nguJuscelino oseBrazil uthi: “Ngasala ngibambe owangaphansi! Ngazibonela ngawami ukuthi iQula Elikhokhelayo liyasiqakathekisa kakhulu thina esingezwayo endlebeni njengoba nje liqakathekisa lalabo abazwayo. Liyafuna sibili ukuthi sithuthuke ekukhonzeni. Ukuphuma kwe-application le kwangithokozisa kakhulu njalo kwangenza ngazimisela ukulibala nsuku zonke iBhayibhili.

Lezinsuku wonke amavidiyo olimi lwezandla enziwa kusetshenziswa ezempucuko abesefakwa kuwebhusayithi yethu laku-JW Library Sign Language app. Lokhu kuncede ukuthi amavidiyo olimi lwezandla athathe amalanga amalutshwane ukuhunyutshwa lokurekhodwa. Kanti njalo abafuna ukuwabukela sebewathola masinya, akusathathi izinyanga kumbe iminyaka. Khathesi amavidiyo olimi lwezandla asephuma ngesikhathi esifananayo lamanye amabhuku.

Nanku okunye okwatshiwo ngabanye abafowethu labodadewethu abasebenzisa ulimi lwezandla. Udadewethu okuthiwa nguKlízia uthi: “Kambe yiphi eyinye inhlanganiso elendaba kangaka labantu abangezwayo endlebeni okokuthi iba leqiniso lokuthi sithola ukudla okuqinisa ukholo ngendlela elula? Ayikho eyinye inhlanganiso emhlabeni engenza lokho inhlanganiso kaJehova esenzela khona.” UVladimir yena uthi: “Amavidiyo olimi lwezandla angitshengisa ukuthi uJehova usinakekela ngendlela anakekela ngayo abantu abezwayo endlebeni.”

Amavidiyo olimi lwezandla ajayele ukuba lomutsho othi: “Ividiyo le isetshenziswa emsebenzini wokufundisa iBhayibhili owenziwa emhlabeni wonke njalo osekelwa ngeminikelo yokuzithandela.” Siyalibonga kakhulu ngeminikelo yenu eliyenzayo futhi eminye yakhona liyenza lisebenzisa ingxenye ekuwebhusayithi yethu ethi donate.jw.org. Iminikelo le iyasinceda ukuthi sihumutshe amaBhayibhili lamabhuku adindwa yinhlanganiso yethu ukuze atholwe yibo bonke abantu okuhlanganisa lalabo abasebenzisa ulimi lwezandla.