• Ongakwenza Ukuze Ube Lemikhuba Emihle
    Vukani!—2016 | No. 4
    • Owesifazane ubukele i-TV njalo udla ukudla okungakhi umzimba

      ISIHLOKO ESISEKUQALISENI

      Ongakwenza Ukuze Ube Lemikhuba Emihle

      • Iwatshi ele-alamu

        UBUTHONGO bulokhu bumphethe u-Austin lanxa i-alamu isimtshela ukuthi avuke. Kodwa njengensukwini, uyeqa embhedeni agqoke ezokugijima akade elele ezifake egcekeni. Kathathu ngeviki uyaphuma ayegijima njalo yikho abevele ekwenza okomnyaka wonke ophelileyo.

      • Iphakethi lama-chocolate

        ULaurie uyahaluzela eqonda ekhitshini esegcwalelene ngemva kokuxabana lomkakhe. Ufika adobhe iphakethi lama-chocolate ahle alitshayele esikhewini. Yikho ahlala ekwenza nxa esezondile.

      U-Austin loLaurie bafanana ngani? Bobabili bangabe bengakunanzeleli ukuthi sekulemikhuba esibangene egazini.

      Wena-ke? Ikhona yini imikhuba emihle ofisa ukuba layo? Mhlawumbe ufuna ukuhlala uselula umzimba, ukuphangisa ukulala loba ufisa ukuchitha isikhathi esinengi uxoxa lezihlobo zakho.

      Kungenzakala ukuthi ufuna ukutshiyana lemikhuba emibi enjengokubhema, ukudla ukudla okungakhi umzimba loba ukuchitha isikhathi eside uku-inthanethi.

      Nxa sesikhuluma iqiniso, akulula ukutshiya imikhuba emibi. Abanye baze bathi ukutshiya imikhuba emibi kufanana lengubo ezikhudumalayo mhla kumakhaza, kulula ukuzitshwathika phakathi kwazo kodwa kunzima ukuphuma kuzo.

      Manje ungenzani ukuze ube lemikhuba ezakunceda kulokuthi ikulimaze? Khangela amacebo amathathu alandelayo asekelwe ezimisweni eziseBhayibhilini.

  • 1 Ungazikhami
    Vukani!—2016 | No. 4
    • Owesifazane ubhala imikhuba ayifunayo langayifuniyo

      ISIHLOKO ESISEKUQALISENI | ONGAKWENZA UKUZE UBE LEMIKHUBA EMIHLE

      1 Ungazikhami

      Kungakhanya kulula ukuntshintsha yonke into ngasikhathi sinye. Ungazitshela ukuthi, ‘Leliviki ngiyayekela ukubhema lokukhuluma inhlamba njalo ngizaqalisa ukulala masinya, ukwelula umzimba, ukudla ukudla okwakha umzimba lokufonela ugogo lokhulu.’ Kodwa ukuzama ukuntshintsha konke ngasikhathi sinye kuzakwenza wehluleke lokuntshintsha okukodwa.

      ISIMISO SEBHAYIBHILI: “Ukuzithoba kuhamba lenhlakanipho.”—IZaga 11:2.

      Umuntu othobekileyo kazikhami. Uyakwazi ukuthi isikhathi lamandla akhe kanye lezinye izinto ngeke kumvumele ukuthi enze konke akufunayo. Yikho-ke kulokuthi azame ukuntshintsha konke ngasikhathi sinye, uzama ukuntshintsha kancane kancane.

      Ukuzama ukuntshintsha konke ngasikhathi sinye kuzakwenza wehluleke lokuntshintsha okukodwa.

      ONGAKWENZA

      Zama ukuntshintsha umkhuba owodwa loba emibili ngesikhathi. Amanyathelo alandelayo angakunceda:

      1. Bhala imikhuba emihle ofuna ukuba layo kanye lemikhuba emibi ofuna ukuyitshiya. Ungatshiyi lutho bhala yonke oyicabangayo.

      2. Kulokho okubhalileyo khetha ofuna ukukusebenzela kuqala.

      3. Khetha imikhuba emilutshwane mhlawumbe owodwa loba emibili phakathi kwaleyo ofuna ukuba layo laleyo ofuna ukuyitshiya, ube ususebenzela kuyo. Ngemva kwalokho usungakhetha eminye elandelayo.

      Ukuze wenelise ukukwenza masinya zama ukufaka umkhuba omuhle esikhundleni somubi. Ngokwesibonelo, nxa emikhubeni emibi ubhale ukuchitha isikhathi eside ubukele i-TV kanti emikhubeni emihle ubhale ukuxoxa labanye, ungahle uzitshele ukuthi: ‘Nxa ngivela emsebenzini ngizahle ngiqalise ngokufonela umngane loba isihlobo kulokuthi ngifikele ukulayitha i-TV.’

  • 2 Balekela Okungakuphambanisa
    Vukani!—2016 | No. 4
    • Impahla zokugijima, amathenesi, isigubhu samanzi lerediyo encane okulelwe kufakwe egcekeni

      ISIHLOKO ESISEKUQALISENI | ONGAKWENZA UKUZE UBE LEMIKHUBA EMIHLE

      2 Balekela Okungakuphambanisa

      • Ubusuzitshele ukuthi awusadli ukudla okungakhi umzimba, kodwa inhliziyo yakho isilenga ngenxa ye-ice cream leyana egcwele egabheni.

      • Ubusukhethe ukutshiyana lokubhema kodwa nangu umngane wakho okwaziyo ukuthi uzama ukwekela ukubhema ekuqhubela umhlanga.

      • Uhlele ukuthi uzavuka ugijima kodwa sekungumsebenzi onzima ukuqalisa ukudingana lamathenesi ekuseni.

      Uyakubona ukuthi kuyini okuluhlupho ezindabeni lezi? Kusegcekeni ukuthi indawo loba izimo esizifaka phakathi kwazo kanye labantu esitshona labo kungasinceda sibe lemikhuba emihle loba sehluleke ukutshiya imikhuba emibi.

      ISIMISO SEBHAYIBHILI: “Umuntu olengqondo uthi ebona ingozi acatshe, kodwa isithutha siyaphikelela singena enkathazweni.”—IZaga 22:3.

      IBhayibhili lisikhuthaza ukuthi sicabange ngesiphetho sendaba. Singenza njalo singenelisa ukubalekela izimo ezingasigwenxa njalo kuzasenza singazichayi emikhubeni esifuna ukuyitshiya. (2 KuThimothi 2:22) Ngamazwi amafitshane nje, kumele sibalekele okungasiphambanisa.

      Kwenze kube nzima ukwenza okungaqondanga njalo kube lula ukwenza okuqondileyo

      ONGAKWENZA

      • Kwenze kube nzima ukwenza okungaqondanga. Ngokwesibonelo, ungagcini ukudla okwaziyo ukuthi akwakhi umzimba nxa ufuna ukukuyekela. Ungenza njalo kuba nzima ukuthi ulingeke ukukudla ngoba kuyabe sekungumsebenzi ukuyakudinga.

      • Zama ukuthi kube lula ukwenza okuqondileyo. Ngokwesibonelo, nxa uhlele ukugijima ekuseni wohle ulale ufake impahla zokugijima egcekeni. Ungahlala usenza njalo kuzaba lula ukuthi unamathele kokuhlelileyo.

      • Khetha kuhle abangane. Sijayele ukwenza njengabantu esitshona labo. (1 KwabaseKhorinte 15:33) Yikho-ke zama ukudinga abangane abakukhuthaza ukuthi wenze okuhle kulokuthi utshone labantu abakutshotshozela ukuthi wenze imikhuba engaqondanga.

  • 3 Ungakhalali
    Vukani!—2016 | No. 4
    • Owesifazane ufaka amamakhi kukhalenda

      ISIHLOKO ESISEKUQALISENI | ONGAKWENZA UKUZE UBE LEMIKHUBA EMIHLE

      3 Ungakhalali

      Owesifazane ufaka amamakhi kukhalenda

      Kulomcabango ojayelekileyo ebantwini wokuthi kuthatha amalanga angu-21 ukuze umkhuba othile ungene egazini. Ukuchwayisisa kutshengisa ukuthi abanye kungabathathela isikhathi eside ukuntshintsha imikhuba ethile kodwa abanye esincane. Kumele kukuqede amandla yini lokhu?

      Cabanga ngalokhu: Ake sithi ufuna ukwelula umzimba kathathu ngeviki.

      • Iviki yokuqala ukwenza kathathu.

      • Iviki yesibili weqa ilanga elilodwa.

      • Iviki yesithathu uphinda ukwenze amalanga amathathu.

      • Iviki yesine ukwenza kanye kuphela iviki isiphela.

      • Iviki yesihlanu uphinda ukwenze amalanga womathathu njalo kusukela khonapho usukwenza mtshokotsho.

      Kukuthethe amaviki amahlanu ukuze umkhuba lo ukungene. Kungakhanya kuyisikhathi eside kodwa nxa usukwenzile obukufisa uyathokoza.

      ISIMISO SEBHAYIBHILI: ‘Ngoba loba angaze awe kasikhombisa umuntu olungileyo uyavuka futhi.’—IZaga 24:16.

      IBhayibhili lisikhuthaza ukuthi singakhalali. Okuqakathekileyo yikuthi uvuke kangaki hatshi ukuthi uwe kangaki.

      Ukuze ungakhalali kufanele ukhangele ukuthi uvuke kangaki hatshi ukuthi uwe kangaki

      ONGAKWENZA

      • Ungazitsheli ukuthi ukwehluleka kutsho ukuthi uyisehluleki. Kulindele ukuthi uzahamba usiwa ukuze uphumelele.

      • Cabanga kakhulu ngalapho owenza khona kuhle. Ngokwesibonelo nxa uzama ukuthuthukisa indlela okhuluma ngayo labantwabakho ungazibuza ukuthi, ‘Kunini lapho engaphosa ngatshingela khona abantwana ngasengizibamba? Kulokuthi ngitshinge kuyini engakwenzayo? Ngingakuphinda njani futhi?’ Ukuzibuza imibuzo le kungakunceda ukuthi uphikelele ukwenza okuhle kulokuthi uhlale ucabanga ngalapho owehluleke khona.

      Khululeka ukukhuluma laboFakazi bakaJehova loba uvakatshele iwebhusayithi yethu i-jw.org ukuze ufunde ezinye izimiso eziseBhayibhilini ezingakunceda empilweni. Uzathola izimpendulo zemibuzo efanana lale; Ngingalwisana njani lokukhathazeka? Ngingenzani ukuze ngithole intokozo empilweni loba ukuthi imuli yami ithokoze?