UNkulunkulu Wasebenzisa Ukuzenzakalela Kwemvelo Ukuze Adale Izinto Yini?

Impendulo yeBhayibhili

Hatshi. IBhayibhili liveza ngokucacileyo ukuthi uNkulunkulu wadala abantu kanye ‘lemihlobo’ etshiyeneyo yezinyamazana lezimila.a (UGenesisi 1:12, 21, 25, 27; ISambulo 4:11) Lithi abantu bavela ku-Adamu lo-Eva abazali bethu bokuqala. (UGenesisi 3:20; 4:1) Okutshiwo liBhayibhili akuhambelani lalokho okukholwa ngabanye ukuthi uNkulunkulu wasebenzisa ukuzenzakalela kwemvelo ukuze adale izinto ezikhona namuhla. Kodwa liyakuvuma ukuthi izinto ezingumhlobo owodwa zingatshiyana njengalokho okutshiwo ngabezesayensi.

• Lokho abanye abakukholwayo

• Imfundiso yokuzenzakalela kwemvelo iyahambelana yini lalokho okutshiwo liBhayibhili?

• Kuyini okwenza izimila lezinyamazana zitshintshe nxa zisendaweni ethile?

Lokho abanye abakukholwayo

Abantu abakholwa ukuthi uNkulunkulu wasebenzisa ukuzenzakalela kwemvelo ukuze adale izinto balemibono etshiyeneyo ngokuthi wakwenza njani lokho. Ibhuku okuthiwa yi-Encyclopædia Britannica lithi abanye abantu bakholwa ukuthi uNkulunkulu wenza ukuthi ezintweni ezidaliweyo kube lento eyodwa eyenelisa ukukhipha okunye okunengi.

Nanku okunye okukholwa ngabanye:

• Yonke into ekhona yaqalela ezintweni ezilutshwana ezazikhona kudala.

• Umhlobo othile wezinto ezidaliweyo ungaziguqula ube ngeyinye into.

• UNkulunkulu nguye owenza ukuthi izinto zizenzakalele ngalindlela.

Imfundiso yokuzenzakalela kwemvelo iyahambelana yini lalokho okutshiwo liBhayibhili?

Imfundiso yokuzenzakalela kwemvelo yenza kukhanye angani okubhalwe kuGenesisi mayelana lendlela izinto ezadalwa ngayo akuqondanga. UJesu wake wacupha amazwi akuGenesisi futhi lokhu kwatshengisa ukuthi okusebhukwini leli kuliqiniso. (UGenesisi 1:26, 27; 2:18-24; UMathewu 19:4-6) IBhayibhili lithi uJesu wayehlala loNkulunkulu ezulwini engakabuyi emhlabeni njalo wancedisa uNkulunkulu ukudala “zonke izinto” ezikhona. (UJohane 1:3) Yikho imfundiso yokuthi uNkulunkulu wasebenzisa ukuzenzakalela kwemvelo ukuze adale izinto ezitshiyeneyo ayivumelani lalokho okufundiswa liBhayibhili.

Kuyini okwenza izimila lezinyamazana zitshintshe nxa zisendaweni ethile?

IBhayibhili kalisitsheli ukuthi izinto ezidaliweyo ezingumhlobo owodwa zingatshiyana okunganani. Kodwa kalikuphikisi ukuthi izimila lezinyamazana eziyimihlobo etshiyeneyo zingahlangana besezidala omunye umhlobo kumbe zingatshintsha kusiya ngendawo ezikuyo. Kodwa lokhu akutsho ukuthi ziyabe seziguqukile zaba ngeyinye into njalo akubangelwa yikuzenzakalela kwemvelo.