Sewake wacabanga yini ngokubala iBhayibhili kodwa wasudondiswa yizizatho ezinjengalezi ezitshiwo ngabanye? Kwabanengi ukubala iBhayibhili yinto enzima. Kodwa kuthiwani nxa ubungathola ukuthi ukubala iBhayibhili kungakunceda ube lempilo engcono njalo ethokozisayo? Ubungenzani nxa ubungathola ezinye izindlela ezingenza ukuthi ukukholise ukulibala? Ubungazama yini ukulibala ukuze ubone ukuthi lingakunceda njani?

Zwana ukuthi abanye bancedakala njani ngokulifunda iBhayibhili.

U-Ezekiel oleminyaka engaphezu kuka-20 uthi: “Ekuqaleni kwakungani ngumuntu otshayela imota engakwazi lokuthi uyangaphi. Kodwa ukubala iBhayibhili kungincedile ngoba khathesi sengikwazi ukuthi ngiphilelani. Ngithola amacebo engingawasebenzisa nsuku zonke.”

U-Frieda laye oleminyaka edlula engu-20 uyalandisa: “Ngangicaphuka masinyane. Kodwa khathesi sengikwazi ukuzikhuza ngenxa yokuhlala ngibala iBhayibhili. Sengilobuntu obungcono njalo lokho sekungenze ngaba labangane abanengi.”

Owesifazana oleminyaka edlula 50 okuthiwa ngu-Eunice nxa ekhuluma ngeBhayibhili uthi: “Liyangisiza ukuthi ngibe ngumuntu ongcono kakhulu njalo selingenze ngalahla imikhutshana emibi ebengilayo.”

Njengoba usuzizwele banengi kakhulu asebencedwe yikubala iBhayibhili, lawe ungalibala lingakunceda ukuthi uphile impilo emnandi. (U-Isaya 48:17, 18) Okunye elingakusiza kukho (1) yikuthi wenze izinqumo ezinhle, (2) uthole abangane abahle (3) ungakhathazeki kakhulu (4) lokuthi ufunde iqiniso ngoNkulunkulu. Konke okuseBhayibhilini kuvela kuNkulunkulu njalo ungakulalela awusoze ulahleke. UNkulunkulu uzakufundisa okuzakunceda.

Okuqakathekileyo yikuthi uzimisele ukulibala. Yiwaphi amacebo angakunceda ukuthi uqalise ukulifunda lokuthi ulikholise?

Kuyini ongakwenza ukuze ukukholise ukubala iBhayibhili njalo ungenzani ukuze okubalayo kukuncede? Ake sixoxe ngezinto ezinhlanu ezincede abanengi.

Dinga indawo ozabalela kuyo. Zama ukudinga indawo engelamsindo futhi ube leqiniso lokuthi akula lutho olukuphambanisayo. Kuqakathekile lokuthi ubale usendaweni elokukhanya futhi ebetha umoya omnandi. Ungenza konke lokhu, okubalayo kuzangena kujule engqondweni lasenhliziyweni yakho.

Zimisele ukulalela. IBhayibhili libhuku elivela kuBaba wethu osezulwini, yikho kuqakathekile ukuthi uzimisele ukulalela konke asitshela khona. Kufanele wenze njengomntwana olalelayo nxa efundiswa ngumzali. Kungenzeka wake wezwa inkulumo ezimbi ngeBhayibhili, yikho ungavumeli inkulumo ezinjalo zikuphambanise ukuthola imfundo evela kuNkulunkulu.​—IHubo 25:4.

Qalisa ngokuthandaza. IBhayibhili libhuku elilemicabango kaNkulunkulu. Yikho kuqakathekile ukuthi sicele uncedo lwakhe ukuze silizwisise. Uthembisa ukuthi ‘uzabapha umoya ongcwele labo abawucela kuye.’ (ULukha 11:13) Umoya ongcwele uzakunceda uzwisise indlela uNkulunkulu acabanga ngayo. Ngokuhamba kwesikhathi, umoya wakhe uzakusiza lokuthi wenelise ukuzwisisa “lezinto ezizikileyo zikaNkulunkulu.”​—1 KwabaseKhorinte 2:10.

Bala ulenhloso yokuzwisisa. Akumelanga ubalele ukuqeda nje. Kufanele ucabangisise ngalokho okubalayo. Zibuze: ‘Yibuphi ubuntu obuhle obusemuntwini engibala ngaye? Ngingakusebenzisa njani lokhu empilweni yami?’

Zimisele ukusebenzisa lokho okufundayo. Ukuze lokho okubala eBhayibhilini kukuncede, dinga ongakusebenzisa empilweni yakho. Nanku ongazimisela ukukwenza: Zimisele ukufunda okunengi ngoNkulunkulu kumbe ukusebenzisa lokho okubalayo ukuze ube ngumuntu ongcono. Nxa usukwazi okufunayo usungakhetha izingxenye zeBhayibhili ezikhuluma ngakho.a

Imicijo le esixoxe ngayo ingakunceda ukuthi ulizwisise iBhayibhili. Yikuphi okunye ongakwenza ukuze ukukholise ukulibala? Isihloko esilandelayo silemicijo engakunceda.

Uyakukholisa yini ukubala iBhayibhili kumbe kuyakudina? Kuya ngokuthi ulibala njani. Ake sikhangele ezinye izindlela ongazisebenzisa ukuze ukukholise ukulibala.

Dinga iBhayibhili elizwisisekayo. Ngeke ukukholise ukubala ibhuku elilamabala anzima njalo angasasetshenziswa. Yikho dinga iBhayibhili elibhalwe ngolimi oluzwisiseka lula ukuze lokho okubalayo ukuzwisise njalo kungene enhliziyweni. Kanti njalo kufanele ube leqiniso lokuthi lihunyutshwe ngendlela eqondileyo.a

Sebenzisa ezempucuko. Kulezinsuku iBhayibhili selitholakala lakwezempucuko. Amanye amaBhayibhili ungawabala ku-inthanethi kumbe uwadawunilode kukhompiyutha, ku-tablet loba efonini yakho. Kanti amanye amaBhayibhili atholakala kwezempucuko enza ukuthi uthole lula amanye amavesi ahambelana lendaba oyibalayo lokuthi ubone ukuthi kwamanye amaBhayibhili ihunyutshwe njani. Nxa uthanda ukulalela kulokubala, ungalithola iBhayibhili elirekhodiweyo. Abantu abanengi bathanda ukulilalela nxa bephakathi kohambo, beziwatshela loba besenza eminye imisebenzi. Lawe ungakuzama lokhu.

Sebenzisa okungakuncedisa ukuthi uzwisise. Kulamamephu atshengisa izindawo okukhulunywa ngazo eBhayibhilini. Amamephu la angakuncedisa ubone ukuthi izindawo obala ngazo zazingaphi okwenza ukuthi uzwisise ngcono lokho oyabe ukubala. Kulezihloko ezitholakala kumamagazini loba kuwebhusayithi i-jw.org ezingakuncedisa ukuthi uzwisise ezinye izingxenye zeBhayibhili.

Libale ngezindlela ezehlukeneyo. Nxa usizwa kukudina ukubala iBhayibhili usukela ekuqaliseni kwalo uze uyefika ekucineni, zama ukuqalisa ngengxenye oyithandayo. Nxa ufuna ungakhetha ukuqala ngokufunda ngabantu abadumileyo okukhulunywa ngabo eBhayibhilini. Ibhokisi elithi “Jayelana Labantu Okukhulunywa Ngabo EBhayibhilini” litshengisa indlela ongakwenza ngayo. Okunye ongakwenza yikubala ulandelela izindaba ezithile eBhayibhilini loba indlela izehlakalo ezazilandelana ngayo. Sekukuwe ukuthi ukhethe indlela ofuna ukulibala ngayo.

IBhayibhili libhuku eliloncedo kakhulu. Lilamacebo amahle avela kuMdali wethu. (2 KuThimothi 3:16) Elikumumetheyo kungasinceda empilweni. IBhayibhili lithi: “Ilizwi likaNkulunkulu liyaphila njalo liyasebenza.” (KumaHebheru 4:12) Lingasinceda ezintweni ezimbili eziyisiqokoqela. Okokuqala yindlela esingathuthukisa ngayo impilo yethu khathesi, okwesibili yikusinceda simazi ngcono uNkulunkulu kanye lalokho asithembisa khona.​—1 KuThimothi 4:8; UJakhobe 4:8.

Lingathuthukisa impilo yakho khathesi. IBhayibhili lingasisiza thina ngokwethu. Lilamacebo amahle mayelana

• Lokuba lobudlelwano obuhle labanye.​—Kwabase-Efesu 4:31, 32; 5:22, 25, 28, 33.

• Lempilakahle.​—IHubo 37:8; IZaga 17:22.

• Lendlela yokuziphatha.​—1 KwabaseKhorinte 6:9, 10.

• Lomsebenzi.​—IZaga 10:4; 28:19; Kwabase-Efesu 4:28.a

UVicent lo-Annalou abasanda kutshada abase-Asia bayabonga kakhulu ngamacebo aluncedo aseBhayibhilini. Njengabanengi abayabe besanda kutshada kwakunzima ukuthi bakhulumisane bekhululekile njalo bazwisisane ngenxa yobuntu babo obabuhlukene. Okwabancedayo yikusebenzisa lokho ababekubala eBhayibhilini. UVicent uthi: “Engikufunda eBhayibhilini kungincede ukuthi ngenelise ukulungisa kuhle loba yibuphi ubunzima esihlangana labo. Ukusebenzisa okuseBhayibhilini kusincedile ngoba khathesi siyathokoza emulini yethu.” Umkakhe u-Annalou laye uthi: “Ukufunda ngezibonelo eziseBhayibhilini kwasinceda. Khathesi ngiyathokoza njalo ngiyasuthiseka emulini yami ngoba sesikwazi ukuhlela izinto esifuna ukuzenza.”

Ukwazi uNkulunkulu. UVicent uphinda athi: “Ukubala iBhayibhili kungisondeze eduze loJehova.” Okwananzelelwa nguVicent kusitshengisa omunye umcijo oqakathekileyo wokuthi iBhayibhili lingasinceda simazi uNkulunkulu. Ungalibala iBhayibhili lizakusiza ukuthi ube ngumngane kaNkulunkulu. Kanti njalo lizakutshela ngekusasa elihle lapho esizathola khona ‘ukuphila okuqotho’ loba ukuphila phakade. (1 KuThimothi 6:19) Alikho ibhuku elingasitshela lokhu ngaphandle kweBhayibhili.

Ungazinika isikhathi sokuhlala ubala iBhayibhili lizakunceda uthuthukise impilo yakho njalo uzamazi uNkulunkulu. Ukubala iBhayibhili kuzakwenza ube lemibuzo eminengi. Ungaba layo khumbula ngomTopiya owaphila eminyakeni engaba ngu-2 000 eyadlulayo. Kunengi ayengakuzwisisi nxa wayebala iBhayibhili. Ngesikhathi ebuzwa ukuthi uyakuzwisisa yini ayekubala waphendula esithi: “Ngingakuzwisisa kanjani kungekho muntu ongichazelayo na?”b Yikho wavuma ukuthi ancediswe nguFiliphu owayengumfundi kaJesu njalo owayelazi kuhle iBhayibhili. (ImiSebenzi 8:30, 31, 34) Nxa ufisa ukwazi okunengi okutholakala eBhayibhilini ungafila ifomu lesicelo sakho ku-www.pr418.com loba ukhangele amakheli akumagazini le ubusubhalela kuleyo eseduze lalapho okhona. Okunye ongakwenza yikuthintana laboFakazi bakaJehova kumbe ufike eWolu yoMbuso yabo esendaweni yakini. Zama ukuqalisa ukulibala namuhla iBhayibhili, lizakunceda ukuthi uphile impilo enhle.