Lingisela Abaphrofethi—UHoseya
1. Yiwuphi umbuzo okungenzakala ukuthi wake wazibuza wona?
1 ‘Kuyini engizimisele ukukwenzela uJehova?’ Kungenzakala ukuthi wake wazibuza umbuzo lo lapho ucabangisisa ngabo bonke ubuhle kanye lesihawu sikaJehova. (Hubo. 103:2-4; 116:12) UHoseya wazimisela ukwenza lokho uJehova ayemlaye ukuthi akwenze, lanxa lokho kwakusitsho ukuthi azidele. Singamlingisela njani uHoseya?
2. Singasilingisela njani isibonelo esihle sikaHoseya sokukhuthazela emsebenzini wokutshumayela?
2 Tshumayela Ngezikhathi Ezinzima: Umlayezo kaHoseya wawuqondiswe embusweni wezizwe ezilitshumi zako-Israyeli ngenxa yokuthi kwakusele kancane ukuthi ukukhonza kweqiniso kuphele. Inkosi uJerobhowami wesibili yenza izinto ezimbi phambi kukaJehova yaqhubekisela phambili ukukhonzwa kwethole okwakuqaliswe nguJerobhowami wokuqala. (2 AmaKho. 14:23, 24) Amakhosi abusa ngemva kwakhe lawo athuthukisa ukukhonza kwamanga embusweni wezizwe ezilitshumi kwaze kwaba yikubhidlizwa kombuso lo ngo-740 B.C.E. Lanxa ukukhonza kwamanga kwakubhahile, uHoseya waqhubeka esebenza njengomphrofethi othembekileyo okweminyaka engaba ngu-59. Lathi sizimisele yini ukuqhubeka sitshumayela zikhathi zonke lanxa abantu besiphikisa kumbe bengalifuni iqiniso?—2 Tim. 4:2.
3. Impilo kaHoseya yatshengisa njani ukuthi uJehova ulesihawu?
3 Cabanga Ngesihawu sikaJehova: UJehova watshela uHoseya ukuthi athathe “umfazi oyisifebe.” (Hos. 1:2) Lanxa umfazi wakhe uGomeri wamzalela indodana, ngokuhamba kwesikhathi wazala abanye abantwana ababengasibo bakaHoseya. Ukuzimisela kukaHoseya ukuxolela umkakhe kwatshengisa ukuthi uJehova wayelesihawu esikhulu kuma-Israyeli okokuthi wawaxolela lapho ephenduka ezonweni zawo. (Hos. 3:1; Rom. 9:22-26) Sizimisele yini ukutshela abantu bonke ngesihawu sikaJehova lanxa ukwenza njalo kusitsho ukubeka eceleni esikuthandayo?—1 Khor. 9:19-23.
4. Yikuphi esingazimisela ukukwenzela uJehova?
4 Ezinye izinceku zikaJehova zitshiye imisebenzi elemali ukuze zisebenze isikhathi esinengi enkonzweni. Ezinye zikhethe ukungatshadi loba ukungabi labantwana ukuze zenze okunengi okuphathelane loMbuso. Nxa sikhumbula ngempilo kaHoseya, singahle sizitshele ukuthi, ‘Ngeke ngikwenze mina lokho okwenziwa nguHoseya.’ Lanxa kunjalo, uJehova angasisebenzisa ngezindlela ebesingeke sicabange ukuthi angasisebenzisa ngazo. Lokho ukwenza kuphela nxa sitshengisa ukuthi siyabonga ngomusa wakhe njalo sikholwa emandleni omoya wakhe ongcwele njengoHoseya.—Mat. 19:26; Flp. 2:13.