Inkonzo kaJesu eGalile iphumelele sibili. Kodwa ufuna ukutshumayela lakwezinye izindawo yikho esithi: “Kufanele ngitshumayele izindaba ezinhle zoMbuso kaNkulunkulu lakwamanye amadolobho.” Uyasuka eGalile ‘atshumayele emasinagogeni aseJudiya.’ (ULukha 4:43, 44) Uhambe ngesikhathi esihle eJudiya ngoba sekusentwasa futhi sekuzakuba lomkhosi eJerusalema.

AmaVangeli alandisa okunengi ngenkonzo kaJesu yaseGalile kuleyaseJudiya. Lanxa abantu beJudiya bengelandaba kangako lenkonzo yakhe, yena uqhubeka ekhuthele ekutshumayeleni lasekwenzeni imisebenzi emihle kungelani lokuthi ungaphi.

UJesu uhle aqonde eJerusalema eyisigodlo seJudiya. Ulande iPhasika lika-31 C.E. Endaweni ephithizelayo eseduze leSango Lezimvu kulendlela ezilophahla eziqonda echibini okuthiwa yiBhethizatha. Echibini leli kubuya abantu abanengi abagulayo, labayiziphofu kanye labagogekileyo. Inengi licabanga ukuthi abantu bangasila nxa bengangena echibini ngesikhathi amanzi enyakaziswa.

Ngelanga leSabatha uJesu ubona enye indoda echibini leli esileminyaka engu-38 igula. Uyayibuza athi: “Uyafuna yini ukusila?” Indoda le ithi: “Mnumzana, angilamuntu ongangifaka echibini nxa amanzi enyakaziswa. Ngisathi kahle ngingene, kudala omunye engiqalele.”—UJohane 5:6, 7.

UJesu utshela indoda le into ebingayilindelanga. Uthi kuyo: “Sukuma, udobhe ithala lakho uhambe!” (UJohane 5:8) Indoda le esiyelatshiwe iyalidobha sibili ithala layo izihambele.

AmaJuda kawathokozi ngesimanga lesi. Abona indoda le abesesithi kuyo: “Lamuhla liSabatha, akukho emthethweni ukuthi uthwale ithala lelo.” Yona iphendula isithi: “Umuntu ongisilisileyo nguye othe kimi, ‘Dobha ithala lakho uhambe.’” (UJohane 5:10, 11) AmaJuda la acatshulwa yikuthi indoda le yelatshwe ngeSabatha.

Abuza indoda eyelatshiweyo athi: “Ngubani lowo okutshele ukuthi ulidobhe uhambe?” Kodwa indoda le kayilazi ibizo likaJesu ngoba eqeda ukuyelapha uhle ‘wathi nyelele, wangena exukwini.’ (UJohane 5:12, 13) Ithi isisethempelini iphinda imbone uJesu ibisisiba lazi ibizo lalowo oyelaphileyo echibini.

Indoda le iya kumaJuda ayibuzileyo ukuthi yelatshwe ngubani ifike iwatshele ukuthi yelatshwe nguJesu. AmaJuda la athi ekuzwa lokhu ayasuka aye kuJesu. Kodwa kawayibuza ukuthi uwathatha ngaphi amandla okwenza izimangaliso. Afuna ukumsola ngokuthi kungani elaphe ngeSabatha futhi aqalisa ukumthwalisa nzima.

Amanye amaJuda asola uJesu esithi wephule umthetho weSabatha ngokwelapha indoda ebigula. UJesu uwaphendula esithi: “UBaba ulokhu esebenza kuze kube khathesi, lami ngiqhubeka ngisebenza.”​—UJohane 5:17.

UJesu kephuli umthetho kaNkulunkulu ophathelane leSabatha. Nxa etshumayela futhi eselapha ulingisela uNkulunkulu owenza imisebenzi emihle. Ngakho uJesu uqhubeka esenza okuhle nsuku zonke. Kodwa abamsolayo bayazonda kakhulu nxa besizwa impendulo yakhe baze bafune lokumbulala. Kuyini okubazondisa kangaka?

Nxa uJesu esithi uyiNdodana kaNkulunkulu amaJuda ayazonda kakhulu njengoba ebevele ezondele ukuthi wephule umthetho weSabatha ngokwelapha ngelanga leli. Akubona kuyikuthuka uNkulunkulu lokho ngoba acabanga ukuthi ngokutsho amazwi la uJesu uzenza olingana loNkulunkulu. Kodwa uJesu kawesabi futhi uqhubeka ewachazela indlela yena loNkulunkulu abathandana ngayo. Uthi: “UBaba uyayithanda kakhulu iNdodana futhi uyitshengisa konke akwenzayo.”​—UJohane 5:20.

UNkulunkulu nguye onika abantu ukuphila futhi lokhu kwakhanya ngesikhathi enika abantu abathile endulo amandla okuvusa abafileyo. UJesu uqhubeka esithi: “INdodana iphilisa loba ngubani efuna ukumphilisa, njengoba nje loBaba evusa abafileyo abenze baphile.” (UJohane 5:21) Amazwi la enza abantu babe lethemba sibili. Okwenziwa yiNdodana kufanana lokuvusa abantu abafileyo ngoba inceda abantu ukuthi bamazi uJehova. Yikho uJesu esithi: “Loba ngubani olizwayo ilizwi lami amkholwe Lowo ongithumileyo, ulokuphila okungapheliyo njalo kasoze ahlulelwe, kodwa usesukile ekufeni wadlulela ekuphileni.”​—UJohane 5:24.

Akulandawo lapho osekukhulunywe khona ngokuthi uJesu uvuse umuntu ofileyo. Lanxa kunjalo, utshela abamsolayo ngokuvuswa kwabantu okuzakwenzakala. Uthi: “Isikhathi siyeza lapho bonke abasemathuneni abazalizwa khona ilizwi layo baphume.”​—UJohane 5:28, 29.

UJesu ulomsebenzi omkhulu wokuba ngumahluleli lowokuvusa abantu abafileyo. Kodwa wenza kucace ukuthi uNkulunkulu ulesikhundla esiphezulu kulesakhe. Uthi: ‘Ngeke ngenze loba yini engizicabangela yona. Kangifuni ukwenza intando yami, kodwa intando yalowo ongithumileyo.’ (UJohane 5:30) Lanxa kunjalo, uJesu ukhuluma ngomsebenzi oqakathekileyo azawenza ukuze lokho uNkulunkulu akuhlosileyo kugcwaliseke njalo khathesi usekuveza kakhulu. Kodwa okukhulunywa nguJesu ayisibo bodwa ubufakazi obumayelana lokuthi ungubani lokuthi uzakwenzani. Uthi kulabo abamsolayo: “Selike lathuma abantu kuJohane [uMbhabhathizi], yena wafakazela iqiniso.”​—UJohane 5:33.

Kungenzeka ukuthi abasola uJesu bezwa ukuthi eminyakeni engaba mibili edlulileyo, uJohane watshela abakhokheli benkolo ngaLowo owayezakuza ngemva kwakhe owayebizwa ngokuthi ‘ngumPhrofethi’ langokuthi ‘nguKhristu.’ (UJohane 1:20-25) Ubakhumbuza ukuthi babemhlonipha njani uJohane osebotshiwe. Uthi kubo: ‘Okwesikhatshana lalizimisele ukuthokoza kakhulu ekukhanyeni kwakhe.’ (UJohane 5:35) Kodwa ubufakazi yena abulethayo bubedlula khatshana obukaJohane uMbhabhathizi.

Uqhubeka esithi: “Imisebenzi uBaba athe ngiyenze [egoqela lesimangaliso asanda kusenza], yona le engiyenzayo, iyafakaza ukuthi uBaba ungithumile. UBaba ongithumileyo laye ufakazile ngami.” (UJohane 5:36, 37) Ngokwesibonelo, uNkulunkulu wafakaza ngoJesu ngesikhathi ebhabhathizwa.​—UMathewu 3:17.

Abasola uJesu kabalaso ngitsho isizatho sokungamkholwa. IMibhalo abathi bayayazi iyafakaza ngaye. UJesu uphetha ngokuthi: “Aluba belimkholwa uMosi, belizangikholwa lami ngoba wabhala ngami. Kodwa lizakukholwa njani engikutshoyo lina lingakukholwa okwabhalwa nguye?”​—UJohane 5:46, 47.

UJesu labafundi bakhe sebeqonda eGalile. Sekusentwasa njalo sekulengqoloyi emasimini. Abafundi bakha izikhwebu zengqoloyi badle ngoba sebelambile. Kodwa lilanga leSabatha futhi abaFarisi babakhangele.

Khumbula ukuthi eJerusalema amanye amaJuda abefuna ukubulala uJesu emsola ngokuthi wephula umthetho weSabatha. Khathesi abaFarisi labo sebesola okwenziwa ngabafundi bakaJesu. Bathi: “Khangela! Abafundi bakho benza into engekho emthethweni ngeSabatha.”​—UMathewu 12:2.

AbaFarisi bathi ukukha izikhwebu lokuzihlikihla ngezandla kufanana lokuvuna lokubhula. (U-Eksodusi 34:21) Imithetho yabo emayelana lemisebenzi okungamelanga yenziwe ngeSabatha iyabasinda abantu, kodwa lona kumele kube lilanga lokuthokoza lokwenza izinto eziphathelane lokukhonza ezibavuselelayo. UJesu uyabaqondisa abaFarisi ngokubatshela izibonelo ezitshengisa ukuthi uJehova uNkulunkulu wayengahlosanga ukuthi umthetho wakhe weSabatha ube njalo.

Isibonelo sokuqala abatshela sona ngesikaDavida lamadoda ayelawo. Bathi sebelambile bafika ethabanikeli badla izinkwa zokubukiswa. Izinkwa lezo zazivele zikhitshiwe phambi kukaJehova kwafakwa ezisanda kuphekwa njalo zazigcinelwa abaphristi ukuthi bazidle. Lanxa kunjalo, uDavida lamadoda ayelawo kabazange bahlulelwe ngokuthi bazidlile.​—ULevi 24:5-9; 1 USamuyeli 21:1-6.

Esibonelweni sakhe sesibili uJesu uthi: “Kalikaze likubale yini eMthethweni ukuthi ngamaSabatha, abaphristi ethempelini bayasebenza kodwa basale bengelacala?” Lapha utsho ukuthi lanxa kuliSabatha, abaphristi babulala izinyamazana zemihlatshelo futhi benza leminye imisebenzi ethempelini. UJesu uqhubeka esithi: “Lanxa kunjalo, ngilitshela ukuthi okulapha kukhulu kulethempeli.”​—UMathewu 12:5, 6; AmaNani 28:9.

UJesu uphinda asebenzise iMibhalo ukuze acacise lokho akutshoyo. Uthi: “Aluba belikuzwisisile ukuthi kutshoni ukuthi, ‘Ngifuna isihawu hatshi umhlatshelo,’ belingasoze libahlulele abangelacala.” Abesephetha ngokuthi: “INdodana yomuntu iyiNkosi yeSabatha.” Lapha uJesu ukhuluma ngokubusa kwakhe kweminyaka eyinkulungwane lapho okuzabe kulokuthula khona.​—UMathewu 12:7, 8; UHoseya 6:6.

Sekuyisikhathi eside uSathane ethwalise abantu amagabha avuzayo njalo izimpi lodlakela kwandile. Kodwa ukubusa kukaKhristu kuzakuba liSabatha elikhulu elizanika abantu ukuphumula abakulindele ngabomvu.

Ngelinye iSabatha uJesu uvakatshela esinagogeni okungenzakala ukuthi liseGalile. Ufica kulendoda elesandla sokudla esigogekileyo. (ULukha 6:6) Ababhali labaFarisi bakhangele uJesu ngelihlo lokhozi. Abakuhlosileyo kukhanya ngesikhathi bebuza besithi: “Kusemthethweni yini ukwelapha ngeSabatha?”​—UMathewu 12:10.

Abakhokheli benkolo bathi nxa kuliSabatha umuntu kumele elatshwe nxa kuyikuthi ugulela ukufa kuphela. Ngokwesibonelo bathi ngeSabatha akukho emthethweni ukuthi umuntu elulwe nxa eqhuzukile kumbe abotshwe ngebhanditshi nxa enyelile ngoba ngeke afe ngenxa yezinto lezi. Kusegcekeni ukuthi ababhali labaFarisi kababuzeli ukuthi bayayizwela indoda le ethwele nzima. Bazama ukudinga indlela yokufaka uJesu icala.

Kodwa yena uyakwazi ukuthi indlela abacabanga ngayo inxele. Uyananzelela ukuthi sebelemithetho elukhuni futhi engekho emibhalweni mayelana lemisebenzi okungamelanga yenziwe ngeSabatha. (U-Eksodusi 20:8-10) Sebeke bayichothoza imisebenzi yakhe emihle. Khathesi usezakwenza into ezabazondisa kakhulu ngoba utshela indoda elesandla esigogekileyo athi: “Sukuma uze lapha phakathi.”​—UMakho 3:3.

UJesu ukhangela ababhali labaFarisi athi kubo: “Nxa ulemvu eyodwa ibisiwela egodini ngeSabatha, kambe ukhona phakathi kwenu ongeke ayibambe ayikhiphele phandle?” (UMathewu 12:11) Nxa umuntu wayelemvu wayeyabe ezigcinele inotho, yikho wayengeke atshiye imvu ewele egodini kuze kube lilanga elilandelayo ngoba yayingafa abeselahlekelwa yinotho yakhe. LeMibhalo ithi: “Umuntu olungileyo uyayinanzelela imfuyo yakhe.”​—IZaga 12:10.

UJesu ucacisa umzekeliso wakhe athi: “Phela umuntu uqakatheke kakhulu kulemvu! Ngakho kusemthethweni ukwenza into enhle ngeSabatha.” (UMathewu 12:12) Lokhu kutsho ukuthi kephuli mthetho weSabatha nxa esilisa indoda le. UJesu utshengise ukuthi uyayizwela indoda elesandla esigogekileyo njalo akukhulumileyo kulengqondo. Lokhu kwenza ukuthi abakhokheli benkolo bangaphikisani laye, bahle basale bequnywe imilomo.

UJesu uyabakhangela acaphuke futhi kumzwise ubuhlungu ukuthi balahlekile. Ngemva kwalokho uthi endodeni elesandla esigogekileyo: “Yelula isandla sakho.” (UMathewu 12:13) Iyaselula isandla sayo besesitshwaphuluka siqine. Lokhu kuyithokozisa kakhulu indoda le, kodwa kubaphatha njani labo abazama ukwethesa uJesu icala?

AbaFarisi akubathokozisi ukuthi isandla sendoda le selatshiwe. Bahle baphume bayecebisana “labalandeli bakaHerodi ukuze bambulale [uJesu].” (UMakho 3:6) Kumele ukuthi labaSadusi bangamalunga eqembu labalandeli bakaHerodi. AbaSadusi labaFarisi kabazwanani kodwa khathesi sebebambene ngoba bonke baphikisana loJesu.