Wasebenzise Wonke Amathuba Olawo Okufakaza NgoMbuso!
1. Singafundani esibonelweni sikaDavida?
1 INkosi uDavida kayizange ivume ukuthi okwakusenzakala kuyo kuyiqede amandla. Ngokwesibonelo, uDavida wayefuna ukwakhela uJehova ithempeli. Lanxa uJehova engamvumelanga ukuthi enze njalo, uDavida kazange alahle ithemba kodwa wancedisa uSolomoni emsebenzini wokwakha ithempeli ngokuthenga izinto ezazidingakala. (1 AmaKho. 8:17-19; 1 ImiLan. 29:3-9) Kulokuthi akhathazeke ngalokho ayengenelisi ukukwenza, wacabanga ngalokho ayesenelisa ukukwenza. Pho thina singasilingisela njani isibonelo sikaDavida njengoba sidinga izindlela zokutshumayela izindaba zoMbuso?
2. Yikuphi ukuzihlola esingakwenza?
2 Yenza Konke Okusemandleni Akho: Lamuhla abantu abanengi benze ukuphila kwabo kwaba lula ukuze babe ngamaphayona asizayo kumbe awesikhathi sonke. (Mat. 6:22) Ungenza okufananayo yini? Ungahlola izimo zakho ubusuthandaza kuJehova uzabona ukuthi ‘uvulelwe umnyango omkhulu womsebenzi.’ Yikho-ke wasebenzise wonke amathuba owatholayo!—1 Khor. 16:8, 9.
3. Yiwaphi amathuba esingawasebenzisa lanxa izimo zethu zisenza singenelisi ukuphayona?
3 Kodwa ungenzani nxa izimo zakho zikwenza ungenelisi ukuphayona? Sebenzisa amanye amathuba olawo okufakaza. Ngokwesibonelo, ungatshumayeza osebenza labo abangayisiboFakazi. Kumbe ungatshumayeza omongikazi labodokotela abakwelaphayo nxa ungohlala uphathekile emzimbeni. Khumbula ukuthi labo abangenelisi ukwenza okunengi ngenxa yokuluphala kumbe ukugula kakhulu bayavunyelwa ukubika imizuzu engu-15 ngenyanga. Nxa ubhala umbiko wakho wenkonzo, qiniseka ukuthi uyabhala isikhathi osisebenzise ekutshumayeleni okungahlelwanga kanye lamabhuku owahambisileyo. Bika lamaphetshana owahambisileyo kanye lezimemo zeSikhumbuzo lezomhlangano wesabelo. Uzabona ukuthi uzabe wenze okunengi kakhulu nxa ungawasebenzisa wonke amathuba olawo okufakaza.
4. Kuyini ozimisele ukukwenza?
4 Wasebenzise wonke amathuba olawo okufakaza izindaba ezinhle kungelani lokuthi izimo zakho zinjani. Ungenza njalo uzasuthiseka ngokwazi ukuthi wenze konke okusemandleni akho ukuze utshumayele ngoMbuso.—Mak. 14:8; Luk. 21:2-4.