Zimisele Ukwenza Abafundi
1. Kuyini okumele sikwenze ukuze abantu basindiswe?
1 Umbiko wenkonzo ka-2014 utshengisa ukuthi abantu bakaNkulunkulu bazimisele sibili njalo bayatshiseka emsebenzini wokutshumayela izindaba ezinhle zoMbuso. (Mat. 24:14) Sisebenzisa izindlela ezinengi ukuze sifikise umlayezo weBhayibhili ebantwini abanengi kakhulu. Izindlela lezi zigoqela ukutshumayela endlini ngendlu, imikhankaso yokuhambisa izimemo lamaphetshana, kanye lokutshumayela obala. Kodwa ukuze abantu laba basindiswe kumele sibasize babe ngabafundi, lokhu sikwenza ngokufunda labo iBhayibhili.—1 Tim. 2:4.
2. Yiphi imibuzo esingazibuza yona ukuze sihlale sikulungele ukuqalisa isifundo seBhayibhili?
2 Hlala Ukulungele Ukuqalisa Isifundo SeBhayibhili: Uyazama yini ukuthi ucele ikheli kanye lenombolo zocingo emuntwini okhanya efuna ukufunda iBhayibhili ukuze uphindele kuye ulenjongo yokuqalisa isifundo seBhayibhili? Ucine nini ukucela ukufunda lomuntu iBhayibhili uqala nje ukumbona? Ucine nini ukucela ukufunda iBhayibhili lomuntu omnika amamagazini nyanga zonke? Usuke watshengisa ofunda labo esikolo, izihlobo, osebenza labo, omakhelwane bakho, kumbe omunye umuntu nje omaziyo ividiyo ethi Kungani Kumele Ulifunde IBhayibhili? lethi Kwenzakalani Esifundweni SeBhayibhili? Nxa usebenzisa inqola kumbe itafula, uyabatshela yini abantu obanika amabhuku ukuthi ngawokufunda labo iBhayibhili mahala?
3. Kuyini okumele sikwenze ukuze senelise ukufundisa abantu iqiniso?
3 Izindlela uJehova loJesu Abasinceda Ngazo: UJesu wathi ekhuluma umlayo wokuthi ‘senze abafundi,’ waqalisa ngebala elithi “hambani.” Lokhu kutsho ukuthi kufanele sihlale sikulungele ukwenza abafundi njalo sisebenze gadalala. UJesu wasithembisa ukuthi uzakuba lathi emsebenzini lo, yikho sileqiniso lokuthi akasoze asitshiye. (Mat. 28:19, 20) Kanti njalo uJehova uyasiqeqetsha futhi uyasipha umoya wakhe lakho konke esikudingayo ukuze sibe zingcitshi ekwenzeni abafundi. (Zek. 4:6; 2 Khor. 4:7) Kufanele simcele ukuthi asiphe isifiso lamandla ukuze sibe lamadlabuzane okwenza umsebenzi lo oqakatheke kangaka.—Flp. 2:13.
4. Kungani kumele sizimisele ukwenza abafundi?
4 Ukutshumayela izindaba ezinhle kwenza sithokoze okwamagama. Kanti njalo sithaba size sithinte amayezi nxa sibona umuntu esimfundisa iBhayibhili ethuthuka aze abhaphathizwe, angene ‘endleleni eya ekuphileni.’ (Mat. 7:14; 1 Thes. 2:19, 20) Nxa singazimisela ukwenza abafundi siyabe sithokozisa uJehova ngoba yena ‘akafuni ukuba lamunye abhubhe, kodwa ukuba umuntu wonke aphenduke.’—2 Phet. 3:9.