Izinto Ezimbili Eziqakathekileyo Ezizalondoloza Umtshado Wenu

1, 2. (a) UNkulunkulu ufuna abatshadileyo bahlale bonke okwesikhathi esinganani? (b) Chaza ukuthi kungenzakala njani ukuthi abantu abatshadileyo bahlale bethokoza kuze kube nininini.

LAPHO uNkulunkulu enika indoda yokuqala inkosikazi, akula okwakutshengisa ukuthi umtshado wabo wawuzakuba samazolo aphanga amuke lelanga. U-Adamu lo-Eva kwakumele bahlale bonke kuze kube nini lanini. (UGenesisi 2:24) UNkulunkulu ufuna ukuthi indoda eyodwa itshade lowesifazana oyedwa. IMibhalo itshengisa ukuthi umuntu otshadileyo angehlukana lomunye wakhe nxa kuyikuthi ufebile futhi lesi yiso sodwa isizatho esingamkhulula ukuthi atshade okwesibili.​—UMathewu 5:32.

² Kambe kungenzakala yini ukuthi abantu ababili bahlalisane kuhle bethokoza kuze kube nininini? Kungenzakala sibili ngoba iBhayibhili lisitshela izinto ezimbili eziqakathekileyo ezingenza ukuthi kube njalo. Nxa indoda lomkayo bangaba lazo, bazathola intokozo kanye lezibusiso ezinengi. Yiziphi izinto lezi?

OKOKUQALA OKUNGAGCINA UMUZI WENU

3. Qamba imihlobo emithathu yothando okumele ibe khona ebantwini abatshadileyo.

³ Into yokuqala luthando. Kuyamangalisa ukuthi iBhayibhili lisitshengisa ukuthi kulemihlobo eminengi yothando. Olokuqala ngolutholakala ebantwini abangabangane abazwanana kakhulu olwenza bakholise ukuba ndawonye. (UJohane 11:3) Olwesibili ngolubakhona ebantwini abazalwa bonke. (KwabaseRoma 12:10) Olwesithathu ngolwezithandani olubakhona phakathi kwejaha lentombi. (IZaga 5:15-20) Indoda lomkayo kumele benze ubungcono babo ukuze babe layo yonke imihlobo le yothando. Kodwa kulolunye uthando oluqakatheke kakhulu ukwedlula imihlobo le esesiyiqambile.

4. Yiluphi olunye uhlobo lothando?

⁴ Ngolimi olwasetshenziswa ukubhala iMibhalo yamaKhristu yesiGiriki, uhlobo lwesine lothando lubizwa ngokuthi yi-a·gaʹpe. Ibala leli yilo elisetshenziswa ku-1 Johane 4:8 ethi: “UNkulunkulu uluthando.” Phela “siyathanda ngoba yena wasithanda kuqala.” (1 UJohane 4:19) UmKhristu kumele abe lalo uthando lolu, aqale ngokuthanda uJehova uNkulunkulu abesethanda labanye abantu. (UMakho 12:29-31) Ibala leli elithi a·gaʹpe likhona laku-Efesu 5:2 ethi: “Liphile impilo yothando, njengalokhu uKhristu wasithanda wazinikela ngenxa yethu.” UJesu waveza ukuthi abalandeli bakhe beqiniso babezakhanya ngokuba lothando lolu. Wathi: “Bonke abantu bazakwazi ukuthi lingabafundi bami uma lithandana [a·gaʹpe].” (UJohane 13:35) Laku-1 Khorinte 13:13 ibala elithi a·gaʹpe liyasetshenziswa. Ivesi le ithi: “Okuthathu lokhu kuma kunjalo: ukukholwa, ithemba lothando. Kodwa okukhulu kwalokhu luthando [a·gaʹpe].”

5, 6. (a) Kungani uthando lusedlula ukholo kanye lethemba? (b) Chaza ukuthi uthando lunceda njani ukuthi umtshado ungachitheki.

⁵ Kanti kungani i-a·gaʹpe isedlula ukholo kanye lethemba? Kungenxa yokuthi uthando lolu lusekelwe ezimisweni ezilungileyo ezitholakala eLizwini likaNkulunkulu. (IHubo 119:105) Umuntu olalo wenzela abanye izinto ezinhle ezifunwa nguNkulunkulu kungelani lokuthi bangabe bekhanya bengafanelanga ukuncedwa. Uthando lolu lunceda abatshadileyo ukuthi balandele umlayo oseBhayibhilini othi: “Bekezelelanani, lithethelelane loba kuyinsolo bani omunye angaba layo ngomunye. Thethelelani njengoba iNkosi yalithethelela.” (KwabaseKholose 3:13) Abantu abatshadileyo kumele ‘bathandane ngokupheleleyo, [a·gaʹpe] ngoba uthando lugqibela izono ezinengi.’ (1 UPhetro 4:8) Amaphutha azahlala ekhona ngoba akulamuntu ongoniyo. Kodwa ivesi le itshengisa ukuthi umuntu olothando kahlali ekhangela amaphutha abanye, uyawagqibela.​—IHubo 130:3, 4; UJakhobe 3:2.

⁶ Nxa indoda lomkayo bemthanda uNkulunkulu futhi labo bethandana, umtshado wabo awusoze uchitheke njalo bazathokoza ngoba “uthando kalupheli.” (1 KwabaseKhorinte 13:8) Uthando ‘lubophela ndawonye kube yikumanyana okupheleleyo.’ (KwabaseKholose 3:14) Nxa utshadile, wena lomkakho lingenzani ukuze libe lalo uthando lolu? Balani iLizwi likaNkulunkulu ndawonye futhi lixoxe ngalo. Fundani ngezindlela uJesu atshengisa ngazo ukuthi wayelothando beselimlingisela, okutsho ukuthi licabange njengaye futhi lenze njengaye. Kanti njalo hambani emihlanganweni yobuKhristu lapho abantu abafundiswa khona iLizwi likaNkulunkulu. Lingakhohlwa lokuthandaza kuNkulunkulu licela ukuthi alincedise ukuze libe le-a·gaʹpe, uthando oluyisithelo somoya wakhe.​—IZaga 3:5, 6; UJohane 17:3; KwabaseGalathiya 5:22; KumaHebheru 10:24, 25.

OKWESIBILI OKUNGAGCINA UMTSHADO WENU

7. Ukuhlonipha yikwenzani, njalo ngubani okumele ahloniphe omunye emulini?

⁷ Inhlonipho yiyo into yesibili engenza abatshadileyo bathokoze emzini wabo. Nxa bethandana sibili bazahloniphana. Ukuhlonipha “yikuqakathekisa abanye lokuba lendaba lemibono yabo.” ILizwi likaNkulunkulu lisitshela okumele kwenziwe ngamaKhristu wonke okugoqela labatshadileyo. Lithi: “Hloniphanani okudlula ukuzihlonipha kwenu.” (KwabaseRoma 12:10) Umphostoli uPhetro waloba wathi: “Ngokufanayo, madoda ekuphileni kwenu labomkenu wobani lozwelo, libaphathe ngenhlonipho njengababuthakathaka.” (1 UPhetro 3:7) Inkosikazi itshelwa ukuthi ‘ihloniphe indoda yayo.’ (Kwabase-Efesu 5:33) Nxa uqakathekisa umuntu othile, uba lomusa kuye futhi umhloniphe. Kawumehlisi isithunzi njalo uba lendaba lokuthi ucabangani uphinde wenze okusemandleni akho ukuthi umsize ngalokho ayabe ekucela.

8-10. Ukuhloniphana kungabasiza njani abatshadileyo ukuthi bathokoze futhi bahlale bethandana?

⁸ Loba ngubani ofuna ukuthokoza emulini yakhe kumele ‘angakhathaleli inzuzo yakhe kuphela kodwa akhathalele lenzuzo [yomkakhe].’ (KwabaseFiliphi 2:4) Lokhu kuyabe kutshengisa ukuthi uyamhlonipha. Akumelanga azihluphe ngokufunwa nguye kuphela kodwa kufanele akhathazeke ngokuthi kuyini okuthokozisa owangakwakhe. Ukuthokozisa umkakhe yikho okumele kube yinto eqakatheke kakhulu kuye.

⁹ Nxa uhlonipha umuntu otshade laye akumelanga ulindele ukuthi livumelane kukho konke. Akusoze kwafa kwenzeka ukuthi abantu ababili bahlale bevumelana sonke isikhathi. Indoda ingathanda into umkayo angalandaba layo kangako, njalo lenkosikazi ingathanda okuthile umkayo angakuthandiyo. Kodwa kumele uhloniphe umbono womkakho kumbe lokho ayabe efuna ukukwenza nxa kuyikuthi kuyavumelana lemithetho kaJehova. (1 UPhetro 2:16; qathanisa loFilimoni 14.) Kuqakatheke kakhulu lokuthi ungamehlisi isithunzi ngokumphoxa loba ngokumenza isithutha kungelani lokuthi lisebantwini kumbe lilodwa.

¹⁰ Kuyacaca-ke ukuthi ukuthanda uJehova lomkakho kanye lokuhloniphana yizo izinto eziqakathekileyo ezingenza ukuthi lithokoze emulini yenu. Pho kuyini okunye ongakwenza ukuze utshengise ukuthi uyamthanda lokuthi uyamhlonipha otshade laye?

INHLOKO ELINGISELA UKHRISTU

11. IBhayibhili lithi ngubani oyinhloko yemuli?

¹¹ IBhayibhili lisitshela ukuthi indoda yadalwa ilobuntu obungayisiza ukuthi ikhokhele kuhle imuli yayo. Yikho-ke kumele yondle imuli yayo futhi iyivikele. Kufanele iyisize lokuthi ibe lobuhlobo obuhle loNkulunkulu. Kumele iziphathe kuhle njalo yenze izinqumo ezinhle ezitshengisa ukuthi iyakuthanda ukwenza okufunwa nguJehova. “Bafazi zehliseni phansi kwabomkenu njengaseNkosini. Ngoba indoda iyinhloko yomfazi njengoKhristu eyinhloko yebandla.” (Kwabase-Efesu 5:22, 23) Kodwa iBhayibhili lithi indoda kayizenzeli umathanda, layo ikhokhelwa yinhloko yayo. Umphostoli uPhawuli wathi: “Ngifuna ukuba likwazi ukuthi inhloko yamadoda wonke nguKhristu, lenhloko yowesifazana yindoda lenhloko kaKhristu nguNkulunkulu.” (1 KwabaseKhorinte 11:3) Indoda ehlakaniphileyo ikhokhela njengoJesu Khristu, inhloko yayo.

12. Chaza ukuthi uJesu watshengisa njani ukuthi wayelalela inhloko yakhe kanye lokuthi wakuveza njani ukuthi wayeyinhloko elothando.

¹² UJesu laye ulenhloko yakhe. Inhloko le nguJehova njalo uyayilalela kukho konke. Wathi: “Kangidingi kuzithabisa kodwa ukuthabisa lowo ongithumileyo.” (UJohane 5:30) Kumele simlingisele sibili uJesu! ‘Ulizibulo kukho konke okwadalwayo.’ (KwabaseKholose 1:15) WayenguMesiya kodwa ngesikhathi esizayo wayezakuba yiNhloko yebandla lamaKhristu agcotshiweyo leNkosi yoMbuso kaNkulunkulu enkulu kulazo zonke izingilosi. (KwabaseFiliphi 2:9-11; KumaHebheru 1:4) Siyabona-ke ukuthi uJesu wayelesikhundla esiphezulu futhi kukukhulu ayesazokwenza. Lanxa kunjalo, kazange abe lesihluku, abe nguntandokayiphikiswa kumbe abadlise luklubhu abanye. Kanti njalo kazange abenze izichaka abafundi bakhe loba ahlale ebakhumbuza ukuthi kwakumele bamlalele. UJesu wayelothando lesihawu ikakhulu kulabo ababecindezelwa. Wathi: “Wozani kimi lina lonke elikhatheleyo lelisindwayo, ngizaliphumuza. Zithwaliseni ijogwe lami, lifunde kimi, ngokuba ngimnene ngithobekile enhliziyweni, njalo lizazuza ukuphumula kwemiphefumulo yenu. Ngokuba ijogwe lami lilula lomthwalo wami kawusindi.” (UMathewu 11:28-30) Abantu babechelesa nxa beloJesu.

13, 14. Indoda elothando ingamlingisela njani uJesu?

¹³ Indoda efuna ukuthi imuli yayo ithokoze kumele icabangisise ngezinto ezinhle uJesu ayezenza. Indoda kuzwa kayilasihluku, kayisuye ntandokayiphikiswa futhi kayimphathi kubi umkayo isima ngelokuthi yona iyinhloko. Kumele imthande futhi imqakathekise. UJesu ‘wayethobekile enhliziyweni.’ Lokhu kutshengisa ukuthi yona kufanele ithobeke ukwedlula yena ngoba yona iyawenza amaphutha, futhi iyabe isifuna ukuthi umkayo ayizwisise nxa isiphambanisile. Yikho-ke indoda ethobekileyo iyawavuma amaphutha ayo loba kungaba nzima ukuthi ithi, “Ngiyaxolisa, yimi engiphambanisileyo.” Kuba lula ukuthi inkosikazi ihloniphe indoda ethobekileyo futhi evumayo ukuthi ezinye izinto kayizazi. Kodwa kuba nzima nxa izikhukhumeza futhi ingukhanda limtshelokwakhe. Inkosikazi layo kumele ixolise nxa iphambanisile.

¹⁴ UNkulunkulu wadala owesifazana elobuntu obuhle obungenza ukuthi imuli ithokoze. Indoda ehlakaniphileyo iyakunanzelela lokhu futhi ayimcindezeli umkayo. Abesifazana abanengi balesihawu futhi balendaba lendlela abanye abazizwa ngayo. Lokhu kubasiza ukuthi baphathe kuhle izimuli zabo futhi baphilisane kuhle labanye. Kanengi, omama yibo abenelisa ukulungilungisa ngekhaya ukuze kube kuhle. KuZaga isahluko 31 kukhulunywa ‘ngomfazi olesimilo’ owayekhuthele kakhulu futhi eleziphiwo ezinengi. Lokhu kwenza ukuthi imuli yakhe ithokoze. Kambe lokhu kwakungenzakala yini aluba indoda yakhe ‘yayingamthembi ngokupheleleyo’?​—IZaga 31:10, 11.

15. Indoda ingatshengisa njani ukuthi ilothando lenhlonipho njengoKhristu?

¹⁵ Kwamanye amazwe indoda bayayikhukhumeza okokuthi nxa umkayo eyibuza umbuzo nje, kuthiwa uyadelela. Inkosikazi iphathwa angathi yisigqili. Lokhu kungenza ukuthi indoda ingaphilisani kuhle lomkayo lokuthi ingabi lobuhlobo obuhle loNkulunkulu. (Qathanisa lo-1 Johane 4:20, 21.) Kanti njalo kulamanye amadoda angazinakekeli kuhle izimuli zawo uze uthole sekungathi umama nguye oseyinhloko ngekhaya. Indoda ezithoba kuKhristu kayimeyisi umkayo njalo kayimphathi njengesichaka. Yona ilingisela uJesu owayelothando olwamenza wazinikela futhi yenza lokho uPhawuli akutshoyo. Wathi: “Madoda, thandani omkenu, njengoKhristu owathanda ibandla wazinikela ngenxa yalo.” (Kwabase-Efesu 5:25) UJesu Khristu wayebathanda abalandeli bakhe waze wabafela. Indoda elothando iyazama ukuzinikela njengoJesu, imphathe kuhle umkayo kulokuthi imthwalise amagabha avuzayo. Nxa indoda izithoba kuKhristu futhi ilothando lenhlonipho njengaye, kuzakuba lula ukuthi umkayo ayihloniphe.​—Kwabase-Efesu 5:28, 29, 33.

AMAKHOSIKAZI AZEHLISAYO

16. Inkosikazi kumele ibe ngumuntu onjani?

¹⁶ U-Adamu wathi eseke waphila yedwa okwesikhatshana, “uJehova uNkulunkulu wathi: ‘Kakukuhle ukuba indoda ibe yodwa. Ngizamenzela umsizi omfaneleyo.’” (UGenesisi 2:18) UNkulunkulu wathi edala u-Eva wayefuna ukuthi abe ‘ngumsizi,’ hatshi ukuthi abe ngenye inhloko. Wayengahlosanga ukuthi umtshado ube njengomkhumbi olabaqondisi ababili abancintisanayo. Wayefuna ukuthi indoda ibe yinhloko elothando kanye lokuthi inkosikazi izehlise kumkayo ngenhliziyo yonke, ibe lothando lenhlonipho.

17, 18. Kuyini okungenziwa yinkosikazi ukuze ibe ngumsizi womkayo?

¹⁷ Kodwa kayisikho ukuthi umama kumele azehlise kuphela. Kufanele azame ngamandla akhe wonke ukuthi abe ngumsizi omuhle. Lokhu angakwenza ngokusekela umkakhe kulokho ayabe ekhethe ukukwenza. Kuba lula ukuthi amsekele nxa kuyikuthi ubevele evumelana laye. Kodwa lanxa bengavumelani, kumele abambisane laye ukuze lokho umkakhe afuna ukukwenza kuphumelele.

¹⁸ Kulokunye okungenziwa yinkosikazi ukuze incedise umkayo ukuthi abe yinhloko enakekela kuhle imuli. Kumele ibonge umkayo nxa esenza okusemandleni akhe ukuthi akhokhele imuli, hatshi ukumchothoza kumbe ukumenza azibone angathi uyazehlulekela. Kanti njalo nxa ifuna baphilisane kuhle emulini, kumele ikhumbule ukuthi ‘umoya omnene lothuleyo uligugu elikhulu emehlweni kaNkulunkulu’ kanye lawomkayo. (1 UPhetro 3:3, 4; KwabaseKholose 3:12) Kodwa inkosikazi ingenzani nxa umkayo engakhonzi? IMibhalo ikhuthaza amakhosikazi ukuthi ‘athande omkawo labantwana bawo, ukuba azikhuze njalo ahlambuluke, lokuba akhuthale emakhaya, lokuba lomusa, lokuba azehlisele ngaphansi kwabomkawo, ukuze kungabi khona ogcona iLizwi likaNkulunkulu.’ (KuThithusi 2:4, 5) UMbhalo lo uyasebenza kungelani lokuthi umkakho uyakhonza kumbe kakhonzi. Kodwa nxa umkakho ongakholwayo efuna wenze into engakutshiya usuzithonisisa, khuluma laye “ngobumnene langenhlonipho” ukuze akulalele. Akhona amadoda angakholwayo ‘asehugeke ngokuziphatha kwabomkabo kungekho kukhuluma, lapho ebona ukuhlanzeka lenhlonipho yokuphila kwabo.’​—1 UPhetro 3:1, 2, 15, 16; 1 KwabaseKhorinte 7:13-16.

19. Inkosikazi kumele yenzeni nxa umkayo efuna yenze into engavumelani lomthetho kaNkulunkulu?

¹⁹ Inkosikazi kumele yenzeni nxa umkayo efuna yenze into engavumelani lomthetho kaNkulunkulu? Kumele ikhumbule ukuthi uMbusi wayo nguNkulunkulu, ilingisele lokho okwenziwa ngabaphostoli lapho ababusi bebatshela ukuthi benze okwakuphikisana lomthetho wakhe. ImiSebenzi 5:29 ithi: ‘UPhetro labanye abaphostoli baphendula bathi, “Simele silalele uNkulunkulu kulokulalela abantu!”’

KHULUMA LAYE KUHLE

20. Kungani uthando lenhlonipho kuqakathekile nxa abatshadileyo bexoxa?

²⁰ Uthando lenhlonipho kuqakathekile nxa likhuluma. Indoda ethanda umkayo iyaxoxa laye izwe ukuthi ufuna ukwenzani, uhlutshwa yini lokuthi ucabangani. Amakhosikazi ayakuthanda lokhu. Indoda iyabe itshengisa ukuthi iyamthanda lokuthi iyamhlonipha umkayo nxa ihlala ixoxa laye futhi ilalelisisa akutshoyo. (UJakhobe 1:19) Amanye amakhosikazi akhala ngokuthi omkabo basithola gqo isikhathi sokuxoxa lawo. Lokhu kuzwisa ubuhlungu sibili. Kulezinsuku amanye amadoda asesebenza ama-awa amanengi njalo impilo iqhubeka isiba nzima okokuthi labanye omama sebesebenza. Kodwa abatshadileyo kumele bazame ukuthola isikhathi sokuxoxa. Nxa bangayekela ukwenza njalo, ngamunye wabo angacina eseziphilela eyakhe impilo. Kanti njalo nxa sebebona kungcono ukuxoxa labantu abangatshadanga labo, bangacina bengasahlalisananga kuhle emzini wabo.

21. Ukukhuluma kuhle kungayinceda njani imuli?

²¹ Kuqakathekile sibili ukuthi abantu abatshadileyo bakhulumisane kuhle. ‘Amazwi amahle amnandi emphefumulweni njalo ayelapha emathanjeni.’ (IZaga 16:24) Kungelani lokuthi otshade laye uyakhonza kumbe kakhonzi, iBhayibhili lithi: “Ingxoxo yenu kayihlale igcwele umusa, ifakwe itshwayi,” okutsho ukuthi ihlabuse. (KwabaseKholose 4:6) Nxa izinto zingamhambeli kuhle otshade laye, kunganceda ukumtshela amazwi amnandi atshengisa ukuthi uyamzwela. “Ilizwi elikhulunywe ngesikhathi esifaneleyo linjengamangqongqo egolide ananyekwe emcepheni wesiliva.” (IZaga 25:11) Kuqakatheke kakhulu ukuthi ukhulume kuhle lokuthi ukhethe kuhle amabala. Ngokwesibonelo, kulokuthi uhwabhe uthi: “Akuvale umnyango lowo,” kungaba ngcono ukuthi ukhulume ngelizwi elipholileyo elitshengisa ukuthi uyazwisisa, uthi: “Bengicela ungivalele umnyango.” Lapho-ke amazwi akho ayabe ‘esefakwe itshwayi.’

22. Kuyini okungenza ukuthi abatshadileyo bakhulumisane kuhle?

²² Kuba lula ukuxoxa nxa likhuluma kuhle, lilomusa, lithaphana ngamehlo othando njalo lizwisisana. Ukutshengisa ukuthi ulalele nxa omunye ekhuluma lakho kungasiza. Nxa indoda lomkayo bejayele ukukhuluma kuhle, bazakhululeka ukutsho okusezifubeni zabo besebeduduzana futhi basizane ezikhathini ezinzima. ILizwi likaNkulunkulu lithi kumele ‘siqinise abadanileyo.’ (1 KwabaseThesalonika 5:14, The Holy Bible in Ndebele) Kwezinye izikhathi kungaba yindoda edanileyo, kwezinye kube yinkosikazi. Lapho-ke kuyabe sekufuneka ukuthi ‘baqinisane’ njalo bavuselelane.​—KwabaseRoma 15:2.

23, 24. Uthando lenhlonipho kubasiza njani abatshadileyo nxa bengavumelani? Nika isibonelo.

²³ Nxa abatshadileyo bethandana njalo behloniphana, kabasoze bahlale bexabana lanxa bengavumelani. Bazazama ngamandla abo wonke ukuthi bangabi “lesihluku.” (KwabaseKholose 3:19) Bobabili kumele bakhumbule ukuthi “impendulo ethobileyo iyaludedisa ulaka.” (IZaga 15:1) Ungameyisi njalo ungamsoli owangakwakho nxa ekutshela okusenhliziyweni yakhe. Mlalelisise ngoba kuzakunceda ukuthi umzwisise ukuthi ucabangani. Bonisanani lize licine livumelene.

²⁴ Uyakhumbula yini okwake kwenzakala uSara etshela umkakhe u-Abhrahama ukuthi angayilungisa njani indaba ethile? Kwaba nzima ukuthi u-Abhrahama avumelane laye. Kodwa uNkulunkulu wathi: “Lalela konke uSara akutshela khona.” (UGenesisi 21:9-12) Lakanye u-Abhrahama walalela, wabusiswa. Lasemulini nxa abatshadileyo bebona udaba ngendlela etshiyeneyo, indoda kumele imuphe indlebe umkayo. Lanxa kunjalo, inkosikazi layo kumele imlalele umkayo hatshi ukuthi kube yiyo yodwa ekhulumayo. (IZaga 25:24) Akumelanga kube lofuna ukuthi izinto zenziwe ngendlela yakhe sonke isikhathi ngoba lokho kuyabe kutshengisa ukuthi kamthandi umkakhe njalo kamhloniphi.

25. Ukukhuluma kuhle kungabasiza njani abatshadileyo endabeni zemacansini?

²⁵ Ukukhuluma kuhle kuqakathekile lasezindabeni zemacansini. Nxa indoda loba inkosikazi ifuna ukusuthisa eyayo imizwa kuphela futhi isehluleka ukuzibamba, iyabe itshaphaza isipho esiligugu esenzelwa ukuthi siqinise uthando lwabo. Ngakho-ke indaba ekhona yikuthi lihlale phansi litshelane konke okusenhliziyweni njalo libekezelelane. Nxa ngamunye ekuqakathekisa ukuthokozisa umkakhe, akwandanga ukuthi ezemacansini zibe ludubo olungachitha umuzi. Phela lasendabeni le “akulamuntu omele azidingele okuhle, kodwa okuhle kwabanye.”​—1 KwabaseKhorinte 7:3-5; 10:24.

26. Kuyini okungenza ukuthi abatshadileyo bathokoze lanxa besebunzimeni?

²⁶ ILizwi likaNkulunkulu lingabasiza sibili abatshadileyo. Phela bazadlula ezikhathini ezimnandi lezinzima. Kodwa umuzi wabo ungahlala uqinile futhi bethokoza nxa bangalalela ukuthi uJehova uthini eBhayibhilini, babe lothando olusekelwe ezimisweni zalo futhi bahloniphane. Bangenza njalo bazahlalisana kuhle futhi badumise loJehova uNkulunkulu owaqalisa imuli.